Сангийн дэд сайд Ч. Ганхуягийн гэргий Г. Уянга: Нөхөр маань хуримандаа урилгын цагийн дагуу миний бэлдсэн хувцаснуудыг зохистойгоор нь өмсөөд зочин шиг ирсэн

2011-02-22

Монголын бизнес улс төрд тод мөртэй гялалзаж яваа “Хас”-ын тодотголт Сангийн сайд Ч.Ганхуягийн гэргий Г.Уянга

энэ удаагийн “Эрхэмсэг хатагтай” булангийн зочноор уригдлаа.

Цэл залуухан банкирийн бүхэл бүтэн банк босгож, бизнес санхүүгийн адармаатай замд цахиур хагалсан амжилтын цаана олонд модель гэж алдаршсан залуу хатагтай Г.Уянга нууцгайхан оршсоор ирсэн. Дөрвөн хүүтэй өнөр бүлийн эзэн хаа ч явсан хараа булаам үзэсгэлэнт гэргийгээрээ гоёх дуртай.

Тиймдээ ч эдийн засагч мэргэжилтэй Г.Уянга хатагтай сүүлийн үед олон нийтийн сониуч фокуст хамгийн эрчтэй өртөх болсон билээ. Ямартаа ч өнөө цагийн өнгөлөг, мөнгөлөг, залуухан, халуухан хос Сангийн дэд сайд Ч.Ганхуяг, түүний гэргий Г.Уянга нарын амьдралын тэр бүр бусдад дэлгэж байгаагүй сонин хачнаас “МНӨ” хүргэхэд таатай байна.

-Юуны өмнө Монголын улс төр бизнесийн залуухан, халуухан хос болох танай гэр бүлийн Валентины баярын сониноос яриагаа эхлэе гэж бодлоо?

-Хайрын баярын тухайд бид хоёр тэр орой хамтдаа хоол идэж, найз нартайгаа цагийг өнгөрөөсөн. Ер нь ажиглаад байхад манайхан сүүлийн үед ямар нэгэн баяруудыг илүү өргөн цар хүрээтэй их цаг, хөрөнгө зарж тэмдэглэдэг болоо юу даа. Лалынхны тэмдэглэдэг баяраас бусдыг нь бараг хөл хөөртэй онцолдог болжээ.

Миний хувьд ийм хэв маягт бага зэрэг шүүмжлэлтэй ханддаг. Залуухан, халуухан хос гэдэг тодорхойлолтын хувьд бид өөрсдөө залуу хүүхдүүд маань бага байна. Ажил төрлийн завсраар олдож байгаа чөлөө заваа аль болох гэр бүл үр хүүхэддээ илүү өгөөжтэйгээр зарцуулахыг хичээдэг
болохоор хүмүүс залуу, халуун гэр бүл гэж хардаг байж болох юм.

-Өө, тань шиг эрх танхил хатагтайн амнаас баяр ёслолыг шүүмжлэх үг гарна гэж огт төсөөлсөнгүй?

-/инээв/. Би ер нь эрх танхил биш. Намайг айлын ганц охин гэдэг утгаар нь их эрх дураараа гэж найз нөхөд маань анх хүлээж авах тохиолдол байсан л даа. Ээжийн охин, эр хүний хань гээд аль аль талаасаа би тийм дур зоргоороо хүн биш л дээ.

-Валентины өдөр дэд сайдаас таныг сураглахад “Өнөөдөр чинь Валентины өдөр” гээд их харамлангуй байсан л даа?

-Үгүй дээ. Үнэхээр тийм сүр дуулиан болоогүй. Тэгэсгээд л өнгөрсөн. Ер нь заавал баяр ёслолоор нэг нэгэндээ бэлэг өгөөд байхаасаа илүү амьдралынхаа өдөр бүр гэр бүлдээ баяр баясгалан инээд хөөр бэлэглэж халуун дулаан уур амьсгалыг бүрдүүлэх нь илүү гэж нөхөр бид хоёр үздэг.

-Айлын гэргий эр нөхрөө амжилтанд хөтлөгч, хамтран зүтгэгч эсвэл халамжлуулагч, хайр хүсэгч гээд арын албаны олон үүрэг хүлээгч байдаг. Харин таны хувьд?

