“ Тэрбээр өдгөө Ирландын загварын агентлагт ажиллахын сацуу их сургуульд сурч байгаа билээ.

-Өнгөрсөн хугацаанд нэлээд олон тэмцээн уралдаан зохион байгуулж, охид залуусыг дэлхийд алдартай тэмцээнд оролцуулж байсан. Энэ удаа юу хийхээр төлөвлөж байна даа, танайх?

-Тийм ээ, бид “Miss Global International”, “Manhunt Global International”, “Fashion Asia Model” тэмцээний монгол дахь сонгон шалгаруулалтыг хийсэн. Эдгээр тэмцээнээс шалгарсан охид, залуус дэлхийн томоохон тэмцээнд хэрхэн эх орноо төлөөлж оролцож байгааг харуулсан бичлэг, сурвалжлагаараа нэвтрүүлэг бэлтгэн үзэгчдэд хүргэсэн. Харин миний хувийн ажил болон компанийн төлөвлөгөөнөөс шалтгаалан ойрын хугацаанд тэмцээн, уралдаан зохион байгуулахгүй.

-Miss Global International” тэмцээнээ дахин зохион байгуулахгүй юм уу?

-Тодорхой төлөвлөсөн зүйл бий. Энэ тэмцээнийг хоёр жил тутамд нэг удаа зохион байгуулахаар ярилцаж байгаа. Тэгэхгүй бол миссийн тэмцээний нэр хүнд сүүлийн үед маш их унаж байна шүү дээ. Болсон, болоогүй баахан л тэмцээн зохиогдож байна. Тэр бүхнээс ялгарахын тулд зохион байгуулах хугацаа болон чанарын тал дээр анхаарч ажиллана.

-Манайхан make-up гэхээр л загвар өмсөгчидтэй харьцуулж үзэх гээд байдаг. Тэгвэл загварын тайз болон өдөр тутмын амьдрал дээр ямар будалт илүү зонхилж байна вэ. Мөн аль орны нүүр будагчид илүү чадварлаг юм бол?

-Загварын ертөнц гэхээр л манайхан зөвхөн загвар өмсөгч, дизайнер байдаг мэтээр төсөөлдөг нь нууц биш. Гэтэл энэ бол нүүр будагч, үсчин, гоо сайханч, зурагчин гээд л бүх салбарын хүнийг нэгтгэж чаддаг маш том ертөнц шүү дээ. Гадаадад ч гэсэн энэ салбар их нэр хүндтэй байдаг юм билээ. Манай загварынхан энд тэндхийн тэмцээн уралдаанд оролцоод багагүй туршлага судалсан байх. Make-up чиглэлээр Япон, Солонгос, Хятад улсын нүүр будагчид Азидаа тэргүүлэх хэмжээнд очсон. Хэрэглэж байгаа бүтээгдэхүүн, нүүр будагчдын ур чадвар нь дээд зэрэглэлийнх. Манай орны хувьд, ихэнх салбар нь дэлхийн өндөр хөгжилтэй орнуудаас 10-15 жилээр хоцорч явж байгаа гэсэн судалгаа байдаг юм билээ. Тэгвэл загварын ертөнцөд тийм хоцрогдол байхгүй. Бусад оронтой адилхан, цаг үетэйгээ хөл нийлүүлэн алхаж байгаа. Бүх зүйл дээр ижил хэмжээнд очсон шүү. Сүүлийн үед илүү энгийн хэв маягтай нүүр будалт, үс засалт моодонд орох болсон. Загварын тайзан дээр ч айхтар хүнд харагдахаар будалт хийхээ больсон. Хамгийн гол нь, суурь будалт гээд бүх зүйл нь цэвэрхэн харагдах ёстой.

-Цөөн тооны хэдэн модель гадаадын агентлагт ажиллаж, чамлахааргүй амжилт гаргаж буй. Гэхдээ бусад охидын хувьд, энэ талын боломж хомс юм шиг санагддаг. Яагаад тэр вэ?

