Тээврийн хэрэгслийн албан татварын хэмжээ хэд болсон, татвараа хэдэн сарын хугацаанд төлөх ёстойг Нийслэлийн Татварын Газрын төсвийн орлого, удирдлагын хэлтсийн татварын улсын байцаагч О.Хуншагайгаас лавлалаа.

-Тээврийн хэрэгсэлд ногдуулах албан татвар хэрхэн нэмэгдсэн бэ?

-2024 оны арванхоёрдугаар сарын 4-нд НИТХ-аас баталсан тогтоолд 2,001 хүртэлх цилиндрийн багтаамжтай тээврийн хэрэгсэлд ногдох татвар нэг см.куб тутамд 72 төгрөг болсон. 2010 оноос хойш мөрдөгдөж байгаа үнээр 2,001 хүртэлх цилиндрийн багтаамжтай тээврийн хэрэгсэлд ногдох татвар 24 төгрөг байсан юм.

Жишээ нь 1,500 мотортой "Приус 20" загварын машины албан татвар 36,000 төгрөг байсан бол 2025 оны нэгдүгээр сарын 1-нээс мөрдөгдөж байгаа тогтоолоор жилд нэг удаа 1,500х72=108,000 төгрөг төлнө.

Авто тээврийн албан татварын тухай хуулийн 5 дугаар зүйлийн 5.1-д заасны дагуу 2,001 хүртэлх мотортой тээврийн хэрэгсэл дээд тал нь 144,000 төгрөг төлнө. Өөрөөр хэлбэл 2,000 хүртэл мотортой тээврийн хэрэгсэлтэй бол цилиндрийн багтаамжаа 72 төгрөгөөр үржүүлж төлөх татварын дүнг гаргана.

2,001-3,001 хүртэл мотортой тээврийн хэрэгслийн цилиндрийн багтаамж тутамд ногдох татвар 81 төгрөг, 3,001 болон түүнээс дээш мотортой тээврийн хэрэгслийнх 99 төгрөг болж нэмэгдсэн. 

Жишээ нь 4,600 мотортой "Ланд круйзер 200" загварын машины албан татвар 4,600х99=455,400 төгрөг болсон. Өмнө нь уг загварын машинд 196,000 төгрөгийн татвар ногдуулдаг байсан.

Нийслэлд 2025 оны нэгдүгээр сарын 1-нээс мөрдөгдөж байгаа тээврийн хэрэгслийн албан татварын хэмжээ:

№

Авто тээврийн болон өөрөө явагч хэрэгслийн төрөл

Жилд ногдуулах албан татварын хэмжээ

/төгрөгөөр/

1

2 дугуйтай мотоцикл

6,000

2

3 дугуйтай мотоцикл

9,000

3

Суудлын авто машин:

 

 

а/2001 см3 хүртэл

б/2001-3001 см3 хүртэл

в/ 3001 см3 болон  түүнээс дээш 

/Цилиндрийн багтаамжийн нэг см3 тутамд төгрөгөөр/

72

81

99

4

Микробус/15 хүртэл суудалтай

35,000

5

Автобус

52,000

6

Ачааны машин:

1/1 хүртэл тооны даацтай

2/ 1-2 тн-ын даацтай

3/ 2-3 тн –ын  даацтай

4/ 3-5 тн-ын

5/ 5-8 тн-ын

6/ 8-10 тн-ын

7/ 10-20 тн-ын

8/ 20-30 тн-ын

9/ 30-40 тн-ын

10/ 40-50 тн-ын

11/ 50-60 тн-ын

12/ 60-70 тн-ын

13/ 70-80 тн-ын

14/ 80-90 тн-ын

15/ 90-100 тн-ын

16/ 100 тн-оос  дээш даацтай

 

75,000

105,000

135,000

165,000

240,000

270,000

300,000

420,000

540,000

660,000

840,000

960,000

1,080,000

1,200,000

1,320,000

1,440,000

 

7

Тусгай зориулалтын автомашин

48,000

8

Трактор, өөрөө явагч  бусад хэрэгсэл

42,000

9

Бага оврын трактор

21,000

10

Чиргүүл/даацын 1 тонн тутамд

16,500

11

Цахилгаан тэжээлт автомашин

0

-Албан татварыг тээврийн хэрэгслийн улсын дугаарын сүүлийн оронгоор төгссөн сард төлөх үү?

