Мода хөөсөн урлаг соёлынхон

2011-05-18

Сүүлийн үед урлаг соёлынхон дунд хэд хэдэн мода дэлгэрээд байна.

Энэ мода нь орчин үеийн залуусыг байлдан дагуулах гэхээсээ илүүтэйгээр нэг тогоонд чанагдаж буй залуусаа байлдан дагуулдаг гэвэл илүү оносон болох болов уу. Гэхдээ рок попынхон үүнд илүүтэй өртөж байгаа нь тун сонин. Ингээд сүүлийн үеийн хамтлаг дуучдын дунд чухам ямар мода дэлгэрээд байгааг сонирхуулъя.

Мода 1: Урлагийн шинэ үеийнхэн үү, үдшийн үзүүлбэр үзүүлэгчид үү
Хамгийн хачирхалтай нь сүүлийн үед дэлгэрээд байгаа нэгэн моданд охид бүсгүйчүүд илүү их өртөж байна гэлтэй. Гэхдээ ихэвчлэн хамтлаг гэгчийг байгуулж хамтаараа лаг байхыг хүссэн охид өртөж байгаа нь тун сонирхолтой. Нэгдсэн нэг санаа бодолтой нэг хүн шиг болохын тулд хамтлагийн охид хэрдээ л зовдог гэдэг. Наад зах нь хөрөнгө санхүүгээр ивээн тэтгэдэг нууц ноёнтон олохоос эхлээд тэдэнд хүндрэлтэй асуудал мундахгүй.

За энэ ч яахав өөрсдийнх нь менежментийн асуудал. Юугаа яаж шийдэх нь өөрсдийнх нь мэдэх хэрэг. Харин сүүлийн үед хамтлаг дуучдын дунд дэлгэрээд байгаа нэгэн модаг ойлгохгүй байгаа юм. Хальт харахад хувцасгүй ч юм шиг харваас бага зэрэг хувцастай. Нэг тиймэрхүү дүр төрхийг та тайзан дээрээс олонтаа харсан л байх. Охид хүүхнүүд сүүлийн үед өндөр зэгзгэр болсон нь мэдрэгддэг ч иймэрхүү хагас нүцгэн дүр төрх цэвэр ичимтгий монгол бүсгүйчүүдэд хэр тохирох юм бол гэж заримдаа боддогоо нуугаад яахав.

Үнэндээ урлаг соёлынхон дунд хамгийн эхэнд дэлгэрээд байгаа мода нь энэ. Барууны орнуудын бүсгүйчүүдээс үүдэлтэй гэж хэлж болох энэ мода охидын хамтлагийг бүгдийг нь тойролгүй дайрч байна. Сайн муу үлгэр дууриал үзүүлж буйг бүү мэд. Ямартаа фенүүдээ дуу хоолойгоороо гэхээсээ илүүтэйгээр хувцаслалтаараа татах гэж оролдож буйн эхний илрэл нь энэ гэлтэй. Хамгийн сүүлд гэхэд “Гурван охин” хамтлагийн бүсгүйчүүд охин насаа гээсэн гэдгээ батлах гэсэн шиг гуя хасаа гялалзуулан дотуур хувцастайгаа тайзан дээр гарч ирж хэсэг нөхдийг “эвгүйцүүлэв”.

Хамгийн хачирхалтай нь энэ мода рок попын бараг бүх охидын толгойг эргүүлж байгаа гээд хэлчихэд нэг их буруудахгүй. Үсээ ягаан ногоон өнгөөр алаглуулж онцгой содон дүр төрхтэй гарч ирж сургууль цэцэрлэгийн охидыг араасаа хуйлруулж байсан “Гала” хамтлагийн Ануг хүртэл живүүлж орхив. За тэгээд алс холын АНУ-д олон жил болж гадаадын соёлд суралцсан “Sweetyemotion” хамтлагийг хүртэл байлдан дагуулсан.

Магадгүй ингээд бичихээр зарим хүмүүс энэ бол хүний эрхийн асуудал яагаад болохгүй гэж хэлэх байх л даа.Гэхдээ л урлаг соёлынхон гэдэг бусад хүмүүсээс нэг алхмын өмнө байх ёстой бас бусдыг уриалан дуудаж байх ёстой хүмүүс. Энэ бичигдээгүй хуулийн дагуу охид бүсгүйчүүд маань тэднийг даган дууриаж гудамж тайлбайгаараа дотуур хувцастайгаа яваад байвал наанадаж манай улсын нэр сүр цаанадаж эрчүүд нүдээ хаана нуух вэ.

Энэ байдлаараа бол тун удахгүй монгол охидод хувцас гэдэг зүйл хэрэггүй болох бололтой. Ямар сайндаа телевиз харж суусан нэгэн буурай “Энэ урлагийнхан чинь өмсөх хувцасгүй болчихсон юм уу даа” гэж бувтнаж асуухав дээ.

Мода 2: Эрчүүд юундаа дутах вэ?
Социализмын үед урт үс гоё ганган ээмгээрээ уралддаг байсан рок попын эрчүүд өдгөө арай өөрөөр уралдаж байна. Тодруулбал тайзан дээр майктайгаа гарч ирээд бодибилдингийн үзүүлбэр үзүүлэх гээд байгаа юм уу эсвэл дуу дуулах гээд байгаа юм уу гэдэг нь мэдэгдэхгүй нөхөд Болдоос эхлээд байнаа, цаана чинь. Ямар сайндаа л хошин урлагийнхан гэж шооч нөхдүүд хараанд өртөж байхав. Болдын өөрийнх нь брэнд болсон В үсгийг нь хэтэрхий томоор хийлгэж хүзүүнээсээ зүүчихээд дуу дуулж байгаа дүр эсгэсэн хэрнээ булчин шөрмөсөө үзүүлж байгаа мэт аяглаж буй Болдыг бид бишгүй харсан.

