Нар тэртээд газрын гадаргууд шингэн, өдрийн гэгээ тасарч байгаа хэдийч салхины хүч хэвээрээ сэвэлзэн үлээсээр. Жижигхэн хав нохой явган хүний засмал зам дээгүүр дэгдэн гүйж байснаа цэцэрлэгт хүрээлэнг нэвсийтэл дарсан хатсан навч руу ороод тонгочиж гарлаа. Навчин дундуур гүйж байснаа шар тууз уяж тэмдэг тавьсан нэгэн зулзган модны ёроолд орчин нэг хөлөө өргөн шээх хав нохойгоо харангаа эзэн нь гаансаар үнэтэй тамхи нэрэн зогсно. Тэд энэ цэцэрлэгт хүрээлэнд яг л эзэн нь юм шиг байх аж. Жонатан Браун хэдийгээр сэтгэл нь их түгшиж, санаа зовж байгаа ч гадна талдаа юу ч үл анзаарагдна. ТТГ-ын дотоод хамгаалалтын ажилтнууд ажил үүргийнхээ дагуу үе үехэн түүнийг дагаж, давхар ажиглаж байдаг нь хэвийн үзэгдэл юм. Гэвч өнөөдөр л тэр өдөр нь биш байгаасай гэж хүсч байв. Түүнээс ч муу зүйл бол ХМТ түүнийг ажиглаж байвал бүр балай хэрэг болох юм. Хэр дээгүүр албан тушаалтай нь хамаагүй тэд үргэлж хэн нэгэн чухал хүмүүсийг байнга хараандаа байлгадаг байв.

Хав нохой зулзган модыг наана цаана нь гаран хэд хэд тойрсноо буцаж эргэн явган хүний зам дээр гарч ирснээр нохойны эзэн тэр хоёр цэцэрлэгт хүрээлэнгийн дундуур үргэлжлүүлэн алхаж одлоо. Энэ уулзалтын талаар Браун өдөржингөө бодол болон суусанч сэтгэл түгшсэн хэвээрээ. Гэртээ ойрхон энэ паркад ийм төрлийн уулзалт хийнэ гэдгээ тиймч сайхан санаа гэж бодохгүй байлаа. Эх орноосоо урван, гадаадын тагнуулд ажиллах болсон Роберт Ханссенг яг л ийм маягаар гэрийнх нь ойролцоох паркаас баривчилсан билээ. Яг таг санахгүй байгаа ч тэр бараг л гэрийнхээ нохойгоо салхилуулан явж байгаад баривчлагдсан байх. Браун өөрийнхөө нохой Спаркыгаа хараад муу ёрын давхцал байна даа гэж бодлоо. Дээр дурдсан Ханссен оросын тагнуулын байгууллагад мэдээлэл өгдөг байсан. Харин Браун хэний ч төлөө тагнуул хийгээгүй, зүгээр л буруу юмыг зөв болгох гэж чармайж байгаа гэж өөрийгөө тайвшруулах ажээ. Тэр Стивкентэй уулзснаар ямарч хууль зөрчөхгүй гэж өөрийгөө итгүүлэх гэж оролдох боловч, мань чөлөөнд гарсан шүүгч хуулийг үл ойшоох нь бас л хуулийн хариуцлага хүлээх үндэслэл болдог гэдгийг бүр анх хуулийн сургуульд элсэн орохдоо л мэдэж авсан байлаа.

ТТГ-ын дэд захирал гэсэн энэ албан тушаалыг хүлээн авахдаа Үндэсний аюулгүй байдлын нууцыг үл задруулах бичигт гарын үсэг зурсан билээ. Тэрхүү гэрээ бичиг нь өргөн асуудал хамарсан маш олон зүйлтэй болохоор хэрвээ шаардлагатай бол ТТГ ямар нэг заалтыг зөрчсөн гээд бариад авах бүрэн боломжтой. Ямарч хэрэг тулгалаа гэсэн мань эр өөрийгөө хамгаалж дөнгөнө гэж бодох аж. Урьд нь шүүгч байсан нэр хүнд нь түүнийг нийгмийн шударга зүтгэлтэн гэж харагдуулдаг болохоор аливаа буруу юмыг зөв болгоход чиглэсэн үйлдэлээ зөвтгөж чадна гэж тооцоолж байлаа.

