Трамп тангараг өргөмөгцөө эхний шийдвэрүүдээ гаргаж эхлэв

АНУ-ын 47 дахь ерөнхийлөгч Дональд Трамп өнгөрсөн шөнө 00:00 цагт тангаргаа өргөсөн. Тэрбээр үүнийхээ дараа мэдэгдлүүд хийж, эхний тушаал шийдвэрүүдээ гаргаж эхлээд байна.

Юун түрүүнд тэрбээр ОХУ-ын ерөнхийлөгч Владимир Путинтэй уулзахаар төлөвлөж буйгаа мэдэгдлээ. Ерөнхийлөгчийн сонгуулийн кампанит ажлын үеэр Трамп албан тушаалаа хүлээж авснаасаа хойш 24 цагийн дотор Украины дайныг дуусгаж чадна гэж амлаж байв. Тэрбээр Зууван танхимд сэтгүүлчдэд хандан хэлэхдээ "Бид дайныг аль болох хурдан дуусгахыг хичээх болно. Украин, Оросын дайн хэзээ ч эхлэх ёсгүй байсныг та бүхэн мэднэ" гэжээ.

Түүнчлэн нэгдүгээр сарын 6-ны Капитолын үймээнээс үүдэлтэй үүсгэсэн байсан 1600 шахам хэргийг Трамп нэг цохилтоор хаав. Тухайн өдрийн хэргээр ял шийтгүүлсэн 1270 шахам хүнд өршөөл үзүүлэх тухай тунхагт тэр гарын үсэг зурсны зэрэгцээ Хууль зүйн яаманд хүлээгдэж буй 300 орчим хэргийг хэрэгсэхгүй болгохыг үүрэг болгожээ. Цаашилбал, хамгийн ноцтой үймээн самууны хэрэгт буруутгагдаж байсан бусад 14 яллагдагчийг суллахыг тушаав.

Мөн хоёрдугаар сарын 1-нээс Канад, Мексикт шинэ татвар ногдуулахаар болж байна. Энэ талаар Трамп Зууван танхимд мэдэгдэл хийхдээ "Хойд Америкийн хөрш орнуудаас импортлох бараа бүтээгдэхүүнд 25 хувийн татвар ногдуулах талаар бодож байна" гэжээ. Харин түүнээс Хятадад ногдуулах гаалийн татварын талаар асуухад анхны бүрэн эрхийн хугацааны үүрэг даалгаврууд хэвээрээ байгаа гэдгийг онцолжээ.

"Capital One Arena"-д ёслолын шууд дамжуулалтыг үзэхээр 20 мянга орчим дэмжигч цуглажээ.

Харин тангараг өргөх ёслолд технологийн магнатууд, улс орны удирдагчид гээд нөлөө бүхий олон хүн оролцсон. Тэднээс онцлон нэрлэвэл, "Tesla"-ийн үүсгэн байгуулагч Элон Маск, "Amazon"-ы Жефф Безос, "Meta"-ийн Марк Зукерберг, "OpenAI"-ийн Сэм Альтман, "Google"-ийн Сундар Пичай, Нью-Йорк хотын захирагч Эрик Адамс, тэрбумтан Мириам Аделсон, хэвлэл мэдээллийн томоохон төлөөлөгчдийн нэг Руперт Мурдок, ерөнхийлөгчид нэр дэвшигч асан Вивек Рамасвами, комедиан Тео Вонн нар хүрэлцэн иржээ. Олон улсын удирдагчидаас Аргентины ерөнхийлөгч Хавьер Милей, Хятадын дэд дарга Хан Жэн, АНУ дахь Хятадын Элчин сайд Ши Фэн нар оролцлоо. Энэ нь АНУ-ын ерөнхийлөгчийн тангараг өргөх ёслолд гадаадын удирдагчдыг урьсан ховрын тохиолдол болсон юм.

АНУ-ын улстөрчид болон өмнөх ерөнхийлөгч нар, тэргүүн хатагтай нар мөн хүрэлцэн ирсэн. Тэднийг нэрлэвэл, Билл Клинтон, Хиллари Клинтон, Жорж В.Буш, Лаура Буш, Барак Обама, дэд ерөнхийлөгч асан Дэн Куэйл, Майк Пенс нар байв. Харин АНУ-ын сенатор Жон Феттерман тангараг өргөх ёслолд шорт, цамцтай хүрэлцэн ирсэн нь хэвлэлийнхний анхаарлыг татав.