-Би нөхрийнхөө хамгийн сайн найз нь байж чаддаг. Найз гэдэг утга ямар өргөн цар хүрээтэй, ид шидтэй билээ. Нөхөр маань ч хамгийн дотны найз минь байж чаддаг. Энэ хүрээнд ямар ч эхнэр нөхөр гэсэн хана хэрэмгүйгээр хялбархан ойлголцож бие биенээ дэмжиж, түшиж амьдардаг.

-Өнөөдрийг хүртэл ихэнх нь таныг Ч.Ганхуягийн модель эхнэр гэж тодотгосоор ирсэн. Харин та бол амьдралдаа загвар үзүүлж байгаагүй гээд байдаг нь хэн нэгэнтэй андуурсных уу? Эсвэл учиртай юу?

-Намайг яагаад хүмүүс модель гээд байдгийг гайхдаг л даа. Хэвлэлүүдэд бүр топ модель гээд биччихсэн байхыг нь уншаад нилээн ичсэн л дээ. Би амьдралдаа тайзан дээр загвар өмсөж үзээгүй. Харин тухайн үеийнхээ загварын тайзны гоё сайхан эгч нар олны танил бүсгүйчүүдийг хараад “Ямар гоё юм бэ. Ямар хүмүүс нь ийм гоё загвар өмсөгч байдаг байна аа” гээд бодоод өнгөрч байснаас загвар өмсөөд алхаж байсан үе байхгүй.

-Нөхөрт тань мэдээж таатай таниар бахархах сэтгэгдэл төрүүлдэг байх?

-Мэдэхгүй.Чамайг хүмүүс ингэж байна гээд энэ сэдвээр ярилцаж огт үзээгүй юм байна. Яагаад гэвэл манай хүн эхнэрээ хэн гэдгийг мэднэ шүү дээ. Гэхдээ би 2001 онд “Улаанбаатарын мисс” тэмцээнд орж байсан. Энэ нь зөвхөн найз нарын маань шахалтаар нэг хоногийн өмнө бүртгүүлээд оролцож байсан санаандгүй шахуу үйл явдал болсон. Гэрийнхэндээ ч хэлэлгүй зурагтаар гарна гэдгийг ч тооцоолоогүй хам хум хувцас бэлдээд оролцож байсан.

Олон гоё охид өрсөлдөж бараг сарын өмнөөс бэлтгэсэн байсан. Одоо бараг хэддүгээр байранд орсноо ч санахгүй байна. “Баясгалант сайхан мисс” гэдэг өргөмжлөлтэй тав зургадугаар байрт шалгарч байсан байхаа. Магадгүй үүнээс улбаалаад загвар өмсөгч гэж хүмүүс төсөөлдөг болсон байх. Одоо эргээд бодоход их хөгжилтэй санагддаг.

-Та их европжуу төрхтэй, гадаад төрхөөрөө ч модель гэж хэлэхэд андуурагдахааргүй л дээ?
-Би цэвэр Монгол. Ээж маань намайг төрүүлэхдээ Германд оюутан байсан. Үүнийг нь мэддэг хүмүүс нь намайг Герман аавтай гэж ярьдаг.

Аав ээж хоёр маань Монгол. Харамсалтай нь намайг бага байхад хувь заяаны эрхээр тэд маань тусдаа амьдрах болсон. Би бол эмээгийнхээ гар дээр өссөн эмээгийн охин. Аавтайгаа төдийлөн ойр өсөөгүй. Европ төрхтэй гэдгийн тухайд аав ээж хоёрынхоо аль сайныг нь аваад дундаас нь гарсан их азтай хувилбар. /инээв/.

-Та хотын унаган охин уу? Түрүүн эмээ маань миний амьдралыг үзэх үзлийн суурийг нь их зөв тавьж өгсөн гэж ярьснаа үргэлжлүүлж болох уу?

-Тийм ээ. Хотын унаган охин. Эмээтэйгээ хоёулхнаа хамт амьдардаг байсан. Ээж маань их ажилтай, надад тэр бүр олдоод бусад хүүхдүүдийн ээжүүд шиг цаг зараад байж чаддаггүй байсан. Тиймээс би эмээгийнхээ хүмүүжлээр монгол ахуйд ойр өссөн. Магадгүй цайсаг гээд эмээгээс үлдсэн тэр зан чанарууд маань одоо ч арилаагүй. Би одоо хүртэл хааяа эмээтэйгээ амьдарч байсан гэрийнхээ хаалга руу очиж явна гэж зүүдэлдэг. Энэ тухай цааш нь үргэлжлүүлэхэд сэтгэлд их эмзэг байна. Эмээгээсээ хойш ганцаардаж, их л үгүйлдэг байсан.

