Bolod.mn сайт долоо хоног бүр нийгэм, улс төр, эдийн засгийн хүрээнд болж өрнөсөн онцлох үйл явдлыг тоймлон хүргэдэг уламжлалтай. Эдгээр өдрүүдэд олны дунд найман ишигний хэрэг гэх нэрээр танигдсан малын хулгайн хэргийн шүүх хурал олны анхаарлын төвд байлаа. Уг хэргийн шүүх хуралдаан өчигдөр болсон ба хэргийн анхан шатны шүүхийн шийдвэрийг хэрэгсэхгүй болгон шийдвэрлэсэн юм. Улмаар уг хэрэгт холбогдоод буй иргэдийг батлан даалтаар гаргасан юм. Эдгээр болон бусад онцлох үйл явдлуудыг тоймлон хүргэж байна. 

Скүүтерийн компанийн ажилтанд хоёр сая төгрөгийн торгууль оноожээ

Олон нийтийн сүлжээнд иргэний дүрс бичлэгийг санаатайгаар тавьсан скүүтерийн компанийн ажилтанг цагдаагийн байгууллагаас шалгаж байгааг мэдэгдсэн. Энэ хэргийг Зөрчлийн хэрэг үүсгэн цагдаагийн байгууллага шалгаж байсан бөгөөд тухайн компанийн ажилтанд торгох ял оноожээ. ЦЕГ-аас өгсөн мэдээллээр, цахим хуудаст байгууллагын эд хөрөнгийг гэртээ авч тавьсан иргэний бичлэгийг нийтэлсэн компанийн ажилтанг бусдын гэрт зөвшөөрөлгүй орж, дуу дүрсний бичлэг хийсэн гэх үндэслэлээр Сонгинохайрхан дүүргийн цагдаагийн хэлтэст шалгаж байгаа. Энэ хэргийн тухайд авч үзвэл Зөрчлийн тухай хуулийн 6.22.1 заалтыг зөрчсөн байж болзошгүй гэж шалгаж байгааг мэдэгдсэн.

Тус заалтад “Оршин суугчийн зөвшөөрөлгүйгээр орон байранд, эсхүл гадна талаас орон байрны доторх орчны гэрэл зураг авсан, дууны, дүрсний бичлэг хийсэн бол хүнийг хоёр зуун нэгжтэй тэнцэх хэмжээний төгрөгөөр, хуулийн этгээдийг хоёр мянган нэгжтэй тэнцэх хэмжээний төгрөгөөр торгоно” гэж заасан. Тиймээс хуулийн дагуу тус компанийг хоёр сая төгрөгөөр торгож шийдвэрлэсэн байна. Мөн Сонгинохайрхан дүүргийн иргэн скүүтерийг хулгайлсан, эсэхийг ч шалгаж байгаа аж. 

Гурван настай хүүг зодсон хойд эцгийн хэргийг прокурорт буцаажээ

Ээжийнхээ хамтран амьдрагчид зодуулснаас хүнд гэмтэл авч, Гэмтэл согог судлалын үндэсний төв /ГССҮТ/-д хүргэгдэн эмчлүүлж байсан гурван настай хүү Ц.Батзаяа өнгөрсөн гуравдугаар сарын 30-нд Турк улс руу эмчилгээнд явсан. Тус улсад дөрвөн удаагийн хагалгаанд орсон бөгөөд биеийн байдал сайжирч байгааг ар гэрийнхнээс нь мэдээлсэн билээ. Тэгвэл өнгөрсөн долоо хоногт хүү тав дахь хагалгаандаа орсон байна. Хагалгаа амжилттай болсон бөгөөд хүүгийн ар гэрийнхэн удахгүй дэлгэрэнгүй мэдээлэл өгнө гэсэн юм. Хүүг зодсон этгээдийг эрүүгийн тухай хуулийн 11.1, 12.1-ийн 4-т заасан үндэслэлээр шалгаж, шүүх хурал өнгөрөгч Баасан гаригт болжээ.

