Тэр бүүхэл талыг нь эх орондоо оруулаад ирсэн гээд бужигнаж байна. “Эрдэнэс тавантолгойн” компанийн хуучин удирдлагын багийнхан үнэхээр жаалжээ. Монголоос БНСУ руу “угаасан” зургаан сая ам.долларын хэрэгт “Эрдэнэс тавантолгой” компанийн гүйцэтгэх захирал асан, нүүрсний хулгайчдын “загалмайлсан эцэг” гэгдэх нь холгүй байгаа Б.Ганхуяг, тус компанийн Дотоод хяналт, эрсдэлийн удирдлагын газрын захирал асан Х.Нурлат тэргүүтэй хүмүүсийн нэр яригдаж байна гэнэ.

Н.ТЭМҮҮЛЭН: Нүүрсний гэх хэрэгт холбогдсон албан тушаалтнууд АНУ руу 5.3 сая ам.доллар, БНСУ руу зургаан сая ам.доллар руу шилжүүлсэн нь тогтоогдсон

Тодруулбал, АТГ-ын Хэвлэл мэдээлэл, олон нийттэй харилцах ажилтан, комиссар Н.Тэмүүлэнгийн хэвлэлд өгсөн мэдээллээр “Нүүрсний хулгайн хэргийн хохирлын тогтоох чиглэл дээр бид анхаарч ажиллаж байна. Нүүрсний гэх хэргийн мөрдөх шалгах ажиллагааны явцад 13.8 тэрбум төгрөгийг албан тушаалтнууд хахууль хэлбэрээр авсан байж болзошгүй нь тогтоогдож байгаа. Мөн энэ хэргийн улмаас учирсан хохирлын мөнгө нь гадаад улс руу шилжүүлэгдсэн болохыг тогтоосон. Тухайлбал, 5.3 сая ам.долларыг АНУ руу, БНСУ руу зургаа орчим сая ам.долларыг шилжүүлсэн байна. Гадаад руу шилжүүлэгдсэн хоёр орчим сая ам.доллар нь Монгол Улс руу эргэн орж ирсэн. Харин үлдсэн мөнгө нь хаана байгаа нь тогтоогдохгүй байгаа. Гэхдээ энэ мөнгийг байгаа газрыг илрүүлэхээр БНСУ-ын Ерөнхий Прокурорын газартай АТГ хамтран ажиллаж байгаа” гэсэн юм.

Харин Хууль зүй, дотоод хэргийн сайд Х.Нямбаатар сэтгүүлчдэд мэдээлэл өгөх үеэрээ гадаад руу шилжүүлэгдсэн их хэмжээний гүйлгээний талаар цухас дурдаад амжлаа. Тэрбээр “Хоёр улсын хууль сахиулах байгууллагын төлөөлөл уулзаж байна. БНСУ руу шилжүүлсэн гэх зургаан сая орчим ам.долларын хэрэг жичтэй яригдана. Одоогоор тодорхой тооны хүнийг шилжүүлж авах ажиллагаа яригдаж байна. БНХАУ-ын Нийгмийг аюулаас хамгаалах яамны төлөөлөлтэй мөн уржигдар уулзалт хийсэн. Энэ чиглэлийн ажлууд бий" гэлээ.

БНСУ РУУ ШИЛЖҮҮЛСЭН ЗУРГААН САЯ АМ.ДОЛЛАРЫН “ЭЗЭН” НЬ Б.ГАНХУЯГ, Х.НУРЛАТ ГЭВ

Хуулийн байгууллагын мөрдөгчид нүүрсний хулгайн мөнгө хил дамнаж шилжүүлэгдсэнийг илрүүлж, Хууль зүй, дотоод хэргийн сайд нь хилийн цаана байгаа мөнгийг олохын төлөө ажиллаж байгаа дуулгалаа. Ноцтой нь БНСУ руу “угаагдаж” шилжигдсэн гэх зургаан сая ам.долларыг “Эрдэнэс тавантолгой” компанийн гүйцэтгэх захирал асан, Б.Ганхуяг, тус компанийн Дотоод хяналт, эрсдэлийн удирдлагын газрын захирал асан Х.Нурлат нарын хүмүүс гаргасан байж болзошгүй талаар эх сурвалж мэдээлж байна.