-Хүний ганц охин ч гэлээ эрх биш гэж та ярьж байна. Гэхдээ л ясны, цусны өөрийн гэх хорьж дарж болдоггүй зан чанар өдий насалтал таньд мэдрэгддэг биз дээ?

-Айлын ганц охин байх хувь тавилангаас надад хамгийн сайн шингэж өгсөн чанар бол хэнээс ч хараат бус, бие даасан чадвар. Ямарваа сонголт шийдвэрийн өмнө хэн нэгнээс зөвлөгөө тусламж гэж хүлээхээс илүү өөрийнхөөрөө байж чаддаг. Ээж маань байнгын завгүй амьдралын төлөө тэмцэлтэй их дайчин хүн учраас над руу хошуу цорвойхоосоо илүү хичээл сурлага юу болж байна гэхчилэн насанд хүрсэн хүний хэмжээнд хариуцлагатайгаар ханддаг байсан. Тухайн үед би хүүхдийн гэнэн сэтгэхүйгээр гомдох үе байсан л даа. Одоо бол ээж минь хат суулгаж хамгийн зөв хүмүүжүүлжээ гэж боддог. “Чи яаж байна. Яах уу ийх үү” гэхээсээ илүү “Чи ингэх ёстой” гэж чиглүүлж зөвлөдөг байсан нь Уянга гэх хувь хүнийг илүү төлөвшүүлсэн. Хүмүүс намайг гаднаас маань яаж дүгнэдгийг мэдэхгүй л дээ. Би хувьдаа өөрийгөө их энгийн нээлттэй гэж боддог. Хүн надад яаж хандана тэр хэмжээнд нь элэгсэг харилцаж сайхан инээгээд өнгөрөхийг хүсдэг. Хүний амьдрал богинохон. Аль болох тайван байхыг хичээдэг. Хэн нэгэн намайг бухимдуулсан ч гэсэн инээмсэглээд л өнгөрдөг. Хүлээцтэй өнгөрүүлсний дараа зарим нь уучлалт гуйх, болж өнгөрсөнийг тайлбарлах гэж оролддог нь энэ зангийн маань олзуурхууштай тал юм болов уу.

-Банкир, одоогийн дэд сайд Ч.Ганхуяг таны амьдралд анх ямар тохиолдлоор орж ирж нүдэнд чинь өртөж сэтгэлд чинь бууж байсныг дурсвал…?

-Хамгийн анх уу? Миний нүдэнд маш эрч хүчтэй, хөгжилтэй, нилээн шударга залуу өртсөн нь надад их таалагдсан. Хамгийн түрүүнд хүний их сайн найз байж чадах хүн байна гэж бодогдсон л доо. Бид хоёр анх сайхан найзууд байсан л даа. Надад бол их сонирхолтой эр хүн санагддаг байлаа. Дараа нь хувийн амьдралд нь асуудал гарч найз бүсгүй, найз залуугийн хэмжээнд харилцаа үүссэн.

-Сонирхолтой түүх байна? Хоёрдахь сонголтын өмнө тэр таниас эмээх ч юм уу шалтгаан байсан болов уу?

-Үгүй байх аа. Үгүй гэж бодож байна. Миний тод санаж байгаагаар намайг их шулуухан охин байсан гэж дурсдаг.

-Хувийн амьдралд нь асуудал гарсан, дараа нь таньд хувь заяагаа холбох товчхондоо гэрлэх санал тавихад та цочир хүлээж авсан уу?

-Хариулмааргүй байна. Яагаад гэвэл өмнөх амьдралд нь эмзэг тусч магадгүй.

-Ойлгож байнаа. Тэгвэл хурим ярьвал татгалзахгүй биз дээ?
-Бид хоёр хамт амьдраад 5 жилийн дараа хуримаа хийсэн. Нэг хүү маань гарчихсан. Дараагийнх нь гэдсэнд байсан.

