"Монгол поп" тоглолтоо хийлээ. Өмнө нь зөвхөн албан ёсны хурал, зөвлөгөөн л болж байсан Их танхим ийнхүү монгол язгуур урлагийг поп стильтэй хослуулсан хөгжмийн нүргээнд нэг үдэш доргив.

"Дуучин Д.Болд Төрийн ордонд тоглох гэнэ" гэсэн зар өнгөрөгч долоо хоногт хэвлэл мэдээллийн хэрэгслээр цацагдсан нь олон хүмүүсийн дургүйцэл бас гайхшралыг төрүүлж байсан юм.

Эцэг, өвгөдөөс уламжлан ирсэн, ардын урлагаа залуу үе бид л хөгжүүлэн, дэлхий нийтэд түгээн дэлгэрүүлэх ёстой хэмээн дуучин залуу үзсэнээр "Монгол поп" хэмээх цомгоо гаргаж байгаа юм. Тиймээс энэ удаагийн тоглолт нь тус цомгийг нийт ард түмэндээ өргөн барьсны баяр байлаа.

Тэрээр улс төр, урлаг соёл, утга зохиол, бизнес, дипломат албаны гээд бүхий л нэр алдартай хүмүүсийг нэгэн дор цуглуулж чадсан байв.

Тоглолтын цагийг 18 цагт хэмээн зарласан ч зочид 17 цаг өнгөрөөгөөд л цувж эхлэв. Тоглолтын урилга дээр хувцас хүндэтгэлийн байх шаардлагатай хэмээн бичсэн байсан тул тэнд хүрэлцэн ирж буй зочид хээнцэр, дэгжин, албан ёсны хувцсаар гоёжээ. Бас тоглолтын утга агуулгатай хослуулан монгол дээлээр гоёсон нь харагдана лээ.

"Монгол поп"-ын баяр цагаан эсгийний ёслолоор эхэлсэн юм. Манай соёл, урлагийнхан сүүлийн үед улаан хивсний ёслол гээчийг хийж, түүн дээгүүр нь алдартнууд алхан зургаа татуулах уламжлал тогтоод байсан. Харин энэхүү барууны соёлыг дуучин Д.Болд монгол ахуйгаар сольж чадсан юм. Үүгээрээ "Монгол поп" цомгийнхоо утга агуулгыг илэрхийлж байгаа гэх. Энэхүү цагаан эсгийг тусгайлан захиалж хийлгэсэн гэх бөгөөд улаан эмжээр бүхий ширмэл эсгий байв. Тоглолт үзэхээр ирсэн зочдыг эртний хаад, хатдын хувцас өмссөн залуус угтан мэндчилэхэд зочид цагаан эсгий дээгүүр алхлан зургаа татуулах аж. Тэгснээ зурагчиндаа хандан "Доод эсгийг нь оруулаарай" гэх нь дуулдана. Зочид ийнхүү зургаа авахуулахын зэрэгцээ хүлээлгийн танхимд өрж тавьсан ивээн тэтгэгч байгууллагуудын хүйтэн ундааг шимэн, шинээр хэвлэгдэн гарч буй "Music" сэтгүүлийг үзэж сонирхоно.

Цаг нэгэнтээ 18.50 минут болжээ. Энэ цагтай зэрэгцэн тоглолтын хамгийн хүндтэй зочин болох Ерөнхийлөгч Ц.Элбэгдорж морилон ирлээ. Тоглолт ч эхлэв. Их танхимын бель этаж дээр Ерөнхийлөгч, Засгийн газар, УИХ-ын гишүүдэд тусгайлан суудал засчээ. Тэдний зарим нь гэргий, хүүхдийнхээ хамт ирсэн байв.

Их танхимын тайзны ард талыг бүхэлд нь дэлгэц болгож хэд хэдэн давхар тайз засч арын эгнээнд нь поп хөгжимчид, урд эгнээнд нь Морин хуурын чуулгын хөгжимчид байраа эзэлчихэж.