-Тэдэнд гүүр болж, гадаадын агентлагтай холбож өгөх байгууллага үнэхээр дутмаг. Зөв агентлаг, зөв хүнтэй нь холбож чадвал амжилт гаргах боломж бий. Бас охид маань гадаад хэлний мэдлэгтэй байх зайлшгүй шаардлагатай. Хэчнээн царайлаг, чадварлаг байгаад хэл ус мэдэхгүй бол хүний нутагт хол явахгүй шүү дээ. Энэ мэт хүчихн зүйлээс шалтгаалж, охид маань гадаадад ажиллаж чаддаггүй. Бид гадаад оронд зохиогдож буй миссийн тэмцээнүүдтэй хамтарч ажилладаг. Моделиудаа ч гэсэн Ази, Европт ажилуулах боломжийг судалж явдаг. Тэд хэрвээ сайн ажиллаж чадвал эх орны минь хүнд өснө. Топ модель Д.Болормаагийн дүү Д.Энхсүрэн л гэхэд дэлхийд алдартай “Сони”-гитйн сурталчилгаанд тоглосон шүү дээ. Тэгэхээр манай охидод маш их боломж байгаа гэсэн үг.

-Эх орондоо ажиллах гэхээр цалин хөлснөөс эхлээд л олон талын бэрхшээл угтдаг талаар загварынхан гомдоллодог юм билээ?

-Үнэн шүү дээ. Гадаадад ажиллах нь олон талын ач холбогдолтой. Цалин мөнгө нь л гэхэд манайхтай харьцуулшгүй өндөр. Гадаадын нэг сурталчилгаанд тоглох хөлс, манай сурталчилгааны ханш тэнгэр газар шиг хол зөрүүтэй. Гэхдээ дан ганц мөнгө хөөсөндөө биш шүү. Олон улсад эх орноо сурталчлан, хувийн карьерээ өсгөх тал дээр илүү анхаардаг юм. Монголд бол тэгтлээ өндөрт гарч чадахгүй л болов уу. Хэсэгтээ л гялалзаад алга болно шүү дээ. Энд загвар өмсөгчдийг оролцуулах бүтэн цагийн ажил гэж байхгүй. Өдөр болгон зураг авалт, загварын шоу зохиогдохгүй. Гадаадад бол эсрэгээрээ. Сингапур, Гонконгт тогтмол зураг авалтанд ордог учраас тэр хэмжээгээрээ цалин авч, ажиллаж амьдраад байх боломжтой. Тэгэхээр залуу байгаа дээрээ гадаадад хэдэн жилийн гэрээтэй ажиллаж, тодорхой хэмжээний карьер, хөрөнгө санхүүтэй болох хэрэгтэй. Миний хувьд, загварын ертөнцөд хообий маягаар ажилладаг. Өдөр болгон загвар өмсдөггүй. Загварын хажуугаар бизнесийн ажлаа амжуулдаг юм.

-Гэхдээ загвар өмсөгч хүн бүрт л топ модель болох хүсэл байдаг шүү дээ. Хувь хүний үүднээс ч, аливаа зүйлийн оргилд нь гарах зорилго байгаа байх?

-Би “Гоёл-2010” наадамд оролцоод “Керасис” бүтээгдэхүүний нэрэмжит “Төгс гоо сайхан загвар өмсөгч” шагналыг хүртсэн. Үс арчилгааны бүх төрлийн бүтээгдэхүүнээр бүтэн жилийн турш хангасан. Харин тус наадмын хувьд, хамгийн том шагнал нь топ модель. Мэдээж хэрэг, би топ модель болно. Болох цаг нь ч болсон гэж бодож байгаа. Харин цаашид энэ чиглэлээр дагнаж ажиллах эсэх минь тодорхой бус. Төлөвлөсөн зүйлүүдээ одоохондоо нууц хэвээр нь үлдээе. Би бизнес менежментийн чиглэлээр суралцаж төгссөн. Одоо нэг компани удирдаж яваа минь мэргэжлийнхээ дагуу ажиллаж байгаа хэрэг.

