Хотын төвийн машины зогсоолуудыг хаасанд олон иргэд бухимдаж буйгаа цахим орчинд илэрхийлээд байгаа билээ. Тэгвэл энэ талаар, Нийслэлийн Автозамын хөгжлийн газрын мэргэжилтэн Б.Ширэндэв "Улаанбаатар хотын автозамын түгжрэлийг бууруулах үндэсний хорооны зөвлөмжийн дагуу өнгөрсөн 2023 оны арванхоёрдугаар сарын 28-наас эхлэн төв зам дагуух зогсоолуудыг хаасан. Өдөрт багадаа энэ зогсоолуудад 300 жолооч автомашинаа байрлуулдаг. Зогсоол дүүрсэн үед автомашинаа нэгдүгээр эгнээнд давхардуулж тавьснаар түгжрэлийн 25-30 хувийг эзэлдэг" гэсэн юм.

Ногдол ашгийн 120 мянган төгрөгийг ирэх сарын 1-нээс иргэдийн данс руу шилжүүлнэ

"Эрдэнэс Тавантолгой" компанийн 1072 хувьцаа эзэмшигчдэд ногдол ашиг тараах асуудал олны дунд хүлээллтэй байсан.

Тэгвэл эл компанийн хувьцааны талаар авах зарим арга хэмжээний тухай тогтоолын төслийг өчигдөр УИХ баталлаа. Тодруулбал, Хоёрдугаар сарын 1-нээс 1072 хувьцааны ногдол ашиг болох 120 000 төгрөгийг иргэдийн дансанд шилжүүлэхээр болжээ

ШШГГ-ын цагдан хорих байрны даргад хоёр жилийн ял оноолоо

Налайх, Багахангай дүүргийн прокурорын газраас Дорнод аймгийн Шүүхийн шийдвэр гүйцэтгэх газрын Цагдан хорих байрны даргад холбогдох хэрэгт яллах дүгнэлт үйлдэн шүүхээр шийдвэрлүүлсэн байна.

Тодруулбал, Дорнод аймгийн Шүүхийн шийдвэр гүйцэтгэх газрын Цагдан хорих байрны даргаар ажиллаж байсан Б.Г нь 2022 оны 6 дугаар сард согтууруулах ундааны зүйл хэрэглэсэн үедээ иргэн С.З-н хүсэл зоригийн эсрэг хүч хэрэглэж, бэлгийн харьцаанд орсон...“ гэх хэрэгт Эрүүгийн хуулийн 12.1 дүгээр зүйлийн 1 /Хүчиндэх/-д зааснаар яллах дүгнэлт үйлдэж, Дорнод аймаг дахь сум дундын Эрүүгийн хэргийн анхан шатны шүүхэд шилжүүлсэн.

Тус шүүхээс хэргийг 2024 оны 1 дүгээр сарын 15-ны өдөр хянан хэлэлцээд шүүгдэгч Б.Г-г гэмт хэрэг үйлдсэн гэм буруутайд тооцож, 2 жилийн хорих ял оногдуулж, ялыг “Нээлттэй” хорих байгууллагад эдлүүлэхээр шийдвэрлэсэн байна. Мөн хохирогч С.З-гийн эмчилгээний зардал болох 3 сая 900 мянган төгрөгийг шүүгдэгч Б.Г-с гаргуулахаар шийдвэрлэжээ.

БЗД-т дэлбэрэлт болж 3 авран хамгаалагч амиа алдан, 10 хүн гэмтэж, их хэмжээний хохирол амслаа

Байгалийн хий тээвэрлэж явсан автомашин Дүнжингарав худалдааны төвийн авто зам дээр давхар эргэлт хийж, суудлын машинтай мөргөлдсөний улмаас дэлбэрэлт болж орон сууцны барилга, олон арван автомашин галд шатаж, гурван авран хамгаалагч харамсалтайгаар амиа алдсан аймшигтай үйл явдал энэ сарын 24-ний шөнийн 01 цагт гарсан.

Тодруулбал, Баянзүрх дүүргийн 26 дугаар хороо, “Их Монгол”, “Дүнжингарав” худалдааны төвийн автозамын уулзварт шингэрүүлсэн байгалийн хий /газ/ тээвэрлэж явсан том оврын автомашин, суудлын автомашинтай мөргөлдсөн зам тээврийн ослын улмаас гал гарч автомашин шатаж байна гэсэн дуудлага ОБЕГ-т энэ сарын 24-ний өдрийн 01.07 цагт иржээ. Дуудлагын дагуу ОБЕГ-ын харьяа Үндэсний аврах бригад, НОБГ-ын Гал түймэр унтраах, аврах 10, 14, 18, 26, 30, 34, 35, 63 дугаар анги, Аврах ангийн нийт 200 гаруй алба хаагч, 48 автомашин, техник хэрэгсэлтэй үүрэг гүйцэтгэсэн юм.