Улмаар шүүхээс хэргийг прокурорт буцааж шийдвэрлэжээ. Гурван настай хүүд хүнд гэмтэл учруулсан хэргээр саатуулагдсан сэжигтэн нь өмнө нь цагдаагийн байгууллагаас эрэн сурвалжлагдаж байсан, 1989 онд төрсөн Э гэгч. Тэрбээр өмнө нь 2018 онд Эрүүгийн хуулийн тусгай ангийн 11.6-д зааснаар хүний биед хөнгөн гэмтэл учруулах зүйл ангиар ял шийтгүүлсэн. Мөн залилах гэмт хэргээр торгуулж байсан этгээд юм. Эх сурвалжийн мэдээлснээр, сэжигтэн нь 2022 оны арваннэгдүгээр сард хохирогч хүүгийн ээжтэй нь танилцаж, 2023 оны нэгдүгээр сараас хамт амьдарч эхэлсэн байна. Хэрэг гуравдугаар сарын 6-ны өдөр гарсан ч хүүг гуравдугаар сарын 8-ны өдөр ГССҮТ-д хүргэж өгсөн нь тогтоогдоод буй.

Хууль зүйн сайдын тушаалаар хоригдлууд шарилж устгах ажилд дайчлагдана

Хууль зүй, дотоод хэргийн сайд Х.Нямбаатар тушаал гарган, ялтангуудаар Улаанбаатар хотын шарилжийг түүлгэж, устгуулах арга хэмжээ авахаар болжээ. Эл тушаал маргааш өдрөөс эхлэн хэрэгжих юм байна. Хууль зүй, дотоод хэргийн сайдын тушаалд “иргэдийн эрүүл мэндийг хамгаалах, шүүхээс оногдуулсан ялын үр нөлөөг дээшлүүлэх зорилгоор хорих ял эдэлж буй хоригдол, нийтэд тустай ажил хийлгүүлэх ял шийтгүүлсэн, баривчлагдсан этгээдийг нийслэл Улаанбаатар хотын нийтийн эдэлбэр газрын шарилж, зэрлэг ургамлыг цэвэрлэх ажилд хууль тогтоомжийн хүрээнд татан оролцуулж, зохион байгуулахыг Шүүхийн шийдвэр гүйцэтгэлийн ерөнхий газарт даалгасугай” гэжээ. Улаанбаатар хот шарилжиндаа бариулж байгаа тухай шүүмжлэл өрнөж, нийслэлийн Захирагчийн ажлын албыг анхааралдаа авахыг олон нийт сануулж байв. Тэгвэл энэ ажилд хоригдлууд дайчлагдах нь ээ.

Андуурсан гүйлгээг завшсан бол гэмт хэрэгт тооцож, ял онооно

Эрүүгийн хуульд “алдаатай гүйлгээ, андуурагдсан илгээмж, гээгдэл эд хөрөнгө, алдуул мал завших” гэмт хэргийг хуульчилж өгсөн юм. Хүний гээгдэл эд хөрөнгө, алдуул мал, андуурагдсан илгээмж, төлбөр тооцооны алдаатай мөнгөн гүйлгээ зэргийг эзэмшигч, өмчлөгчид нь буцаан өгөлгүй, эзэмшигч, өмчлөгч нь тодорхойгүй бол цагдаагийн болон нутгийн захиргааны байгууллагад мэдэгдэж хүлээлгэн өгөөгүй өөртөө завшсан үйлдлийн хохирлын хэмжээ 300,000 төгрөгөөс дээш үнийн дүнтэй бол гэмт хэрэгт тооцно. Мөнхийн таксигаар үйлчлүүлсэн Б-ээс андуураад түүн рүү шилжүүлсэн 4000 юань буюу 1,478,000 төгрөгийг бусдын эзэмшлийнх гэдгийг мэдсээр байж өөрийн хэрэгцээнд зарцуулсан үйлдлийг “алдаатай гүйлгээ завших” гэмт хэрэгт тооцож шүүхээс ял оногдуулж, хэрэг шүүхэд байхад Мөнх нь 1,180,000 төгрөг хохирогчид төлсөн тул үлдэгдэл 298,000 төгрөгийг түүнээс буцаан олгуулахаар шүүхээс шийдвэрлэсэн байна.

Энэ гэмт хэрэг нь хөнгөн гэмт хэрэгт хамаарах бөгөөд торгох, нийтэд тустай ажил хийлгэх, зорчих эрх хязгаарлах ялаас сонгож оногдуулахаар заасан. Мөнхийн үйлдсэн гэмт хэрэгт оногдуулах ялыг хөнгөрүүлэх, хүндрүүлэх хуульд заасан нөхцөл байдлууд тогтоогдоогүй, хувийн байдлын хувьд анх удаа шүүхээр ял шийтгүүлж байгаа, ажил хөдөлмөр эрхэлдэггүй, тогтсон орлогогүй, хохирол бүрэн төлөгдөөгүй, нийтэд тустай ажил хийлгэх ял оногдуулахад хуульд заасан харшлах нөхцөл байдлууд тогтоогдоогүй зэргийг харгалзан үзээд түүнд 240 цагийн нийтэд тустай ажил хийлгэх ялаар шийтгэсэн. Уг ялыг шүүхийн шийдвэр гүйцэтгэх байгууллагаас тодорхойлсон газарт өдөрт наймаас дээшгүй цагаар нийтийн ашиг сонирхолд тустай ажлыг цалин хөлс олгохгүйгээр хийнэ. Эрүүгийн хуулийн 17.5 дугаар зүйл. Алдаатай гүйлгээ, андуурагдсан илгээмж, гээгдэл эд хөрөнгө, алдуул мал завших гэмт хэрэг.

