“Ерөнхийлөгч Жорж Бушийн үед би Цагаан ордонд хэд хоносон юм. Тухайн үед Жорж Буш аавыг хаана орогнож байгаа талаар нь мэдээлвэл хариуд нь надтай Вашингтонд уулзах урилга илгээнэ гэж байв. Би түүний энэ саналаас нь татгалзсан. Учир нь миний сүсэглэдэг шашны зан үйл болоод миний зүрх сэтгэл, баримталж явдаг зарчмуудад маань нийцээгүй юм. Тиймээс уучлал хүсээд “Би ийм юм хийдэггүй” гэсэн хариуг илгээж байлаа” хэмээн дэлхийн хамгийн нэртэй алан хядагч, “Аль-Каида” бүлэглэлийн толгойлогч гэгддэг Осама Бин Ладений дөрөв дахь хүү, 30 настай Омар Осама Бин Ладен ярив. Түүний эцэг хүүгээ “Аль-Каида”-ийн ирээдүйн толгойлогч гэж үздэг байсан ч Омар алдарт есдүгээр сарын 11-ний аймшигт явдал болохоос хэдхэн сарын өмнө уг бүлэглэлээс гарсан байдаг.

Омар бид хоёр Катарын нийслэл Доха хотноо нэгэн жижиг зочид буудалд ярилцсан юм. Түүний гуйсан ганц зүйл нь уг зочид буудлын нэрийг дурдахгүй байх. Учир нь Омар болон түүний англи эхнэр Зейна Бин Ладен нар хэн нэгэн өөрсдийнх нь аминд хүрчих вий гэдгээс эмээж байгаа аж.

-Миний ойлгосноор, Бушийн төлөөлөгчид гэх хүмүүс 2009 оны нэгдүгээр сард танай хаалгыг тогшсон юм байна. Тэгээд тэд юу санал болгов?

-Түүний төлөөлөгчид Цагаан ордноос явж байгаа гэдгээ хэлсэн. Тэгээд аавыгаа хаана байгааг хэлж өгвөл надад тусалж, хамгаалж чадах тэр газар хүргэж өгөхөд бэлэн байна гэсэн. Хариуд нь би маш харамсалтай байна, гэвч би тэгж чадахгүй гэж хариулсан. Тэр хүн бол миний эцэг, би харин хүү нь. Ямар ч хүү эцгийгээ хайрлаж, хүндэлдэг байх ёстой гэдэг биз дээ. Эцэгтэйгээ санаа нийлдэггүй хөвүүд тийм ч олон байдаггүй л байх.

-Тэгвэл та хүчирхийлэл, алан хядах үйл ажиллагааны талаар ямар бодолтой явдаг хүн бэ?

-Бусад хүмүсийн л адил би хүчирхийлэл, дайн дажин гэх зэрэг зүйлсийг огт дэмждэггүй. Гэхдээ тэр бүхэн нь ариун зорилготой, дэлхийн тэргүүлэгч орнуудын эрх баригчдаас зөвшөөрөгдсөн, шударга байдлыг тогтоохын төлөө бол өөр хэрэг. Яг өнөөдөр Ливид өрнөж байгаа шиг л. Тухайлбал, НҮБ өөрийн гэсэн цэргийн хүчинтэй, тэрнийгээ энх тайван байдлыг тогтоох онцгой нөхцөл байдалд ашигладаг. Иймэрхүү нөхцөл байдал үүсвэл би ч дэмжиж оролцоход бэлэн байна.

-АНУ-д 2001 оны есдүгээр сарын 11-нд болсон алан хядах ажиллагааны дараа танд ямар мэдрэмж төрж байв. Та тэр үед хаана байсан бэ?

-Би энэ талаар нэг их дэлгэрэнгүй ярьмааргүй байна. 10 жил өнгөрч. Уг үйлдлийг хэн ч дэмжихгүй гэдгээ энэ хугацаанд би хэлж байсан. Энэ алан хядах ажиллагааны ард хэн байсныг би мэдэхгүй, энд л цэг тавьчихая. Энэ асуултад үүнээс илүү хариулж хэлэх зүйл алга. Их эмзэг сэдэв учраас би дахин хөндмөөргүй байна.

-Энэ алан хядах ажиллагааны ард хэн байсныг та үнэхээр мэдэхгүй гэж үү?

