Арга ч үгүй. Уг нь энэ байгууллагыг албан тушаалтнуудыг хянаж, авлигал хээл хахуулыг бууруулахын тулд байгуулсан юм гэнэлээ. Гэвч үүсэн байгуулагдсан цагаасаа хойш Авилгалтай тэмцэх газраас хоёр том дуулиантай хэрэг л гарч ирлээ. Нэг нь тус байгууллагын дарга гадаадад амиа алдсан хэрэг. Нөгөөдөх нь бас л дарга нь шоронд орсон асуудал байв. Авлигалтай тэмцэх газрынхан дотроо ч эв нэгдэл муутай, угаасаа л хоёр том фракцид хуваагддаг. Тус байгууллагыг анх толгойлж байсан Б.Дангаасүрэн Улсын Дээд шүүхийн судалгааны албаны даргаар ажиллаг байсан нэгэн.

Тэрбээр ажлаа хүлээж авсныхаа дараахан шүүх, прокурорт ажиллаж байсан хүмүүсээр багаа бүрдүүлжээ. Тэрбээр насаараа шүүх, хуулийн байгууллагад ажиллаж, Улсын Дээд шүүхийн даргад хоёр ч удаа нэр дэвшээд унаж байсан учраас хуучин найз нөхөд, хамт олноо татаж авчирсан хэрэг. Харин түүний дараа АТГ-ын даргын суудалд тухалсан Ч.Сангарагчаа Хан-Уул дүүргийн Цагдаагийн хэлтсийн дарга, Нийслэлийн Цагдаагийн газрын дэд дарга, Цагдаагийн академийн тэнхимийн эрхлэгч, ЭЦГ-ын дэд дарга, Зохион байгуулалттай гэмт хэрэгтэй тэмцэх хэлтсийн даргаар ажиллаж байсан. Харин Авлигатай тэмцэх газрын даргаар томилогдохоосоо өмнө Тагнуулын ерөнхий газрын Мөрдөн байцаах хэлтсийн даргаар ажиллаж байв.

Тиймээс түүний бүрдүүлсэн баг тэр чигээрээ хуучин цагдаад ажиллаж байсан нөхдүүдээс бүрддэг. Хэзээнээсээ цагдаа, прокурор, шүүх гурав бие биендээ амбицтай. Үүнээс үүдэн Авлигалтай тэмцэх газарт цагдаагийн, прокурорын гэсэн хоёр том фракци үүсэж, хэрэг төвөг бус харин хамтран ажиллагсдаа шалгаж, тагнаж, мөрддөг, хов живээр ажлаа хийцгээдэг болсон аж. Тиймээс Ч.Сангарагчаагийн ажлыг хэн авах бэ гэдэг асуулт л тэдний толгойг өвтгөж, цалин хангамжнаасаа салахгүй байхыг хүсэгчид нойргүй хоноцгоож байгаа сурагтай.
Ерөнхийлөгчийн толгойны өвчин

Харин албан тушаал гэдэг амттай бялууны төлөө зүтгэгчид даргаа нэг бол хойд нас руу нь илгээдэг, эсвэл хар гэрт хорьдог энэ хадаастай сандлаас нэг их айхгүй байгаа бололтой. АН-ын томчуудын хүрээнд Ч.Сангарагчаагийн суудлын хэнд өгөх вэ гэдэг маргаан аль эрт эхлэсэн аж. Ерөнхий прокурор, Ерөнхий шүүгчийн суудлыг гартаа оруулж авсан АН-ынхан АТГ-ын даргаа томилох гэж тэсэлгүй яарч байгаа. Удахгүй УИХ-ын хаврын чуулган эхэлнэ. Энэ чуулганаар АТГ-ын даргын асуудлыг хэлэлцүүлэх үү? Аль эсвэл хүлээзнэх үү гэдгээ шийдэж чадахгүй байна. Учир нь Ардын намынхан “Гурван шатны шүүхийн шийдвэр гартал энэ асуудлыг хэлэлцэх шаардлагагүй гээд гэдийчих юм бол АТГ даргагүй хичнээн ч удаж мэднэ. Тиймээс ахиад л хэлэлцээрийн ширээнд суух шаардлагатай болж байгаа юм.

