Гэр бүлийн хоёр хүнийг буудаж, нөхрийг нь хөнөөсөн хэрэгт сэжиглэгдээд буй Б.Нэргүйн ээж Г.Бадмаагаас хүүгийнх нь талаар цөөн асуултад хариулт авсан юм. Тэрбээр хүүгээ хүний амь хөнөөсөн гэдгийг мэдээгүй байгаа билээ. Б.Нэргүйн нагац ах Г.Банди тэр талаар хэлэлгүй нууж байгаа аж. Учир нь Г.Бадмаа нэлээд олон жилийн өмнө автын осолд орсны улмаас сэтгэцэд нь өөрчлөлт оржээ. Гэхдээ ухаан санаа эрүүл саруул. Тиймдээ ч ганц хүүдээ амь гэнэ. Хар багаас нь эрхлүүлж хүн хүнээс харамлаж, хайрласаар өдийг хүргэжээ. Харин хүүг нь хэрэгт холбогдсон, хүний амь бүрэлгэсэн гээд хэлчихвэл юу ч хийж мэдэх бололтой. Тиймд Г.Банди эл хэргийг ээжээс нь нуугаад байгаа аж. Цагдаа нар Нэргүйг баривчлаад явах үед "Ээжээ хүүг нь хот руу авч явахаар ирсэн байна. Тэнд аваачиж юм асуугаад л буцаана гэсэн. Санаа зовох зүйлгүй. Удахгүй ирнэ ээ" гээд явжээ. Түүнийг сэтгэцийн өвчтэй гэж хүн бүхэн хэлж буй ч жирийн л нэг айлын эзэгтэй мэт ажиглагдана. Яриа хөөрөө нь ч хэвийн л юм. Хурдан шалмаг хөдөлж гэрийн хоёр талд гаран байгаагаараа биднийг дайлж байсан. Ингээд бид Г.Банди гуайн хэлсэнчлэн хүүгийнх нь найз мэтээр түүнтэй яриа өдөж Нэргүйн талаар зарим зүйлийг тодрууллаа.

-Нэргүй хэддүгээр анги төгслөө. Бага байхад нь сургуулиас гаргасан гэсэн сураг байсан?

-Долдугаар ангид байхдаа өөрөө сургуулиас гарчихсан юм. Уг нь хичээлдээ онц сурдаг сайн хүүхэд байсан юм. Шинэ жил болохоор л өвлийн өвгөнөөс бэлэг аваад ээждээ өгдөг байсан.

-Танай хүү хаана байгаа юм?

-Ах хэлэхдээ найзынх нь талаар л юм асуух гээд цагдаа нар аваад явсан гэсэн. Миний санаа зовоод байх юм. Байсхийгээд л зүүн хамар дээр гарч хардаг. Маргааш ирэх байх аа. Өнөөдөр ч ирж амжихгүй л болов уу. Нар хүүшилчихлээ. Миний хүү хот хүрээ рүү зөндөө л очиж, ирдэг. Ирэхдээ ээждээ байнга юм авчирч өгнө өө.

-Танай хүү Г-гийн охиноос яагаад салсан юм бэ?

-Нэг охин манайд ирдэг л юм. Уг нь бэр болох байсан юм гэсэн. Гэхдээ миний хүүтэй таардаггүй юм. Дандаа л хэрэлдэж муудалцдаг байсан. Харин саяхнаас урд айлын охинтой уулзаж учраад байгаа бололтой байсан. Тэр охин нь ч нэлээд сайн юм шиг байгаа юм. Тэднийд өдөржин байдаг болчихсон байна лээ.

Ийнхүү ярилцсаны дараа бид хүн амины хэрэг гарсан гэх газар руу хөдөллөө. Биднийг зүүн урд гүвээ давж явахад уг хот айлаас зүүн тийш нэгэн хүн алхаж байсан нь Г.Бадмаа гуай бололтой. Мөн л хүүгээ харахаар өвөлжөөнийхөө зүүн овоо руу алхаж яваа нь энэ болов уу.

Баяндавааны карьерт нар шингэх үед хүрч очсон юм. Уг нь ч Нэргүйнхээс ойрхон юм. Карьерийн ирмэг дээр шинэхэн орсон цасан дээр дуссан цус ягаарна. Түүнийг ажиглавал тэндээс ямар нэгэн хүнд зүйл чирч зайлуулсан болов уу гэмээр мөр тод үлдсэн байв. Уг мөрийг даган хэд алхтал карьерийн хамгийн эхний хонхорт тулан алга болов. Харин тэнд хэсэг чулуун дээр нөжирсөн цус үлдсэн байлаа. Тухайн газрыг нэлээд ухаж төнхсөн болов уу гэмээр хоёр метр хэртээ урт хонхойлжээ. Ойр хавьд нь өөр өөр гутлын мөр байна. Энэ газарт л хэрэг гарч, цогцсыг булсан бололтой. Цагдаа нар ч гэмт хэрэг гарсан эл газар нарийвчилсан үзлэг хэд хэдэн удаа хийсэн гэсэн.

