Тэр дундаа улс төрд хүчин зүтгэж яваа нэгнээ бол чөтгөрөөс л дор үздэг цаг юм уу даа. Хэн нэгэнтэй уулзаж учирч үзээгүй байж, тэр хүний сэтгэлийн орон зайд ямархан өнгө гэрэлтэж бас ямархан аялгуу эгшиглэж явааг нь мэдэхгүй байж хүний ам дагаж нэгнээ муу хэлээд ч яах билээ. Миний бие сэтгүүл зүйд бараг 20 жил ажиллаж байна. Энэ хугацаанд бор шар хэвлэлээр хөөрхий муу Э.Бат-Үүлийг мөн ч олон янзаар бичсэн дээ. Тэглээ гээд надад наалдаж гийгүүлсэн ч юм алга. Бас Э.Бат-Үүл гишүүнээс хоргодож үгүй болсон ч юм алга. Бид хоёр өөр өөрсдийнхөө амьдралын жимээр өөр өөрийнхөөрөө урсаж яваа хоёр их гол юм. Ус мөрөн ч ус мөрөнөө хайрлах далдын нэгэн хүч байдаг байх.Тэр хүч нь нэгдэж цөм болж хувирдаг биз ээ.

Түүн лүгээ адил хүн хүнээ хайрлах нь амьд заяаны мөнхийн гэрэлт дуудлага юм. Тиймээс төрийн шагналт Яруу найрагч О.Дашбалбар агсан “Амьддаа бие биеэ хайрла” хэмээн хэлээ биз.Зарим тохиолдолд хэн нэгнийг үзэн ядаад ч байсан хамаагүй хайрламаар санагдаж сэтгэлд нэгэн их цалгиа хөвсөлздөгийг нуух юун. Тиймээс хүн хүнээ хайрлах шиг сайхан юм байхгүй гэж дахин хэлмээр байна. Бас хэн нэгнийхээ хийж, бүтээснийг хүлээн зөвшөөрөх шиг гайхамшиг байхгүй биз ээ.
Улс төрийг Э.Бат-Үүлгүйгээр төсөөлөхөд жаахан хэцүү байх. Харин Э.Бат-Үүлийг улс төргүйгээр төсөөлж боломоор санагддаг юм.Таны санал магадгүй миний эсрэг ч байж болох юм. Гэхдээ Э.Бат-үүл бол улс төрийг бүтээгчдийн нэг. Харин улс төр Э.Бат-Үүлийг бүтээгээгүй шүү дээ.Үүнээс үзэхэд миний бодол тийм ч их буруу биш байх. Би анх Э.Бат-Үүлийг цагаан толгойгоор нь бусдаас ялгадаг. Харин юу хийж явдаг хүнийг нь бараг ойлгодоггүй байлаа.

Дараа нь улс төр, нийгмийг сонирхдог болж үл ялигхан саарал өнгөтэй дууных нь өнгө, хийж бүтээж байгаа зүйлээр нь түүнийг мэддэг болсон юм. Монголын олон аавын хүүхдүүд эх орон,тусгаар тогтнол гэрэлт ирээдүйнхээ төлөө амь хайрлан тэмцсээр ирсэн түүх өнөөг хүртэл үргэлжилсээр л байгаа. Тэрхүү түүхийн хуудсыг бичигчдийн нэг нь Ардын уран зохиолч С.Эрдэнэ баавайн хүү Бат-Үүл юм. Нийгмийн гаж буруу үйлдлийг засаж залруулах гэж, ард түмнийхээ амьдрал амжиргааг дээшлүүлэх гэж өөрт байгаа сэтгэлийн болоод оюуныхаа хүчийг зарцуулсаар л яваа нэгэн. Аливаа нэг нийгэм тэр бүү хэл гэр бүлд ч гэсэн юм хийж байгаа хүн л алдар гавъяа зэмлэл шийтгэл хоёрыг зэрэг хүлээдэг шүү дээ. Энэ тавилан ч Э.Бат-Үүлийг тойроогүй дайрч яваа. Тэрээр олон юманд буруудаж хууль эрх зүй зөрчсөн гэж гүтгэгдэн доромжлогдож, бас хийж бүтээсэн зүйлээрээ үнэлэгдэж чадсандаа өнөөдөр ардын баатар хэмээх эрхэм цолыг хүртсэн биз ээ.

