“Нисванис” хамтлагийн ахлагч Л.Энх-Амгалан: Япон хүүхэнтэй үерхэж байсан, түүний сайхан хайрын буянаар Японд очиж үзсэн

2011-04-05

-Рок хөгжим сонсдог залуучуудын тоо хүрээгээ тэлж байна.

Гэтэл сүүлийн үеийн рок хамтлагууд уран бүтээлээ олонд сайн хүргэж чадахгүй байгаа харагддаг?
-Рок хөгжмийг үзэл бодол нь төлөвшсөн, өөртэй итгэлтэй хүмүүс сонсдог. Манайханд рок хөгжмийн суурь боловсрол байхгүй болохоор ойлгох гэж их цаг алдаж байна. Рок хамтлагууд уран бүтээлээ хийж байгаа. Хүмүүс яагаад мэдэхгүй байна гэхээр бид өөрсдийгөө рекламдаж алиа салбадай шиг явдаг хүмүүс биш. Золиосгүй сайн сайхан юм гэж байхгүй. Бид 19 наснаасаа 30 нас гартал рок хөгжим яах гэж тоглосон гэхээр Монголд ганц хүн ч болов зөв сэтгэлгээтэй болоосой гэж зорьсон. Өнөөдөр бид баяжаагүй, олонд танил төдий хүмүүс. Гэхдээ өнөөдөр хэн нэгнийг царайчлаад нэр төртэй, мөнгөтэй болох юмсан гэж гүйсэн хамтлагуудийг би буруутгахгүй. Монголд хэнээс ч хараат бус эрх чөлөөтэй уран бүтээл хийгээд амьдрахад хүлээж авах хүмүүсийн сэтгэлгээ нь хүрэхгүй байна шүү дээ. Тийм болохоор амьдралаа өөд нь татахын тулд зүтгэж яваа хүмүүсийг буруутгаад яах юм бэ. Манай хамтлаг бол хүнд таалагдах гэж уран бүтээл хийгээгүй. Тэгсэн бол баян явах байсан. Монголд шинэ сэтгэлгээ, шинэ философийг бий болгохын төлөө зүтгэж явна. Ядаж шинээр өөрөөр дурлалцаж эрч хүч ав л даа. Юм өөрчлөгдөхгүй байх шиг уйтгар байхгүй.
-Өөрийг чинь их дурламтгай гэдэг. Дурлал шинэ эрч хүч авчирдаг уу?
-Эрч хүч өгөхгүй бол би дахин дурлахгүй шүү дээ. Нэг дурлахаараа шататлаа дурладаг. Дурлалд хэн нэг нь бууж өгдөг. Харамсалтай нь би дандаа сөгддөг л дөө. Их шанална, уйтгарлана.Тэгж байтал дахин дурлаж дээшээ өндийнө. Би хүсээгүй ч тааралдсан бүсгүйчүүд маань дандаа надаас дүү хүүхнүүүд байдаг.
-Хэдэн настай бүсгүйчүүдтэй дурлалцаж явсан юм бэ?
-Үерхэж явсан орос охин надаас арав дүү. Түүнээс урьд нь япон хүүхэнтэй үерхэж байсан. Түүний сайхан хайрын буянаар өнгөрсөн оны 12 сард би Японд очсон. Дуучин Нарантай намайг холбож өгөөд бид хоёр нэг CD хийсэн. Тэр намайг орос охинд хайртай гэдгийг мэддэг байсан.
-Тэр япон хүүхэнтэй хэзээ танилцаад үерхээд авсан юм бэ?
-Ноднин Төв аймгийн Өндөрдовд морин цэргийн үзүүлэх тоглолт болоход би тэнд тайзны зохион байгуулагч хийж байсан. Тэгэхдээ танилцсан юм. Өөр олон яриа түүх хэнд ч хэрэггүй байх.
-Хэн нэгэнтэй нь амьдралаа тууштай холбож болоогүй юм уу?
