Увсынхан зааны гэргий, эсвэл гарьд Б.Гантогтохыг УИХ-д суулгах болов уу

2011-03-23

Увс аймаг УИХ-д гурван мандаттай. ХЗДХ-ийн сайд Ц.Нямдорж гэж дархлагдсан нөхөр, Б.Чойжилсүрэн гэж байгаа

үгүй нь мэдэгдэхгүй бизнесмен.Ч.Хүрэлбаатар гэж ирээдүйтэй байж мэдэх нэг залуу гээд МАН-ын гурван нөхөр увсчуудыг төлөөлөн УИХ-д сууж буй. Увс ардчилсан сонгууль өгсөн цагаас эхлээд улаан талдаа бат зогссон аймгуудын нэг. Увсад АН-аас суудал авч байсан түүх байхгүй. АН-ын лидерүүдийн нэгд зүй ёсоор багтдаг Ерөнхий прокурор Д.Дорлигжав гэхэд л Увсын тойрогт олон удаа өвдөг шороодсоныг уншигч та мэднэ.

Энэ тойрогт ,олон , удаа намнуулж байгаа АН-ынхан энэ жил МАН-тай нэгийгээ үзэж нэхий дээлээ уралцахаар зэхжээ. Тиймээс тусгай төлөвлөгөөний дагуу жинхэнэ гарч ирэх шаанстай гэж үзсэн хэд хэдэн залууг нэр дэвшүүлэхээр бэлтгэж байгаа аж. Тус намаас ирэх сонгуульд сойхоор АН-ын ҮЗХ-ны гишүүн “Мон-Атом”-ын дэд захирал Н.Тэгшбаяр, мөн хорооны гишүүн Д.Бумбаяр зааны гэргий Ц.Одонтунгалаг /хуульч, хувийн нотариатч/, НХХ-ийн дэд сайд Д.Нямхүү, МУИС-ийн Олон улсын эрх зүйн тэнхимийн эрхлэгч Т.Мэндсайхан /хувийн хуулийн фирмтэй/, Улсын гарьд Б.Гантогтох, ‘Тэсо” компанийн захирал Н.Сайнбуян нарыг нэр дэвшүүлэхээр болжээ.

Дашрамд дурьдахад, эдгээр хүмүүс бүгд АН-ын ҮЗХ-ны гишүүд аж. Түүнээс биш Увсын тойрогт акулууд очиж өвдөг шороодохгүй, зүрхтэй зоригтой залуучуудаа явуулж тэднийг унагаах төлөвлөгөө боловсруулж суугаа ажээ. Н.Сайнбуян гэх нөхөр Д.Дорлигжав болон Увсад АН-аас нэр дэвшсэн нөхдөд гар таталгүй мөнгө босгодог байсан гэдгийг хэн хүнгүй мэдэх байх. Нөгөө талд нутгийн хүү дуучин С.Жавхлан бие даан нэр дэвшинэ гэдгээ өөрөө хэлсэн. С.Жавхлангийн хувьд бол нэлээд халгаатай өрсөлдөгч гэдгийг ажиглагчид ярьж буй.

Сонгууль дөхөж буй энэ өдрүүдэд Ерөнхийлөгч асан Н.Энхбаяр түүнд анхаарал хандуулж, Ц.Нямдоржийн эсрэг өөрийнхөө намын нэр дээрээс босгох сонирхол байгааг ч эх сурвалж дуулгасан. Увсаас УИХ-д сууж буй Б .Чойжилсүрэн бол угаасаа УИХ-д байгаа үгүй нь мэдэгдэхгүй бизнесээ хийгээд явж байдаг нөхөр, ирэх сонгуульд түүнийг сонгохгүй гэдгээ увсчууд нэгэн дуугаар амлаж байгаа. Тэрбээр өнгөрсөн 2008 оны сонгуулиар сонгогч бүрт мөнгө тарааж элдэв арга хэрэглэж байж гарч ирсэн түүхтэй. Тараасан мөнгөө нөхөхийн тулд ахмад дайчдад олгох нэг өрөө байрны бүх тендерийг өөртөө авсан.

Хүүхдийн урлан бүтээх төвийн хашаан дахь орон сууцны хороолол, монгол наадмын дэвжээ болсон төв цэнгэлдэх хүрээлэнгийн ойр орчим гээд түүнд гар бие оролцоогүй барилга үгүй гэх. Тэгэхээр увсчууд Б.Чойжилсүрэнгийн бизнесээ хийх замыг нь засч, ирэх сонгуульд гаргахгүй гэнэ. Харин Ц.Нямдоржийн хувьд хэзээ ч хүчтэй өрсөлдөгч хэвээрээ байгаа бөгөөд тэрбээр өөрийн тойрогтоо нэг ч хии гаргаагүй аж. Түүнийг унагаж чадах хүн бол С.Жавхлан гээд бодчихсон явааг чухам яаж тайлбарлах юм бол.