Түүнчлэн газ тээвэрлэж явсан автомашины ойр орчимд байсан 60 айлын орон сууц, ойролцоох 30 орчим машин галд өртсөн. Мөн галд өртөж гэмтсэн 14 иргэнийг ГССҮТ-ийн салбар эмнэлгийн эрчимт эмчилгээний тасагт 5-н хүн, түлэгдэлтийн тасагт 5 хүн эмчлүүлж байна гэх мэдээллийг тухайн цагт мэдээлж байсан. Харин дөрвөн иргэн түлэгдэлтийн 3-4 зэрэгтэй буюу биеийн байдал маш хүнд байгаа аж.

“Гал унтраах ажиллагаанд ямар нэгэн тактикийн алдаа гараагүй”

Дэлбэрэлт болж буй үйл явдлын талаарх иргэдийн хийсэн видео бичлэгүүд цахим орчинд нийтлэгдсээр байгаа. Ингэхдээ иргэдийн хийсэн бичлэгүүдээс аюултай хийн газнаас болж гарсан дэлбэрэлтийг унтраах үйл явцыг мэргэжлийн тактик алдагдагсан бөгөөд авран хамгаалагчдыг аюултай галын бүс рүү орох тушаал өгсний улмаас гурван хүн эрдэнэт амиа алдсан хэмээн иргэд шүүмжилсэн. Үүнд, ОБЕГ-ын дарга, бригадын генерал Г.Ариунбуян амиа алдсан алба хаагчдыг ямар нөхцөлд ажилласан талаар мэдээлсэн өгсөн.

Тэрбээр "Дуудлагыг мэдээллийг Нийслэлийн онцгой байдлын газар хүлээж аваад 01:07 цагт харьяа ангиас хөдөлж, галын голомтод 01:15 цагт очсон. Тухайн үед 60 тонн газ тээвэрлэж байсан автомашины ёмкость хазайсан байдалтай, шатлаг нэлээд дэлгэрсэн, ойролцоох автомашинуудад галын тархалт дэгдсэн, дулааны үйлчлэлээр нөхцөл байдал хүндэрсэн байсан. Тиймээс нэмэлтээр анги байгууллагуудыг татаж оролцуулсан гэлээ.

Түүнчлэн гал унтраах ажиллагаанд ямар нэгэн тактикийн алдаа гараагүй. Монгол Улсад мөрдөгдөж байгаа дүрмийн дагуу гал унтраах удирдагч маань тухайн нөхцөл байдлын үнэлгээ хийх зорилгоор буугаад ажиллаж байх явцад 40 метрийн алслалтай ёмкость хүчтэй дэлбэрэлтийн улмаас шидэгдэж гурван алба хаагч харамсалтайгаар амиа алдсан.

Тухайн үед 63 дугаар ангийн найман алба хаагч хоёр автомашинтайгаар очиж Санни таэур хажууд буугаад хүчтэй гал унтраах зориулалтын хошуугаар галын голомт руу чиглүүлээд нөгөө гурван алба хаагчид бууж нөхцөл байдлыг үнэлж байхад ийм асуудал гарсан” гэсэн юм.

Нийслэлийн 14-р сургуулийн хажууд байрлах ШТС-ыг эсэргүүцэж эцэг эхийн төлөөлөл мэдээлэл хийлээ

Сургууль, цэцэрлэгийн ойролцоох шатахуун болон газ түгээх станцуудын асуудлаар Улсын Онцгой Комисс(УОК)-т тусгай ажлын хэсэг байгуулагдсаныг Боловсрол, шинжлэх ухааны сайд Л.Энх-Амгалан цахим хуудсаараа мэдээлэв. Нийслэлийн 13 сургуулиас 200 метр дотогш зайд 16 шатахуун түгээх болон авто газ түгээх цэг байрладаг байна.

Тодруулбал

Баянгол дүүрэгт хоёр,
Баянзүрх дүүрэгт тав,
Сүхбаатар дүүрэгт нэг,
Багануур дүүрэгт хоёр,
Хан-Уул дүүрэгт гурав,
Чингэлтэй дүүрэгт хоёр,
Сонгинохайрхан дүүрэгт нэг бий.

Мөн төрийн өмчийн бус есөн сургуулиас 200 метрээс дотогш зайд есөн шатахуун түгээх цэг байрладаг байна.

Энэ асуудлын дагуу Боловсрол, Шинжлэх Ухааны Яамнаас холбогдох яамдад өнгөрсөн хавар албан бичгээр ханджээ. Уг асуудлыг ойрын хугацаанд шийдвэрлүүлж, сургууль, цэцэрлэгийн бүсэд хэт ойртсон газ болон шатахуун түгээх станцуудыг буулгах тал дээр тууштай шахаж, асуудлыг байнга тавьж ажиллахаа мэдэгдэв.

Энэ талаар Нийслэлийн БЗД-ийн 14-р сургуулийн эцэг эхийн төлөөллүүд болон тус сургуулийн багш нар Шунхлай ШТС-ыг эсэргүүцэн мэдээлэл хийсэн.

Нийслэлийн 14-р дунд сургуулийн тухайд 6000 гаруй сурагч, 300 гаруй багш ажилчидтай ба эдгээр хүмүүсийн сурах, ажиллах, амьдрах эрх зөрчигдөж байна хэмээлээ.