-Авто тээврийн албан татварын тухай хуульд тээврийн хэрэгслийн албан татвар төлөх хугацаа тавдугаар сарын 31-ний өдрөөр дуусгавар болно гэж заасан байгаа. 

Тээврийн хэрэгслийн улсын дугаар нь 1, 6-аар төгссөн бол нэгдүгээр сард татвар төлөх журам цуцлагдсан.

Иргэд хуулийн хугацаанд буюу тавдугаар сарын 31-нийг дуустал тээврийн хэрэгслийн албан татварыг төлнө гэсэн үг.

-Хуулийн хугацаанд буюу тавдугаар сарын 31-нийг дуустал тээврийн хэрэгслийн албан татварыг төлөөгүй бол?

- Тээврийн хэрэгслийн албан татварыг хуулийн хугацаанд төлөөгүй бол алданги, торгууль ногдуулна. Албан татварыг хуулийн хугацаанд төлөөгүй бол татварын 10%-тай тэнцэх хэмжээний мөнгөөр торгох журамтай. Өөрөөр хэлбэл автомашины албан татвараа хугацаанд нь төлөөгүй бол татвараа төлж, дээрээс нь 10%-тай тэнцэх хэмжээний торгууль төлнө гэсэн үг.

-Автомашины албан татварыг хаана төлөх вэ, хувааж төлж болох уу?

-Тээврийн хэрэгслийн албан татварыг М-Монголиа, Гэрэгэ киоск, арилжааны банкны аппликэйшнууд, smartcar.mn, autobox.mn, etax, ebarimt аппликэйшнд автомашины улсын дугаарыг оруулж, эсвэл банкны салбаруудад очиж бэлэн мөнгөөр төлж болно. 

Автомашины албан татварыг хуулийн хугацаанаас өмнө хувааж төлж болно. Жишээ нь банкны аппликэйшнээр төлөх тохиолдолд үнийн дүнг бичих талбар гарч ирнэ. Уг талбарт автомашины нэхэмжилсэн албан татварыг хувааж төлөх үнийн дүнг оруулаад төлж болно.

-ББСБ-ын зээлээр автомашин авсан тохиолдолд татвар нь компанийн нэр дээр төлөгдөх үү?

-Зээлээр машин авсан бол улсын дугаарыг оруулахад албан татварын нэхэмжлэл гарч ирэх тул эзэмшигч төлнө.

-Автомашинаа оношилгоонд оруулах үед албан татвараа заавал төл гэх шаардлага тавих уу?

-АТҮТ-тэй хамтран ажиллах гэрээний хүрээнд тээврийн хэрэгслийн албан татварыг төлөх хуулийн хугацаа дуусаагүй үед зөвхөн оношилгоонд оруулж болно. Харин автомашины албан татвар төлөх хуулийн хугацаа хэтэрсэн үед татварыг төлүүлж оношилгоонд оруулах шаардлагыг тавина.

-2024 оны татвараа төлөөгүй бол нэмэгдсэн үнээр төлөх үү?

- Тээврийн хэрэгслийн 2024 оны албан татварыг төлөөгүй бол 2025 онд төлөхдөө нэмэгдээгүй үнээр төлнө.

-Нийслэлийн авто зам ашигласны төлбөрийг албан татвартай зэрэг төлөх ёстой юу?

-НИТХ-ын 2024 оны арванхоёрдугаар сарын 4-ний тогтоолоор авто зам ашигласны төлбөрийн хэмжээ тав дахин нэмэгдсэн. Авто зам ашигласны төлбөрийг тээврийн хэрэгслийн албан татвартай хамт төлөх системтэй. Гэхдээ зэрэг төлөхгүй, дараалуулж төлсөн ч болно. 

2025 оны нэгдүгээр сарын 1-нээс мөрдөгдөж байгаа нийслэлийн авто зам ашигласны төлбөрийн хэмжээ: