Энэ удаагийн “Хавтаст хэрэг” буланд гэр бүлийн таарамжгүй харьцааны улмаас дагавар охин нь амиа хорлосон хэргийг тоймлон хүргэж байна.

Шүүгдэгч Л.А нь 2021 оны хоёрдугаар сарын 7-ны өдөр өөрийн фейсбүүкийн “....” гэх цахим хаягаас дагавар охин болох 17 настай хохирогч А.О-ийн фейсбүүкийн хаяг руу “Bi chinii banshin helee hiimeer bn” гэсэн мессеж илгээн, биеийг нь илж таалах зэргээр бэлгийн харьцаанд орохыг санал болгож, насанд хүрээгүй хүүхдэд садар самууныг сурталчилж, уруу татсан гэмт хэрэг үйлджээ. 2021 оны гуравдугаар сарын 29-ний өдрөөс 30-нд шилжих шөнө Сүхбаатар дүүргийн арваннэгдүгээр хороо 534 дугаар байрны 122 тоот байрлах гэртээ гэр бүлийн хамаарал бүхий харилцаатай, өөрийн эрхшээлдээ байсан 17 настай, насанд хүрээгүй хохирогч А.О-ийг скочоор гарыг нь хүлж, цахилгаан бороохойгоор цохиулах зэргээр бие мах бодид нь халдсаны улмаас сэтгэл санаа болон бие махбодын байнгын хүчирхийлэлд автуулж, түүнийг амиа хорлоход гарцаагүй хүргэсэн гэмт хэрэгт тус тус холбогджээ.

ХОХИРОГЧ: МИНИЙ ОХИН ШӨНӨ УНТАЖ ЧАДАХГҮЙ, СЭТГЭЛЭЭР УНАЧИХСАН БАЙСАН

Хохирогч Г.О-ын мөрдөн шалгах ажиллагааны шатанд өгсөн: “...Манай охин 2021 оны гуравдугаар сард сэтгэлээр унасан, надаас хөндийрөөд юм асуухаар ууртай байгаад байсан юм. Тэгээд би бага хүү Э-д “Дүү чинь үүрээр хар дараад байх юм. Шөнө унтаж чадахгүй байна” гэж ярьсан юм. Тэгээд манай Э надад би зөндөө олон дээдэстэй, тэгэхээр дүүг өвтгөөд байгаа юм болов уу гэсэн. Би охиноо болон том ах Э, том бэр М нарын хамт Дэнжийн 1000 орчим нэг бөө дээр очсон. Тэгээд миний охин юм асуух гээд дүлгэнээд байгаа шинжтэй болохоор нь би тэр гэрт байсан хүмүүсийг гаръя том болж байгаа охинд асуух зүйл байгаа байх гэж хэлээд дагуулаад гарсан. Тэгээд хэсэг хугацааны дараа намайг ороод ир гэхээр нь ороход тэр бөө надад “охиныг чинь илээд таалаад байдаг юм байна. Охин чинь чамд хэлж чадахгүй миний ээж энийг сонсоод галзуурах байх, унах байх” гэж бодоод хэлж чадахгүй байгаа юм байна гэж надад хэлсэн, тэгээд гадаа машинд суух хоорондоо охиныгоо үнсээд юу гэсэн үг вэ, ээжтэйгээ найз шигээ бай, юу ч нууж болохгүй шүү гэж хэлсэн. Эргэж гэртээ ирээд А-тай уулзаад чи яаж миний охиныг илж оролдож чаддаг байна гэж хоорондоо маргалдаж уйлаад ойр зуурын хувцсаа аваад охиныгоо дагуулаад дарь эхийн хуучин хашаа байшиндаа ирсэн.

Ингээд бид гуравдугаар сарын 26-ны өдрийг хүртэл тэнд байсан. Манай охин дарь эхээс гуравдугаар сарын 25-ны өдөр амвей сүлжээний ажлаараа яваад ирье гээд гарахаар нь "Орой ирнэ биздээ битгий хангай хотхонд очоорой, А залгах юм бол утсаа битгий аваарай" гэж хэлсэн. Тэгээд өглөө 05:00 цагийн үед утас дугарахаар нь авсан чинь А “О намайг ирээд аваадах гээд байна, топаз зочид буудлын энд байна" гээд яриад байна би очоод авчих уу гэхээр нь би өөрөө очиж авна гээд том хүү Э-ийн хамт тэр газар нь очиход А машинтайгаа ирчихсэн байсан Э нь энэ хавиар согтуу явж байна гэж надад хэлсэн. Манай хүү бид хоёр очиж уулзахад Э нь согтуу байсан болохоор нь О-той хамт байна гэж бодоод хүүхэд хаана байна, дандаа дагуулж явж архи дарс уудаг гэж уурласан, ах нь бас уурлаад маргалдсан.