1. Төлбөр тооцооны алдаатай гүйлгээг завших. Банк болоод хувь хүн заримдаа данс андуурч мөнгө шилжүүлэх тохиолдол гардаг. Энэ үед та тухайн мөнгийг зохих этгээдэд мэдэгдэн буцаан өгөх ёстой.

2. Андуурагдсан илгээмжийг завших. Бусдын илгээмжийг андуурч авах, эсвэл хаяг, нэр андуурч танд хүргэгдэн ирсэн илгээмжийг өөртөө авах нь гэмт хэрэг юм. Та бусдын илгээмж өөрт тань андуурагдан ирснийг мэдсэн дариуд хүргэлт хийсэн болон илгээмжийн газарт мэдэгдэж буцаах ёстой. 3. Гээгдэл эд хөрөнгө завших. За энэ бол ойлгомжтой байх. Бусдын хаясан гээсэн эд хөрөнгийг олсон бол тухайн олсон газрынхаа харьяа дүүрэг, сумын, аймгийн цагдаагийн газар хэлтэст аваачиж өгч хүлээлгэн өгөх ёстой. Цагдаа эзнийг нь олох ёстой.

4. Алдуул малыг завших. Өөрийн мал сүрэгт ирж нийлсэн, гүйгүүл, салхи шуурганд тасарч уруудсан гээд ямарваа нэг байдлаар алдагдсан бусдын малыг өөртөө авбал мөн л гэмт хэрэг юм. Алдуул малыг содон шинж тэмдэг, им тамгаар нь заавал өөрийн оршин суугаа газрын харьяа цагдаад мэдэгдэж тэмдэглүүлэх, орон нутгийн зарын бүлэгтээ зургийг нь оруулах зэргээр олонд зарлах шаардлагатай.

Найман ишигний гэх хэргийн Анхан шатны шүүхийн шийдвэрийг хүчингүй болголоо

Олны дунд найман ишигний хэрэг буюу олон тооны мал хулгайлсан гэх хэргийн давж заалдах шатны шүүх болж, шүүх бүрэлдэхүүн шийдвэрээ танилцууллаа. Шүүх бүрэлдэхүүн хэргийг хянан хэлэлцэж, анхан шатны шүүх буюу Хэнтий аймгийн Бор-Өндөр суман дахь сум дундын шүүхээс гаргасан 35 дугаартай яллах тогтоолыг бүхэлд нь хүчингүй болгож шийдвэрлэсэн байна. Ингэснээ хэрэгт холбогдогсод суллагдсан. Гэхдээ тэднийг цагаатгасан хэрэг биш бөгөөд шүүх энэ хэрэг дээр дахин ажиллаж байгаа хэрэг юм. Энэ хугацаанд шүүхийн ажиллагаанд саад учруулахгүй байх, дуудсан цагт ирэх зэргээр шийдвэрийг сайтар дагаж мөрдөхийг шүүх бүрэлдэхүүн шүүгдэгчдэд сануулсан юм.

Архангай аймгын Чулуутын хавцалаас нэг иргэн унаж, амь насаа алджээ

Улаанбаатар хотоос Архангай аймгийн чиглэлд аялж явсан 30 настай эрэгтэй “Чулуут” хавцлаас хөл алдан унаж, амь насаа алджээ. Энэ тухай дуудлага 07 дугаар сарын 27-ны 23:05 цагт онцгой байдлын байгууллагад ирсэн байна. Тус аймгийн Онцгой байдлын газрын Тариат сум дахь Эрэн хайх, аврах бүлгийн алба хаагчид эрэн хайх, аврах ажиллагааг зохион байгуулж, 07 дугаар сарын 28-ны 06:24 цагт “Чулуут”-ын хавцлаас цогцсыг олж, аймгийн Цагдаагийн газрын мөрдөгчид шилжүүлэн өгсөн байна.