Хуулийн дагуу АТГ-ын даргын нэрийг УИХ-д Ерөнхийлөгч өргөн барих учиртай. Харин энэ нэр хэн байх вэ гэдэг дээр Ц.Элбэгдорж гацаад байна. АН-ынхан дотор нэр нөлөө олж эхлээд байгаа Ардчилсан хүчний холбооныхон Тагнуулын Ерөнхий газрын дарга асан Ж.Энхнасаныг дэмжиж байгаа. Харамсалтай нь Ж.Энхнасанг Ц.Элбэгдорж Ерөнхий сайд болмогцоо ТЕГ-ын томилсон ч тэрбээр бас л тагнаж чагнасан хэрэгт холбогдож байсан удаатай. Эхнэр нь сүрхий гүйлгээ ухаантай, хятадуудтай хамтран бизнес хийдэг учраас ашиг сонирхолын зөрчилтэй гэж олон албан тушаалаас мултарч байсан нэгэн. Өдгөө Тагнуулын экс дарга Ж.Энхнасан Өмгөөлөгчдийн холбооны дэд Ерөнхийлөгч гэсэн даруухан албанд нам гүмхэн амьдарч байна. Гэвч Ж.Энхнасан хүчтэй, зоригтой, бас шийдэмгий байж чадна гэдэгт олон хүн эргэлзэж, гэр бүлийнх нь бизнесийг ч тэд сонирхож байгаа юм.
Үүнээс гадна Ерөнхийлөгчийн хуулийн зөвлөх асан Г.Ганзоригийг Улсын Ерөнхий прокурор Д.Дорлигжав тэргүүтэй нөхөд АТГ-ын даргад сойхоор эргэлдэж байна. АНУ-д “Ганзориг консальтинг” компани байгуулж, сүүлийн арав орчим жил америкт аж төрж буй монголчуудад хууль, эрх зүйн зөвлөгөө, туслалцаа өгч байсан энэ эрхэм Ц.Элбэгдоржийг АНУ-д очиход нь тосч авч, газарчилж байсан нэгэн.

Гэвч олон жил гадаадад амьдарсан, монгол ахуй амьдралаас хол хөндийн, танил талын хүрээ муутай учраас Ерөнхийлөгчийн хуулийн зөвлөхийн ажлыг ч сайн хийж чадалгүй ажлаа өгсөн. Зөвлөхөөс хусагдсан энэ эрийг Д.Дорлигжав балишиглаж байгаа ч Ц.Элбэгдорж бас л эргэлзэж байна. Харин түүний нутгийн ах Тогоочийн Лхагвааг энэ суудалд хамгийн шаанстай нь гэж АН-ынхан шивэр авир хийж байна. Тэрбээр бас л Элбэгээгийн буянаар зөөлөн суудалд сууж үзсэн нэгэн. Тэрбээр 2000 онд Гаалийн Ерөнхий газрын даргаар ажиллаж, 2005 онд Удирдлагын акдемийг толгойлж явсан. Т.Лхагваа хэт нутгархаг ч Ховдынхон дотроо нэр нүүр олж чадаагүй энэ эр сонгуульд олон удаа өвдөг шороодож, намынхандаа бас л адлагдаж байсан нэгэн. Түүнийг Элбэгээ дэмжсэн ч намынх нь нөхөд бас л эсэргүүцэнэ гэдгийг Ерөнхийлөгч аль эрт тооцоолсон бололтой.

Өдгөө Т.Лхагваа Удирдлага, бодлого судлал хүрээлэнгийн захирлаар ажиллаж, АН-ын “Шинэ Улаанбаатар” төсөл дээр илтгэл тавьж, Ерөнхийлөгч Ц.Элбэгдоржийг тахин шүтдэг С.Эрдэнэтэй тун дотно байгаа. Тийм ч учраас түүний нэрийг Ерөнхийлөгчид С.Эрдэнэ санал болгож байгаа аж. Ардчилсан намынхан дотор АТГ-ын дарга болохыг хамгийн их хүсч байгаа хүн бол Т.Билэгт. Нэг хэсэг Ардчилсан хөдөлгөөн дотор шургалж орсон НАХЯ-ны “Болодой” хэмээх нууц нэртэй туршуул байсан гэдгийг Дарь.Сүхбаатар илчилж, намынхан дотроо үнэ хүндээ алдсан Т.Билэгтийн нас 55 хүрээгүй. Гэвч тэрбээр “Би АТГ-ын дарга болох ёстой шүү” хэмээн хуурай агсам тавьж байгаа ч хуулийн өмнө хүч мөхөсдөөд байна.
Үнэндээ Б.Хурцаас болж баахан баалуулж, албан тушаалыг сонгуулийн хандивын мөнгөний оронд бэлэглэж байна гэдэг хэл аманд хангалттай өртсөн Ерөнхийлөгч Ц.Элбэгдорж Үндсэн хуулийн цэцийн гишүүдийн нэрээ ч УИХ-д өргөн барьж чадалгүй гурван сарын нүүр үзэж байгаа. Дээр нь хэл амтай, хэрүүл тэмцэлтэй АТГ-ын даргыг сонгох ажил түүний хувьд тун амаргүй байгаа аж.
Б.Цоож

''Шударга мн''

Хадаастай сандал
Tweet
Bolod.mn

Сэтгэгдэл (1)

Уншигчдын оруулсан сэтгэгдлийн талаар манай сайт хариуцлага хvлээхгvй болохыг анхаарна уу.
Үгийн санд шүүлтүүр хийсэн болно

Зочин
Эрхэм Ерөнхийлөгчөө! Шарын Цогтоо гэдэг хүн яг таарна. Маш шударга, хуульч, АН-ын гишүүн, нэр цэвэр, цагдаа, прокурорт ажиллаж байгаагүй. Та алдахгүй шүү

2011-03-30 | 10:27:28 | 202.131.226.130 |

Мэдээ
Гадаад мэдээ
Видео