Үргэлж үдэш орой болтол ажиллахын зэрэгцээ ажлын хүнд дарамт нь түүнд хэтэрхий ядаргаатай мэт санагдах авч өөрт нь хууль ёсоор оногдох ёстой байсан албан тушаалыг нь Ирень Кеннеди булааж байгаа нь яавч хүлээн зөвшөөрч болохгүй явдал юм. Кеннеди болон бусад орлогч нар өөрөөс нь ямар нэг юм нуугаад байна гэж Браун харддаг байлаа. Тангуулын ажлын ямарч туршлагагүй, холбооны шүүгч байсан түүнд зарим хүмүүс итгэхгүй байсаар байгаа нь илт. Браун ТТГ-ын захирал болоодохвол дээрх уур амьсгал санаанд оромгүй хурднаар өөрчлөгдөх болно гэхээс бүр тэсч ядна. Өөрт нь таалагдахгүй хуучин дарга нарыг нь халж өөртөө үнэнч байж чадах, аливааг хуулийн хүрээнд хийх тийм хүмүүсийг олж зохих ёсны албан туушаалд нь тавих талаар аль хэдийн төлөвлөж амжсан байв. Тэгээд цаг нь ирэхээр Кларкын сууж байгаа тэр дээгүүр албан тушаалд очих болно.

Салхи түр зуур намдав. Энэ үед араас нь ирж яваа хэн нэгний хөлийн чимээ сонсогдлоо. Дотроо түгшсэн хэвээрээ мөрөн дээгүүрээ эргэн харвал нэгэн үл таних эр алхаж байгаа нь харагдав. Спарки дахиад л замаас гаран навчин дундуур дэгдэж гарахад Браун энэ боломжыг ашиглан эргэн харж нөгөө эрийг сайтар харлаа. Өөр рүү нь дөхөн ирж яваа үл таних эртэй харц солилцоод хоорондоо юм ярилгүй зүгээр толгой дохин мэндлэв. Тэр Стивкен гэгч чухам ямархуу төрхтэй хүн болох талаар Браунд ямарч төсөөлөл байсангүй. Хэрвээ энэ занга байвал яах вэ гэсэн аймшигтай бодол зурсхийн орж ирлээ. Зүрхний цохилт нь түргэсээд ирэв. Петер Камерон хэдхэн долоо хоногийн өмнө ор сураггүй алга болсон. Магадгүй энэ өөрийнх нь ээлж болж байгаа ч юм билүү. Үл таних эр инээмсэглээд гадуур цувныхаа халааснаас ямар нэг зүйл гаргаж ирэхээр нь Браун давхийн голоор нь хүйтэн оргиод явчихав. Тэгээд өөрийн мэдэлгүй гараа өргөлөө.

Энд болох гэж буй нууц уулзалтын талаар Стивкен огтоос санаа зовохгүй байлаа. Хууль бус гэмээр зүйл өөрийнх нь зүгээс байхгүй. Хуучин ХМТ-ны мөрдөгч байсан мань эр зүгээр л Конгрессын нэг гишүүний хүсэлээр ТТГ оролцсон ч бай, үгүй ч бай хамаагүй ямар нэг хуулийн гадуурх хэргийг судалж үзэхээр ирж байгаа нь энэ болой.

Стивкен баруун гараа халааснаасаа гаргахдаа Браун түүнийг хараад цочиж байгааг харж амжив. Хэдэн алхамын зайд очиж зогсоод,

-Шүүгч Браун, та сайн байна уу? гэж мэндлэв.

Браун энэ үед сая л нэг юм сэхээ авч гараа буулгаад,

-Би ... сайн байна аа гэж түгдрэв.

-Намайг Норб Стивкен гэдэг гээд гараа сунгав.

-Аан..., сайн байна уу гээд Браун түүний гарын барилаа.

-Таныг маш их хүндэтгэдэг нэг эрхэм таныг зааж өгсөн юм л даа.

-Тийм үү. Тэр чинь хэн байх билээ гэж Браун эелдэгээр асуув.

Браун түүний энэ асуултын чихнийхээ хажуугаар өнгөрөөгөөд,

-Тэр хүн маань өөрөө энэ асуудалд холбогдох тиймч дуртай биш байгаа юм. Тэгэхдээ таныг маш зарчимч, шударга хүн хэмээн хүндэлдэг юм билээ.

