-”Танайд хоноё” нэвтрүүлгийг хөтлөхөө больсноос хойш Тэнгис ямар уран бүтээл хийж байна вэ?
-Юуны өмнө Монголын хамгийн ууган хэвлэл “Монголын үнэн” сонины мянга мянган уншигчдад энэ өдрийн мэндийг дэвшүүлье. Хүүхэд байхаасаа л хүмүүс “Үнэн” сонинг уншиж байхыг хардаг байлаа. Харин одоо зочноор нь уригдаад ярилцлага өгч байгаадаа баяртай байна. Би телевизийн урлагт хөл тавиад долоон жил болж байна. “Эр өсч, эсгий сунана” гэдэгчлэн 25 дугаар суваг телевизэд олон нэвтрүүлэг бэлтгэсний эцэст өрх тусгаарлаж, бие даан уран бүтээл хийхээр ажиллаж байна.

Залуу хүнд хийхийг хүссэн олон зүйл байдаг. Үүнийгээ гүйцэлдүүлэхийн тулд телевизээсээ гарч, хэсэг нөхдийн хамт “Ocean” энтертайментийг байгуулан анхны нэвтрүүлэг болох “Хамтдаа”-гаа хийгээд үзэгчдээс урмын “ташуур” аваад явж байна даа.

-”Хамтдаа” нэвтрүүлгийг “Танайд хоноё”-гоос хуулбарласан гэж ярих юм билээ.
-Айлд очдог нэвтрүүлэг болгоныг “Танайд хоноё”-той адилхан гэж ойлгож болохгүй. Тэгвэл “Танайд хоноё” ч бас гадаадын нэвтрүүлгийн хуулбар. Хөдөөгийн айлд очиж залуучуудад ёс заншил, амьдрал ахуйг нь танилцуулдаг нэвтрүүлэг Японд бий. Америкт Холливудын одод гэрээ танилцуулдаг нэвтрүүлэг байдаг шүү дээ. Тэгэхээр би “Танайд хоноё” нэвтрүүлгийг хуулбарлаагүй. Өмнө нь би энэ нэвтрүүлгийг хийдэг байсан болохоор л ингэж ярьж байгаа. Би “Танайд хоноё” нэвтрүүлгийг хийх боломж олгосон “25 дугаар суваг” телевизийнхээ хамт олонд талархаж явдаг.

-”Танайд хоноё” нэвтрүүлгээс болж Г.Алтантүрүү Та хоёрыг таарамжгүй болсон гэх яриа байдаг.
-Ер нь монголчууд хүмүүсийг хооронд нь өрсөлдүүлэх дуртай. Бид хоёр уран бүтээлийн сайхан найзууд байсан. Алтантүрүү маань намайг телевизэд ороход “Амьдрал аа гэж”, “Танайд хоноё”, “10000” гээд олон нэвтрүүлэг хийж байсан. Гэхдээ “Танайд хоноё” нэвтрүүлгийг би хийсэн нь Алтантүрүүд таалагдаагүй юм шиг байгаа юм. Уг нь З.Алтай захирлын хүсэлтээр энэ нэвтрүүлгийг хийх болсон. Уг нь хүлээн зөвшөөрөгдсөн нэвтрүүлгийг үргэлжлүүлэхдээ тийм ч дуртай байгаагүй. Түүнээс бид хоёр ямар нэг байдлаар ам муруйж, маргалдаагүй.

-”Танайд хоноё” нэвтрүүлгийг хийж байсан хоёр хүн телевизээсээ гарч, бие даалаа. Үүнд холбоо байна уу?
-Хийж бүтээх хүсэл эрмэлзэл дүүрэн залуус уран бүтээлийн цагаан өрсөлдөөн бий болгохоор шийдсэн хэрэг. Өрсөлдөөний үр дүнд үзэгчид хожно. Тэнгис, Алтантүрүү хоёрын уран бүтээл, амьдралын замнал тусдаа. Уран бүтээлээрээ үзэгчдийн өмнө өрсөлдье гэж хэлмээр байна.

