Иргэд бэлэн мөнгө авах сонирхолтой байна

2011-04-18

УИХ-ын өнгөрөгч бямба гаригийн чуулганы үдээс хойшх хуралдаан цагаасаа ялимгүй ухарсан ч, нэлээд ажил хэрэгч болсон.

Энэ удаагийн хуралдаанаар Ерөнхий сайдад хаягласан С.Бямбацогт гишүүний асуулгын хариуг сонсов. Тэрбээр Хүний хөгжил сангийн тухай хуулийн хэрэгжилт болон иргэдэд олгож буй хувь хишгийг ажлын байр нэмэгдүүлэх, жижиг дунд үйлдвэрлэл эрхлэх, хөрөнгө оруулалтын чиглэлээр олгох асуудлыг хэрхэн зохион байгуулж буй талаарх мэдээлэл авахыг чухалчилсан юм.

Тиймээс асуулгатай холбогдуулан Хүнс, хөдөө аж ахуй, хөнгөн үйлдвэрийн сайд Т.Бадамжунай, Нийгмийн хамгаалал, хөдөлмөрийн дэд сайд Д.Нямхүү нар мэдээлэл хийсэн юм.

Сайд нарын мэдээлж буйгаар иргэд бэлэн мөнгө авах сонирхолтой байгаа нь судалгаагаар тогтоогджээ. Учир нь Хөдөлмөр халамжийн үйлчилгээний газраас өнгөрөгч онд иргэдээс хишиг, хувиа ямар хэлбэрээр авахыг хүсэж буй талаар судалгаа явуулсан байна. Тэгэхэд нийт иргэдийн 55 орчим хувь нь бэлэн мөнгө авахыг хүссэн аж. Харин бэлэн бусаар авах хүсэлтэй иргэдийн 22,9 хувь нь төрөл бүрийн зээлийн төлбөрт гэсэн бол 17,9 хувь нь сургалтын төлбөр болон хичээлийн хэрэглэл дүрэмт хувцас зэрэгт хэмээн тодруулжээ. Мөн долоон хувь нь малчны зээлийн төлбөрт, 17,2 хувь нь орон сууц худалдан авах урьдчилгаа болон 15 хувь нь эрүүл мэндийн үйлчилгээний төлбөрт зарцуулах хүсэлтэй буйгаа хэлсэн байна.

Түүнчлэн 21,2 хувь нь тэтгэврийн болон эрүүл мэндийн даатгалын шимтгэлд зарцуулахаа мэдэгджээ. Тэгэхээр иргэдийн хувь, хишиг хүртэх хэлбэрийн сонголтод тухайн өрхийн амьжиргааны түвшин нөлөөлж байгаа нь судалгааны явцад ажиглагдсан байна.

Үндэсний статистикийн хорооны судалгаагаар Монголд ядуурлын хамралтын хүрээ 2007-2008 онд 35,2 хувь байсан бол 2009 онд 38,7 хувь болж өсчээ. Ойролцоогоор сая гаруй хүн ядуурлын шугамаас доогуур амьжиргаатай, өдөр тутмын наад захын хэрэглээгээ хангаж чадахгүй байгаа нь тогтоогдсон гэнэ. Тэр ч утгаараа эдгээр иргэний хувьд, хишиг хувиа өдөр тутмын хэрэглээ болон тулгамдсан өр төлбөртөө ашиглах хүсэл давамгайлж байгаа гэсэн статистик гарсан байна.

Иймээс УИХ-ын 67 дугаар тогтоолын хоёрдугаар зүйлд заасны дагуу иргэд сар бүр хүртэх хишиг, хувиа өөрсдийн санаачилгаар авах боломжтой юм. Өөрөөр хэлбэл, ажлын байр бий болгох, хөрөнгө оруулалтын зорилгоор бэлэн бусаар авах тохиолдолд нэгдэж, хоршоо, нөхөрлөл, жижиг, дунд үйлдвэр байгуулах, оруулах хөрөнгийн хэмжээ 10,0 сая төгрөгөөс доошгүй байхаар журамлажээ.

Мөн энэ онд хүнс, хөдөө аж ахуй, хөнгөн үйлдвэр, хөдөлмөр, нийгмийн хамгаалал, байгаль орчин, аялал жуулчлал, эрдэс баялаг, эрчим хүч, зам тээвэр барилга, хот байгуулалтын салбарт улсын төсөв болон гадаадын зээл тусламж, төсөл хөтөлбөрийн хүрээнд нийт 112 мянган ажлын байр бий болох тооцоо судалгааг тус яамнаас хийжээ. Үүний 70 хувь нь байнгын ажлын байр байх гэнэ.