-Эрхэм Стивкен, та ч намайг бараг барьц алдуулах шахлаа. Ингэхэд та юу хийдэг билээ?

-Би энэ Вашингтонд нэг жижиг хамгаалалт, зөвлөгөөний бизнес эрхэлдэг юм л даа. Үүнээсээ өмнө ХМТ-нд арван нэгэн жил тусгай мөрдөгч байлаа.

-Өө за.

-Танд надад зориулах хэдхэн мөч байхгүй биз. Би танаас цөөн хэдэн юм асуух гэсэн юм?

Браун юу ч дуугаралгүй шууд эргэж хараад алхаад явчихав. Стивкен түүнийг гүйцэж хажууд нь зэрэгцэн ирээд,

-Шүүгч Браун, би тантай илэн далангүй байя. Таныг шүүгч байх үед би хэд хэдэн хэрэг барьж тан дээр орж байсан. Тэгээд таныг өөрийн шүүх хурлын танхимаа яг л ёс журмын дагуу авч явдаг байсныг мэдэх болсон доо. Мөн та ХМТ-нд нилээд хатуу ханддаг байсан байх, тийм үү?

-Таны урьд ажиллаж байсан тэр газар заримдаа бусдын адил л хуулийг даган мөрдөхөө мартчихдаг байсан юм.

-Энэ тал дээр миний хувьд маргах зүйл алга аа, Шүүгч ээ гээд хэсэг дуугүй алхаснаа үргэлжлүүлэн,

-Харин таны одоо ажиллаж байгаа газрын хувьд та юу гэж хэлэх байна? Тэд үргэлж дүрмийн дагуу тоглодог уу?

-Наадах чинь сонирхолтой л асуулт байна. Ингэхэд хэн таныг надтай уулз гэж явуулсан юм бэ? гээд явган хүний зам дээр дахин гарч ирж байгаа хав руугаа харсан чигээрээ асуув.

Стивкен түүний асуултанд шууд хариулсангүй. Асуултанд нь хариулахгүй өнгөрөөдөг юм билүү гэж бодсноо түүнд итгэж болох эсэхээ туршиж үзэхээр,

-Конгрессман Рүдин гэлээ.

-Аан, Альберт уу? Тэр ч миний одоогийн ажиллаж байгаа газарт тэгтлээ дурлаад байдаггүй юм.

-Та Холбооны засгийн газрыг хэлж байна уу эсвэл ТТГ-г уу?

-Үгүй дээ. Цаадах чинь Холбооны засгийн газрын томоохон дэмжигч нь байхгүй юу. Би ТТГ-ыг хэлж байна.

-Конгрессман Рүдин бодохдоо Др. Ирень Кеннеди ТТГ-ын дараагийн захирал байхад тохирох хүн биш гэж байх шиг байна билээ.

-Др. Кеннеди бол маш чадварлаг хүн.

-Би тэгж л сонссон юм байна. Харин тэр дүрмийн дагуу тоглох болов уу эсвэл дүрмээ үе үехэн зөрчөөд байх болов уу?

Сенатор Кларкын явуулсан энэ шинэ танил руугаа Браун сүрхий гэгч нь хараад,

-Та юу гэж хэлэх гээд байна, Эрхэм Стивкен?

-Би юу гэх гээд байна вэ гэвэл та урьд нь ХМТ-ныхонд яггүй хатуу ханддаг байсан. Харин одоо би таныг урьдын байр суурин дээрээ хэвээрээ байна уу эсвэл санаа бодол тань өөрчлөгдсөн юмуу гэж гайхахад хүрээд байгаагаа нуух чадахгүй байна л даа.

-Та миний зарчим, шударга байдлыг маань шалгаах гээд байна уу?

-Үгүй дээ, Эрхэм ээ. Таныг одоогоор тун эгзэгтэй байдалд орчихоод байгааг тань би мэдэж байгаа юм. Тэгээд энэ асуудал тань цаашид улам хүндрэх болно гэж хэлэх гэсэн юм. Хэрвээ дараагийн долоо хоногт Кеннеди батлагдчихвал та энэ байгаа байран дээрээ үлдэх байх даа.

