“Роснефть”-ээс Д.Зоригт сайдад захидал ирүүлжээ

2011-06-23

Газрын тосны бүтээгдэхүүний нийлүүлэлтийн талаар ЭБЭХ-ний сайд Д.Зоригт энэ сарын 2-нд ОХУ-ын Шадар сайд И.В.Сечин,

Эрчим хүчний дэд сайд АН.Шишкин, “Роснефть” компанийн ерөнхийлөгч Э.Ю.Худайнатов нартай Москва хотноо уулзжээ. Энэ уулзалт болон “Роснефть” компаниас Эрдэс баялаг, эрчим хүчний сайдад хаяглан ирүүлсэн захидлын талаар Д.Зоригт Засгийн газрын гишүүдэд танилцуулсан байна. Газрын тосны бүтээгдэхүүнтэй холбоотой асуудлаар ОХУ манай улсад дарамт, шахалт үзүүлсэн утга бүхий захидлыг Монгол Улсын Ерөнхийлөгч, салбарын сайдад ирүүлсэн тухай зөрүүтэй мэдээлэл зарим хэвлэл, мэдээллийн хэрэгслүүдээр гарч байгаа.

Энэ талаар Эрдэс баялаг, эрчим хүчний сайд Д.Зоригт Засгийн газрын хуралдааны дараа сэтгүүлчдэд залруулга, тайлбар өгсөн юм. Тэрбээр “Захидалд манай улсыг дарамталж, шахсан зүйл байхгүй. Энэ захидал Ерөнхийлөгчид бус Эрдэс баялаг, эрчим хүчний сайдад ирсэн” гэдгийг тодотголоо.

Мөн “Роснефть” манай улсад шатахуун түгээх станцуудаа барьж шатахуун борлуулах, бөөний худалдааны бааз байгуулах зэрэг асуудлыг урьд өмнө ч тавьж байсан. Энэ нь хоёр орны харилцаанд яригдаж байдаг хэвийн асуудлуудын нэг. Захидал бичсэн нь газрын тосны бүтээгдэхүүний талаар ОХУ-ын холбогдох компани нь байр сууриа илэрхийлсэн л зүйл. Манай улс ч гэсэн махны экспорт, төмөр замын шинэчлэл зэрэг олон асуудлыг ОХУ-д тавьдаг. Үүнтэй утга нэг юм. Харин Оросын талаас тавьсан хүсэлтийг хэрхэн яаж шийдвэрлэх нь манай дотоод асуудал. Өнөөдөр /өчигдөр/ Засгийн газрын хуралдаанд танилцууллаа. Цаашид газрын тосны салбарт хэрэгжүүлэх бодлогын арга хэмжээний хүрээнд энэ асуудлыг авч үзэж холбогдох газруудаар хэлэлцүүлэхээр боллоо” гэв. Манай улс хэрэгцээт газрын тосны бүтээгдэхүүнийхээ

тодорхой хувийг хойд хөршөөс гадна Казахстан, БНХАУ-аас оруулж ирээд байгаа юм. Газрын тосны бүтээгдэхүүний хангамжийн өнөөгийн байдал, цаашид авах арга хэмжээний талаар Засгийн газрын хуралдаанд ойрын үед танилцуулахыг Эрдэс баялаг, эрчим хүчний сайд Д.Зоригтод даалгасан байна.