Түүнчлэн жижиг, дунд үйлдвэр, үйлдвэрлэл эрхлэгчдэд санхүүгийн дэмжлэг үзүүлэх эх үүсвэрүүд эрс нэмэгдэж байгаа гэлээ. Жишээ нь, төсвөөс 24 тэрбум төгрөгийн эх үүсвэрийг сумдад үйлдвэрлэл хөгжүүлэх сан байгуулахаар төлөвлөсөн.

Мөн 25.2 тэрбум төгрөгийг жижиг, дунд үйлдвэр хөгжүүлэх сангаар дамжуулан зээл олгох зорилгоор зэхэж буй. Үүний зэрэгцээ Япон улсаас 58 сая ам.долларын хоёр шаттай зээлийн 45 сая нь жижиг, дунд үйлдвэрүүдэд хөнгөлөлттэй зээл олгох эх үүсвэр болох ажээ.

Мэдээллийн дараа нэр бүхий гишүүд албаныханд асуулт тавьж, санал хэллээ. Тухайлбал, УИХ-ын гишүүн Д.Оюунхорол, А.Тлейхан, Х.Бадамсүрэн нар "Орон нутагт ажиллаж байхад 70-с дээш насны ахмадууд Хүний хөгжил сангаас иргэдэд олгож буй хувь хишгийн үлдэгдэл сая төгрөгийг өр барагдуулах болон бусад зориулалтаар бэлнээр олгох хүсэлтийг их гаргаж байсан. Энэ асуудлыг шийдэх гарц байна уу" гэв.

Гишүүдийн асуултад дэд сайд Д.Нямхүү "Нийгмийн хамгаалал хөдөлмөрийн яам үлдэгдэл мөнгийг бэлнээр өгөх асуудлыг дэмжиж байгаа. Өнөөдөр 60-с дээш насны 160 мянган ахмад байна. Үүнийг шийдвэрлэхийн тулд журамд өөрчлөлт оруулж, санхүүжилтийн эх үүсвэрийг шийдэх шаардлагатай. Гэхдээ энэ алхмыг дагаад инфляци өсөх гэх мэт гарч болох сөрөг үр дагаварыг сайтар судлах хэрэгтэй" гэж тодруулав.

Харин энэ зуур УИХ-ын гишүүн Д.Тэрбишдагва "Өнгөрөгч онд Хүний хөгжил санд стратегийн орд газраас нийт 230 тэрбум төгрөг цугларах ёстой байсан. Зарлага нь 300 гаруй тэрбум төгрөг байхаар төсөвт тусгагдсан. Харин 2011 онд 972 тэрбум төгрөг цугларч, 804 тэрбум төгрөгийн зарлага гарахаар туссан. Энэ мөнгүүд өнөөдөр байна уу, байхгүй бол хаанаас цуглуулах юм бэ. Иргэд гишүүдийн амласан 1.5 сая төгрөгөө авахыг хүсч байна. Мөн 35-65 насны ажилгүй мөртлөө мэргэжилтэй хүмүүсийг судалсан юм байна уу" гэхэд дэд сайд Д.Нямхүү "Хүний хөгжил сангийн орлогын мэдээлэл бидэнд байдаггүй. Энэ бол Сангийн яамны хариулах асуулт" гэсэн товхон хариулт хэлсэн юм.

Эцэст нь Хүний хөгжил сангаас иргэдэд олгож байгаа хувь хишгийг бөөнөөр нь өгч чадах уу, чадахгүй юу, 21 мянган төгрөг иргэдийн амьдралд үнэхээр тус дэм болж байгаа юу, иргэд өөрсдөө сонголтоо хийгээд бөөнөөр нь авах хүсэлт гаргасан тохиолдолд хэрхэх талаар холбогдох Байнгын хороод судалж үзэх чиглэлийг чуулганы хуралдаанаас гаргав.

О.Сэлэнгэ

"Нийгмийн толь"

Иргэд бэлэн мөнгө авах сонирхолтой байна
Tweet
Bolod.mn

Сэтгэгдэл (1)

Уншигчдын оруулсан сэтгэгдлийн талаар манай сайт хариуцлага хvлээхгvй болохыг анхаарна уу.
Үгийн санд шүүлтүүр хийсэн болно

Зочин
Сайн байцгаана уу, ирэх онд өгөх сая төгрөгийн бэлэнээр авмаар байна. Учир нь чанаргүй, үнэтэй орон сууц биш, үр хүүхэддээ үлдээхээр чанартай орон сууц авмаар байна. Хэн нэгэний хувийн бизнест биш жинхэнэ ард түмнийхээ амьдралд хэрэгтэйгээр шийдвэрлэж өгөөч эрх баригчид минь.

2011-10-04 | 15:07:14 | 178.116.51.34 |

Мэдээ
Гадаад мэдээ
Видео

Архив ангилал

Иргэд бэлэн мөнгө авах сонирхолтой байна

Сэтгэгдэл (1)