Э.Содномпилжээ: Ард түмэн минь ард байгаа гэж бодохоор л сайхан болдог

2024-08-28

Паралимпын алт, хүрэл медальт, ДАШТ-ий гурван алт, дөрвөн мөнгөн медальт, Азийн наадмын алт, мөнгө, хүрэл медальт,

Дэлхийн цомын зургаан удаагийн аварга, Ази тивийн таван удаагийн аварга, дэлхийн дээд амжилтыг эзэмшигч, Хөдөлмөрийн баатар, гавьяат тамирчин Э.Содномпилжээтэй ярилцлаа.

“Парис-2024” паралимп эхлэхэд бага хугацаа үлдлээ. Таны бэлтгэл сургуулилалт хэр хангагдаж байна вэ?

-Парисын олимп хаяанд ирлээ. Тун завгүй бэлтгэл сургуулилалтдаа анхаарч байна. Байнгын бэлтгэлтэй байгаа.

Парисын олимпод аваргаа бататгах, дэлхийн рекорд эвдэх, хүчтэй өрсөлдөгчөө ялах зорилго нэн тэргүүнд байгаа байх. Энэ зорилго биелээсэй гэсэн хүсэл таныг хүндэтгэн биширдэг монгол түмнийх болсон гэхэд эргэлзэхгүй байна.

-Тэгэлгүй яах вэ. Аваргаа бататгах том үүрэг хариуцлага байгаа. Тиймээс маш их хичээж оролцоно. “Парис 2024” бол миний гурав дахь олимп. Олимпын наадамд явахад ард түмэн минь ард бий гэж бодохоор л сайхан болдог юм. Монгол Улсаа, ард түмнээ төлөөлж явж байгаа учир хариуцлагатай байхыг эрмэлздэг. “Монгол Улс, би монгол хүн” гэж хэлэх их бахархалтай, нэр хүндтэй байдаг. Олимпын үеэр хичээх л ёстой, улс эх орны минь нэр гарч байгаа шүү гэж бодож явдаг. Олимпын гол зорилго бол мэдээж өөрийн амжилтыг шинэчилж, аваргаа бататгах юм.

Мөн “Парис 2024” паралимпын наадмаас медаль авбал Монгол Улсын түүхэнд болон шигшээ багийн түүхэнд олимпын гурван медальтай анхны тамирчин болно. Үүний төлөө хичээж, зүтгэж байна.

Таны хүчтэй өрсөлдөгчөөр Ираны тамирчин Гарибши Алиакбарыг нэрлэж байгаа. Паралимпын пауэрлифтингийн 107 кг жингийн гол өрсөлдөөн та хоёрын дунд гарах байх гэсэн таамаг салбарынхны дунд ч бий. Та гол өрсөлдөгчтэйгөө хүч үзэхэд бэлэн үү?

-Бэлэн байна. Сүүлийн жилүүдийн тэмцээн уралдаанд Алиакбар бид хоёр урд хойноо ороод л яваад байгаа. Дэлхийн чансаагаар ч урд хойноо ороод л явж байна даа. Энэ олимпоор хүчтэй өрсөлдөж, хүч үзнэ дээ.

Тэмцээний өмнө сэтгэл зүйн хувьд өөрийгөө хэрхэн бэлтгэдэг вэ?

-Тэмцээний өмнө сэтгэл зүйгээ өөрөө л бэлтгэдэг дээ. Улс орныхоо өмнө бас үүрэг хариуцлага хүлээж байгаа учраас тэмцээнд амжилттай оролцоход анхаардаг. Бэлтгэл сургуулилалтаа ч чамбайруулдаг. Тэмцээнд орох бүрд сэтгэл зүй бэлтгэгдэж, сайжирдаг.

Таныг бэлтгэл сургуулилалтаа тасалдаггүй, хоцордоггүй, сахилга баттай, сэтгэл зүйн хувьд ч бэлтгэгдсэн тамирчин гэж анхны багш тань дүгнэсэн байдаг. Багш тань таныг хоёр ч удаа спорт руу хөтөлсөн хүн гэдэг шүү дээ. Энэ тухай дурсаж болох уу?