-Таны надаар тоглуулах гээд байгаа энэ тоглоом чинь их аюултай болохыг мэдэж байна уу?

-Үгүй ч байж болно. Конгрессман Рүдин энэ хэрэгтээ таныг огт татан оруулах гээгүй юм шүү. Тэгээд яг үнэндээ бол Кеннедиг бус таныг тэр албан тушаал дээр байх ёстой хүн гэж үздэг юм билээ.

-Наадах чинь юу ч өөрчлөхгүй. Жаахан шударга ярилцъя л даа. Яахав би зарим нэг юм мэднэ ээ. Гэвч хэрвээ би энэ талаараа Конгрессманы байнгын хорооны өмнө очиж мэдүүлэг өгөх юм бол би хэзээч энэ хотод дахиж ажил олно гэж үгүй.

-Конгрессман энэ талаар мэдэж байгаа. Тиймч болохоор энэ хэргээс болж тань руу бүгд анхаарлаа хандуулж, нэр хүндэд тань сэв суулгахыг хүсэхгүй байгаа юм. Яг одоогийн байдлаар түүнд Кеннедиг батлагдахаас өмнө амжиж хугацаа хожиж болох зарим нэг баттай мэдээлэл хэрэгтэй болоод байгаа билээ гэж өчөөд Стивкен зогсон Брауны тохойноос нь татан өөр рүүгээ харуулан зогсоогоод цааш нь үргэлжлүүлэн,

-Хэвлэл мэдээллийнхэнд хандаж болох ямар нэг хууль ёсны баримт. Ланглий дотроос нэрээ нууцалсан хэн нэгний баттай мэдээлэл гэлээ.

-Тэр батлагдах хугацааг жаахан хойшлууулах хэрэгтэй байгаа юм уу эсвэл бүр мөсөн таслан зогсоох гээд байгаа юм уу?

-Таслан зогсоохыг илүүд үзэж байгаа гэдэгт би маш итгэлтэй байна. Тэрээр таныг тэр албанд илүү тохирох хүн гэж үзэж байгаа гэдгийн би танд түрүүн хэлсэн байх аа.

Браун цаашаа эргэн харж, замаар үргэлжлүүлэн алхаж эхлээд эргэж харалгүйгээр,

-Надад бага зэрэг бодох хугацаа хэрэгтэй байна гэв.

-Намайг өршөөрөөрэй, Эрхэм шүүгч ээ. Бидэнд тиймч их хугацаа алга. Дараагийн Даваа гарагт Сенатын Тагнуулын байнгын дэд хороогоор орох гээд байгаа болохыг та мэдэж байгаа биз дээ.

Браун алхаж явснаа гэнэтхэн зогсоод,

-Тантай ярилцахад их сонирхолтой байлаа, Эрхэм Стивкен гээд гараа сунгав. Тэд гараа барилцах үед Браун түүнийг өөр рүүгээ татаад бараг чихэнд нь шүргэх шахан,

-Маргааш өдий үед хүрээд ир. Бид арай илүү зүйл ярилцаж болох юм гэв. Ингэж хэлээд Стивкений гарыг тавьж, цааш эргэн түргэн түргэн алхаж одоход үдшийн бүрий түүний уруул дээр тодрох инээмсэглэлийг халхалж байлаа. Жинхэнэ бодит амьдрал дээр мэдээлэл олж авах, түүнийг наймаалцах нь Брауны төсөөлж байснаас хамаагүй зугаатай хэрэг болохыг мэдэж аваад сэтгэл нь хөнгөрөөд ирлээ.

АНДРЬЮС АГААРЫГ ЦЭРГИЙН БААЗ, МЭРИЛАНД,

БААСАН ГАРАГИЙН ӨГЛӨӨ

АНУ-ын Агаарын цэргийн онгоц газардах дөхөж байна. Италийн Авиано дахь АНУ-ын Агаарын баазаас өнөө өглөө нар ургах үед хөөрсөн аж. Тэр онгоцонд ердөө хоёрхон зорчиг яваа бөгөөд нэг нь унтаж, нөгөө нь гүн бодолд дарагдан сууна. Нислэгийн эхний үед жаахан унтаж авсан боловч нойрноос илүүтэй бодох, төлөвлөх зүйл маш их байсан болохоор төд удалгүй босоод ийнхүү сууж байгаа нь энэ болой.

