Дуучин Нара: Хэрэгцээ гарвал зарим өдөр хэдэн зуун мянгаар нь зарцуулдаг

2011-06-15

Дуучин Нара, энэ эмэгтэй бол олны хараанд зүй ёсоор өртөж, бусдын анхаарлын төвд байдаг бүсгүйчүүдийн нэг.

Цоглог, үргэлж өөрийнхөөрөө байж чаддаг түүнтэй уран бүтээл болоод хувийн амьдралынх нь талаар илэн далангүй ярилцлаа.

-Таны “Уучлаарай залуу” дуу их таалагдсан. Ялангуяа, клип нь их өвөрмөц болсон юм шиг санагдсан шүү?
- Баярлалаа, би уран бүтээлээ хийгээгүй нэлээд завсарласан. Фэнүүд маань ч надаас их зүйл хүлээсэн байх. Тийм болохоор бусдаас өөр, шинэлэг зүйл хийхийг хүссэн. Шинэ уран бүтээл маань үзэгчдэд таалагдаж, надад маш их эрч хүчийг өгч байна. Энэ эрч, хүчээрээ цаашид олон уран бүтээл хийхээр төлөвлөсөн.

-Дуучин Нара бие даасан тоглолтоо хэзээ хийх вэ. Хэтрүүлж хэлэхэд бараг таниас бусад хамтлаг, дуучид тоглолтоо хийчихлээ?
- Уран бүтээлч хүний мөрөөдөл нь бие даасан тоглолт хийх шүү дээ. Мэдээж, тоглолт хийхийн тулд ард түмэнд хүрсэн олон сайхан дуутай байх ёстой гэж би боддог.

-Та Японд сурч, хэсэг хугацаанд амьдарсан. Одоо ч ирэн, очин байдаг. Тэнд уран бүтээл хийгээд байна уу, эсвэл...?
-Одоо ч сурч байгаа, нүүр будалтын чиглэлээр. Урлагийн хүн байнга л нүүр будалт хийх шаардлагатай болдог. Ер нь, гоо сайхны бүхий л талын мэдлэгтэй байх ёстой. Би жаахан байхын л ээжийнхээ театрын кремыг нүүрэндээ түрхэж, бас хүүхэлдэйдээ илүүчилдэг байлаа.
Залуу хүн сурч, өөрийгөө хөгжүүлэх хэрэгтэй. Тэр хэрээрээ ихийг хийж, бүтээнэ гэж боддог, би. Японд өөр чиглэлээр сурч байгаа маань ч энэ хүсэлтэй минь холбоотой.

-Японд олон найзтай юу. Таныг сүмочидтой их найз гэж сонссон юм байна?
-Тэгэлгүй яах вэ, найзгүй бол уйтгартай биз дээ. Би олон найзтай. Сүмоч Бямбадорж, Санчир нартай ч найз. Гэхдээ сая явахдаа найз нөхөдтэйгээ уулзах зав гарсангүй. Хичээлээ сайн хийвэл их юм сурна. Монголдоо ирж уран бүтээлээ хийх цаг ч хожих учраас өөртөө амралт, чөлөөт цаг гаргаагүй.

-Танай эгч сүмоч Бямбадоржийн эхнэр болж, саяхан охин төрүүлсэн гэл үү?
-Тэд зүгээр л найзууд шүү дээ. Саяхан тийм мэдээлэл цацагдаж, баахан сенсаци дэгдээсэн.

-Тэгээ яагаад ийм мэдээлэл цацагдсан юм бол. Монголчууд овоо босгоогүй бол шаазгай хаанаас суух вэ гэж ярьдаг...?
-Мэдэхгүй, анх энэ мэдээллийг цацсан хүн л мэдэж байгаа байх даа. Дахин хэлэхэд тэд зүгээр л найзууд.

