болно гэсэн хууль хаана байна вэ-

Чингэлтэй дүүргийн замын цагдаа С.Ган-Очир энэ сарын 9-ний шөнө Ерөнхийлөгчийн Тамгын газрын хуулийн бодлогын референт, 27-хон настай нэгэн залуугийн амь насаар машиныхаа дугуйг “нөхөж” орхилоо.

Энэ хэрэгтэй холбоотой ээдрээ, хариулт нэхсэн асуултууд шил даран хөвөрч байна. Замын цагдаагийн эх сурвалжуудын өгч байгаа мэдээллээр хэрэг Баянгол дүүргийн 18 дугаар хороонд энэ сарын 9-ний 23:30 цагийн үед гарч, хохирогч эмнэлэгт ухаангүй хүргэгджээ. Харин эмнэлгийн ажилтнуудын хэлснээр хохирогч залуугийн нэр, хаягийг тогтоож чадаагүй байхад нас барсан гэж байгаа.

Гэтэл 10-ны өдрийн 16:00 цагийн орчимд Улсын Ерөнхий прокурорын дэргэдэх Мөрдөн байцаах албанаас хохирогчийн аав руу залгаж, “Хүү чинь осолд орсон. Та манай албанд ирнэ үү. Утсан дээр нь “Аав” гэсэн дугаар байсны дагуу залгаж байна” гэжээ.

Замын цагдаагийн хэвлэлийн төлөөлөгчийн тайлбарласнаар тэд хэргийн дуудлагыг авмагцаа очиж, хэргийн газрын үзлэг, хэмжилтийг хийгээд, осол гаргасан машины эзэн цагдаагийн албан хаагч байсан учраас холбогдох байгууллагад нь шилжүүлээд хэргийн газрыг орхиж явсан гэж байгаа. Харин Улсын Ерөнхий прокурорын газрын эх сурвалж хэргийн талаарх мэдээлэл 10-ны өдрийн үдээс хойш тус газарт ирсэн гэжээ. Тэгэхээр энэ хүртэл, замын цагдаагийнхан юу хийсэн байж таарах вэ?

Прокурорын мөрдөнгийнхний гарт очиж, аав руу нь залгах хүртэл хохирогчийн гар утас хэнд байсан хэрэг вэ? Гар утас нь байсаар байхад замын цагдаагийн ажилтнууд хохирогчийн ар гэртэй холбоо тогтоогоогүй учраа тайлбарлахгүй байна. Гар утас хохирогчийн талаарх мэдээллийг өгч чадахгүй байгаа юм бол, замын хажуугаар явахдаа иргэд духан дээрээ нэрээ бичиж явах ёстой болж таарч байна. Хэрэв цагдаа биш, энгийн хүн энэ хэргийг үйлдсэн бол ачиж, саатуулаад сүрийг үзүүлж таарна. Хууль тийм юм чинь. Харин замын цагдаа хүн дайрсан бол гадуур байцаагдаж болно, хохирогчийн талаарх мэдээллийг хэдэн ч цаг нууж болно гэсэн хууль хаана байна вэ, Хууль зүй дотоод хэргийн сайд аа!

Замын цагдаагийн газраас өгсөн мэдээллээр осол гаргасан цагдаа цоо эрүүл байсан гэнэ лээ. Хэргийн мэдээллийг 16 цаг нууж байгаа цагдаатай манайх шиг улсад албан хаагчийнхаа тарьсан балгийг баллуурдахын тулд хэрэгт холбогдогчийн цусыг өөр хэдэн ч хүний цусаар сольж, орлуулж чадна, энэ хугацаанд.

Он гарсаар дөрвөн ч цагдаа зам тээврийн осол гаргаж, хүний аминд хүрээд байна. Хэчнээн цагдаа хүний аминд хүрч, хүчирхийлэл үйлдэв. Хүн дайрч хөнөөчихсөн цагдаагаа хаацайлж дөнгөөд байгаа болохоор цагдаа нар хэрэг хийхээсээ айна ч гэж юу байхав. Намайг хамгаалах ёстой цагдаа ийм л байна, би хэнд итгэж амьдрах вэ, Ц.Нямдорж сайд аа!

Цагдаа хүний аминд хүрсэн жишээнээс цөөн хэдийг энд бичиж, эргэн сануулъя, Танд!