Мөн "TikTok"-ийг АНУ-д хориглох эсэх тухай яригдаж буй энэ өдрүүдэд тус платформын гүйцэтгэх захирал Шоу Зи Чю ёслолд оролцсон нь анхаарал татлаа.

Тангараг өргөх ёслолд оролцоогүй ч дэлхийн удирдагчид АНУ-ын 47 дахь ерөнхийлөгчид баяр хүргэж, дор бүрнээ байр сууриа илэрхийлж байна.

Украины ерөнхийлөгч Зеленский: Ерөнхийлөгч Трамп үргэлж шийдэмгий байдаг. Түүний хүчирхэг бодлогоор дамжуулан энх тайван нь Америкийн манлайллыг бэхжүүлэхийн зэрэгцээ урт хугацааны, шударга энх тайванд хүрэх боломжийг олгох болно.

Израилийн ерөнхий сайд Беньямин Нетаньяху: Дахин хамтарч ажиллах нь АНУ, Израилийн харилцааг илүү өндөр түвшинд хүргэнэ гэдэгт найдаж байна. Үлдсэн барьцааны хүмүүсийг буцааж өгөх, Хамасыг устгах, Газа дахь улс төрийн ноёрхлыг зогсоох, Газын зурвас Израильд дахин аюул учруулахгүй байх тухайд тантай хамтран ажиллахыг тэсэн ядан хүлээж байна.

Германы канцлер Олаф Шольц: АНУ бол манай хамгийн ойрын холбоотон. Бидний баримталж буй бодлого бол Атлантын далай дамнасан сайн харилцаа юм.

Их Британийн ерөнхий сайд Кейр Стармер: Манай хоёр улсын харилцаа хэдэн зууны туршид хамтын ажиллагаа, төгсөшгүй түншлэлээр тодорхойлогдсоор ирсэн. Ерөнхийлөгч Трампийн Их Британитай холбогдсон удаан хугацааны түүхэн харилцаа холбоо энэ нөхөрлөлийг үргэлжлүүлнэ гэдэгт итгэж байна.

Туркийн ерөнхийлөгч Режеп Тайип Эрдоган: Трамп Орос, Украины дайныг зогсооно гэж удаа дараа хэлсэн тул Туркийн хувьд шаардлагатай бүхнийг хийх болно. Бид энэ асуудлыг аль болох хурдан шийдвэрлэх хэрэгтэй. Энэ асуудал бидний хэлэлцэх асуудлын жагсаалтад багтах болно. Трамп хоёр дахь бүрэн эрхийн хугацаандаа бүх хүн төрөлхтөнд сайн сайхныг авчраасай гэж хүсч байна.

Сирийн дефакто удирдагч Ахмед аль-Шараа: Сүүлийн арван жил Сирид асар их зовлон авчирсан мөргөлдөөн манай үндэстнийг сүйрүүлж, бүс нутгийг тогтворгүй болгож байна. Түүнийг Ойрхи Дорнодод энх тайван тогтоох, бүс нутагт тогтвортой байдлыг сэргээх удирдагч гэдэгт бид итгэлтэй байна.

Тайванийн дарга Лаи Чин-тэ: АНУ бол Тайванийн аюулгүй байдал, эдийн засаг, худалдааны чухал түнш. Мөн ардчилал, эрх чөлөөний үнэт зүйлсийг хуваалцдаг хүчтэй холбоотон юм. Тайванийн ард түмний нэрийн өмнөөс шинэ ерөнхийлөгчид чин сэтгэлийн баяр хүргэе.

Дээрхээс гадна НАТО-ийн ерөнхий нарийн бичгийн дарга Марк Рутте, Европын комиссын ерөнхийлөгч Урсула вон дер Лейен нар Трампад баяр хүргэсэн бол баяр хүргэсэн утгатай бус мессеж илгээсэн хүн ч байна. Тодруулбал, Панамын ерөнхийлөгч Хосе Раул Мулино тангараг өргөх үедээ хэлсэн Трампийн үгсээс заримыг нь няцаажээ. Трамп тангараг өргөхдөө Панамын суваг дахь АНУ-ын хяналтыг сэргээх хүсэлтэй байгаагаа дахин нотолсон байна. Харин Мулино "Бүгд найрамдах Панам улс болон ард түмний нэрийн өмнөөс ерөнхийлөгч Дональд Трампийн Панам болон түүний сувгийн талаар хэлсэн үгнээс бүрэн татгалзах ёстойг мэдэгдэж байна" гэжээ.

Тангараг өргөх ёслолд ирсэн зочид болон бусад онцлох агшинг багтаасан гэрэл зургуудыг доор хүргэж байна.