ХААН Банктай 2009 оноос хойш хамтран ажиллаж буй урт хугацааны түнш болох Нидерландын хөгжлийн банк (FMO) уг хамтарсан санхүүжилтийг удирдан зохион байгуулсан бөгөөд Италийн хөгжлийн санхүүгийн байгууллага (CDP), Финландын хөгжлийн санхүүгийн байгууллага (Finnfund), BlueOrchard, ILX, Nations Trust Bank, Invest in Visions, Atlantic Forfaiting зэрэг дэлхийд нэр хүндтэй томоохон хөгжлийн банк, санхүүгийн байгууллага, хөрөнгө оруулалтын сангуудтай хамтран нийт 200 сая ам.долларыг 5 хүртэлх жилийн хугацаатай, хосолсон валютаар, синдикат зээл хэлбэрээр ХААН Банканд олгох юм. Уг хамтарсан санхүүжилтийн 40 сая ам.долларыг FMO нь Монгол Улсын үндэсний валют болох төгрөгөөр олгож буйгаараа онцлог юм. Энэхүү үйл явдал нь ХААН Банкны түүхэнд нэгэн шинэ хуудас нээж, хамгийн олон санхүүжүүлэгч байгууллагуудтай хамгийн өндөр дүнгээр байгуулсан хамтарсан санхүүжилтийн хэлэлцээр болж буй бол олон улсын хөрөнгө оруулагч, санхүүжүүлэгч байгууллагаас Монгол Улсын банкны салбарт хосолсон валютаар олгож буй анхны хамтарсан санхүүжилт болж байна.

ХААН Банк энэхүү санхүүжилтийн эх үүсвэрийн 30 хувийг ногоон зээл, төслүүдийг санхүүжүүлэх, үлдсэн 70 хувийг эмэгтэй болон залуу бизнес эрхлэгч, хөдөө аж ахуй, тогтвортой ноос ноолуурын салбарт үйл ажиллагаа явуулж буй бизнес эрхлэгч харилцагчдаа санхүүжүүлэхэд зориулж, ногоон санхүүжилтийг нэмэгдүүлэх, санхүүгийн хүртээмжийг сайжруулах, тогтвортой эдийн засгийн өсөлтөд хувь нэмрээ оруулан ажиллах юм.

Монгол Улс газар зүйн байршил, эрс тэс цаг агаарын онцлогоос шалтгаалан байгаль орчны өвөрмөц сорилтуудтай тулгардаг бөгөөд дэлхийн уур амьсгалын өөрчлөлтөд илүү өртөмтгий байна. Уур амьсгалын өөрчлөлт нь ялангуяа Монгол Улсын байгаль цаг агаараас ихээхэн хамааралтай хөдөө аж ахуй, газар тариалангийн салбар болон эмзэг экосистемүүдэд илүү хурдацтай нөлөөлж, иргэдийн амьжиргаа, улс орны хөгжилд хүчтэй нөлөөлөхөөр байгааг Дэлхийн банк групп-ээс онцолжээ.

Монгол Улсад ногоон зээлийн санхүүжилт хөгжлийн эхэн үедээ байгаа хэдий ч ХААН Банк энэ чиглэлд тэргүүлэн ажиллаж байна. Тухайлбал, ХААН Банк 2015 онд анхны ногоон зээлийн бүтээгдэхүүнээ зах зээлд нэвтрүүлж, ногоон зээлийн багцынхаа эхлэлийг тавьж байсан түүхтэй. ХААН Банк тогтвортой, ногоон санхүүжилтийг эрчимтэй нэмэгдүүлэх зорилго тавин ажиллаж байгаа бөгөөд 2023 онд Монгол Улсын анхны Ногоон бондыг, 2024 онд Монгол Улсын анхны Нийгмийн бондыг гаргаж, тогтвортой санхүүжилтийг нэмэгдүүлэх хүрээнд томоохон амжилт үзүүлээд буй. Цаашид тогтвортой хөгжлийг дэмжих, нийгмийн сайн сайхан байдлыг хангах урт хугацааны зорилгынхоо хүрээнд 2026 оны эцэс гэхэд нийт зээлийн багцынхаа 10 хувийг ногоон зээл, 15 хувийг жендэрийн санхүүжилтийн зээлээр бүрдүүлэхээр зорин ажиллаж байна.

Энэхүү хамтарсан санхүүжилтийн тодорхой хэсэг нь “2X Challenge” буюу эмэгтэйчүүдийг чадавхжуулах, хөгжиж буй зах зээл дэх эмэгтэйчүүдийн оролцоог нэмэгдүүлэх зорилготой олон улсын санаачилгад нийцсэн санхүүжилт болж буйг мөн дуулгахад таатай байна.