-Энэ дүгнэлтийг хэлсэн хүн бол миний анхны багш Ш.Энхсайхан. 2017 онд багш маань бурхан болсон. Би 14 наснаасаа буюу 1999 оноос Ш.Энхсайхан багштай танилцаж, пауэрлифтингээр хичээллэж эхэлсэн. 2001 онд улсын аваргад түрүүлснээр бидний амжилт эхэлж байлаа. Гэвч багш маань гадагшаа ажлаар явж, би ч сургуульд сурах гээд тэмцээн уралдаанд оролцохоо больсон байсан юм. Гэтэл нэг удаа багштайгаа автобусанд таарснаас хойш дахин бэлтгэлдээ орж, одоог хүртэл тасралтгүй хичээллэж байна даа. Харин багш маань бурхан болсноос хойш Монголын пауэрлифтингийн нэгдсэн холбооны ерөнхийлөгч, гавьяат тамирчин Д.Баттулга багшийн удирдлага дор бэлтгэл сургуулилалтаа хийж байна. Талийгаач багшийнхаа зааж зөвлөсөн зүйлсийг мартахгүй бэлтгэл сургуулилалтаа хийдэг.

Та өөрөө шавь бэлтгэж байна уу?

-Шавь нар бий. Г.Оргилболд маань энгийн буюу эрүүл төрлөөрөө Дэлхийн аварга шалгаруулах тэмцээнээс гурван алтан медаль авсан. Гурван жил дараалан дэлхийн аварга болсон Монголын анхны тамирчин. Миний гарын шавь байгаа юм.

Таныг багаасаа спортод дуртай, тэсвэр хатуужилтай хүүхэд байсан гэдэг. Олимпын аварга, дэлхийн аварга, дэлхийн рекорд эзэмшигч болж, өндөр амжилт гаргахад таны энэ чанар ихээхэн нөлөөлсөн байх?

-Би багаасаа спорт сонирхдог байсан. Спортыг сонирхдог, дуртай байсан болохоор өнөөдрийн амжилтад хүрсэн гэж ойлгож болно. Өмнө нь жүдо бөхөөр ч хичээллэдэг байсан.

Эх орныхоо далбааг олимпын тэнгэрт мандуулж, төрийн дууллаа цэнгэлдэхийн хойморт эгшиглүүлэн аварга болж байсан үеийн сэтгэгдэл одоог хүртэл тод санагддаг байх. Яг энэ мөчөө дөрвөн жилийн дараа дахин дурсвал?

-Энэ бол мартагдашгүй өдрүүдийн нэг. Багш нартайгаа олон өдөр хоног хичээл зүтгэл гаргаж, нөр их хөдөлмөрлөсний үр дүн гарсан. Тухайн үед Японд ковидоос сэргийлсэн хяналт шалгалт их байсан болохоор тэмцээндээ оролцож чадахгүй байх вий дээ л гэж их айж байсан. Харин тэмцээндээ оролцоод алтан медаль авахад үгээр илэрхийлшгүй сайхан мэдрэмжтэй байсан. Монголдоо ирэхэд гэр бүл, найз нөхөд, монголчууд маань маш халуун дотноор хүлээж авсан. Үнэхээр сайхан байсан. Одоо Парисын олимпоор аваргаа бататгаж, дөрвөн жилийн дараа тэр сайхан мэдрэмжээ дахин авъя даа.

Амжилт хүсье. Аваргаа бататгаарай.

-Баярлалаа. Хичээнэ ээ.

-Монголд пара спортыг мэддэггүй хүнгүй боллоо. Тэр дундаа пауэрлифтингээр хичээллэгсэд олон болж байгаа. Парисын олимпоор ч Монгол даяар паралимпыг шууд дамжуулах гэж байгаа нь ихээхэн ач холбогдол өгч буйн илрэл. Үүнд баг тамирчдын, тэр дундаа таны гаргасан амжилт, байгуулсан гавьяа маш их нөлөө үзүүлсэн нь үнэн. Бас өөрийнхөө амжилтаар олон хүнд итгэл, урам зориг өгч байгаа гэдэгт эргэлзэхгүй байна. Танд уншигчдынхаа өмнөөс талархал илэрхийлье. Бас хүн төрөлхтний түүхэнд гаргасан амжилтаараа нэрээ дуурсгах алдар цууг ерөөе. Ярилцсанд баярлалаа.

-Маш их баярлалаа. Танай хамт олонд бас ажлын өндөр амжилт хүсье. Олимпын тухай мэдээлэл, түүхийг нэгтгэн үлдээж байгаад баярлалаа.

Эх сурвалж: Үндэстний ТОЙМ сэтгүүл