Лу.Гантөмөр Л.Оюун-Эрдэнэд хуурай агсам тавьж, С.Баярцогт, Б.Хурц нар түүний эсрэг нэгджээ

2023-05-25

Төрийн өндөр албан тушаал хашиж явсан хүмүүс үр хүүхдүүд, ойр дотныхондоо Боловсролын зээлийн сангаас зээл авч,

гадаадын их, дээд сургуулиудад суралцуулсан тухай мэдээлэл нийгэмд дуулиан дэгдээгээд байна. Тэр дундаас улс төрийн гол бай нь АН-ын дарга Лу.Гантөмөр болоод байна. Түүнийг АН эрх барьж байх үед Боловсрол, соёл, шинжлэх ухааны сайдаар ажиллаж байхдаа тус яамны дэд сайд асан Б.Ургамалцэцэгийн 2000 онд АНУ-ын Брижпортын их сургуульд суралцаж байхдаа авсан 29960 ам.долларыг 2013 оны тавдугаар сарын 22-ны өдрийн А/185 тоот тушаалаар тэглэсэн, мөн “Салбар хариуцсан сайд байхдаа охиноо гадаадад зээлээр сургаад зогсохгүй хагас тэрбум төгрөг илүү авч дансанд нь хийж өгчээ. Тодруулбал, БЗС-аас зөвхөн нэгхэн жилд 283.141.3 ам.доллар илүү олгосон. Лу.Гантөмөрийн охин Г.Хуланд хоёр ижил нэхэмжлэхээр давхардуулан дөрвөн удаа гүйлгээ хийж 151 мянган ам.доллар илүү олгожээ. Зээлээ төл” гэх мэдээлэл цахим ертөнцөөр нэг түглээ. Түүгээр ч зогсохгүй АН олонхи байх үед Х.Тэмүүжин дээр өрсөлдөгчид нь хууль хяналтынхантай хүч хавсарч “Сайн ах” драмыг дэглэсэнтэй төстэй мэдээллийг ч олон нийтийн сүлжээгээр нэг сэвж байна. АН-ын даргаар саяхан сонгогдож, тамгаа хэнд ч өгдөггүй ааш муутай С.Эрдэнээс тамгыг нь салгаж авсан Лу.Гантөмөрөөр ийнхүү “оролдох” нь улс төрд ямар үр дагавар авчрах бол...

Лу.Гантөмөр хэдийгээр олны өмнө ил гарч мэдэгдэл хийхгүй байгаа ч өнгөрсөн долоо хоногт Ерөнхий сайд Л.Оюун-Эрдэнэ болон МАН-ын нөлөө бүхий улстөрчдөд хуурай агсам тавьсан гэх мэдээлэл Төрийн ордонд цомхон хүрээнд тархжээ. Чингэхдээ “Үндсэн хуульд нэмэлт өөрчлөлт оруулах тухай Л.Оюун-Эрдэнэ чиний “Барбарос төлөвлөгөө”-г АН-ынхан бид дэмжсэн. Хариу нь энэ үү” гэх утга бүхий үгийг хэлжээ. Л.Оюун-Эрдэнийн тухайд, Үндсэн хуульд нэмэлт өөрчлөлт оруулж, гишүүдийн тоо, сонгуулийн тогтолцоог өөрчлөх чин хүсэлтэй байгаа. Учир нь тэрбээр 2024 онд эрх баригч МАН-ыг сонгуульд удирдаж оролцоно. Хэрэв хуучнаар буюу жижиг мажоритари тогтолцоогоор сонгууль явуулбал МАН 2016, 2020 онд үнэмлэхүй ялсан шигээ УИХ-д дахин олонхи болж чадахгүй. Үндсэн хуульд нэмэлт өөрчлөлт оруулж, гишүүдийн тоог 152 болгох талаар УИХ дахь МАН-ын бүлгийн гишүүд тойрогтоо очиж ухуулах гэсэн биш сонгогчдодоо бараг хөөгдөөд ирцгээснийг өөрсдөө мэдэж байгаа. Иргэдийн хувьд “УИХ-ын 76 хулгайч” хэмээн гишүүдэд асар муу хандлагатай байгаагийн дээр цалин, тэтгэвэр, ажилгүйдэл, ядууралд бухимдсан ийм сөрөг реакцитай үед УИХ-ын сонгуулийг явуулбал МАН, АН-ын эрх мэдлийн хуваарилалт солигдоно гэдгийг Л.Оюун-Эрдэнэ тэнэг л биш бол тооцож суугаа. Өөрөөр хэлбэл, МАН-ын нэр хүнд ийм муу байгаа үед эгзэг нь таарвал АН ирэх сонгуульд ялах магадлал бийг ажиглагчид хэлдэг. Тиймээс Лу.Гантөмөр түүний энэхүү эмзэг цэгийг хатгаж, “БЗС-аар намайг харлуулах гэж байж танай намынхан хамт бүдрэв ээ” гэсэн сануулгыг ч давхар өгсөн гэх.