-Загварын гараагаа хэрхэн эхэлж байсан бэ?

-Топ модель “том” Д.Цолмонгийн анхны шавь. Дараа нь топ модель Д.Болормаа багш дээр очиж “Монгол модель” агентлагт харьялагдах болсон. Хэрэв өөрөө хүсвэл загварын тайзан дээр 40 гартлаа алхах байх. Гэхдээ ирээдүйд юу болохыг хэн ч мэдэхгүй шүү дээ. Би хүнтэй сууж, хүүхэд гаргах нь тодорхой. Магадгүй, гэр бүлийн амьдралаа илүүд үзэх ч юм билүү. Амьдрал яаж өөрчлөгдөхийг хэлж мэдэхгүй. Одоо бол загвараас өөр юм бодохгүй л байна. .

-Моделиуд маань үнэхээр чадварлаг, бас их дайчин. Гэвч олны хараанд өртөөд тэгдэг ч юм уу нэр хүнд нь нэлээд доошилсон. Энэ талаар юу гэж боддог вэ?

-Миний нэр их “цэвэр” шүү дээ. Яг бүх хүнийг тэгж хэлж болохгүй байх. Энэ бол хувь хүний хүмүүжил. Манай гэрийнхэн намайг сайн хүмүүжүүлсэн. Тэднийхээ итгэлийг алдахгүй, үргэлж сайн охин байхыг хүсдэг. Хүмүүс олны танил, сайн сайхан явж байгаа хүний тухай ярих дуртай байдаг шүү дээ.

-Кинонд тоглох бодол бий юу?

-Намайг илүү монголжингоо төрхтэй болгох дүр бүхий нэгэн киноны санал ирсэн. Гэхдээ сайн жүжиглэж чадахгүй бол дэмий биз. Тиймээс сайтар бодож байж саналыг нь хүлээж авна. Боломжийн санагдвал татгалзахгүй шүү.

-Гэр бүл төлөвлөлтийн тал дээр?

-Бодож л байна. Гэхдээ яг төдийд, тэгж сууна гэж бодоогүй ээ. Ойрын хугацаанд амьдрал зохиож бодол байгаа. Найз залуугаасаа саяхан салсан. Би гэр бүлийн хувьд, их нээлттэй байхыг хүсдэг. Үнэхээр хайртай хүнтэйгээ учирвал хэзээ ч хамаагүй сууна. Түүнийг хойшлуулж болохгүй байх аа. Ажил, амьдралаа давхар аваад явах чадал бий, надад. Хэчнээн ажил төрөл минь амжилттай байлаа ч, надад гэр бүл минь илүү чухал. Эгч нарынхаа үгийг сонсч байхад гэр бүлийн амьдрал хамгийн том аз жаргал байдаг юм шиг ээ.

-Хообий тань юу вэ?

-Ном унших, кино үзэх. Чөлөөт цагаараа усанд сэлж, фитнессээр хичээллэдэг. Нэг их хүнд зүйл өргөхгүй ч гэсэн, тогтмол дасгал хийж байвал эрүүл мэндэд сайн.

-Өөрийгөө тодорхойлооч гэвэл?

-Зорьсон зүйлдээ тууштай, илүү дутуу маяг байхгүй, нэлээд даруухан талдаа, дуу цөөтэй, шударга нэгэн л гэж хэлмээр байна даа. Энэ ч утгаараа, эрчүүдийн зүгээс элдвийн санал ирээд байдаггүй. Эсвэл би тийм халдаж боломгүй хүн шиг харагддаг байх. Тэгээд ч би эрчүүдтэй илэн далангүй харилцаж, нүүрэмгий загнаж чаддаггүй. Санал зөрөлдсөн үед шууд л уурлах байх. Харин хоёр нүүр гаргасан хүнд үнэхээр дургүй. Наашаа харж инээчихээд цаашаа харж муулаад явдаг хүн олон байдаг шүү дээ.

Р.МӨНГӨН