FMO нь ийнхүү уг хамтарсан санхүүжилтийг зохион байгуулж, ХААН Банканд хувийн болон хөгжлийн санхүүжүүлэгч байгууллагуудын шинэ түншлэлийг бий болгож, улмаар тогтвортой хөгжлийн стратегийг дэмжих, урт хугацааны санхүүжилтийг хангахад үнэ цэнтэй хувь нэмрээ орууллаа.

Гэрээг үзэглэх үеэр ХААН Банкны Байгууллагын банк хариуцсан дэд захирал Т.Ууганбаяр “ХААН Банк харилцагчидтайгаа хамтдаа өсөж хөгжих уриатайгаар нийгэм олон нийт болон байгаль орчиндоо урт хугацаанд эерэг үр нөлөө үзүүлэхийг зорьж ажилладаг. Энэхүү хамтарсан санхүүжилтийн эх үүсвэрийг бид Монгол Улсынхаа байгаль орчин болон нийгэмд тулгараад буй олон бэрхшээл, сорилтуудыг шийдвэрлэхэд зориулан ажиллах болно. FMO-гийн зөвлөгөө, дэмжлэг, тусламжтайгаар бид олон улсад нэр хүндтэй санхүүжүүлэгч байгууллагуудтай шинэ харилцаа тогтоолоо. Мөн цаашид илүү ногоон, илүү хүртээмжтэй Монгол Улсыг бүтээх бидний зорилгод үнэтэй хувь нэмэр оруулж, манай алсын харааг дэмжиж, итгэл хүлээлгэж буй FMO-д талархаж байна” гэж онцоллоо.

Мөн FMO-гийн Санхүүгийн байгууллага хариуцсан захирал Хуан Хосе Дада: “Бид ХААН Банктай энэхүү хосолсон валют бүхий урт хугацаат хамтарсан санхүүжилтийн гэрээг амжилттай байгуулж, хамтын ажиллагаагаа шинэ түвшинд гаргаж байгаадаа баяртай байна. Энэхүү хамтарсан санхүүжилтийн гэрээ нь бидний хамтын ажиллагааг бэхжүүлээд зогсохгүй тогтвортой эдийн засгийн хөгжил болон уур амьсгалын өөрчлөлтийн эсрэг хамтдаа үүрэг амлалт авсныг илэрхийлж буй явдал юм. Бид тэгш бус байдлыг багасгах, ногоон санхүүжилтийг дэмжих, Монгол Улсад үйл ажиллагаа явуулж буй бүхий л бичил болон жижиг, дунд бизнес эрхлэгчдийг дэмжихэд үргэлжлүүлэн хувь нэмрээ оруулан ажиллах болно” гэж хэллээ.

CDP нь Италийн хөгжлийн санхүүгийн байгууллага болохын хувьд Монгол Улсын ногоон тогтвортой байдал болон бичил болон жижиг, дунд бизнес эрхлэгчдийг дэмжих, тэр дундаа тогтвортой ноолуурын салбарт үйл ажиллагаа явуулж буй бизнес эрхлэгчдийг дэмжих зорилгоор 20 сая ам.долларын санхүүжилт олгож буй. CDP-ийн Гадаад улс орон, санхүүгийн байгууллага болон корпорэйт санхүүжилт хариуцсан захирал Кристина Морелли "Энэхүү санхүүжилт нь Евроазийн бүс нутаг дахь эдийн засгийн боломжийг өргөжүүлж, инновацыг дэмжиж буй чухал алхам болж байна. Энэ төрлийн хамтын ажиллагаа нь шинэ боломжийг нээж, бодит өөрчлөлт бий болгоход нэн чухал бөгөөд бид ийнхүү бизнес эрхлэгч нар болон орон нутгийн хөгжлийг дэмжихэд чиглэсэн санаачилгыг хамтран хэрэгжүүлж буйдаа талархаж байна" хэмээн дурдлаа.

Мөн Финландын хөгжлийн санхүүгийн байгууллага (Finnfund)-ын Санхүүгийн байгууллага хариуцсан хөрөнгө оруулалтын менежер Киав Латт “Бид FMO-гийн удирдсан хамтарсан санхүүжилтийн зээлд хувийн хөрөнгө оруулагч байгууллагууд болон бусад хөгжлийн банкуудтай хамтран оролцож, ХААН Банканд энэхүү санхүүжилтийг олгож байгаадаа туйлын баяртай байна. Энэхүү урт хугацааны санхүүжилт нь ХААН Банкны ногоон, хүртээмжтэй санхүүжилтийг Монгол Улс даяар байгаа нийт бизнес эрхлэгчид, харилцагчдадаа хүргэх зорилтыг нь хэрэгжүүлэх, тус улсад тулгарч буй уур амьсгалын өөрчлөлтийн сорилтуудыг шийдвэрлэхэд нь хувь нэмэр оруулна гэж харж байна. Энэхүү хөрөнгө оруулалт нь эмэгтэйчүүдийг чадавхжуулах, уур амьсгалын өөрчлөлтийн эсрэг үйл ажиллагааг идэвхжүүлэх/ цэвэр шилжилтийг хурдасгах, ЖДҮ-ээр дамжуулан эдийн засгийн өсөлтийг хангахад чиглэдэг тул Финландын тэргүүлэх чиглэлүүдтэй маш сайн нийцэж байгаа юм” гэж сэтгэгдлээ хуваалцлаа.