АН-д юу болж байна вэ. Лу.Гантөмөртэй холбоотой скандалд дөрөөлж түүнийг намын даргаас унагах ажиллагаа мэр сэр идэвхжиж эхэлжээ. АН-ын дарга болсных нь дараа тус намынхан “З.Энхболд, С.Эрдэнэ нар “АН фракцигүй нам боллоо” гэж мэдэгдээд намыг сонгуульд ялагдуулж, хүчийг нь сулруулсан. Тиймээс фракциудыг дахин сэргээж, клубуудын зарчмаар ажиллуулах нь зүйтэй” гэдэг дээр санал нэгдэж хэд хэдэн клуб байгуулсан. Тэдгээрээс С.Баярцогт тэргүүтэй “Од” клубынхан Лу.Гантөмөрийн эсрэг хөдөлж эхэлжээ. С.Баярцогтод Ц.Элбэгдоржийнхон буюу ТЕГ-ын дарга асан Б.Хурц, АН-ын генсек асан Ч.Өнөрбаяр нар хүч нэмжээ. Тэднээс гадна С.Эрдэнийг АН-ын дарга байхад дагаж гүйж байгаад тамгаа өгөхөд нь хоосон хоцорсон гэгддэг Х.Алтанхуяг, нийслэлийн АН-ын дэд дарга асан А.Цэрэнбат нар АН-ын гишүүд, дэмжигчдийн эрх ашгийг хамгаалах нийгэмлэг байгуулж мөн л Лу.Гантөмөрийг унагах ажиллагаанд нэгдсэн аж. Ц.Элбэгдоржийн талынхан С.Баярцогтынхон буюу “Од” клубыг дэмжиж буй шалтгаан нь хэрэв Лу-г огцруулж, С.Баярцогтыг АН-ын дарга болгож чадвал Ч.Өнөрбаярыг намын Ерөнхий нарийн бичгийн дарга дахин болгох... Гэхдээ энэ нь сонгууль дөхсөн үед тийм ч том шалтгаанд орохгүй. Тэднийг өөр том эрх ашиг нэгтгэсэн байж таарна. Харин Жэнко Х.Баттулга Лу.Гантөмөрт гэрчилгээгээ нэгэнт өгчихсөн учир түүний талд зогсож байгаа. С.Эрдэнэ АН-ын даргын тамгаа өгсөн ч Баянгол дүүргээ алдчихгүйн тулд Лу.Гантөмөрийг хүссэн ч, эс хүссэн ч дэмжиж байгаа. Х.Тэмүүжин Лу.Гантөмөртэй адил дүүдээ БЗС-аас зээл авсан гэх асуудалд хутгалдсан учир тарж одсон “Нэг ардчилал” фракцийнхаа суурин дээр түүнтэй хамт байна. УИХ-ын гишүүн Д.Ганбат, УИХ-ын гишүүн асан Г.Баярсайхан тэргүүтэй “Хийморь” клубынхан Лу.Гантөмөрийг дэмжсэн хэвээр байгаа аж. АН-д ийнхүү байдал эвгүйтэх тал руугаа оржээ. Тулаан ширүүсвэл Лу.Гантөмөр тэсэж үлдэх болов уу, яах бол...?!

Эх сурвалж: С.Бат

http://www.analiz.mn/postview/58077

Лу.Гантөмөр Л.Оюун-Эрдэнэд хуурай агсам тавьж, С.Баярцогт, Б.Хурц нар түүний эсрэг нэгджээ
Tweet
Bolod.mn

Сэтгэгдэл (5)

Уншигчдын оруулсан сэтгэгдлийн талаар манай сайт хариуцлага хvлээхгvй болохыг анхаарна уу.
Үгийн санд шүүлтүүр хийсэн болно

Зочин
Битгий горьд. Юуны чинь АН ялах. Бид чинь МАН, АН хоёроос з********хаж бөөн луйвар бульхайг нь харсаар байж ********үү? Ийм зүйл байхгүй шүү. Дахин хэлэхэд битгий горьд. Бадарчин баярлах болоогүй шүү.

2023-05-26 | 10:09:28 | 203.98.76.9 |