-Дөрвүүлээ хуримласан гэсэн үг үү?

-Тийм ээ/инээв/. Бүр зургуулаа хуримаа хийсэн. Ерөөсөө сарын өмнө хуримын тов гаргаад маш хурдан хугацаанд бүгдийг хийсэн ч хуримын өдөр бол хуримын өдөр бол миний амьдралд тохиолдсон хамгийн сайхан өдрүүдийн нэг. Тэр өдрийг нөхөр маань надад бэлэглэсэн гэж боддог

-Хэвлэлд гарсан зургаас харахад хувцасны сонголтууд нь мэдрэмж илтгэж байсан. Тэр нь таных уу?
-Бүгдийг би өөрөө сонгосон. Яг үнэнийг хэлэхэд нөхөр маань хуримандаа урилгын цагийн дагуу миний бэлдсэн хувцаснуудыг зөв зохистойгоор нь өмсөөд зочин шиг ирсэн./инээв/. Хуримын бэлтгэлд миний найзууд, зохион байгуулах компани гээд маш сайн баг найдвартай ар тал ажилласан. Урлах эрдэм, Торго салон, мөн гадаадаас гээд уламжлалт гурван төрлийн гоёл сонгож өмссөн.

-Хуримандаа зочилдог эр хүн гэхээр та ч нөхрөө их тааваар нь байлгаж эрхлүүлдэг эхнэр байна даа?

-Нэг их эрхлүүлдэг нь ч юу байхав. Яг тэр үеэр Монголд гадны 500-гаад зочид чуулсан олон улсын маш том хурал болоод нөхөр маань голлох үүрэгтэй ажилласан. Энэ хурлын яг маргааш нь хурим маань болж таараад хойш тавьж болохгүй ажилтай байсан. Түүнээс би ганцхан нөхрөө эрхлүүлээд байдаг юм биш л дээ. Бид хоёр энэ талдаа ер нь тэгш эрхийн зарчимтай гэх үү дээ.

-Хэдэн жилийн өмнө дэд сайд надад “Би эхнэрээ орой болгон баярлуулдаг” гэж ярилцлага өгч байсан. Та уншаад инээсэн үү?

-/инээв/. Яг энэ үгийг нь уншаад инээд хүрсэн л дээ. Гэхдээ агуулга нь бол ямар нэгэн тэмдэглэлт баяраар эхнэрээ баярлуулахаас илүү амьдралынхаа хором бүхэнд баярлуулдаг гэсэн утга санаа байсан. Энэ нь үнэн л дээ. Би нөхрөө амьдралынхаа төлөө ямар хэмжээнд зүтгэж ямар завгүй ажилладгийг мэднэ..

Гэхдээ энэ бүх ажлын ачаалал проблемыг орой гэрийнхээ хаалганы ард үлдээж нүүр дүүрэн инээмсэглэлээр тэвэрч үнсээд гэртээ орж ирж чаддаг нь маш том бэлэг. Бид хоёр тэр ярилцлагаас өмнө энэ сэдвээр ярилцаж байсан. Чи бол бидний бэлэг. Эрт ирвэл бүгд аз жаргалтай байдаг гэж би тоглоом шоглоомоор хэлж байсныг нөхөр маань ярьсан байсан.

-Банкираас төрийн сайд болоход ямар нэгэн өөрчлөлт гарсан уу?
-Надад бол ямар ч ялгаа мэдэгдэхгүй. Нөхөр маань нөгөө л цагийн хуваариараа эртлэн гарч орой ирээд л. Гаднаас нь хөндлөнгийн нүдээр харахад илүү их уншиж байгаа юм болов уу. Түүнээс өөрөөр хувийн амьдрал, нөхрийн маань зан чанарт өөрчлөлт гарсангүй.