Тоглолт эхлэхэд арын дэлгэц дээр Монгол орны үзэсгэлэнт байгаль, уул тал, говь, хангайг харуулсан бичлэг явахын зэрэгцээ их элсэн говьд тэмээн жингийн цуваа хонх дуугарган намуухан алхлах нь тодоос тод харагдана. Энэхүү дүрсний цаана ардын болон поп хөгжим хослон эгшиглэх ажээ.

bold

Харин тайзны голд дуучин Д.Болд бор өнгийн дээл, монгол гутлаар "гангараад" зогсч байна. Тэрээр хүрэлцэн ирсэн зочдын амрыг эрээд эхний дуугаа дуулсан юм. Түүний дээл нь ташуу захтай бөгөөд саа болон шигтгээгээр чимэглэсэн байв. Эртний хаадын дээлийг бэлгэдсэн шийдэлтэй бөгөөд хормой хэсгийг нь хээгээр хүрээлсэн нь содон харагдаж байв. Түүний дуунд поп болон морин хуурын чуулгын хөгжимчид ая данг тааруулахын зэрэгцээ монгол дээлээр гоёсон "Гурван охин" хамтлаг вакал хоолойг хийж байна. Харин дуучны өмнүүр Монголын олон ястны хувцас өмссөн Улсын ардын дуу бүжгийн чуулгын бүжигчид бүжнэ. Тайзны зүүхэнтээ "Шуранхай" хамтлагийн дуучид уртын дуугаар хөг нэмэх аж. Цаашид дуулсан дуунууд ч мөн л ийм ая дан, тоглолттойгоор өрнөж байлаа. "Амьдрал намайг дуул гэлээ", "Мөнгөн цагаан үүл" зэрэг "Монгол поп" цомогт нь орсон дуунууд үргэлжлэв. Түүнээс гадна "Хайрын хүч" цомогтоо багтсан "Түүнийг харснаас хойш", "Чи надад дурлаасай" зэрэг хит дуунуудаа дуулж байв. Тэр үзэгчидтэйгээ хамтран дуулахыг хичээж, микрофоноо танхим руу хандуулж байсан ч зочид төдийлөн чанга дуулсангүй. Д.Болд ч дахин дахин "чанга" хэмээн хэлэх боловч танхимд намдуухан дуулах нь л сонсдоно. Магадгүй энэ удаагийн тоглолтод ирсэн үзэгчид нь тийм ч чанга дуулж, сэтгэл хөдлөлөө илэрхийлээд байхааргүй хүмүүс байсан болов уу. Гэхдээ тэд дагаж дуулахгүй ч гэсэн баяр хүргэсэн алга ташилтаараа танхимыг доргиож байв.

Дуучин маань "Чи надад дурлаасай" дуугаа дуулсны дараа хөгжимгүйгээр зочидтойгоо хамтран ....Чи минийнх байгаасай Чимээгүй хүрээд ирээсэй Зүүдэндээ харсан хайр минь Өглөө нь үнэн байгаасай... хэмээн дуулж байснаа "Төрийн ордонд тоглож байгаа минь үнэн байгаасай" хэмээн үзэгчдээ хөгжөөгөөд авсан юм.

Тэрээр дууныхаа дундуур "Урлагийг төрийн хэмжээнд хүлээн авч байгаад төр засагтаа баярлалаа гэхийн зэрэгцээ урлаг, соёлынхноосоо анх удаа Төрийн ордны их танхимд тоглолтоо хийж байгаа би азтай хүн" хэмээх нь содон дуулдсан.

bold

Тоглолтын дараагийн хэсэг хоёр жилийн өмнө нээлтээ хийж, үзэгчдийн талархлыг хүлээж байсан "Би чамд хайртай" киноны ая эгшгээр эхлэв. Улсын филармоны симфони найрал хөгжил тус киноны "Алхам" аязаар хүндэт зочдын сонорыг мялаав. Энэ үеэр дуучин маань дээлээ солиод амжчихжээ. Тэр эртний хийцтэй цэнхэр өнгийн дээл өмсчээ. Дуучин Д.Болд уг нь Хөгжим бүжгийн коллежийн хийл хөгжмийн ангид 12 жил суралцжээ. Гэхдээ дуулж эхэлснээсээ хойш 15 жил нэг ч удаа тайзан дээр тоглож үзээгүй ажээ. Харин энэ удаа хийл хөгжим тоглож зочдодоо бэлэг барихаар шийдсэн байв. Тэр тоглохынхоо өмнө буруу тогловол гараад битгий загнаарай хэмээн мэргэжлийн багшаасаа уучлалт гуйн "хаяагаа манаж" байв. Энэхүү хошигнол нь ч үзэгчдэд таалагдаж байгаа бололтой алга ташин урам өгөв. Тэрээр "Би чамд хайртай-2" киноны дууны эхний бадгийг цахилгаан хийлээр тоглож, харин хоёр дахь бадгийг дуулж байсан нь тоглолтын хэв маягийг нэг л өөр гэдгийг илтгэнэ.