-Би орос, япон, монгол гурван охинтой үерхсэн болохоос амьдрал зохиогоогүй. Тэгэхийг ч хүсээгүй. Замд л тааралдсан сайхан сэтгэлтэй хүмүүс. Саллаа, сарнилаа гээд зарим хүмүүс сонин юм ярих юм. Яагаад би хүнтэй үерхэж болохгүй гэж. Хэл амгүй санаа амар амьдармаар байна. Манай найз нар “Одоо чи хаанах охинтой үерхэх гэж байна” гээд явуулаад байдаг юм. Би дурлахаас их айдаг, дахин дахин шатмааргүй байна. Алийн болгон дурлалд сөхрөх юм бэ. Жаахан бүтээлч юм хиймээр байна шүү дээ. Гэхдээ дахин дурлахгүй гэж амлаж чадахгүй. Дурлахгүйг хичээнэ ээ.
-Та хэзээ гэрлэнэ гэж бодож явна? Нас 30 гарчихлаа шүү дээ?
-Явж байтал болно биз дээ. Ээж Эрдэнэтэд миний зургийг бариад энэ хүнд эхнэрийн даллага авахуулах гэсэн юм гээд лам дээр очсон чинь нөгөө лам “Миний шүтдэг хамтлагийн дуучин байна” гэсэн гэнэ лээ. Тэр рок хөгжим сонсдог лам хэзээ ирэхээр эхнэр дуудаж өгсөн юм бол би мэдэхгүй. Намайг үзээд зурхайч болох байсан гэж хэлсэн гэнэ лээ. Миний амьдралын хань ямар хүн байхыг би мэдэхгүй.
-Ингэхэд таны нэг өдөр хэрхэн өнгөрдөг вэ?
-Орой 21 цагаас бааранд дуулна. 01 цаг өнгөрөөгөөд гэртээ харина. Өрөөндөө 05 цаг хүртэл телевизээр Оросын суваг үзнэ. Тэгээд унтаад өдөр 12 гэж сэрээд бэлтгэлээ хийдэг. Өдөр ирж хоолоо идчихээд бааранд очиж дуулдаг. Монголд том бага гэхгүй рок хамтлагууд бааранд дуулж байна шүү дээ.
-Та махлаг хүүхэн таалагддаг гэж ярьж байсан. Ирээдүйн гэргий чинь махлаг хүүхэн байх юм болов уу?
-Яагаад бүдүүн хүүхнүүд нийгэмд гоочлогдох ёстой гэж. Туранхай болохоор гоо сайхан харагддаг юм уу. Бүдүүн хүүхэнд ч гэсэн гоо сайхан байдаг юм. Тэднийг өмөөрч уран бүтээл хийснээ зөв гэж боддог. Клипэн дээр дандаа туранхай миссийн мөрөөдөл болчихсон хүүхнүүд тоглодог. Тэд бусдад таалагдахын тулд л аргаа бараад хэдэн нүцгэн хүүхэн тоглуулж байна. Ер нь хамгийн гол гоо сайхан уураг тархи сэтгэлгээ шүү дээ.
-Рок хамтлагууд үнэтэй гитараар сайн уран бүтээл хийдэг гэж ярих юм. Та нарын хувьд?
-Бид мөнгөнийхөө хэмжээгээр гитар авдаг. Гитартаа сэтгэл хангалуун байдаг. Үнэтэй гитар барьсанаараа сайн уран бүтээлч болохгүй. Чадаж л байвал үр дүн тэр. Рок хөгжсөн оронд эрүүл нийгэм оршдог. Рок хөгжөөгүй байгаа болохоор эрүүл бус нийгэм байна. Манай монголчууд мануухай шиг арай дэндүү ноомой харагддаг.
-Сайн уран бүтээлийг ихэнхдээ мөнгөтэй холбож тайлбарлаж байна?
-Зарим нэг нь урлагт мөнгөөр дулдуйдан дээгүүр байр эзлэж байна. Урлагийг мөнгөөр хэмжиж болохгүй. Хэрэв тэгвэл сөнөх тийшээгээ хандаж байгаа нь тэр. Урлаг гэдэг бол зүрх сэтгэл, түүнийг мөнгөөр худалдан авч болохгүй. Эцсийн эцэст тэнцүү тэмдэгийн дараа салаавчны үнэлгээ авах хүмүүс л урлагийг мөнгөөр худалдаж авдаг.

"Шударга мн"