-Ер нь миний мэдэх, мэдэхгүйд асуудлын гол нь байгаа юм биш. Би зүгээр л энэ сэдвээр яримааргүй байна. Их хуучирсан сэдэв учраас энэ талаар ярих нь хэнд ч ашиггүй. Хамгийн гол нь би алан хядах ажиллагааг огт дэмждэггүй гэдгийг ойлгоорой.

-Та аавтайгаа санал нийлдэггүй ч түүндээ хайртай гэж түрүүн хэлсэн. Үүнийхээ талаар жаахан тодруулахгүй юу?

-Тэгье. Дорнын соёлтой хүмүүс зарим үед хоорондоо санаа нийлэхгүй байх явдал бий. Би 20 настайдаа аавынхаа орогнож байсан газраас явсан. Цаашдаа тэд нартай хэзээ ч холбогдолгүй өөрийнхөөрөө амьдрахаар шийдсэн. Би зөвхөн гэртээ харьж, бусад ард түмний амьдралд оролцолгүй амар жимэр амьдрахыг хүссэн.

-Дэлхийн олон оронд алан хядах ажиллагаа явагдаж энгийн номхон иргэдийн амь үрэгдэхэд танд юу бодогддог вэ?

-Үнэхээр ямар ч гэм, зэмгүй хүмүүс амь үрэгдэж байгаа нь нууц биш. Энгийн номхон иргэд нь еврей, палестин, америк, афган, ирак гээд ямар ч үндэстэн байсан надад маш харамсалтай байдаг. Тэд бол хүн шүү дээ. Тэдний иргэншил, улс орных нь удирдагчид ямар үйл ажиллагаа явуулдаг гэх зэрэг нь надад огт хамаагүй, би тийм юм сонирхдоггүй. Угаас би энгийн иргэдийн амьдралыг л сонирхдог.

-Эцэг тань ярьсан зүйлсийг чинь сонсоод таны талаар сэтгэл дундуур үлдэх болов уу. Та юу гэж бодож байна. Та аавынхаа дэргэд хүмүүжиж, түүнтэй цуг цэргийн сургалтад явж байсан шүү дээ?

-Би аавдаа юу ч хэлэх вэ дээ. Өнөөдөр бид хоёр тус тусынхаа замаар амьдралаа хөөгөөд явж байна. Энэ асуултад хариулах надад их хэцүү байна, тиймээс энэ сэдвийг хаая.

-Тэгвэл Омар Бин Ладен өнөөдөр хүчирхийллийг зогсоохын тулд юу хийж чадах вэ. Та үгийн хүчийг ашиглан хүмүүсийг хүчирхийлэл, алан хядах ажиллагаанаас татгалзахыг уриалж чадах уу?

-Тухайн орны нөхцөл байдал, хүмүүсээс нь л шалтгаалах байх. Тухайлбал, гэрээс нь хөөж гаргасан учраас хүмүүс бусдад хүч хэрэглэсэн байж болно. Ийм тохиолдолд яах вэ. Битгий хүч хэрэглэ гэх үү. Хэрэв тэгж хэлбэл, гэр рүү нь дайрч орсон хүмүүст тусалсан хэрэг болно биз дээ. Тэгэхээр ийм үед эсрэг талынх нь үйлдлийг зогсоон асуудлыг цэглэж, шударга байдал тогтоохын тулд зайлшгүй хүч хэрэглэхээс аргагүйд хүрнэ. Мэдээж хэрэг, энэ үйлдэл бүхэлдээ хүний эрх болон хүний эрхийн цаад санааг зөрчиж байгаа хэрэг мөн.

-Та үүгээрээ юу хэлэх гээд байна вэ. “Аль-Каида” хүч хэрэглэж байгаа нь зарим тохиолдолд зөв гэх гээд байна уу?

-“Аль-Каида”-ийн хувьд надад хэлэх үг алга. Энэ бүлэглэлийн хүмүүс цаашдаа хэрхдэгийг ч би мэдэхгүй. Юутай ч, энэ бүлэглэлийн хүмүүс дэлхийн олон оронд хүрэлцэн очиж их л олон зүйлд бэлддэг бололтой. Энэ хүмүүс бүгд өөр өөрийн гэсэн үзэл бодол, араншинтай. Зарим нь их найрсаг, зарим нь их хэрцгий, нэг хэсэг нь алан хядагч, үлдсэн нэг хэсэг нь хэт сүсэг бишрэлтэй гэх мэт. Мөн зарим нь юманд нэлээд нухацтай ханддаг хэдий ч бүгд л гэрээсээ дайжин аавын минь дэргэд орогнодог болжээ. Тэгээд түүнтэй хамт үлддэг.