Мийч Рапп онгоцны цонхоор харан сууна. Тэртээ доор Мэриландын хөдөөгийн байдал харанхуйд умбасан харагдна. Хаа нэгтээ айлын гадаах болон гудамжны гэрэл харагдах агаад замаар яваа машины гэрэл ч үе үе зурсхийн үзэгднэ.. Эх орон, танил газар нутаг нүдэнд нь харагдан улс орноороо бахархах сэтгэл өөрийн эрхгүй төрөх авч бас нэгэн зүйл санаанд торон үлдсэн хэвээрээ. Анна уурлан зочид буудлаас гарсны дараахан буюу таван минутын дараа гэхэд буудлын хажуугийн хаалганы дэргэд бага оврын автобус ирэн Донетелла тэр хоёрыг хүлээж байжээ. Аннагийн араас гарах, зурвас үлдээж учир байдлаа тайлбарлах ямарч цаг байсангүй, шууд л Донетеллаг аван италиас аль болох хурдан гарах хэрэгтэй байсан юм.

Гадаа тэднийг хүлээж авсан хүн өөрийгөө зүгээр л Чаак гэж танилцуулсан бөгөөд Агентлаг түүнийг явуулсан ажээ. Хорин минутын дараа гэхэд Милан хотын захын нэг эмнэлгийн арын хаалгаар Рапп тэр хоёр Донетеллаг дамжлан оруулж байлаа. Тэднийг ТТГ-аас тодорхой хэмжээний хөлс авдаг нэг эмч угтан авсан юм. Настайвтар тэр эмч Денетеллагийн шархын дахин цэвэрлэж боогоод цусны бүлгийг нь тогтоон түүнд хоёр литр шинэ цус хийж өглөө. Мөн шарх нь хувилахаас сэргийлж хүчтэй антибиотик болон өвчинг намдаах зорилгоор нэг тун морфин тарьж өгсөн аж. Хоёр цагийн турш эмнэлэг дээр байсны эцэст эмч Донетеллагийн цусны даралтыг хэрхэн шалгаж байх талаар Раппад зааварчилгаа өгөөд замд хэрэг болж магадгүй гээд нэг литрийн ууталсан цус өгсөн байлаа. Донетеллагийн шарх нь амь насанд нь аюулгүй ба дараагийн дөрөв, тав хоног сайн гам хийх юм бол хөл дээрээ босох болно гэж Раппт хэлжээ.

Шөнийн нэг цаг болохоос арай өмнөхөн тэд эмнэлгээс гараад Италийн хойд зүг чиглэн давхиж гарчээ. Юдинь хотыг чиглэн явах зуураа замдаа Верона, Венец хотуудыг дайран өнгөрөв. Гурван цаг гаран явах хугацаанд Донетелла унтсаар л байсан бол Раппт тийм боломж гарсангүй. Дээр дурдсан Чаак гэгч эртэй Рапп урьд нь хэзээч уулзаж байгаагүй болохоор танихгүй хүнд итгэж, амь насаа даатгаж болохгүй байсан билээ. Тэд агаарын цэргийн бааз дээр ирмэгц үүдний харуулын цэрэг рүү дөнгөж дохих төдийгөөр нэвтрэн ороод талбай дээр хүлээж байсан онгоцны зүг шууд давхин хүрэв. Тэгээд хэдхэн минутын дараа гэхэд ямарч гааль, ямарч хилийн шалган, ямарч цагдаа болон камергүйгээр онгоцонд сууж Америкыг зорьсон нь энэ болой.

