Хакүхо холбооноос гарснаар сүмогийн ирээдүйд сүүдэр туслаа

2025-06-05

Мэргэжлийн сүмогийн хамгийн алдартай бөхчүүдийн нэг Хакүхо Японы Сүмогийн Холбооны бүрэлдэхүүнээс

гарсан нь сүмогийн ирээдүйд ноцтой асуудал үүсгэж болзошгүйг харуулж байна гэж Японы The Japan Times сонинд бичжээ.

Тус сонинд онцолсноор, тэр албан ёсоор холбооноос гарснаар хамгийн сүүлд зодог тайлсан 10 ёкозүнагийн зөвхөн дөрөв нь л тус холбоонд үлдээд байна. Тэд нийлээд 30 удаа Эзэн хааны цом хүртэж байсан бол холбооноос гарсан зургаан ёкозүна нийт 117 удаа буюу үлдсэн дөрвөөс даруй дөрөв дахин их түрүүлж байжээ.

Энэ нь өндөр түвшний ур чадвар, туршлага, мэдлэг алдагдаж байгааг илтгэж байгаа бөгөөд эл томоохон хохирол шинэ залуу авьяастнуудыг сүмод элсүүлж, тогтоон барихад хүндрэл учруулж байна.

Сүүлийн 20 жилийн хугацаанд олон ёкозүна мэргэжлийн сүмог орхисон ч Хакүхо холбооноос гарсан нь хамгийн том гарз. Тэр зөвхөн сүмогийн түүхэн дэх олон дээд амжилтуудын эзэн, хамгийн олон цомтой бөх төдийгүй шинэ залуу авьяастнуудыг сүмод оруулах, хөгжүүлэхэд чухал үүрэг гүйцэтгэдэг байв.

Хакүхо аваргын зохион байгуулдаг “Хакүхо цом” тэмцээн нь сүүлийн 15 жилд бага, дунд ангийн хүүхдүүдийн дунд зохион байгуулагддаг хамгийн нэр хүндтэй сүмогийн тэмцээн болсон. Энэ тэмцээн нь шинэхэн ёкозүна Оносато зэрэг олон мэргэжлийн бөхөд анхны урам зориг өгсөн бөгөөд дэлхийн олон орны хүүхдүүдэд чухал туршлага олгож, олон улсын сонирхогчдын сүмо болон Японы мэргэжлийн сүмог холбосон гүүр болж байв.

Гэвч Хакүхо холбооноос гарснаар Хакүхо цомын ирээдүй ч мөн тодорхойгүй болж байна.

Түүнчлэн, хэрэв Хакүхо олон улсын мэргэжлийн сүмогийн шинэ байгууллага үүсгэн байгуулах тухай цуурхал үнэн бол аварга маш том сорилттой нүүр тулна. Учир нь өмнөх ижил оролдлогууд бүгд бүтэлгүйтэж байсан билээ.

Мэргэжлийн сүмогийн нэр хүндтэй олон бөхчүүд зодог тайлсны дараа олон улсын мэргэжлийн сүмогийн шинэ байгууллага байгуулах хүсэлтэй байсан ч бодит байдал дээр ийм санаачилгууд ложистик, санхүүгийн бэрхшээл, мөн олон улсын сүмогийн салбарын хагарал, улс төржилтөөс болж амжилт олоогүй.

Ямартаа ч, ирэх жилүүдэд юу болохоос үл хамааран, Хакүхо Японы Сүмогийн Холбооноос (JSA) гарсан нь мэргэжлийн сүмод хүнд цохилт болж байгаа бөгөөд сүүлийн үед ёкозүна нарын дунд ийм тренд бий болсон нь харамсалтай.

Гэхдээ шийдэл хайхаас өмнө нэг зүйлийг ойлгох хэрэгтэй. Ёкозүна нар тус бүр өөр өөр нөхцөл байдал, шалтгаанаар холбооноос гарсан. Тиймээс дээр дурдсан зургаан ёкозунаг томоохон хуйвалдааны золиос болсон гэж дүгнэх нь буруу. Гэсэн хэдий ч нийтлэг зүйлс байгааг үгүйсгэх аргагүй. Тухайлбал, өөрсдийнхөө цаг үед дэвжээн дээр ноёрхож байсан зарим бөхчүүд карьерынхаа туршид сүмогийн хатуу дэг журам, ёс суртахууны хүлээсэнд дургүйцэж, хэд хэдэн удаа сануулга авч байсан байдаг. Гэхдээ амжилтын оргилд гарч, цом болон мөнгөн шагналуудыг хамж байгаа үед албан ёсны сануулга, хэвлэлийн шүүмжлэлийг тэсвэрлэхэд арай амар байх нь дамжиггүй. Харин гэрэл цацарсан дэвжээнээс бууж, шинэ иерархийн хамгийн доод түвшинд очих үед байдал эрс өөрчлөгддөг.

