“Осол аваар, цөлжилт нэмэгдэж байгаагаас зам хаав” гэсэн маш тодорхой үндэслэлээр Тавантолгойн нүүрсний замыг хаасан ч Засгийн газрын гишүүд цоожтой хаалганы цаана зодолдохоос наагуур юм болж, түүнд нь УИХ-ын нэг бус гишүүн хутгалдаж хэрүүлийн алим шидэлцсээр нээсэн нь хоёр хүний аминд хүрлээ.

“Засгийн газар, УИХ-д ороод суучихсан, нэг ёсондоо эрх мэдэлд нэгэнт хүрсэн архи, нүүрсний бүлэглэл хүчээ авч байна” гэсэн шүүмжлэл хоёр хүний амь насаар ийнхүү батлагдаж байна.

“Шороон замыг засч сайжруулсан шороон зам болгосон тул” гэсэн үндэслэлээр Тавантолгойн замыг нээснийг холбогдох албаныхан хэлж байгаа. Хүнд даацын машин явдаг шороон замыг сайжруулсан шороон зам болгоод нэмэр байна уу. Байгаль орчин сүйддэг, осол аваар гардаг хэвээр, мөнгө “угаасан” ажил болсноос ахиц гарсангүй.

Тавантолгойн замыг хаах шийдвэр гаргасан Зам, тээвэр, барилга хот байгуулалтын сайд Х.Баттулгын хувьд үнэхээр эр зориг гаргасан том алхам байсан. Гэхдээ нүүрсний энэ том лоббиг дийлсэнгүй. Зам хаасан нь зарим хүний хэлж байгаа шиг шоу байгаагүй. “Осол аваар, цөлжилт нэмэгдэж байгаагаас зам хаав” гэсэн тодотголтойгоор тэрхүү шийдвэрийг гаргасныг Авто замын газраас сэтгүүлчдэд мэдээлж байсан нь саяхан.

Тавантолгойн замд гарсан ослын улмаас өнгөрсөн онд 23 хүн амь насаа алдсан нь цагдаагийн мэдээлэлд тэмдэглэгдсэн. Энэ онд мөн 12 осол гарч үүний улмаас гурван хүн амь насаа алдсан талаар ч хэвлэл, мэдээллийн хэрэгслүүд нэгэн зэрэг мэдээлсэн нь баримт болж /зарим сайтын мэдээллийг өчигдөр татаж эхэлснийг эс тооцвол/ үлджээ.

Хуулийн сайд яагаад нүүрсний замд санаа зовж салбарын сайдыг элдвээр шахаж зам нээсний эхний өдөр юу болов. Тавантолгойн замыг нээлгэхээр сайд дарга нар лобби хийсэн үү хийсэн, зам нээсэн үү, нээсэн, тэнд хэрэг гарсан уу гарсан, хүний амь нас эрсэдсэн үү эрсэдсэн гээд асуудал шилээ даран үүсч байна. Одоо хэн нь хариуцлагаа шударгаар хүлээхийг харах л үлджээ.

Ялангуяа өөрийгөө Монголын цорын ганц шударга хүн гэж үздэг сайд Засгийн газрын хуралдаан дээр “Чи Тавантолгойн замыг яахаараа хаадаг юм бэ, бушуу нээ” хэмээн ЗТБХБ-ын сайд Х.Баттулга руу үсчиж байсан тухай хаалттай хуралдааны нээлттэй тэмдэглэлүүд нэг бус хэвлэл, мэдээллийн хэрэгсэлд гарсныг саная.

Тавантолгойн нүүрсний зам хаагдсанд Ц.Нямдорж сайдаас дутуугүй бачуурсан УИХ-ын гишүүд ч цөөнгүй байсныг хэвлэлүүд мөн онцолсныг эргэн сануулъя. Тухайлбал, ЗГХЭГ-ын дарга Ч.Хүрэлбаатар, УИХ-ын гишүүн Ж.Сүхбаатар нар ихээхэн бухимдсан гэж байгаа. Энэ юуг харуулж байна вэ гэвэл УИХ, Засгийн газар хэдхэн олигархиудын гарт орчихсон, цоожтой хаалганы цаана өөрсдийн эрх ашгийн төлөө “алалцаж” суудгийг ард түмэндээ жинхэнээс нь мэдрүүллээ.

Монголчуудыг тэжээнэ гэж сурталчлаад байгаа Тавантолгойн нүүрсний орд газарт Засгийн газар, УИХ-ын гишүүдийн бизнес цэцэглэж, хүнд даацын машинууд өмнөд хөрш рүү өдөржин, шөнөжин нүүрс зөөдөг юм байна. Хамтын хүчээр лоббидсоор байгаад хаагдаад байсан нүүрсний замаа нээтэл нь УИХ-ын гишүүн Б.Чойжилсүрэнгийн “Хурд авто” компанийн машин мөргөлдөж хоёр хүн амь эрсэдлээ. УИХ дахь нүүрсний лобби бүлгийн нэг гишүүн нь Б.Чойжилсүрэн гэдгийг энэ осол илрүүллээ.

Ганц энэ ч бус хэд хэдэн хүний амь настай холбоотой хэрэг явдалд түүний нэр холбогддог. Тухайлбал, Увс аймгаас УИХ-д сонгогдож гарч ирснийх нь дараахан нэгэн бүсгүй учир битүүлгээр амь эрсэдсэн нь түүний нэртэй холбогдож, хүний гарт амиа алдсан байтал холбогдох байгууллагууд өөрөө амиа хорлосон гэсэн хачирхалтай дүгнэлт гаргасан нь хэвлэлээр гарсан. Сүүлийн үед түүний хувийн компани Улаанбаатарын аль өнгөтэй өөдтэй газрыг орон сууцаар дүүргэж байгаа. Зайсангийн ам, Цэнгэлдэх хүрээлэнгийн орчим баригдсан “Рапид харш” нэртэй өндөр барилгууд түүнийх. Б.Чойжилсүрэнгийн компанийн барилгын ажилтнууд бэртэж гэмтсэн, тэр бүү хэл долоо, найман давхраас хүн унаж нас баржээ гэсэн мэдээлэл байнга шахам гардаг ч хохирогчдын амыг мөнгөөр барьчихдаг гэсэн таагүй мэдээлэл дуулддаг.