Амиа алдсан алба хаагчдын ар гэрт 3 өрөө орон сууц олгоно

Засгийн газрын пүрэв гаригийн хуралдаанаар Дүнжингарав худалдааны төвийн уулзвар дээр болсон ослын улмаас гал түймрийн аюулд өртсөн айл өрх, иргэдийг байршуулах орон сууц, хохирлыг барагдуулахад шаардлагатай төсөв санхүүгийн асуудлыг нэн яаралтай хэлэлцүүлнэ гэдгийг Шадар сайд С.Амарсайхан мэдэгдсэн юм. Дахин сануулахад, осолд өртөж амиа алдсан алба хаагчдын ар гэрийнхэнд тусламж үзүүлэх үүргийг ОБЕГ-ын дарга Г.Ариунбуянд үүрэг болгосон бол ослоос болж үүссэн хохирлын хэмжээг тогтоож яаралтай арга хэмжээ авахыг Засаг даргын орлогч П.Сайнзоригоор ахлуулсан ажлын хэсэгт даалгаад байгаа юм.

Улмаар албан үүргээ гүйцэтгэж яваад амиа алдсан Онцгой байдлын албаны гурван албан хаагчдын ар гэрт “Буянт-Ухаа” хороололд тус бүр гурван өрөө орон сууц олгохоор шийдвэрлэлээ. Мөн бусад хохирлыг арилгахад шаардлагатай нөхөн төлбөрийг Засгийн газрын нөөц хөрөнгөөс гаргахаар шийдвэрлэсэн байна.

Ц.Хулан, Б.Отгонбаатар нарын хэргийг хяналтын шатны шүүхийн хуралдаанаар хэлэлцүүлэхээс татгалзлаа

Улсын дээд шүүхийн Эрүүгийн хэргийн танхимын нийт шүүгчийн хуралдаанаар Ц.Хулан, Б.Отгонбаатар нарт холбогдох хэргийг шүүгдэгч Ц.Хулан, түүний өмгөөлөгчдийн гаргасан гомдлыг үндэслэн хяналтын шатны шүүх хуралдаанаар хэлэлцүүлэх эсэхийг 2024 оны нэгдүгээр сарын 24-ний өдөр хэлэлцлээ.

Шүүгдэгч, түүний өмгөөлөгчдийн гаргасан гомдол Эрүүгийн хэрэг хянан шийдвэрлэх тухай хуулийн 40.1 дүгээр зүйлийн 1 дэх хэсэгт заасан хяналтын журмаар гомдол, эсэргүүцэл гаргах үндэслэлд хамаарахгүй байгаа тул уг хэргийг хяналтын шатны шүүх хуралдаанаар хэлэлцүүлэхээс татгалзав.

Ингэснээр давж заалдах шатны шүүхийн магадлал хэвээр үлдэж байна. Нийслэлийн Эрүүгийн хэргийн давж заалдах шатны шүүх уг хэргийг 2023 оны 11 дүгээр сарын 1-ний өдөр хэлэлцээд Ц.Хулангийн анх удаа гэмт хэрэг үйлдсэн болон хувийн байдал зэргийг харгалзан үзэж, анхан шатны шүүхээс Эрүүгийн хуулийн тусгай ангийн 19.4 дүгээр зүйлийн 1 дэх хэсэгт зааснаар түүнд оногдуулсан 9 жил 6 сарын хугацаагаар хорих ялыг 8 жил 1 сарын хугацаагаар хорих ял болгон хөнгөрүүлж, Б.Отгонбаатарыг Эрүүгийн хуулийн тусгай ангийн 19.4 дүгээр зүйлийн 1 дэх хэсэгт заасан эрүүгийн хариуцлагаас чөлөөлж, суллаж шийдвэрлэсэн байна.

Согтуу жолооч төв талбайд автомашинтайгаа зорчсон

Энэ сарын 24-ны 18 цагийн орчимд нэгэн иргэн Сүхбаатарын талбайд машинтайгаа давхисан гэх мэдээлэл гарсан. Тээврийн цагдаагийн албанаас тодруулахад, талбай дээр машинтайгаа явсан жолооч 4.91 хувийн согтолттой гарсан. Жолоочийг саатуулсан.

Тодруулбал, Сүхбаатар дүүргийн зургадугаар хороо Сүхбаатарын талбайд 18:06 цагт приус маркийн машины жолооч цагдаагийн алба хаагчийн шаардлага биелүүлэхгүй шалгуулахаас зайлсхийх оролдлого хийсэн. Бусдад аюултай нөхцөл үүсгэн хөдөлгөөнд оролцсон учир тус дүүргийн цагдаагийн хэлтэс шалгаж байна гэлээ. Согтуу жолооч машинтайгаа төв талбай руу орж зогсоод, цагдаа нарыг очиход зугтаасан байна.

BOLOD ДОЛОО ХОНОГИЙН ТОЙМ: Газ тээвэрлэсэн машин дэлбэрсний улмаас эрдэнэт хүний амь нас үрэгдлээ
Tweet
Bolod.mn