Ардчиллын анхны долоогийн нэг, анхны парламентын гишүүн, газар хувьчлал, өмчлөлийн асуудал гээд бүх л зүйл дээр Э.Бат-Үүл шиг үнэнч баттай зогсож саарал ордны буруу бодлогыг эсэргүүцдэг анхдагч бараг байдаггүй гэж хэлэхэд хилсдэхгүй. Тэрээр улс төрчөөсөө гадна Монголд хүнд байдаг нэг эрхэм чанарыг сэтгэл зүрхэндээ тээж явдаг нэгэн хэмээн надад санагддаг юм.

Учир нь 1998 онд Ардын уран зохиолч С. Эрдэнэ гуай, ардын жүжигчин Д.Жаргалсайхан нар аавуудынхаа гэгээн дурсгалд зориулан Хэнтий аймгийн Дадал сумын нутаг Сэрүүн Галтайд Дашпунцаглан хэмээн хийд босгосон юм. Уг хийдийн нээлтэнд Ардын уран зохиолч Д. Цоодол, Т. Галсан соёлын гавъяат зүтгэлтэн Г. Мэнд-Ооёо, Д. Нацагдоржийн шагналт зохиолч Х.Зандраабайдий, Яруу найрагч Д.Нямсүрэн, Г.Сонинбаяр зэрэг уран бүтээлч нартай миний бие хамт явсан. Тэр үед Хярхон голд 10 гаран жип машин усанд сууж зарим нь бараг л унахаа алдсан. Энэ үед Э.Бат-Үүл гишүүн аль хэдийн буучихсан аврах багийхан ирэхээс өмнө хүмүүсийг үүрэхийг нь үүрч хөтлөхийг нь хөтөлж гол гаргаж бусдыгаа уриалаад зогсож байсан.Тэгэхэд л надад эгэл эр хүн монгол эрчүүдийн нэгэн ноён нуруу аргагүй л мөн юм байна даа гэж бодогдож билээ.

Үүнээс хойш хэн нэгнээс түүнийг өмөөрмөөр санагддаг болсон юм. Улс төр л болсон хойно дандаа гэгээн тунгалаг байна гэж юу байх вэ? Миний багш Соёлын гавъяат зүтгэлтэн, төрийн шагналт Д.Батбаяр нэгэн удаа “Улс төр бол хамгийн заваан хөзрийн тоглоом” миний хүүхдүүд болж л өгвөл холхон яваарай гэж захиж байж билээ. Гэхдээ л хүссэн хүсээгүй улс төртэй зууралддаг нь нийгэмшсэн хүний ёс бизээ. Энэ тоглоомон дотор нэгэнт орчихсон болохоороо С.Зоригийн үхэлд буруутан болж, эсвэл ардчилсан намын зарим нэг нөхдийнхөө буруу хийсэн бодлого, тогтоолын золиос болж ард түмнээр бишгүй дээ л нэг чичлүүлж байсан. Одоо ч .Бат-Үүлийг чичилсэн хүн олон байгаа бас өмөөрөх хүн ч олон байгаа.
Гэхдээ л улс төрийг тэнгэр хэмээн үзэж, улс төрчдийг үүл хэмээн бодвол Э. Бат-Үүлийн сэтгэлээс үргэлжийн мөнх цагаан цас бударсан үүл юм. Тэрхүү цас нь тогтсон эрхэм төрөөс эрүүл нийгэм, эрх чөлөөт хөгжил цэцэглэх нь дамжиггүй.

В.Нэргүй

гонюьс

Э. Бат-Үүл гэж цагаан цасны үүл шиг хүн
Tweet
Bolod.mn

Сэтгэгдэл (1)

Уншигчдын оруулсан сэтгэгдлийн талаар манай сайт хариуцлага хvлээхгvй болохыг анхаарна уу.
Үгийн санд шүүлтүүр хийсэн болно

Зочин
муу xэлүүлэxгүй xун гэж байдаг юм уу. манайxан бол xун муулаx тал дээрээ дэндүү авяастай шуу. батуулдээ эрүүл энx урт удаан наслаxийг ероое

2011-06-17 | 08:20:23 | 76.171.152.252 |

Мэдээ
Гадаад мэдээ
Видео