Бизнесийнх нь хөлд дандаа хүний амь нас эрсдэж байдаг энэ эрхэм дахиад хэдэн хүний амиар “наадах” вэ гэсэн асуудлыг ч энэ дашрамд сөхөх хэрэгтэй. Машин мөргөлдөж хүний амь эрсдэнгүүт осолтой замыг нээхийг шаардаад байсан эрхмүүд “би ч буруугүй, би ч буруугүй” хэмээн мэдэгдэж, төрийн хэдэн байгууллага бие бие рүүгээ “чи шийдвэр гаргасан” гэцгээн бухаж байна. Ийм том шийдвэрийг төрийн хэдэн байгууллага гаргачихдаг юм биш. Ёстой жолдох байлгүй. Тэд бүү хэл төрийн сайд нь хорих гээд чадалгүй дарамтанд орж замаа нээсэн юм чинь. Энэ хэргийн хариуцлагыг цоожтой хаалганы цаана зам нээлгэхээр загнасан, дарамталсан Засгийн газар, УИХ дахь нүүрсний лобби бүлэг л хүлээх учиртай, өөр хэн ч биш.

ХУУЛЬ ЗҮЙ, ДОТООД ХЭРГИЙН САЙД Ц.НЯМДОРЖ:

-Засгийн газрын хуралдаанаар нүүрсний тээвэрлэлтийг зогсоосон тухай асуудал хөндөгдөхөд миний бие ингэх шаардлагагүй гэж үзсэн. Улсын төсөвт 200 тэрбум төгрөгийн орлого нүүрсний тээвэрлэлтээр орж ирэх ёстой. Тээврийг зогсоочихоор төсвийн орлого бүрдэхгүй болж ирнэ. Энэ үүднээс нь асуудлыг ярьсан. Чухамдаа бол үүний цаана бизнесийн өрсөлдөөн л явж байгаа юм.

Удахгүй хатуу хучилттай авто зам ашиглалтад орох гэж байхад тээвэрлэлтийг зогсоосон нь “Энэ надаас өрсөөд хэдэн төгрөг олох нь” гэсэн өрсөлдөөнтэй нь л холбоотой. (Төрийн ордон. “Г” танхим. Хэвлэлийн бага хурлын үеэр 2011.05.13)

ЗАМ, ТЭЭВЭР, БАРИЛГА ХОТ БАЙГУУЛАЛТЫН САЙД Х.БАТТУЛГА:

-2009 оноос эхлээд замтай холбоотой асуудлаа нүүрс экспортлогч компаниудад олон удаа тавьсан. “Замаа тавиад тээвэрлэлтээ хий” гэсэн шаардлага тавьсан. Тэд мөнгөгүй биш учраас ухамсраараа ойлгох ёстой. Мэргэжлийн байгууллагууд нь газар дээр нь хяналт тавих ёстой. Бид зам хаасан шийдвэртээ бат зогсоно. 2-3-хан компани нүүрс экспортлоод улсын төсөвт овойж оцойсон их татвар орж байгаа зүйл байхгүй. Татвараа нууж хаагаад л хагас дутуу төлдөг байх. Лав бүтэн төлдөггүй. Нууж хаасан мөнгө нь байж л байгаа. Харин түүнийг нь илрүүлэх хэрэгтэй. (Засгийн газрын хуралдааны дараа сэтгүүлчдэд өгсөн мэдээллээс 2011.04.20)

Ч.Үл-Олдох

"Зууны мэдээ"

Засгийн газар, УИХ дахь нүүрсний лобби хоёр хүний аминд хүрлээ
Tweet
Bolod.mn

Сэтгэгдэл (2)

Уншигчдын оруулсан сэтгэгдлийн талаар манай сайт хариуцлага хvлээхгvй болохыг анхаарна уу.
Үгийн санд шүүлтүүр хийсэн болно

Зочин
Хүний амь эрсэдсэн хариуцлагыг хэн хүлээх вэ? Хүлээх хүн олдохгүй бол ирэх сонгуульд эрх барьж буй хоёр намд хариуцлага тооцохоос өөр гарц алга даа.

2011-05-18 | 13:49:04 | 180.149.65.149 |

Зочин
энэ балай замаа тvr xaaj baigaad zasmal zamaa taviad nvvrsee zoogoochee,zasgiin gazriin gishvvd,nertei xeden tenegvvd mongolchyydiin ami nasaar naadaad dyyslaa sh dee.Ami nasaa aldsan xvnii ard vldej bgaa xvmvvsiin ireedvi yamar boloxiig xen medex yum bee,Zasmal zam tavix xygatsaand aldsan aldagdlaa noxox bol amarxan shvv dee....daxin ene zamaa xaaxgvi bol daraagiin zarchmaar temtsexed bid belen bna shvv ard tvmen chini......nvvrs zooxgvi bol xyatad yls svirchix geed bgaam shig l bxiin bolildoo ta nar....Energy Resyrs gej sxan yarisan goviin ard tvmniig noxoinoos dor vzsen kompani bolioroi zaa....anxaaryyllaa shvv stetsiin mon bysad symiin irged belen bna shvv....

2011-05-18 | 13:02:47 | 202.179.11.107 |

Мэдээ
Гадаад мэдээ
Видео