Магадгүй дуучиндаа хайртай болон өнчин өрөөсөн гэхээр сэтгэлээ бөмбөрүүлж суудаг түмний хувьд гаргаад ирэхийг үгүйсгэх аргагүй юм. Н.Энхбаяр ахайтан ч нэгийг бодож хоёрыг тунгаасан биз ээ. Увс аймагт дөрвөд, баяд, халх, хотон гэсэн дөрвөн том ястан бий. Тэгээд ч олон ястны өлгий нутагт улс төрийн өөрийн гэсэн онцлог байдгийг ч судлаачид өгүүлдэг. 2008 оны сонгуульд гэхэд л АН-аас нэг хотон, хоёр баяд нэр дэвшээд ялагдсан. Хэрвээ нэг хотон биш баяд, халх, дөрвөд тус бүрээс нэг нэг хүн нэр дэвшсэн бол Д.Дорлигжав гарах байсан гэсэн судалгааг хүртэл хийжээ.

Олон ястны өлгий болсон аймагт тухайн үндэстний зан заншил, ёс зүйд тохирсон сонгууль явуулж байгаагүй нь тус намын ялагдах нэгэн шалтгаан байхыг ч үгүйсгэхгүй байгаа юм. АН-аас санал болгож нэр дэвшүүлж байгаа эдгээр залуусаас олон жилийн турш ус нутагтайгаа харьцаж ирсэн Н.Тэгшбаярыг нэлээд санал хуваах шаанстайд тооцож байгаа аж. Гарьд Б.Гантогтох ч үймүүлнэ гэнэ. Баруун турууны бүсгүй, зааны гэргий Ц.Одонтунгалаг ч санал хуваах шаанстай нэгэн гэдгийг хэлсэн. Харин АН-аас нэр дэвшигчдэд мөнгө босгож чамгүй туршлага хуримтлуулсан Н.Сайнбуян, МУИС-ийн багш Т.Мэндсайхан нар ч нутаг зүг рүү анхаарал хандуулаад багагүй хугацааг өнгөрөөж байгаа гэх.

Хамгийн гол нь эдгээр нэр дэвшигчид бүгд ҮЗХ-ны гишүүн бөгөөд2012 он хүртэл ротаци хийгдэхгүй учраас эдгээр хүмүүсээс АН-ын анхны ялагч Увс аймгаас тодрох нь гарцаагүй болжээ. Яг өнөөдрийн байдлаар энэ тойргийг ийнхүү төлөвлөөд байна. Увс аймагт олон ястнаас гадна нэг онцлог бий. Тэд улсдаа алдартай олон бөхчүүдийн өлгий нутаг. Тийм ч учраас бөхдөө бусад аймгаас илүү хайртай газарт бөхчүүд нэр дэвших нь амжилтын нэг үндэс байж магадгүй гэсэн тооцоог тус намынхан гаргасан хэрэг.

Хэрэв Гарьд Б.Гантогтох, Д.Бумбаяр зааны гэргий нар АН-аас нэр дэвших юм бол аль аль нь ус нутагтаа нэр хүндтэй улсын тоонд зүй ёсоор ордог. Тэгэхээр АН-ынхан зааны гэргийгээр галаа мануулж, Б.Гантогтох гарьдаар адуугаа мануулах хэрэг гарах нь дээ.

С.Ууганбаяр

Эх сурвалж: “Монголын мэдээ”

Увсынхан зааны гэргий, эсвэл гарьд Б.Гантогтохыг УИХ-д суулгах болов уу
Tweet
Bolod.mn

Сэтгэгдэл (2)

Уншигчдын оруулсан сэтгэгдлийн талаар манай сайт хариуцлага хvлээхгvй болохыг анхаарна уу.
Үгийн санд шүүлтүүр хийсэн болно

Зочин
Гантогтох МАН орсон бол гарч магадгүй Баянаа аварга дэвшээд гарч чадаагүй юм шүү Увсынхан улаан өнгөтэй хэцүү уул нь АН-аас хүн гаргах л ёстой байхгүй юу сайн л ажилдаа Ганаа миний дүү

2011-11-17 | 11:54:05 | 202.179.10.22 |