Танд энэ өдрийн мэндийг хүргэе. Цагдаа, дотоодын цэргийн байгууллагын удирдах албан тушаалтны сургалт зөвлөгөөн болж байгаа юм байна, та энэ талаар товч мэдээлэл өгнө үү?

Өдрийн мэнд хүргэе. Тус зөвлөгөөнөөр Цагдаагийн албаны тухай, Дотоодын цэргийн тухай хууль, Засгийн газрын 2024-2028 оны үйл ажиллагааны хөтөлбөр, тэргүүлэх чиглэлийн талаар удирдах ажилтнуудын дунд нэгдсэн ойлголт бий болгох, цагдаа, дотоодын цэргийн байгууллагын шинэчлэлийг амжилттай хэрэгжүүлж, хуулиар хүлээсэн чиг үүргийн хүрээнд иргэдэд хүргэх үйлчилгээг сайжруулж, үр дүнд хүрсэн улс орнуудын туршлага, дэлхий нийтийн чиг хандлагаас суралцах, үйл ажиллагаанд тулгамдаж буй асуудал, цаашдын бодлого зорилтоо тодорхойлох зорилгоор зохион байгуулж байна.

Энэ удаагийн зөвлөгөөнийг “Хамтдаа хөгжье” уриа дор “Байгууллагын хөгжил, цаашдын чиг хандлага”, “Төрийн бодлого, хөгжлийн удирдлага”, “Мэргэжлийн удирдлага” үндсэн сэдвийн хүрээнд хийж хэрэгжүүлсэн болон цаашид хэрэгжүүлэх ажил, арга хэмжээний талаар хэлэлцэх юм.

Зөвлөгөөн энэ оны 01 дүгээр сарын 23-25-ны өдрүүдэд зохион байгуулагдаж, цагдаа, дотоодын цэргийн байгууллагын 220 удирдах албан тушаалтан оролцож байна

Экологийн цагдаагийн алба бол хүрээлэн байгаа орчны эсрэг гэмт хэрэг, зөрчилтэй тэмцэх гол чиг үүрэгтэй байгууллага, энэ онд энэ төрлийн гэмт хэрэг, зөрчлийн нөхцөл байдал ямар байв?

Цагдаагийн байгууллагад 2024 онд хүрээлэн байгаа орчны эсрэг гэмт хэрэг, зөрчлийн шинжтэй 2399 гомдол мэдээлэл хүлээн авч, 782 хэрэгт мөрдөн шалгах ажиллагаа явуулсан. Хэргийн илрүүлэлт 72.9% хүрч, өмнөх оноос өссөн эерэг үзүүлэлттэй байна.

Хяналт шалгалт, нэгдсэн болон хэсэгчилсэн арга хэмжээний чиглэлээр Хүрээлэн байгаа орчны эсрэг гэмт хэрэг, зөрчлөөс урьдчилан сэргийлэх, илрүүлэх, таслан зогсоох, шалган зааварчлах чиглэлээр аймаг, сумдад 73 удаагийн хяналт шалгалт зохион байгуулснаар гэмт хэргийн шинжтэй 72 үйлдлийг илрүүлэн, шалгаж шийдвэрлэж, “Илрүүлэлт”, “Шийдвэрлэлт-2024”, “Ургамал”, “Цахим хяналт”, “Хяналт”, “Сэрэмжлүүлэг”, “Эко-2024”, “Усны сан”, “Самар”, “Бодис” зэрэг нийт 18 удаагийн нэгдсэн болон хэсэгчилсэн ажил, арга хэмжээ зохион байгуулж ажилласан байна.

Байгаль орчны нөхөн сэргээлтийн тухай асуудал ихээр хөндөгддөг. Компани аж ахуйн нэгжүүд нөхөн сэргээлээ гэдэг ч шаардлага хангадаггүй. Зарим нь бүр ажилладаггүй. Ийм нөхцөл байдал байна уу?