1.Хөдөлгөөнт эргүүлийн газрын албан хаагч, дэд ахлагч Т.Үүрцайх өнгөрсөн хоёрдугаар сарын 3-нд согтуугаар тээврийн хэрэгсэл жолоодож, улмаар жирэмсэн эмэгтэйг дайрч хүнд гэмтээв. Эмэгтэйн биеийн байдал одоо хүртэл сайжрахгүй эмчлүүлж байгаа аж. Хэргийг УЕП-ын дэргэдэх Мөрдөн байцаах албаныхан шалгаж байна.

2.2008 оны гуравдугаар сарын 5-нд Баянгол дүүргийн Цагдаагийн хэлтсийн эрүүлжүүлэх байрны цагдаа С.Бат-Очир, С.Ганзориг, Р.Цогбадрах, эмч У.Золзаяа нар бүлэглэн улсын начин П.Ганбаярын амь насыг хөнөөв. Тэднийг Эрүүгийн хуулийн 91.1, 99.2-т заасан үндэслэлээр буруутган байцаасан ч, шүүх хурлаар С.Бат-Очирд таван жилийн хорих ял ногдуулж, бусдыг нь цагаатгасан юм. Хэрэг гарсан даруйд тус хэлтсийн удирдлагуудыг нь торгож, цол бууруулаад өнгөрсөн юм.

3.2008 оны есдүгээр сард Эргүүл хамгаалалтын газрын эргүүлийн офицер О.Баянмөнх такси хүлээж зогссон 20 орчим насны охиныг хээр аваачин хүчирхийлсэн. Тэрээр “Би хүргээд өгье” гэж хэлээд Туулын бургасанд аваачиж хүчирхийлсэн нь мөрдөн байцаалтын явцад тогтоогдсон байна. О.Баянмөнх нь цагдаагийн байгууллагад 20 гаруй жил ажилласан дадлага туршлагатай нэгэн юм.

4.Өнгөрсөн оны хоёрдугаар сарын 23-24-нд шилжих шөнө Баянгол дүүргийн цагдаагийн хэлтсийн цагдаа дэд ахлагч Н.Дэлгэрдалай, Н.Булгаа эрүүлжүүлэх байрныхаа ариун цэврийн өрөөнд иргэн А-г зодож улмаар уг үйл явдлыг бичсэн хяналтын камерын дүрс бичлэгийг устгасан. Тус хэргийг цагдаагийн байгууллагынхан дотоод хяналт шалгалтаараа илрүүлж УЕП-ын дэргэдэх Мөрдөн байцаах албанд шилжүүлсэн юм. Цагдаагийн ажилтнууд эрүүлжүүлэх байрны эмч, дэслэгч н.Эрдэнэбилэгийн заавраар бичлэгийг устган хохирогчоор “гомдолгүй” хэмээн хүчээр хэлүүлсэн нь мөрдөн байцаалтын явцад тогтоогдсон юм.

5.2006 оны зургадугаар сарын 12-нд Баянзүрх дүүргийн Амгалангийн орчимд Чингэлтэй дүүргийн цагдаагийн хэлтсийн дэд хурандаа Ц.Насанбат зам хөндлөн гарч байсан явган зорчигчийг дайрч хөнөөсөн. Тэрээр талийгаачийг нас барсны маргааш өдөр нь ар гэрийхэнд нь дуулгаж байсан юм. Гэсэн ч талийгаач өөрөө замын хөдөлгөөний дүрэм зөрчсөн учраас осол гарсан хэмээн хэрэгсэхгүй болгосон байна.

6.2009 онд Чингэлтэй дүүргийн хэсгийн байцаагч, цагдаагийн ахмад Н.Наранзул танилынхаа хүүг хашраах гэж байгаад аминд нь хүрсэн хэрэг гарч байв. Түүнд танил эмэгтэй нь “Манай хүү архи уугаад агсам тавих юм. Хашраагаад өгөөч” гэснээр хүсэлтийг нь хүлээн авсан залуу хэтрүүлсэн байлаа. Тэд үүнийгээ нуун дарагдуулсан ч, захиалагч ээж цагдаагийн байгууллагад “Хүүг маань танхайрагч этгээд зодож, амийг нь хөнөөлөө” гэж хандсанаар хэрэг илэрсэн юм.