Онгоцонд Донетелла тэр хоёроос өөр зорчигч байхгүй болохоор онгоц хөөрсний дараа Рапп хэсэг дугхийгээд авчээ. Онгоцны багийнханд маш тусгай зорчигч тээж байгаа болохоор саад болохгүй байхыг тушаасан байлаа. Хөөрөөд дөрвөн цаг шахам болж байхад Рапп гэнэтхэн сэрлээ. Хэсэгхэн унтах зууртаа хар дарсан зүүд түүнийг бүрэн эзэмдэж авсан байв. Рапп гэрийхээ гадаа ирээд гэр доторхоо хараад зогсож байх юм. Рапп урьд нь харж байсан юм шиг нэгэн эртэй Анна хамт байна. Тэд инээлдээд л, үнсэлцээд л, их л аз жаргалтай харагдаж байлаа. Анна гэнэтхэн гадаа зогсож байгаа Раппыг олж хараад толгой сэгсэрээд “Чамд боломж байсан. Чи өөрөө түүнийг үгүй хийсэн” гэж амандаа хэлж байх юм. Рапп маш их шаналж байв. Хэдийгээр Рапп Аннад хязгааргүй их хайртай боловч саяхан зочид буудалд Анна хэрэг явдалд хэрхэн хандаж байгаа нь Раппт зарим нэг зүйл бодогдуулжээ.

Онгоцны жижигхэн цонхоор харж суухад урьд шөнө болж өнгөрсөн зүйлээс болж сэтгэл нь их хөдлөн босч сууж, ядаж байлаа. Донетеллагийн тэр галзуу юм шиг италь ааш авирыг нь бодохоос уур нь хүрэх аж. Тэр Аннад тэд урьд нь хосууд байсан гэдгийг хэлэх хэрэггүй байсан юм. Хэдийгээр морфины үйлчилгээ түүнийг тэгж хэлүүлсэн гэж үзэж болох ч Донетелла энэ зэргийн морфиноос болж хэлэх ярихаа алдтал ухаангүй болно гэж байхгүй гэдгийн Рапп мэдэж байв. Тиймээс уур цухал нь хүрсэн хэвээрээ. Гэвч Донетеллагаас авсан тэр багахан мэдээлэл Раппын оюун бодлыг өөр тийш нь хөтлөх бөгөөд тэр талаар хийх ажил их байгааг төсөөлж явлаа.

Дугуй газардах үед хэрэг явдлын учрыг бүрэн олоогүй байж Анна тийнхүү аашилж гарч одсонд гомдож байлаа. Тэр битгий хэл Анна түүнд тайлбарлах ямарч боломж олгоогүй. Тэнд хүмүүс үхэж, Донетелла шархдаж, тэгээд Раппын олж авсан тэр жаахан мэдээлэл нь АНУ-ын үндэсний аюулгүй байдалд төсөөлж байгаас ч илүү маш хүчтэй, аймаар цохилт болохоор тийм нөхцөл байдал үүсээд байгааг гээд л тайлбарлах юм их байсан билээ. ТТГ-ын хуучин нэг ажилтны амь насанд Моссадын захирлын тушаалаар халдсан байна гэдэг бол маш ноцтой хэрэг. Хариу нэхсэн маш олон асуулт гарч ирэх болно. Петер Камерон бол Моссадын тагнуул байсан уу, эсвэл давхар агент байв уу? Бен Фрейдман өөрөө тэр ажиллагааг гүйцэтгэхийг тушаав уу эсвэл хэн нэгний тушаалаар хийв үү? Гэвч асуудал цаашид улам хүндэрнэ гэдэг ганцхан зүйл л тодорхой байсан юм. Рапп дээрх ээдрээтэй хэрэгийн учрыг олохоор Италь руу явсан боловч тэр ганцхан нэр түүнийг ийм байдалд оруулна гэдгийг мэдээгүй байжээ.

Энэ хэргээс болж олон улсын байдал яах бол гэдэг бас санаа зовооно. Ямарч байсан Донетеллаг бүрэн хамгаалалтандаа авах нь ойлгомжтой бөгөөд харин тэр өөрийн мэдэж байгаа бүхнээ Кеннедид хэлэх шаардлагатай болох юм. Раппын хувьд Донетеллаг аль болох хурдан Италиас авч гараад Америкт авчирахаас өөр ямарч сонголт байгаагүй билээ. Хамгийн тодорхой нэг зүйл мэдэгдэж байсан нь Бен Фрейдман Донетеллаг алах маш ноцтой шалтгаан байгаа гэдэг байв. Тэр санаандаа хүртэл хэзээч зогсохгүй гэдгийг нь Рапп сайн мэдэх билээ.