БНХАУ-аас авах зээлийн асуудлаар УИХ-д хандана

БНХАУ-ын Засгийн газраас олгох 500 сая ам.долларын экспортын зээлийг ашиглах тухай Сангийн яам, БНХАУ-ын Экспорт-Импорт банкны хооронд байгуулсан зээлийн Ерөнхий хэлэлцээрийг соёрхон батлах тухай хуулийн төслийг УИХ-д өргөн мэдүүлэхээр Засгийн газрын хуралдаанаас шийдвэрлэжээ. Ерөнхий сайд С.Батболдын БНХАУ-д хийсэн албан ёсны айлчлалын үеэр Ерөнхий хэлэлцээрт талууд гарын үсэг зурсан юм. Зээлийн 200 сая ам. доллараар мах, хуурай сүү боловсруулах, гурилын үйлдвэр, үр тарианы элеватор байгуулах, бага оврын трактор худалдан авах “Хүнс, хөдөө аж ахуйн” төслийг хэрэгжүүлнэ. Үлдэх хөрөнгийг “Шинэ зууны боловсрол”, “Цахим эрүүл мэнд”, “Замын олон төвшний огтлолцол”, “Автозамын уулзвар, төмөр замын дээгүүрх гүүрэн гарц” төслийг санхүүжүүлэхээр тохиролцоод байна. Зээлийн эргэн төлөгдөх хугацаа 20, үүнээс үндсэн төлбөрөөс чөлөөлөгдөх хугацаа долоон жил байх бөгөөд жилийн хоёр хувийн хүүтэй юм.

“Эрдэнэс Тавантолгой”-н хувьцааны 20 хувийг иргэдэд олгохыг дэмжив

“Эрдэнэс-Тавантолгой” компанийн нийт хувьцааны 10 хувийг аж ахуйн нэгжүүдэд худалдахаар шийдвэрлэсэн нь аж ахуйн нэгжид хөрөнгө оруулсан иргэд болон бусад иргэнд хэт ялгавартай хандсан, тэгш бус хуваарилалт гэж УИХ-ын гишүүн Д.Одбаяр, Б.Батбаяр, Я.Батсуурь, Х.Жекей, Д.Хаянхярваа нар үзсэн байна. Иймээс компанийн нийт хувьцааны 10 хувийг үндэсний аж ахуйн нэгжүүдэд худалдах хувийг хүчингүй болгож, иргэдэд эзэмшүүлэх хувьцаан дээр нэмж олгох нь зүйтэй хэмээн УИХ-ын тогтоолын төсөл санаачилжээ. Засгийн газрын хуралдаанаар тогтоолын төслийг хэлэлцээд зарчмын хувьд дэмжсэн саналыг хууль санаачлагчдад уламжлахаар боллоо.

Зарим хотод улсын зэрэглэл тогтооно

“Зарим хотод улсын зэрэглэл олгох тухай” УИХ-ын тогтоолын төслийг зарчмын хувьд дэмжиж, УИХ-д өргөн мэдүүлэхээр тогтсон байна. Бүсийн тулгуур төв болох Ховд, Улиастай, Хархорин, Эрдэнэт, Дархан, Зуунмод, Чойбалсан, Өндөрхаан, Сэлэнгэ аймгийн төв Сүхбаатар, Дорноговь аймгийн Замын-Үүд сумын төв Замын-Үүдийг улсын зэрэглэлтэй хот болгохоор төсөлд тусгаад байгаа ажээ. Дархан, Зуунмод, Эрдэнэт, Хархорин, Ховд, Улиастай, Чойбалсан, Өндөрхаан хот аймаг, бүс нутгийн хэмжээнд төдийгүй улсын нийгэм, эдийн засгийн хөгжилд томоохон үүрэг гүйцэтгэдэг үйлдвэр, үйлчилгээ, их, дээд сургууль, эрдэм шинжилгээний байгууллага олонтой. Тэгвэл Сүхбаатар, Замын-Үүд нь манай орны босоо тэнхлэгийн олон улсын чанартай авто, төмөр зам дайран өнгөрдөг олон улсын тээврийн зангилаа суурин юм. Улсын зэрэглэлтэй болгосноор хотуудын бие даан хөгжих нөхцөл бүрдэж, улс, бүс нутаг, аймгийн хөгжилд хотуудын гүйцэтгэх үүрэг өсөн нэмэгдэнэ гэж тооцсон байна.

МОНГОЛЫН МЭДЭЭ СОНИН