-Гэр бүлийг амжилттай бүрэн бүтэн авч явахад эхнэр хүнээс их ухаан, тэвчээр, зүтгэл шаарддаг гэж олон эмэгтэйчүүд ярьдаг л даа?
-Тийм ээ. Санал нэг байна. Хорвоогийн айлын эхнэрүүдийн жаргал зовлон адилхан шүү дээ. Даргын эхнэр, жолоочийн эхнэр өөр гэж би боддоггүй. Ямар ч гэр бүлийн амгалан амьдрал үр хүүхдийн инээд, эр нөхрийн амжилт бүгд л ээж хүнээс, эхнэр хүнээс тодорхой хэмжээнд шалтгаалдаг. Энэ бүхний үнэ цэнэ эмэгтэй хүний ухаалаг, хүлээцтэй амьдралыг бодитоор харах чадвараар хэмжигдэнэ. Ямар ч тохиолдолд түрүүлж дуугарахаасаа өмнө хэдхэн секунд тунгааж бодоод ярьж байвал тайвнаар асуудлыг шийдэж өөртөө ч өрөөлд ч зовлонгүй ойлголцоно. Уурлаж уцаарлах, уйлж гоморхохоосоо илүү эмэгтэй хүн маш тайван байж гэр бүлээ амгалан амьдрах нөхцөлийг бүрдүүлж өгөх ёстой.

-Таны нөхөр таниар бахархаж, таниар гоёх дуртай. Томоохон хүлээн авалт, олныг хамарсан арга хэмжээнүүдэд дэд сайд ингэж харагддаг?

-Эхнэрээрээ гоёх дуртай гэж бодогддоггүй юмаа. Зарим нэг арга хэмжээнд нь би хамт явмааргүй байсан ч гэсэн бидний хамтдаа байх хугацаа их богино гэдгийг бодохоор аргагүй хүлээн зөвшөөрөхөөс аргагүй байдалд ордог.

Манай нөхөр гадагшаа томилолтоор явахад сардаа дөрөвхөн хоногийг гэртээ өнгөрүүлсэн үе ч бий. Тиймээс хамт байх хугацаагаа аль болох аз жаргалтай, халуун дулаанаар өнгөрүүлэх боломж бололцоог алдмааргүй байдаг. Биднийг хамтдаа явж байхад хэн яаж харж байна гэдгийг нэг их асуудал болгоод байдаггүй. Хүн миний тухай юу гэж бодож байгаад би огтхон ч санаа зовдоггүй. Яагаад гэвэл би хэнд ч муу юм хийдэггүй. Аль болох бусдын төлөө бага боловч тустай зүйл хийхийг санаж сэдэхийг хичээдэг.

-Хосуудыг илүү ойртуулж байдаг зүйл бол хол ойр байх гэж найруулагч И.Нямгаваа гуай ярьсан байдаг л даа. Яагаад гэвэл нууц амраг гээчийг амьдралдаа гаргаж ирэхгүй байх арга байна уу гэсэн асуултын хариуд. Үүнтэй та санал нийлэх үү?
-/инээв/. Магадгүй. Сайхан хариулт байна.

-Таныг өнгөлөг бас дэгжин харагдуулахын тулд дэд сайдыг гар татдаггүйг мэднэ. Та үгүйсгэхгүй биз дээ?
-Намайг гоёход гэдэг утгаараа биш л дээ. Ямар ч эр хүн үр хүүхэд хань ижлийнхээ амьдралын хэрэгцээг хангаад хүн шиг авч явахыг хичээдэг байх. Манай нөхөр ч гэсэн бусдын адил гэр бүлээ сайн сайхан амьдруулж улс орондоо ихийг бүтээх гэж ажиллаж хөдөлмөрлөж яваа. Надад ямар ч баяр ёслол болоогүй байхад сайхан цэцэг аваад ороод ирдэг халамжтай хань. Аз жаргалтай байлгах гэж хичээдэг оролдлого зүтгэл нь намайг чимж, инээд хөөртэй сэтгэл хангалуун харагдуулдаг байх. Тийм эд материалаар хангадаг ийм юм авахуулдаг гэсэн хэрэглээгээр минии аз жаргал хэмжигдэхгүй. Би өөрөө ч энгийн зантай, хувцаслалтандаа ч тийм зарчим баримталдаг. Гял цал бэлэг сэлтээс илүү нөхрийн маань хайр халамж, сэтгэлийн нөмөр нөөлөг намайг их чимж гэрэлтүүлдэг жаргалтай байлгаж чаддаг.

-Нью-Иоркт Swarovski-ийн дуудлага худалдаанаас таньд гоёлын даашинз авч байхыг нь нүдээр харсны хувьд асуусан юм л даа?