Хэдийгээр энэ нь хошин шогийнхны нэг үзүүлбэр ч үнэний ортой. Нэг үгээр хэлбэл Болд рок попынхон дунд майктайгаа тайзан дээр гарч ирэх мода дэлгэрүүлсэн энэ. Түүний энэ модыг ВХ үг дуугүй дууриаж байгаа. Түүнчлэн “Номин талст” хамтлагийн ахлагч Батсүх гээд л хэд хэдэн хүн дагаж буй нь харагддаг. Мэдээж юм бүр муу байна гэж юу байхав. Юм бүр сайн байна ч гэж юу байхав. Хаа очиж рок попын эрчүүдийн дэлгэрүүлж буй энэ мода сайн үр дүн дагуулж байна. Учир юу хэмээвээс өсвер насны хевгүүд тэднийг дууриан биеийн тамираар хичээллэх дур сонирхолтой болгож байгаа гэсэн.

Мода 3: Ийм амархан байсан гэж үү?
Урлаг соёлынхон дунд дэлгэрээд буй бас нэг мода нь төрийн дээд одон медалиар шагналуулах явдал. Өөрөөр хэлбэл нэг тоглолт хийгээд л Соёлын тэргүүний ажилтан болчихдог мода хэтэрхий хавтгайраад байна. Хамгийн тод жишээ нь бас л “Гурван охин” хамтлаг. Хүүхэд байхаасаа л урлагт хөл тавьж бас ч гэж цөөнгүй үзэгч сонсогчтой болсон тэд зургаан жилийн дараа анхны бие даасан тоглолтоо хийснийг та бүхэн мэдэж байгаа байх.

Нэлээд их хүч хөдөлмөр зарцуулсан тэдний тоглолт хүмүүст ч нэлээд сайн хүрсэн юм билээ. Харин тэднийг галтай тоглолт хийгээд тайзнаас буух болоход Монгол Улсын соёлын тэргүүний ажилтан болгочихлоо. Насаараа урлагт зүтгээд үзүүрээс нь ч атгаж чадаагүй энэ том шагнал тэдний хувьд тун хялбархан олдсон нь үнэндээ хачирхалтай. Гэхдээ энэ ч нэг их хачирхаад гайхаж хүлээд аваад байх асуудал биш болж дээ.

Урлагт зүтгэж байгаа хүн бүр л нэг дуу дуулаад түүнийгээ мөнгөөр зодож олны сонорт хүчээр наачихаад арын хаалгаар Соёлын тэргүүний ажилтан болдог болчихоод удаж байна. Хамтаараа лаг байж амжилтанд хүрсэн зарим нэгийг нь алаг үзчихээд бөөн юм болж байсан ч удаатай. Хэнийг хэлээд байгааг та гадарласан л байх. Хэдэн жилийн турш монголын охидын хамтлагг нэгэн өвөрмөц нэртэй хамтлаг бүртгэгдсэн нь “Киви” байв.

Хатуу чанга продюссертай гэгддэг тус хамтлагийн нэгэн гишүүн бас л нэг тоглолтынхоо дараа энгэрээ цоолж хөл нь газар хүрэхгүй баярлаж байсан нь саяхан. Хүүхнүүд л болсон хойно нэг нэгэндээ атаархаж тунирхалыг үг чулуудсаар хэдэн сарын дараа нөгөөх нь бас Соёлын тэргүүний ажилтан гэж дуудагдахаар болсон.

Үнэндээ насаараа зүтгээд олж чадахгүй өндрөөс өндер босготой тэрхүү шагнал нь орчин үеийн хүүхдүүдэд ийм хялбархан олдчихож байгаад гомдоллох хүн цөөнгүй бий. Шагналын үнэ цэнэ буурсан гэж ярьдаг ч арай л нэг тоглолтыг нь Соёлын тэргүүний ажилтан гэсэн төрийн дээд одон медалиар мялаачихмааргүй санагдах юм.

Х.Гиймаа
Эх сурвалж: “Улаанбаатар таймс”

Мода хөөсөн урлаг соёлынхон
Tweet
Bolod.mn

Сэтгэгдэл (3)

Уншигчдын оруулсан сэтгэгдлийн талаар манай сайт хариуцлага хvлээхгvй болохыг анхаарна уу.
Үгийн санд шүүлтүүр хийсэн болно

Зочин
ккк жужигчин отгонöýöýã-èéã õэлчижээ-болжээ ñàíàë íèéëæ áàéíà

2011-05-19 | 10:38:11 | 203.169.51.218 |

Зочин
Солонгосуудаас л дуурайж байгаа юм.Солонгосууд 15-16 настай охидаар тиймэрхүү бужиг гэхэд инээдтэй юм хийлгэж, бас нэг гэрт байлгадаг.Яг унэндээ тэд боол шиг л хуний эрхээр байдаг утсан хүүхэлдэй.Шутээд байх юм үгүй.Тэд жинхэнэ од биш. Монголчууд тийм л битгий болоосой.

2011-05-19 | 00:00:06 | 210.106.206.52 |

Зочин
ок санал нийлж бна

2011-05-18 | 17:06:28 | 182.160.22.98 |