Акэбоно, ах дүү хоёр Ханада, Хакүхо зэрэг эрсийн хувьд сүмо бол багаасаа л мэддэг, түүгээрээ амьдарсан цорын ганц ертөнц нь юм. Гэтэл тэдний ертөнц ийн эрс өөрчлөгдөхөд сэтгэл зүйн хямралыг даван туулах ямар нэгэн туршлага, механизм бараг байдаггүй.

Мэргэжлийн тамирчин бүрийн хувьд зодог тайлах нь том цохилт байдаг бөгөөд ялангуяа илүү өндөр оргилд гарах тусам цохилт нь илүү хүчтэй илэрдэг.

Сүмогийн хувьд нөхцөл байдал бүр ч хатуу. Зодог тайлсны дараах амьдралд нь ч тэднийг өнөөх л хатуу дэг журам дагасаар л байдаг. Хэрэв тэд холбоондоо дасгалжуулагч, багшаар үлдэх сонголт хийвэл хүссэнээрээ амьдрах бараг л боломжгүй. Тийм ч учраас зарим “сахилгагүй” бөхчүүд холбооноос гараад хамгийн түрүүнд үсээ цайруулж, шивээс хийлгэдэг нь гайхах зүйл биш юм.

15-хан насандаа мэргэжлийн сүмод орж, арван гаруй жилийн турш шаргуу хөдөлмөрлөж, залуу насны эрх чөлөө, аз жаргал, баяр баясгалангаа золиослон байж дээд зиндаанд хүрсэн хүн гэнэт дахин 30 жил үргэлжлэх өөр нэгэн шатны ёроолд очсон байна гээд төсөөлөөд үз. Энэ бол сэтгэл зүйн хувьд асар том сорилт.

Асахифүжи, Онокүни, Хокутофүжи зэрэг ёкозүна нар 1990-ээд оны эхээр зодог тайлах үеийг бодвол XXI зуунд амьдрал эрс өөрчлөгдсөн. Одоо цагт дэлхий ертөнц нээлттэй болж, интернет, даяарчлалын нөлөөгөөр нэр хүндтэй, санхүүгийн бяртай нэр цуутай бөхчүүдийн хувьд өмнө нь маш олон сонирхолтой сонголт нээгдэж байна.

Мэдээж, ояката буюу дэвжээний ахлагчаар үлдэнэ гэдэг ихэнх том цолтой сүмочдын хүссэн тогтвортой, тайван амьдралынх нь баталгаа байдаг.

Харин Таканохана, Хакүхо зэрэг домогт ёкозүна нарын хувьд Японы Мэргэжлийн сүмогийн холбоонд үлдэж, өөрчлөлтийн төлөө тэмцэх өөр сонголт, өөр хүсэл байдаг ч тэдний тэсвэр тэвчээрт ч хэмжээ хязгаар бий.

Хэн нь зөв, хэн нь буруу байсан нь хамаагүй эцсийн дүндээ үр дүн нь ижил. Сүмогийн түүхэнд нэрээ мөнхөлсөн бөхчүүд спортоос өөр замыг сонгохоос аргагүйд хүрч байна. Энэ бол ноцтой асуудал. Үүнд хялбар хариулт үгүй. Үүнд хариулахын тулд шинэлэг сэтгэлгээ, шинэ арга зам хэрэгтэй.

Хамгийн сүүлийн кейс болох Хакүхо аварга явсан ч Японы Мэргэжлийн Сүмогийн Холбоо оршсоор байх болно, хөгжсөөр л байх болно. Хакүхо аваргын өмнө шинэ гайхалтай боломжууд нээгдэх нь дамжиггүй. Гэвч талууд маргаантай асуудлуудад шийдэл олж чадсан бол, аль алинд нь хамаагүй ашигтай байх байсан нь гарцаагүй. Сүмо ч бас том зүйлээ алдаж, хоосорч байна. Домогт аварга нь явчихлаа. Тиймээс эл спортын ирээдүйн төлөө сүмогийн ертөнц асар нэр хүндтэй бөхчүүдээ авч үлдэх гарц, арга замаа олох хэрэгтэй.

https://news.zindaa.mn/53oy