-Энэ асуултанд хариулахгүй. Дэмий байхаа. Хүн ер нь үнэ цэнэтэй бэлэгнээс илүү хэн ч анзаарамгүй аахар шаахар юманд их баярладаг шүү дээ. Бид хоёр бие биендээ баярлах нь их амархан даа.

- ” Мак ” -ын Б.Нямтайширын охин, “Гацуурт”-ын О.Чинбатын охин гээд таны найз нөхдийн хүрээллийг захаас нь гадарлана. Хүнийг найз нөхдөөр нь шинж гэдэгчилэн та нөхөрлөлийг ямраар үнэлэх вэ?
-Эрэгтэй, эмэгтэй олон сайхан найз нөхөд бий. Гэхдээ би тэр бүр найз нартаа цаг гаргаад байдаг хүн биш л дээ. Зүрх сэтгэл санаа оноо нийлж бие биеэсээ хэрэгтэй мэдээлэл авч чаддаг, энерги солилцдог хүрээлэл гэж би ойлгодог. Зорилгоор ч юм уу бий болгосон нөхөрлөлийн харилцаа байхгүй. Би найз нөхдөө ямар компанитай, хэдий хэрийн өв залгамжилдагаар нь дүгнэдэггүй. Санаа сэтгэл холбодог найзууд л гэж би тодорхойлно.

-Гэр бүлийг дандаа л нэгт тавиад байна гэж юу байхав. Таны гоолиг бие, гоо сайхандаа тавих анхаарал өөртөө бол цаг завыг хангалттай зардгийг илтгэж байна?
-Эмэгтэй хүн гоё сайхан, эрүүл энх байхын тулд ингэж амьдрах ёстой гэж мэргэжлийн түвшинд зөвлөгөө өгч чадахгүй л дээ.Эрүүл амьдралын тухай номнуудыг сонирхож уншиж байсан л даа. Би бол ямар ч байсан хөдөлгөөнтэй спортын аль нэг төрлөөр долоо хоногт 2 удаа хичээллэх сонирхолтой байдаг. Эмэгтэй хүн сэтгэл санаа өөдрөг амьдралдаа сэтгэл хангалуун байгаа тохиолдолд үзэсгэлэнтэй харагддаг. Тиймээс дуртай зүйлдээ цаг гаргаж чаддаг тайван амьдрал илүү чухал.

-Дөрвөн хүүтэй дэд сайдынх охинтой болох төлөвлөгөө мэдээж байгаа байх?
-Яг одоогоор төлөвлөсөн юм алга. Юу болохыг хэн мэдэхэв. Харж л байя. Бурхан хэзээ бэлгээ илгээх нь үү?/инээв/.

-Хөл бөмбөгийн багтай хүн тэдэнтэйгээ бужигнаж өгнө биз дээ?
-Хэдий их ажилтай байсан ч гэсэн тэдэндээ цаг заваа зарж чаддаг хамгийн сайн аав гэж би хэлнэ. Миний нөхрөөс илүү үр хүүхэддээ халамжтай аав энэ хорвоо дээр байхгүй гэж хааяа бодогддог. Дөрвийн дөрвөн хүүдээ аав нь хүн байхыг л сургадаг. Чи өөрөө өөртөө хөрөнгө оруулалт хийх ёстой гэж боловсролд нь илүү хөрөнгө оруулалт хийхийг бид хоёр хичээдэг. Өөрсдийнх нь хүсэл сонирхол бас чухал л даа. Одоо балчир байгаа ч бага гэлтгүй хүүхдүүдтэйгээ ярилцаж чаддаг нээлттэй аав учраас ойлголцож чаддаг. Ер нь аав гэхээсээ илүү сайн найз шиг нь байдаг юм.

-Сангийн дэд сайдын өрхийн төсөв мэдээж таны гарт байх. Мөнгөнд хандах таны үнэлэмжийг сонсмоор байна?
-Өрхийн төсөв мэдээж надад оногдох нь ойлгомжтой. Минйй бодлоор мөнгө бол хүний өөрийн хөдөлмөрийн үр шим, хэрэглээ болохоос амьдралын утга учир биш.Хичнээн ч их мөнгөтэй байсан нэг өдрийн дотор хийсээд явчихыг хэн байг гэхэв. Хүн мөнгийг амьдралынхаа зорилго болгох хэрэггүй. Ямар нэгэн хүсэл мөрөөдөлтэй байгаад түүгээрээ хөглөгдөж амьдарвал ямарч амжилтанд хүрч чадна. Үүнийг нь дагаад мөнгө өөрөө аяндаа ирдэг гэж боддог.