Зочдын хүсэн хүлээж байсан дуу бол "Миний хоёр эрдэнэ" байжээ. Энэ дууг дуулахад үзэгчид үе үе алган ташин баяр хүргэж, хамт дуулна. Тэрээр дуугаа эхлэхийн өмнө "Аав, ээж хоёртоо хайртай гэдгээ Ерөнхийлөгчийнхөө өмнө албан ёсоор хэлье" хэмээн мөн л зочдыг хөгжөөж, тоглолтын уур амьсгалыг сэргээгээд авна лээ.

Тоглолтын төгсгөл хэсэг ирлээ. Танхим чив чимээгүй, тайзны арын том дэлгэцийн гэрэл л гялбалзана. Тэр дэлгэц дээр хоёр морь давхиж буй нь гарах бөгөөд морины давхих чимээ л бүхний анхаарлыг татна. Удалгүй тэр морьдын дээгүүр бүргэд нисэн дуугарна. Бүргэдийн дуу, морьдын төвөргөөн нийлэн нэг л тийм сэтгэл сэргэм дуу авиа танхимыг эзэмдэх ажээ. Энэ бол түүний өвөөдөө зориулан "Монгол поп" цомгийнхоо эхний дуу болгон оруулсан "Хээрийн салхитай аялгуу" дууны эхлэл байлаа. Д.Болдын дуулахтай зэрэгцэн "Шуранхай" хамтлаг уртын дуугаа цангинуулахад олон ястны бүжиг бүжин цэнгэнэ.

Дуучин маань энэхүү дуугаа дуулахдаа танхимд ирсэн зочдоо бие биелгээгээ хийхийг уриалсан юм. Түүний хэлснийг Ерөнхийлөгчөөсөө авахуулаад ирсэн бүх зочид биелүүлэх нь содон харагдаж байв. Ерөнхийлөгч Ц.Элбэгдорж хоёр гараа ялимгүй дээш өргөн биелж байгаа харагдсан бол УИХ-ын гишүүн, АН-ын бүлгийн дарга Ч.Сайханбилэг чамгүй сайн биелээч гэдгээ харуулаад авна лээ. Тэрээр эхнэр болон топ модель Э.Одгэрэлтэй зэрэгцэн суугаад бүгдээр нэгэн зэрэг биелж харагдсан. Түүний хойно суух УИХ-ын гишүүн Су.Батболд ч гэсэн бүжгийн эвсэлтэй гэдгээ нуусангүй.

Зочдоос хамгийн идэвхтэй биелгээ хийж байсан нь Төрийн соёрхолт бүжиг дэглээч С.Сүхбаатар байлаа. Тэрээр босоод ирчихсэн, бусдыгаа уриалан бүжиглэхийг дуудаж байв.

Биелгээг идэвхийлэн хийж байсан өөр хүмүүс бол "Камертон" хамтлагийнхан. Тэд эхнэрүүдтэйгээ босч зогсоод ахлагчдаа хүндэтгэл үзүүлж байлаа.

Ийнхүү хөгжим бүжиг, дуу хуур хосолсон "Монгол поп" тоглолт өндөрлөсөн юм. Төрийн ордонд болж буй анхны поп тоглолт гэдгээрээ онцлогтой байсан болоод ч тэр үү энэ удаагийн тоглолтыг үнэхээр сайн хийхийг дуучин маань ч, зохион байгуулагч "On’n Off" продакшныхан ч хүссэн нь илт мэдрэгдэж байсан юм. Тэд үнэхээр Төрийн ордонд тоглож байгаа гэсэн нэр сүрээ хамгаалж чадсан гэдэгт итгэлтэй байна.

Т.ГЭРЭЛМАА

мэдээ