Түүнд тайлбарлах боломж олгоогүй Аннад гомдож байлаа. Донетелла тэр хоёр холбоотой байсан нь үнэн. Гэвч тэр үе өнгөрсөн. Аннаг урьд хэнтэй унтаж байсан нь Рапп огт хамаагүй хэрэг юм. Раппын хийж байсан ажил бол бусад хүмүүсийнхтэй адилгүй. Түүнд цайны завсарга, тайван суугаад үдийн хоол иднэ гэж байхгүй, тэр битгий хэл түүнд ажлын ширээ ч гэж байхгүй. Бүх ажил нь хутганы ирэн дээр болж өнгөрдөг юм. Ийм төрлийн ажлаас зүгээр нэг гараад явчихдаггүй. Рапп энэ ажлаас гарах гэж аль байдгаараа хичээж байсан билээ. Бүх зүйлээ зохицуулаад, ирээдүйгээ аюулгүй болгочихоод үлдсэн бүх амьдралаа Аннатай хамт өнгөрөөнө гэж бодож байлаа.

Улс эх орныхоо төлөө болон Аннагийн өөрийнх нь төлөө золиослосон бүхнийхээ төлөө түүнд уур нь хүрч байв. Эх орныхоо төлөө ч, Аннагийн төлөө ч цусаа урсгаж явсан билээ. Харин энэ жаахан ээдрээнд Анна бүдэрч байгаад харамсана. Аннаг өөртөө хайртай гэж итгэж явсанч урьд шөнийн үйл явдлаас харахад үгүй л юм шиг байна. Хайр дурлалын талаар тийм их зүйл мэдэхгүй ч Рапп хүний итгэл даах гэдэг юмыг харин маш сайн мэдэх билээ. Түүний хувьд хамтрагчаасаа нүүрээ буруулна гэдэг байж болох хамгийн муу хэрэг юм. Хэрвээ хүмүүс бие биедээ үнэхээр хайртай юм бол холдож явахын оронд хамтдаа хайр сэтгэлийнхээ төлөө тэмцэх хэрэгтэй. Харин энэ бол Рейллигийн хувьд юу ч биш юм байна гэдгийг ойлгож авчээ. Тэрээр тэмцэхийн оронд Раппын орхиод зугтсан. Тайлбарлах боломж ч олгоогүй.

Өөрийгөө болон Аннаг тайвширтал нэг хэсэг энэ асуудлыг сөхөхгүй байсан нь дээр гэж өөртөө хичнээн хэлж байсанч ер тус болохгүй байв. Уурандаа болоод зочид буудалд түүнийг орхиод гараад явсан Аннаг бодох тусам түүний уур нь улам их хүрч байлаа. Ийм хүүхэнтэй гэрлэх гэж хүсч байгаа эсэхээ өөрөөсөө асуух хэдийч хариулт олдож өгсөнгүй.

Рапп ямарваа зүйлийг саарлаар харах дургүй. Хар эсвэл цагаан гэсэн байдлаар юманд ханддаг байв. Түүний ажил ч тэр ал эсвэл үх гэсэн зарчим дээр явах буй заа.

Онгоц бараг газардаж, Рапп эх орныхоо хөрс шороонд дээр бараг бууж байлаа. Дугуй газар хүрэх тэр үед Рапп дараагийн хийх алхамынхаа талаар өөрийн гэсэн төлөвлөгөөтэй болсон байв. Анна Рейлли яахав хүлээж байг. Рапп тоглоомоос гарах гэж оролдсон боловч Кеннедиг ганцааранг нь орхиж чадахгүй билээ. Кеннеди бол түүний найз. Тиймээс ч Анна шиг найзаа хаяаад явах зүрх Рапп байхгүй. Ямарч гэсэн Кеннедигийн асуудал хаашаа эргэх нь гэдгийг харж байгаад дараа нь Анна дээр очиж бүгдийг тайлбарлах гэж оролдох хэрэгтэй гэж бодож байлаа. Хэрвээ тэр үнэхээр хайртай л юм бол түүний тайлбарыг сонсож, уучлалт гуйхыг нь хүлээж авах бөгөөд өөрөө ч бас уучлалт гуйх байх. Хэрвээ үгүй бол зүрх нь яаж ч шаналаж байсан Рапп цаашид өөрийнхээ замаар явах болно хэмээн өөрийгөө зоригжуулж байлаа.

Б.Тэмүүжин Арлингтон хот, АНУ