-Проблем гарвал эвлэрлийн хонхыг хэн жингэнүүлдэг вэ?
-Би л юм болов уу даа. Ямарваа нэг асуудал гарвал хоёулаа чимээгүй л болчихдог. Хэдэн минутын дараа эргээд ярилцахад бүх юмны учир олддог. Эмэгтэй эрэгтэй хүний амьдралд хүлээх үүрэг роль энэ тэнцүү байдаг байх. Миний баримталдаг зарчим бол хүн юу тарина түүнийгээ хурааж авдаг. Би хариу нэхэхгүйгээр зүгээр л хүмүүст өгөх дуртай. Нөхрөө би хайрлаж байж хайрыг нь хүртэнэ үү гэхээс чи намайг хайрлах ёстой гэж тулгаад шаардаад байх хамгийн утгагүй.

-Дэд сайд сүрчиг үнэртүүлсэн дэгжин залуу. Түүний цамцны цардсан зах, гоёмсог зангиа бүгд л таны халамж биз дээ?
-Миний хувьд таны тодорхойлолт эсрэгээрээ. Би нөхрийнхөө хувцасны сонголт загварт оролцдоггүй. Ер нь манай хүн биендээ эвтэйхэн хувцаслахыг илүүд үздэг. Маш нямбай, хувийн зохион байгуулалт сайтай хүн учраас миний гарыг хараад байдаггүй. Сүрчигний хувьд ч гэсэн би өөрт таалагдсанаа авч бэлэглэнэ үү гэхээс өөрөө хувьдаа нилээд хэмжээний усны цуглуулгатай. Тэрэндээ дуртай. Ерөнхийдөө гадаад төрх, хувцаслалт зэргийг надаар заалгаад байхгүй өөрөө зохицуулдаг.

О. Хонгорзул
Эх сурвалж: “Монголын нэг өдөр”

Сангийн дэд сайд Ч. Ганхуягийн гэргий Г. Уянга: Нөхөр маань хуримандаа урилгын цагийн дагуу миний бэлдсэн хувцаснуудыг зохистойгоор нь өмсөөд зочин шиг ирсэн
Tweet
Bolod.mn

Сэтгэгдэл (5)

Уншигчдын оруулсан сэтгэгдлийн талаар манай сайт хариуцлага хvлээхгvй болохыг анхаарна уу.
Үгийн санд шүүлтүүр хийсэн болно

Зочин
тайчигч хүүхэн байж

2012-06-04 | 15:08:49 | 202.21.106.2 |

Зочин
шулуухан охин ч гэх шиг ичиж үхлннээ

2012-06-04 | 15:06:56 | 202.21.106.1 |

Зочин
гэрээгээр гэрлэгсэд шүү яриа нь цаанаа нэг хүмүүжилгүй байгаа биз

2012-06-04 | 15:06:04 | 202.21.106.2 |

Зочин
чи битгий атаарх эннээс илүү яахийн,цайхан хүүхэн чини улам сайхан байхийн тулд өнөтэй,мөнгөтэй эр хүнийг сонгож суудаг ш дээ яг уянга шиг,чи төсөөл л дөө өөрөө энэ хүүхэн яавч хөлсний байранд амидараад,ус халааж оймос угаах хүүхэн биш байгаа биз дээ,4 хуухэд гаргаад ийм хэмжээнд эмэгтэй хүн тэр болгоон байж чадахгүй л бхгуй юу

2011-12-29 | 02:15:36 | 95.209.71.104 |

Зочин
яагаад ч юм бэ таалагдсангуй. Баг омсож яриад бна шуу дээ, хэзээ байтлаа монголчууд ийм хуйтэн хондий байдаг байсан юм, тэгээд ч нохрийнхоо монгонд ни болж суучихаад эд хоронго сонин биш ч гэх шиг, шал дургуй хурчихлээ

2011-02-22 | 21:51:10 | 203.91.117.3 |

Мэдээ
Гадаад мэдээ
Видео