Тэгээд машинд ороод юм ярьж байтал Э бид нарт “Та нарын мэдэхгүй юм байгаа, пааранд хүлээд амыг нь скочдоод хүчиндсэн” гэж хэлэхээр нь би гайхаад юу гэнэ ээ чи юу яриад байгаа юм бэ би охиноосоо энэ талаар хэд хэдэн удаа асуухад огт тийм юм болоогүй, зүгээр нэг хажуу хавиар нь өнгөрөхөөр илэх тэврэх асуудал байдаг гэж хариулж байсан. Тэгээд гуравдугаар сарын 29-ний өдөр Э-той холбогдоод О-г асуухад манай гэрт ирсэн байна, өөр тийшээ явлаа гээд байна, дүү нь яах вэ гэхээр нь өө яагаад вэ, Энхүүлээ бид хоёр очоод авъя гэхэд дүү нь аваад хоночих уу та санаа зовох уу гэхээр нь үгүй ээ гэж бичээд Э-ийн гэрт нь 23:00 цагийн орчимд очсон. Тэгээд Э-ийн хамт, хоёр ахтай нь хамт манай гэрт очиж ярилцахаар яваад гэртээ орж ирсэн. Манай хүү ээжийгээ бодол доо ээж өчнөөн хоног чамд санаа зовоод байна, ярих юм байна уу гэж асуусан чинь ээж бид хоёр угаасаа энэ хүнээс бүр мөсөн холбоогоо таслахаар шийдээд тохирчихсон, гадуур хоносон нь миний буруу дахиж ийм үйлдэл гаргахгүй ээ гээд босож зогсож байгаад бид нараас уучлалд гуйсан...Э чиний ярьсан зарим юмыг гэрийнхэн чинь мэдэхгүй байна лээ шүү дээ, тэр тухайгаа яриач гэж хэлсэн чинь талийгч тоймтой хариулт өгөөгүй, үгүй ч гэхгүй, тийм ч гэхгүй булзааруулаад байсан...талийгч ариун цэврийн өрөө рүү ороод гарч ирэхдээ шууд өөрийнхөө жижиг өрөөнд ороод хаалгаа хаасан. Би хувцсаа солих гэж байгаа юм байна гэж бодсон. Гэтэл манай зээ охин аниа уначихлаа гэж жижиг өрөөнөөс ганцаараа уйлаад гараад ирсэн” гэжээ.

ГЭРЧ: ХОЙД ААВ МИНИЙ ГАРЫГ СКОЧООР ХҮЛЖ БАЙГААД ЦАХИЛГААН БОРООХОЙГООР ЦОХИЖ БАЙСАН ГЭЖ ЯРЬЖ БАЙСАН

Гэрч Г.Э-ны мөрдөн шалгах ажиллагааны шатанд өгсөн: “...Э-той хамт дагуулаад 2021 оны гуравдугаар сарын 29-ний орой 23:00 цаг өнгөрөөгөөд гэрт авчирсан. Гэртээ ирээд дүүгээ яагаад сэтгэлээр унаад байгаа юм, юу болсон юм гэхэд та нар хойд аавын үгэнд итгэнэ үү, миний үгэнд итгэнэ үү өөрсдөө мэд гэсэн. Миний ярьж байгаа бүх зүйл үнэн. Миний гарыг скочоор орноос уяж байгаад цахилгаан бороохойгоор бие дээр цохиж, миний бэлэг эрхтэнг долоож, чиний бэлэг эрхтэн рүү чинь хэлээ хиймээр байна гэдэг байсан гэж ярьж байсан. Миний дүү О ариун цэврийн өрөө орлоо гээд явсан. Нээх удаагүй нэг минут хүрээгүй байж байтал төрсөн ахын хүүхэд болох Н аниа цонхоор үсэрчихлээ гээд орилоод ороод ирсэн...” гэсэн.

Гэрч Ж.Э-ийн мөрдөн шалгах ажиллагааны шатанд өгсөн: “...би талийгчийн ээж, Э ах хоёртой нь уулзахад эгч нь А-с салж байгаа. Одоо О-г яах вэ, хэдүүлээ барьж аваад, засаж авъя гэж ярилцахад би “О-г А нь оролдоод хүчин болоо биз дээ” гэж хэлсэн чинь тэр 2 энэ талаар сонсож байгаагүй юм шиг гайхаад тийм юм болсон юм уу би зүгээр оролдсон гэж бодож байсан гэж ээж нь хэлж байсан. Өчигдөр талийгаачаас хүчиндүүлсэн талаар асуухад “талийгч ээж Э ах та 2 мэдэж байгаа биз дээ би хэлсэн ш дээ гэхэд ээж нь чи хүчиндүүлсэн гэж хэлээгүй ш дээ гэхэд одоо болилдоо заза буянаараа болог гэж жаахан гомдсон байдалтай хэлэхэд ээж нь скоч хүлүүлсэн гэж юу яриад байгаа юм талийгаач өөрөө хэлж чадахгүй байхаар нь би өмнөөс нь тэр өдөр чамаас мессеж аваад 18:00 цагийн үед танай гэр лүү очоод хаалгыг чинь тогшиход А онгойлгохоор нь би 07:00 цагаас О-той гүйх ёстой байсан юм та дуудаад өгөх үү гэж хэлсэн гэхэд хар шөнөөр чи юу яриад байгаа юм гээд хаалгаа хаах гээд байсан, тэгэхээр нь би хаалгыг нь татаж байгаад О, О гэж хашхирахад А нь хаалгаа хаагаад одоо явахгүй бол цагдаа дуудаж өгнө шүү гэж хэлэхээр нь би тэгвэл би өөрийг чинь цагдаа дуудаж өгнө шүү гэж хэлчхээд гараад ээж, ах Э нарт нь энэ талаар хэлсэн” гэж бид тэд нарт хэлээд би тэр үед би чамайг дуудаад байхад яагаад гарч ирээгүй юм бэ гэж асуухад талийгаач миний амыг скочдоод гарыг минь хүлсэн байсан юм чинь би яах юм гэхэд Энхүүлээ ах би төд удалгүй яваад орсон ш дээ, хүлүүлсэн байвал мөр гарна шүүдээ гэхэд талийгч савхи өмсүүлсэн байсан юм чинь гэж хэлсэн. Жаахан байж байгаад бууз идэж байхад тал талаас нь хүмүүс хэлээгүй гээд байхад талийгч босоод жижиг өрөө лүү орсон. Тэгээд л дүү нь Н /10 орчим насны/ О аниа цонхоор үсэрчихлээ гэж жижиг өрөөнөөс гарч ирээд хэлсэн” гэжээ.