Түүнээс гадна цус дуссан хонхрын зүүн урд талд ойрмогхон мөн л цус байна. Бүр цаашаа хэд хэдэн ч удаа бага зэрэг нөжирсөн цус үлджээ. Баяндаванаас Чингэсийн цогцолбор хүртэл арав гаруй км учир биднийг явсаар байтал бүр үдшийн бүрий буух нь тэр. Тэгээд ойр хавийн жуулчны баазуудаас талийгаач Гонгорын гэрийг сураглалаа. Хүн бүр л "Уг нь урд уулын аманд байгаа. Гэхдээ тийшээ машин тэрэг яваагүй. Та нарын унаа ч хүрч амжилгүй цасанд суух болов уу гэж байв. Тэднийхтэй хамт Увс аймгаас нүүж ирсэн гэх Ганбат хэмээн өөрийгөө танилцуулсан нэлээд халамцуу эр "Хөрөнгө хогшил гэхээр юм байдаггүй айл. Хэрэг гарснаас хойш бага насны хоёр хүүхэд л эднийд байгаа байх" гэлээ.

Цагдаа нар дуудлагын дагуу хэргийн газар очиход Баяндавааны карьерт талийгаач Гонгорын цогцсыг булсан байжээ. Хэргийн газраас холгүйхэн орших Б.Нэргүйн гэрт 05:20 цагт очиход тэрбээр дээл хувцсаа өмсчихсөн буугаа үүрээд оргох гэж байсан байна. Цагдаа нар түүнийг баривчлах гэхэд нь тэрбээр өөдөөс бага зэрэг эсэргүүцэл үзүүлж "Та нар яаж байна аа. Яалаа гэж баривчилж байгаа юм" хэмээн хашгичиж байсан юм байх. Албаны эх сурвалжийн хэлж буйгаар "Г.Нэргүй хэргээ хүлээгээд байгаа юм байна. Тэрбээр "Гонгорын охинтой сууж байсан юм. Тэгээд биднээс нэг хүүхэд гарсан. Гэхдээ тэр хүүхэд нь миний хүүхэд биш юм билээ. Үүнээс болж салцгаасан. Гэтэл аав нь ирж намайг дандаа элдэв янзаар хэлдэг байсан. Бүр арга ядахдаа шинэ таван ханатай гэр хүртэл авч өгсөн. Хэрэг гардаг өдөр тэдний өөдөөс юу ч хэлээгүй. Тэд намайг загнаад байхаар нь уур хүрээд байсан юм. Угаасаа би хүнээр загнуулж үзээгүй. Тэгээд орой болж үхрээ уяж байхдаа Гонгортой уулзсан юм. Тэр мөн л өдрийн хэлсэн зүйлээ давтан ярьсан. Ингээд орой болоход тэднийг гаргаж өгөх гэж яваад карьерийн тэнд очингуутаа л араас нь буудчихсан" хэмээн мэдүүлсэн гэнэ.

Харин хохирогч М "Биднийг замын унаанд суулгаж өгөх гээд Нэргүйн хамт явсан. Гэрээс гараад зүүн урд зүг рүү алхаад байхаар нь төв зам руугаа яагаад явахгүй байгаа юм бэ гээд асуусан чинь "Энүүхэн цаана манай найзынх байгаа тэрнийг гуйгаад хүргээд өгчихье. Одоо яаж унаа олдох юм" гэсэн. Тэр үед буудчихна гэж яаж санах билээ. Дагаад л алхаад байсан. Карьер хүрэх үед бие засна гээд ард үлдсэн. Гэнэт л буун дуу гарч нөхөр маань чанга хашгираад гүйсэн. Юу болоод байгааг мэдэх сөхөөгүй эргээд хартал буун дуу дахин тас хийж нэг юмаар хүчтэй цохих шиг л болсон. Тэгээд цаашаа юу болсныг мэдээгүй. Нэг сэрсэн чинь шороо, чулуу, цасаар булуулчихсан хэвтэж байсан. Нөхөр маань дуудаад сэрэхгүй болохоор нь тусламж дуудах гээд сумын төв рүү алхсан. Биднийг, найзынх энд ойрхон хэмээн худал хэлж амь насыг минь хөнөөхөөр авч явсан юм билээ." хэмээн мэдүүлжээ.

Хохирогч М ухаан оронгуутаа л Эрдэнэ сумыг чиглэн алхсан байна. Тэгээд сумын төвийн эмнэлэгт шууд хүрч очин тусламж хүсчээ. Хэрэг гардаг шөнө ажилласан сувилагч эмэгтэй байж таарсан. Тэрбээр нэрээ нууцлан мэдээлэл өгөхийг зөвшөөрөв. Шөнө 04:30 минутийн орчимд эмнэлгийн хаалгаар цустайгаа холилдсон нэгэн эмэгтэй орж ирсэн. Тэр хүн хохирогч М байсан. Тэрбээр "Буудуулчихлаа. Нэргүй бид хоёрыг буудчихсан" гээд л ухаан алдаад уначихсан. Бууны сум цээжинд нь оносон байсан" гэв. Тухайн үед жижүүр байсан эмч Г эмнэлгийн анхны тусламж үзүүлж, цагдаад энэ талаар цаг алдалгүй мэдэгджээ.