-Миний мэдэх Омар Бин Ладен энх тайвны элч болохыг хүсдэг нэгэн. Тэгвэл дэлхийн аль нэг өнцөг буланд, тухайлбал Европт, Палестинд, Израильд, Латин Америкт эсвэл АНУ-д алан хядах ажиллагаа яг өнөөдөр явуулахаар бэлтгэж буй хүмүүст хандаж юу хэлэх вэ?

-Ямар хүмүүст хандана гэж. “Аль-Каида”-ийн хүмүүст үү. “Аль-Каида”-ийнханд хандаж хэлэх үг байхгүй. Энэ бүлэглэлийн хүмүүсийг би таних ч үгүй. Түүнчлэн алан хядагчид “Аль-Каида” бүлэглэлд багтдаг эсэхийг мэдэхгүй юм. Тийм болохоор “Аль-Каида”-д хаяглалгүй ерөөс нийт алан хядагчдын талаар л ярья.

-Таны эцэг амьд байгаа юу?

-Мэдэхгүй, гэхдээ амьд байгаа гэж бодож байна.

-Аав, ах нар чинь хамт нуугдаж байсан тэр газраас явсныхаа дараа та түүнээс ямар нэгэн захидал занаа аваагүй юм уу?

-Үгүй. Тэднийг орхин явснаас хойш би ямар ч сураг сонсоогүй. Би яг тан шиг л байдалд байна. Та миний эцгээс ямар нэгэн захидал занаа авсан уу.

-Осама Бин Ладенаас бол захидал авч байгаагүй юм байна...

-Тэгвэл та бид хоёр ялгаагүй л юм байна. Түүнд надад хандаж хэлэх үг байхгүй. Харин би эцэгтэйгээ холбоо барьж чадахгүй л байна.

-Гэхдээ түүний тухай ярихдаа та их уйтгарлах юм?

-Эцгийнхээ талаар ярихаар миний сэтгэл их тавгүйтдэг. Би өөртэй чинь уулзахаасаа өмнө энэ ярилцлага надад төвөгтэй олон асуудлыг бий болгоно гэж хэлж байсан. Гэвч та миний үгэнд ач холбогдол өгөөгүй. Нэгэнт ярилцлага өгч байгаа юм чинь миний ярьсан бүхэн бусдад өгөөжтэй байгаасай гэдэгт найдаж сууна.

-Өмнө нь та Каддафигийн дэглэмийн эсрэг явуулж буй холбоотнуудын цэргийн ажиллагааг зөвтгөж байсан санагдана. Миний ойлгосноор, та Арабын орнуудад өрнөж буй хувьсгалыг дэмждэг, тийм үү?

-Засгийн газруудаа огцруулахын төлөө олон орны ард түмэн нэгдэж байгааг та харж байгаа биз ээ. Олон хүчин зүйлсийн улмаас миний эх орон Саудын Арабт ийм хувьсгал өрнөсөнгүй. Үүний төлөө би улсынхаа эрх баригчдад, тэр дундаа Абдала хаанд талархаж явдаг юм. Абдала хаан болон түүний гэр бүлийнхнийг Бурхан ивээг. Манай улсын эрх баригчид шударга ажилладаг болохоор Саудын хаанд элдэв асуудал үүсэхгүй байна гэж боддог. Нөгөө талаар, хаан өөрөө их шударга хүн. Мөн Катарын ард түмэн болон эмир шах Хамед нарыг бурхан ивээж байна. Хамед шахийг энэ дэлхий дээрх энх тайвны төлөө хийж байгаа бүхнийг нь бурхан сайшаан хүлээж авч ивээлээ хайрлаж байна. Мөн Персийн буланд байдал тайван байгаа нь сайшаалтай. Харин хойд Африкийн орнуудын ард түмэн Засгийн газрынхаа эсрэг тэмцэл явуулж байна. Хэрэв тухайн удирдагчид ард түмэн нь дургүй байгаа бол түүнд хоёр л зам бий. Ард түмний дургүйцлийг хүргээд байгаа тэр хүчин зүйлсүүдийг засч залруулах эсвэл бүхнийг орхиж албан тушаалаа ард түмнээс сонгогдсон хэн нэгэнд шилжүүлэн өгөх. Гэтэл ард түмэнтэйгээ тэрсэлдэн, хүмүүсийн амь насанд хүрэх нь буруу зүйл. Ийм тохиолдолд хүчтэй улс орнууд хөндлөнгөөс оролцож, байдлыг засах ёстой. Хувьсгал гарч байгаа бол тухайн улсын удирдагч буруу ажиллаж, ард түмнээ өлсгөлөнд хөтлөж байгаагийн шинж юм. Азаар манай оронд хувьсгал өрнөсөнгүй. Тэгэхээр манай хаан болон түүний тойрон хүрээлэгчид ажлаа зөв явуулж байна гэсэн үг. Угаас тэд маань ямар ч орны удирдагчдаас илүү.