ТАЛИЙГААЧИЙН ТАРХИ ХАГАРЧ, ЭЛЭГ НЬ УРАГДАЖ, УУШГИНД НЬ ЦУС ХУРСАН БАЙЖЭЭ

Шүүхийн шинжилгээний үндэсний хүрээлэнгийн 2021 оны 04 дүгээр сарын 13-ны өдрийн 653 дугаартай “... талийгаач нь А.О нь гавлын суурь, дагз ясны хугарал, их тархи бага тархины аалзан хальсан доорх тархмал цус харвалт, элэгний урагдал, язрал, 2 уушгины тархмал цус хуралт, цус хуралт гэмтлийн улмаас нас баржээ. Хөнгөн зэргийн согтолттой. Цусанд мансууруулах болон сэтгэцэд нөлөөлөх бодис илрээгүй. Охин хальс хуучин урагдалтай” гэх дүгнэлт гарчээ.

Дээрх нотлох баримтуудаар шүүгдэгч Л.А нь өөрийн үйлдлийн хууль бус шинжтэй болохыг ухамсарлан ойлгож, хохирогчийн биеийг нь илж таалах скочоор гарыг нь хүлж, цахилгаан бороохойгоор цохиулах зэргээр бие мах бодид нь халдсаны улмаас сэтгэл санаа болон бие махбодын байнгын хүчирхийлэлд автуулж, түүнийг амиа хорлоход гарцаагүй хүргэсэн нь Эрүүгийн хуулийн ерөнхий ангийн 2.3 дугаар зүйлийн 2 дахь хэсэгт заасан “өөрийн үйлдэл эс үйлдэхүйг хууль бус шинжтэй болохыг ухамсарлаж, түүнийг хүсэж үйлдсэн, хохирол хор уршигт зориуд хүргэсэн бол санаатай гэмт хэрэгт тооцно” гэж заасанд нийцэж байна.

17 НАСТАЙ ДАГАВАР ОХИНОО ХҮЧИРХИЙЛЖ, АМИА ХОРЛОХОД НЬ ХҮРГЭСЭН ХОЙД ЭЦЭГТ НЬ 1.6 ЖИЛИЙН ХОРИХ ЯЛ ОНООЖЭЭ

Шүүгдэгч Ш овогт Л.А-г хүүхдэд садар самууныг сурталчилсан, бэлгийн харьцаанд орохыг санал болгосон гэмт хэрэг үйлдсэн, гэр бүлийн хамаарал бүхий харилцааны улмаас эрхшээлдээ байгаа хүнийг байнга хүчирхийлсний улмаас амиа хорлох нөхцөл байдалд хүргэсэн гэмт хэрэг үйлдсэн гэм буруутайд тус тус тооцсугай.

Эрүүгийн хуулийн ерөнхий ангийн 6.8 дугаар зүйийн 1 дэх хэсэгт зааснаар шүүгдэгч Л.А-д Эрүүгийн хуулийн тусгай ангийн 10.4 дүгээр зүйлийн 1 дэх хэсэгт зааснаар оногдуулсан /өршөөн хасаж/ 1 /нэг/ жилийн хугацаагаар хорих ял дээр Эрүүгийн хуулийн тусгай ангийн 16.8 дугаар зүйлийн 1 дэх хэсэгт зааснаар оногдуулсан 6 /зургаа/ сарын хугацаагаар хорих ялыг нэмж нэгтгэн, нийт биечлэн эдлэх ялын төрөл, хэмжээг 1 /нэг/ жил 6 /зургаа/ сарын хугацаагаар хорих ялаар тогтоосугай гэжээ.

https://ergelt.mn/news/71/single/38093

17 настай дагавар охиноо хүчирхийлж, амиа хорлоход нь хүргэсэн хойд эцэгт 1.6 жилийн хорих ял оноожээ
Tweet
Bolod.mn