-Танайх хэр чинээлэг амьдралтай айл вэ. Манайхан бүгд Японд хувийнхаа зардлаар сурч, эцэг, эхийнхээ дэмжлэгээр уран бүтээлээ хийгээд явж байна гэж та нэг биш удаа ярьж байсан?
-Аав маань хувийн компаниа урирддаг. Би эцэг, эхийнхээ буянаар Японд урлагийн сургууль төгссөн. Японд амьдралын өртөг өндөр болохоор тэтгэмж авдаггүй оюутан би хичээлийнхээ бус цагаар янз бүрийн ажил хийдэг байсан. Над шиг ажил хийдэг оюутнууд олон байдаг. Японд бол зөөгчийг, манайхны ярьдгаар ширээний үйлчлэгчийг сайхан хүүхнүүд хийдэг байсан. Тэд өөрсдөөрөө бахархаж, нэвтрүүлэг хүртэл хийлдэг юм билээ. Харин манайхан ширээний үйлчлэгч гэхээр буруугаар ойлгодогт би их гайхдаг. Монголд ч ялгаагүй, сурахынхаа хажуугаар бааранд зөөгч хийдэггүй оюутан байдаг юм уу, байвал цөөхөн л байгаа байх.

-Урлагийнхан байнга л олны нүдэн дээр ил явдаг болохоор хэрэглээ өндөртэй байдаг. Нууц биш бол өдөрт хэдэн төгрөг зарцуулдаг, ямар дэлгүүрээр үйлчлүүлж, аль ресторанд хооллодог вэ?
- Харьцангуй л даа. Ямар хэрэгцээ, шаардлага байна түүндээ л зарцуулдаг. Зарим үед найз нөхдийн төрсөн өдөр болохоор хэдэн зуун мянгаар нь зарцуулах тохиолдол ч бий. Гадуур хоол идэхгүй, зарлага гарахгүй өдөр ч байдаг.

-Нараг тансаг үнэртэй сүрчигт гар татдаггүй гэж сонссон юм байна. Ер нь, таны хувьд сүрчиг цуглуулах хэрэглээ юу, эсвэл хобби юу?
-Эмэгтэй хүний нэг шунал байдаг шүү дээ. Энэ ч гоё үнэртэй юм, тэр нь ч гоё савтай юм байна гэж авсаар байгаад бараг цуглуулга гэж хэлж болохоор болсон. Тэрнээс биш сүрчиг цуглуулдаг гэж харагдахыг хүсээгүй. Сүрчиг худалдан авах бол миний хэрэглээ.

-Та мэдээж уран бүтээлээсээ, цомгоосоо тодорхой хэмжээний орлого олдог байх. Тэр мөнгөө юунд зарцуулдаг вэ?
-Хамгийн анх 2007 онд 1500 гаруй ширхэг цомгоо Японы ханшаар зарж, борлуулсан. Тэр орлогоо буцаагаад өөрийнхөө уран бүтээлд зарцуулсан. Одоогоор цомгийн орлого гээд байх зүйл бараг байдаггүй.

-“Шинэ үе”-ийн Батука та хоёр найзлаад багагүй хугацаа өнгөрлөө. Бодвол хурим хийх талаар ярьж байсан биз дээ?
-Бид хоёр жил гаруй хугацаанд л хамт байсан. Одоогоор хуримын талаар ярьж, төлөвлөсөн юм алга.

-“Хувилгааны эрэлд”, “Цахирмаа” зэрэг кинонд тоглож, өөрийгөө муугүй жүжигчин гэдгээ мэдсэн байх. Дахин кинонд тоглох санал ирсэн үү. Ер нь, дуулах, жүжиглэх хоёрт ялгаа байна уу?
-Манайхан бүгдээрээ урлагийн хүмүүс. Ээж маань Хүүхэд залуучуудын теарт ажилладаг байсан мэргэжлийн жүжигчин хүн бий. Одоо ч гэсэн кинонд дүр бүтээгээд явж байна. Би “Хувилгааны эрэлд” кинонд ээжтэйгээ хамт тоглосон. Аав ч гэсэн залуудаа урлагаар явдаг байсан юм билээ. Кинонд тоглохын тухайд гэвэл, Япон явахын өмнө нэг санал ирсэн. Би тэр саналыг хүлээж аваагүй. Яагаад гэвэл, юм болгонд оролцох цаг хугацаа гэж байдаг. “Хувилгааны эрэлд”, “Цахирмаа” зэрэг кинонд олны дэмжлэгтэй тоглосон. Би бага байхын л дуучин юм уу жүжигчин болно гэж мөрөөддөг байлаа. Мөрөөдөл маань эхнээсээ биеэлж байгаа болохоор би их азтай хүн.

-Ярилцсанд баярлалаа, уран бүтээлд тань өндөр амжилт хүсье.

ASUNews.mn