-Цаашдаа ямар уран бүтээл гаргахаар ажиллаж байна вэ?
-Манай энтертайнмент олон уран бүтээл хийхээр төлөвлөж байна. Анхных нь “Хамтдаа” нэвтрүүлэг. Дараа таван нэвтрүүлэг гарахад бэлэн болсон. Эдгээрийн нэг нь жинхэнэ шоу бизнесийн энтертайнмент нэвтрүүлэг байна. Би хийж байгаа нэвтрүүлэг болгондоо залуучуудад хараагүйгээ харж, сонсоогүйгээ сонсоосой гэсэн үүднээс амжилтад хүрсэн хүмүүсийн үгийг сонсгохыг хичээдэг. Би мундаг судлаач биш ч залуу хүн.

-Анх хэрхэн телевизийн урлагт хөл тавьж байв?
-2005 оны сүүлээр би гадаадаас ирээд удаагүй байлаа. Тухайн үед өнөөгийнх шиг олон телевиз байгаагүй. Тэр тусмаа энтертайнмент нэвтрүүлгүүд байгаагүй. Ингээд “25 дугаар суваг” телевизэд ажилладаг найздаа шинэ нэвтрүүлгийн санаа хэлсэн юм. Миний хувийн цуглуулгад 4000 орчим DVD байдаг. DVD-гээ ашиглан гадны одуудын тухай нэвтрүүлэг хийх санал тавитал найз маань энэ талаар мэдлэггүйн улмаас олигтой нэвтрүүлэг хийж чадаагүй. Ингээд хамт хийгээд үзье гэхэд нь зөвшөөрч хоёр, гурван дугаар хийсэн. Хэсэг хугацааны дараа З.Алтай захирал дуудаад телевизийн урлагт орооч гэсэн юм. Цаг гаран ярилцсаны эцэст телевизийн хүн болсон доо. Уг нь би эдийн засагч мэргэжилтэй. Гэхдээ би эдийн засагч мэргэжилдээ дуртай.

-Залуу хүн туршлагагүйн улмаас алдаа гаргах нь бий. Ганбуушийнд очихдоо мишокгүй хоносон гээд шуугиж байсныг санаж байна. Тиймэрхүү алдаа хэр гардаг вэ?
-Нэвтрүүлэг болгонд бага сага алдаа гардаг. Би Ганбуушийнд очиж нэвтрүүлэг хийсэн нь бас ч гэж учиртай. “Танайд хоноё” нэвтрүүлэг сонгуулийн үеэр “захиалгатай” гэж хэлүүлэхэд хүрээд байв. Алтантүрүүгээс дутуу байна гэх яриа ч гараад байлаа. Ерөнхийдөө нэвтрүүлэг нэг хэв загварт орчихсон байсан. Тунгалаг бүсгүйнд очоод Алтантүрүү маань үнэхээр сайхан нэвтрүүлэг хийсэн. Тэгэхэд яавал хүмүүсийн сонирхлыг татах бол гэж бодсоны үндсэн дээр Ганбуушийг сонгосон.

Нэвтрүүлгийг хийхээр шийдэхдээ л иймэрхүү яриа гарна гэдгийг мэдэж байсан. Эцэст нь нэвтрүүлгийг хоёр сая долоон зуун мянган монголчуудын хоёр сая таван зуун мянган нь үзсэн. Үзээгүй нь сонссон гэдэгт итгэлтэй байна. Өнөөдрийг хүртэл ярилцаад сууж байгаа нь би хийж чадсаны гэрч. Бид мишок барьж очдог ч монголчууд зочноо урилгагүй байсан ч мишоконд унтуулахааргүй сайхан сэтгэлтэй хүмүүс. УИХ-ын гишүүн Э.Бат-Үүлийнд хонохдоо мишокгүй очсон. Энэ тохиолдлыг ярихгүй мөртлөө Ганбуушийнд очсоныг яриад байгаа нь сонин.