ХААН Банкны тухай

Монгол Улсын хамгийн том арилжааны банк болох ХААН Банк нь орон даяар нийт 547 салбар нэгж болон бүх төрлийн цахим сувгаар дамжуулан Монголын нийт хүн амын 82 хувьд үйлчилгээ үзүүлэн ажиллаж байна. Үндэсний тэргүүлэгч банк болохын хувьд тогтвортой хөгжлийг дэмжих, цахим шилжилтэд түүчээлэх, харилцагч төвтэй байх бодлогынхоо хүрээнд хот суурин болон орон нутгийн иргэд, бичил болон жижиг, дунд бизнес эрхлэгч, мөн томоохон аж ахуйн нэгжийн харилцагчдадаа банк санхүүгийн цогц үйлчилгээг хүргэн ажиллаж, банкны салбарын хөгжилд хувь нэмрээ оруулж байна.

Нидерландын хөгжлийн банк (FMO) -ны тухай

FMO нь өндөр зорилтот төсөл, хөтөлбөр болон бизнес эрхлэгч нарт хөрөнгө оруулах замаар хөгжиж буй орнуудын хувийн хэвшлийн тогтвортой өсөлтийг дэмждэг олон улсын тэргүүлэгч нөлөөллийн хөрөнгө оруулагч байгууллага юм. Хүчирхэг хувийн хэвшил нь эдийн засгийн болон нийгмийн хөгжлийг бүтээдэг гэж үздэг бөгөөд эдийн засгийг илүү хүртээмжтэй, бүтээмжтэй, уян хатан, тогтвортой болгохын төлөө FMO 50 гаруй жилийн хугацаанд бизнес эрхлэгчдийг дэмжсээр ирсэн туршлагатай. Хөдөө аж ахуй-хүнс-ус, эрчим хүч болон санхүүгийн байгууллага зэрэг хөгжилд өндөр үр нөлөөтэй гурван салбарт төвлөрөн ажилладаг. Дэлхийн 85 улс оронд нийт 13 тэрбум еврогийн хөрөнгө оруулаад буй FMO нь дэлхийн хамгийн том хоёр талт хувийн хэвшлийн хөгжлийн банкуудын нэг юм.

Италийн хөгжлийн санхүүгийн байгууллага (CDP)-ын тухай

CDP нь Итали улсын болон түнш орнуудынхаа тогтвортой хөгжлийг дэмжих хүрээнд ажилладаг Итали улсын Засгийн газраас томилогдсон олон улсын хөгжлийн санхүүгийн байгууллага юм. CDP нь инновац, бизнесийн өрсөлдөх чадвар, дэд бүтэц болон улс орны хөгжилд санхүүжилт олгох замаар эдийн засгийн өсөлт, нийгмийн хүртээмж болон экологийн шилжилтийг дэмжин ажиллаж байна. Дэлгэрэнгүй мэдээллийг ЭНД дарж авна уу.

Финландын хөгжлийн санхүүгийн байгууллага (Finnfund) -ын тухай

Финландын хөгжлийн санхүүгийн байгууллага (Finnfund) нь Финланд улсын хөгжлийн банк, нөлөөллийн хөрөнгө оруулалтын чиглэлээр ажилладаг. Тус банк нь урт хугацааны үр нөлөөтэй, тогтвортой ирээдүйг бий болгох хүрээнд олон улсын өмнө тулгамдаж буй хөгжлийн сорилтуудыг шийдвэрлэх бизнес, үйл ажиллагаануудад хөрөнгө оруулалт хийдэг. Өөрөөр хэлбэл, жил бүр хөгжиж буй орнуудын 20-30 байгууллагыг сонгон 200-250 сая еврогийн хөрөнгө оруулалт хийдэг. Хөрөнгө оруулалтын голлох салбаруудад сэргээгдэх эрчим хүч, тогтвортой ойн аж ахуй, тогтвортой хөдөө аж ахуй, санхүүгийн байгууллагууд, цахимжилтийн дэд бүтэц, цахим шийдлүүд багтдаг. Өнөөдөр Finnfund-ийн нийт хөрөнгө оруулалт 1.23 тэрбум евротой тэнцэж буй бөгөөд үүний тэн хагас нь Африк тивд хийгдсэн байна. Дэлгэрэнгүй мэдээллийг www.finnfund.fi сайтаас авна уу.

Хамтын өсөлт төгөлдөр - ХААН Банк

ХААН Банк 200 сая ам.долларын хосолсон валют бүхий хамтарсан санхүүжилтийн гэрээ байгууллаа
Tweet
Bolod.mn