Манай байгууллагын хувьд онцлог нэг ажил бол Монгол Улсын шадар сайд, Байгаль орчин, аялал жуулчлалын сайд, Уул уурхай, хүнд үйлдвэрлэлийн сайд, Хууль зүй, дотоод хэргийн сайд нарын 2020 оны 167, А/698, А/336, А/242 дугаартай хамтарсан тушаалаар “Нөхөн сэргээлт 2024” нэгдсэн арга хэмжээг дөрвөн жилийн хугацаатай зохион байгуулах үүрэг бүхий ажлын хэсгээс өнгөрсөн онуудад улсын хэмжээнд уул уурхайн олборлолтын улмаас эвдэгдсэн 195 байршлын 3.773 га талбайд биологийн болон техникийн нөхөн сэргээлт хийлгэж, төлөвлөгөөний хэрэгжилтийг 1.773 га талбайгаар давуулан биелүүлсэн. Мөн түүнчлэн Монгол Улсын Ерөнхийлөгчөөс санаачлан хэрэгжүүлж буй “Тэрбум мод” үндэсний хөдөлгөөний хүрээнд “Нэг сая мод” арга хэмжээг хариуцан зохион байгуулж, Цагдаа, дотоодын цэргийн анги, байгууллагын хэмжээнд нийт 141.851 мод тарьж, 70.9 га талбайг моджуулан, зорилтот түвшинг 35.4 хувьд хүргэж, төлөвлөгөөний хэрэгжилтийг 21.851 модоор давуулан биелүүлсэн байна.

Хүрээлэн байгаа орчны эсрэг гэмт хэрэг, зөрчилтэй тэмцэх ажилд шинээр нэвтрүүлсэн ажил, шинэ санал санаачилгын талаар?

Хүрээлэн байгаа орчны эсрэг гэмт хэргийг илрүүлэх, таслан зогсоох, урьдчилан сэргийлэх ажлын хүрээнд:

“DJ Matrice 350 RTK” маркийн дрон /нисгэгчгүй нисдэг төхөөрөмж/-ийг ашиглаж, 18 хэргийг илрүүлж, Хууль бусаар мод бэлтгэх гэмт хэрэг, зөрчилтэй тэмцэх ажилд технологийн дэвшлийг нэвтрүүлж, алба хаагчийн үйл ажиллагааг хөнгөвчлөх зорилгоор тээврийн хэрэгсэлд ачигдсан болон задгай талбайд хураасан мод, модон материалын эзлэхүүний хэмжээг интернэт, гар утасны сүлжээ хамаарахгүй тодорхойлдог “Wood watcher” программ, Зайнаас тандан судлах арга буюу Сансарын хиймэл дагуулын өндөр нарийвчлал бүхий суурь зургийг ашиглан ArcGIS программ дээр орон зайн дүн шинжилгээ хийж, хууль бусаар ашигт малтмал олборлон, ашигласан гэмт хэргүүдийг илрүүлж, Хүрээлэн байгаа орчны эсрэг гэмт хэрэгтэй тэмцэхэд техник хэрэгсэл очих боломжгүй, шавар, шалбааг, ус, цас ихтэй гол мөрнийг туулах ажилд Моторт завийг ашиглаж, хууль бусаар ашигт малтмал олборлосон 26 хэргийг үйлдлийг газар дээр нь илрүүлэн ажиллаа.

Цаашид танай алба ямар бодлого, зарчмыг барьж ажиллах вэ?

Гэмт хэрэг, зөрчлөөс урьдчилан сэргийлэх ажлыг онол, судалгаа, дүн шинжилгээнд үндэслэн иргэн, байгууллагын оролцоог ханган зохион байгуулж, мэдээлэл, техник, технологийн шинэчлэлийг тасралтгүй нэвтрүүлэх чиглэлээр зайнаас тандан судлах арга-Сансрын хиймэл дагуул, орон зайн дүн шинжилгээний ArcGis программыг үйл ажиллагаандаа ашиглаж, иргэн, хуулийн этгээдийн хууль ёсны эрх ашгийг хамгаалах зарчмыг баримталж ажиллах болно.

Ярилцсан танд баярлалаа, та бүхний цаашдын ажилд өндөр амжилт хүсье.

Баярлалаа, хүн бүр байгаль хамгаалагч гэдгийг иргэн бүр ухамсарлаж, ирээдүй хойч үедээ байгаль дэлхийгээ илүү сайхнаар үлдээхийн төлөө хамтран ажиллацгаая гэж уриалж байна.

Байгалийн унаган төрх, экологийн тэнцлийг хадгалж, хойч үедээ үлдээхийн төлөө хамтдаа

ЭКОЛОГИЙН ЦАГДААГИЙН АЛБА

М.Батсайхан: Байгалийн унаган төрх, экологийн тэнцлийг хадгалж, хойч үедээ үлдээхийн төлөө хамтдаа
Tweet
Bolod.mn