-Аливаа зүйлийг хийхэд энэчлэн хэл ам дагуулах нь бий. Шинээр энтертайнмент байгуулаад ажиллахад бэрхшээл тулгарч л байгаа байх?
-Олон хүндрэл гарч байна. Хэдийгээр энтертайнмент байгуулсан гэж ярьж байгаа ч зарим үед би цэвэрлэгч, жолооч хийж байна. Бүх зүйл нуруун дээр ирж байгаа ч өөрийнхөө дураар ажиллаж байгаа минь сайхан. Хөлсөө дуслуулж олсон талх амттай гэдэг дээ. Амжилтын төлөө “цангаж” яваа хүний хувьд урмаар хөглөгдөн бэрхшээлийг давж явна. Эдийн засагч хүн аливааг тооцоотой хийдэг.

Мөн би багаасаа киокушинтай каратегаар хичээллэсэн. Улсын хоёр удаагийн аварга. Спортоор хичээллэдэг байсан минь бэрхшээлийг даван туулах чадвар олгосон. 10 км гүйлтийг давахын тулд өөрийгөө ялж сурсан минь өнөөдөр хэрэг болж байна. Надад байгаа бүхнээ би өөрөө бүтээсэн гэж бодох сайхан байдаг.

-Манай орны хувьд залууст хэр боломж байгаа вэ?
-Чадах зүйлээ хийх юм бол бидэнд боломж нээлттэй байна. Монголд амьдрал байгаа. Залуус гэнэт баяжихыг хүсээд байна. Гадаадад очоод мөнгийг бөөн бөөнөөр нь олчих шиг санадаг. Би амьдралынхаа дөрөвний нэгд нь гадаадад амьдарсан. Хүний нутагт ажиллах хэцүү. Мөн би олон хүүхэдтэй айлын отгон нь. Багадаа бусдын л ижил өссөн. Ах нарын хувцас багадаж, хуучрахаараа надад ирнэ. Ээж 260 төгрөгийн цалинтай. Түүгээрээ олон хүүхдийн хувцас, хоол ундыг зохицуулна. Би Пионерийн ордны дууны дугуйланд явдаг байхдаа том эгчээс дараагийн эгчид очсон шубыг өмсдөг байв. Хоёр ханцуй нь нөхөөстэй. Тэгсэн дугуйлангийн маань нэг охиныг гэрт нь хүргэж өгөхөөр хамт гарах гэтэл өлгүүрээс шубаа авч чаддаггүй. Эгчийнхээ ноорхой шубыг өмсчихсөн байна гэж шоолох вий гэхдээ охиноосоо нуугдчихаж билээ.

Энэ утгаараа би баян тансаг гэхээс илүү дундаас доогуур амьдралтай айлын хүүхэд амжилтад хүрдэг гэж боддог. Би “хожих тоглоомоороо тоглоё” гэдэг зарчим баримталдаг. Чадахгүй зүйл хөөцөлдөх нь цаг хугацааны гарз. Түүний оронд настай болсон эмээдээ сүү барьж очоод хууч хөөрч суух нь дээр шүү дээ. Эмээ минь 96 настай сайхан буурай бий. Өглөө сэрэхэд маани мэгзэм уншиж угтдаг болохоор би эмээгээрээ бахархдаг.

-DVD цуглуулдагийн хувьд кино хийхийг мөрөөддөг үү?
-Мөрөөддөг. Мөрөөдөл маань биелнэ гэж найддаг. Олсныхоо үзүүрээс атгачихаад явж байна. Би залуу хүн болгонд нэг зүйлийг хэлмээр санагддаг. Зөв цаг хугацаандаа зөв зүйлээ хийснээр амжилтад хүрнэ. Мэдлэг, боловсрол хоёрыг ялгах ёстой. Хүн болж төлөвшсөнөөр мэдлэгийг нэмэрлэж чадвал боловсрол болно. Гадаадад сургууль төгссөн болгон боловсролтой биш. Түүний дэргэд насаараа мал малласан амьдралын ухаантай хүн боловсролтой гэж би боддог.

М.Хангал