-Тэгэхээр та Египетийн хувьсгалыг дэмжиж байгаа байх нь ээ?

-Энэ асуултын хариуг Египетийн ард түмэн өгнө. Гэвч Мубаракийг эх орноос нь хөөнө гээд байгаа нь тийм ч зөв шийдэл биш юм. Тэр хүн бүх насаа Ерөнхийлөгчийн албан үүргийг гүйцэтгэхэд зориулсан учраас хөөх нь шударга бус явдал. Хэрэв албан тушаалаас нь огцруулахыг хүсч байгаа бол энэ нь хуулийн үндэслэлтэй гэдгийг бүгд хүлээн зөвшөөрсөн байх ёстой. Үүний дараа эх орноос нь хөөж, түүнтэй зүй бусаар харьцах хэрэггүй. Тэр хүн эх орондоо ясаа тавих бүрэн эрхтэй хүн.

-Та Каддафиг заавал огцруулах ёстой гэж үздэг үү?

-Каддафигийн хувьд бол тэр өөрөө ч, түүний хүү ч иргэдийнхээ эсрэг алан хядах ажиллагаа явуулж байна. Эхэндээ ард түмэн нь тэднийг огцруулах санаагүй байсан. Гэвч эцсийн дүндээ ийм шийдэлд хүрсэн байна. Каддафи, түүний хүү хоёр алан хядах бүлэглэлийн адил үйл ажиллагаа явуулж байна.

-Таны бодлоор Ливийн сөрөг хүчнийхэн болоод Катарыг оролцуулсан олон улсын бүлэглэлийнхэн Каддафиг баривчлах ёстой юу?

-Тийм. Түүгээр ч барахгүй хэрэв Саудын Арабын хаан зөвшөөрвөл би Ливи рүү биечлэн очиж баривчлах ажиллагаанд оролцоно.

-Америкчууд олон жилийн турш таны эцэг Осама Бин Ладенийг баривчлахыг оролдож байна. Гэвч чадахгүй л байна. Яагаад юм бол?

-Надад энэ тал дээр хэлэх зүйл алга.

-Тэгвэл долоон настай Ахмед Бин Ладен хүүгээ том болоод “Миний эцэг Омарын зөв үү, эсвэл Осама өвөөгийн зөв үү” гэж асуувал та юу гэж хариулах вэ?

-Хүү маань одоохондоо ийм юм бодох нас нь биш байна. Цаашдаа яахыг хэн мэдлээ. Одоогоор ямар нэгэн юм хэлэхэд эрт байна. Би амьдралдаа нэг ч алан хядагчийг харж байгаагүй... Яах вэ, ганц нэгийг харсан л байх. Гэхдээ би тэднийг үргэлж буруутгадаг. Тиймдээ ч би тэд нараас салж явсан. Хүүдээ алан хядагч л болж болохгүй шүү гэж хэлнэ дээ. Бид жирийн хүмүүс шиг л энгийн амьдралаар амьдрах ёстой.

-Хэрэв өнгөрсөн үеийг өөрчилж болдогсон бол та өөрчлөх байсан уу?

-Үгүй. Энэ асуултад хариулах амархан байна. Болдог юм болдгоороо л болоо биз, тэгээд л гүйцээ. Энэ оны арванхоёрдугаар сард Катарт НҮБ-ын чуулга уулзалт болно. Хэрэв уулзалтад оролцогчид намайг Ойрхи Дорнодын асуудлыг шийдэх элч төлөөлөгчөөр томилвол өөрийн биеэ энэ үйлст бүрэн зориулахад бэлэн байна. Гэхдээ үүний тулд би эхлээд Саудын Арабын хаан болон Катарын эмирээс зөвшөөрөл авах ёстой.

Эх сурвалж:

http://www.lavanguardia.es/internacional/20110404/54135941186/bin-laden-me-negue-a-decir-a-bush-donde-estaba-mi-padre.html