7.2009 оны гуравдугаар сарын 10-нд Төмөр замын цагдаагийн хэлтсийн хэв журмын цагдаа Г нь гудамжинд явж байсан 19 настай охины гар, хөлийг нь скочдож хүчирхийлсэн хэрэг гарч байв. Тэрээр үйлдсэн хэргээ хүлээн зөвшөөрөхгүй байсан ч нотлох баримтаар тогтоогдсон байна.

8.Сүхбаатар дүүргийн Замын цагдаагийн тасгийн албан хаагч, цагдаагийн дэслэгч н.Баттулга өнгөрсөн онд тээврийн хэрэгсэл согтуугаар жолоодож явахдаа явган зорчигчийг мөргөж хүнд гэмтэл учруулж байв. Хэргийг УЕП-ын дэргэдэх мөрдөнгийнхөн шалгасан билээ. Дэслэгч Баттулга нь цагдаагийн байгууллагад ажиллаад нэг жил ч болоогүй нэгэн байжээ.

9.2007 оны наймдугаар сарын 6-нд Сэлэнгэ аймгийн Сайхан сумын Номгоны цагдаагийн хэсгийн төлөөлөгч Л.Мөнхбат найз Б.Даваатай согтууруулах ундаа хэрэглэсэн үедээ иргэн А.Оюуныг хөнөөсөн хэрэгт холбогдож байв. Л.Мөнхбатыг хүндрүүлэх нөхцөл байдалгүйгээр хүнийг санаатай алсан гэмт хэрэгт, Б.Давааг бусдыг эд хөрөнгийг санаатайгаар эвдэж гэмтээсэн, төрийн албан хаагчийг хуулиар хүлээсэн үүргээ гүйцэтгэж байхад нь хүч хэрэглэн эсэргүүцсэн гэмт хэрэг үйлдсэн гэм буруутайд тооцож, Л.Мөнхбатыг Эрүүгийн хуулийн 91.1-д зааснаар 10.1 жилийн хорих ял ногдуулсан байна.

10.Нийслэлийн хөдөлгөөнт эргүүлийн цагдаа, дэд ахлагч Б.Төгсбаяр 2009 оны тавдугаар сарын 31-нд өөрийн танил Б.Баярхүүг “Чи надад таалагддаггүй” гэх шалтгаанаар хөдөлмөрийн чадваргүй болтол нь зодож гэмтээв. Тухайн үед хэргийг УЕП-ын дэргэдэх Мөрдөн байцаах алба шалгах байтал Сонгинохайрхан дүүргийн цагдаа нар шалгаж, зарим нотлох баримтыг устгасан гэдэг. Хожим тус албаныхан шалгасан ч Б.Төгсбаярт холбогдох хэрэг шүүхийн шатанд байхдаа Өршөөлийн хуульд хамрагдан хэрэгсэхгүй болжээ. Харин хохирогч Б.Баярхүү тахир дутуу болж, хөдөлмөрийн чадвараа бүрэн алдсан байна.

11.Өнгөрсөн оны аравдугаар сард Хөдөлгөөнт эргүүлийн цагдаа Улсын Их дэлгүүрийн урд замд 30 гаруй насны эрэгтэйг дайрч хөнөөсөн хэрэг гарсан. Явган зорчигч ослын газар дээр шархаа даалгүй нас барсан. Хэргийг УЕП-ын дэргэдэх Мөрдөн байцаах албаныхан шалгаж байна.

12.Өнгөрсөн онд Архангай аймгийн цагдаа нар шир тушаахаар явж байсан иргэн Б-г “Чи хаанаас юу хулгайлав” хэмээн хэл амаар доромжилж, хөдөлмөрийн чадваргүй болтол нь зодож хүнд гэмтэл учруулсан хэрэг гарч байв. Хэрэг шалгагдах явцдаа “Гэмт хэргийн бүрэлдэхүүнгүй” хэмээн хэрэгсэхгүй болсон байна.

Х.Хулан

"Зууны мэдээ"

Дахиад хэдэн цагдаа хүний амиар дугуйгаа нөхөж, гарынхаа чилээг гаргах вэ, Ц.Нямдорж сайд аа!
Tweet
Bolod.mn