Эх сурвалжийн бидэнд өгсөн мэдээллээр “Б.Ганхуягийн багийнхан нүүрсний хулгайн хахуулийн мөнгөө хадгалж байх газраа жинхэнэ олж ядсан бололтой. Монголд хаус хороолол болгоод зогсохгүй гадаад руу гаргаад явуулчихжээ. Монгол Улсын хэдэн жилийн төсвийг халааслаад, оффшор бүс рүү гаргачихсан гэсэн үг. Мөрдөгчдийн БНСУ-аас олсон зургаан сая ам.долларын эзэн нь Б.Ганхуяг, Х.Нурлат нар гэнэ лээ. Тэднээс гадна төрийн өмчит компанийн удирдлагууд ч оролцсон юм байна лээ. Хууль хяналтын байгууллагын мөрдөгчид гярхай сайн ажиллаж, гадаад руу гаргасан мөнгийг тогтоож, олох арга хэмжээг авч байна. Барилга байшин болсныг олж тогтоогоод гаднын улсын хуулийн байгууллагатай хамтарч ажиллаж байгаа гэнэ лээ. Б.Ганхуяг, Х.Нурлат нарын хүмүүс “Эрдэнэс тавантолгой” компанийг цөлмөхийг дээд зэргээр үзүүлжээ. Хэлэх ч ү олдохгүй юм. АНУ руу гарсан 5.3 сая ам.доллар ч тэдэнтэй холбоотой байгаа байх. Нэг л технологиор гарсан байж таараа” гэлээ.

Ямартай ч Монголоос хил дамнан шилжүүлэгдсэн нүүрсний хулгайн хахуулийн мөнгө БНСУ, АНУ руу гарсан нь тодорхой болж, талыг нь эх орондоо авчирч, эх үүсвэрийг нь тогтоох ажил явагдаж байна. Мөн мөрдөгчдийн илрүүлснээр зургаан сая ам.долларыг “Эрдэнэс тавантолгой” компанийн Дотоод хяналт, эрсдэлийн удирдлагын газрын захирал асан Х.Нурлат дамжуулан гаргасан байж болзошгүй сэжүүр олджээ. Цаашлаа, АНУ руу шилжүүлсэн 5.3 сая ам.доллар ч мөн Б.Ганхуягийн багийнхантай холбогдож болзошгүй байгаа ажээ.

Б.ГАНХУЯГ, Х.НУРЛАТ ТЭРГҮҮТЭЙ ХҮМҮҮС “ТАВАНТОЛГОЙ ТҮЛШ” ХХК-ИЙН АШИГ БОЛОХ ЗУРГААН САЯ АМ.ДОЛЛАРЫГ БНСУ РУУ ГАРГАСАН УУ

Тэгвэл Б.Ганхуяг, Х.Нурлат нарын БНСУ руу шилжүүлсэн байж болзошгүй зургаан сая ам.доллар нь “Тавантолгой түлш” ХХК-аас гарсан гэх ноцтой мэдээлэл байна. Өөрөөр хэлбэл, Б.Ганхуяг төрийн өмчит “Тавантолгой түлш” ХХК-аас нүүрсний мөнгийг гаргуулж, “Эрдэнэс тавантолгой” компаниар дамжуулж мөнгө угаасан байж болзошгүй сэжүүрийн үзүүрээс мөрдөгчид атгаад авчээ.

“Эрдэнэс тавантолгой” ХК-ийн Дотоод хяналт, эрсдэлийн удирдлагын газрын захирал асан Х.Нурлат Б.Ганхуягийн хамаг хорыг хамт хутгалцдаг нэгэн. Өөрөөр хэлбэл, тэд “Эрдэнэс тавантолгой” ХК-ийг нүүрсний биш авлигын уурхай болгосон гол хамтрагчид аж. Тэд авч болох бүхнээс авлига авч, төрийн өмчит компаниар дамжуулж, хахуулийн мөнгөө угаасан байж болзошгүй байгаа юм.

Харин Б.Ганхуяг, Х.Нурлат нартай дөрөө харшуулж, халаасан нэгтгэсэн газар нь төрийг цөлмөсөн төрийн өмчит “Тавантолгой түлш” компани бололтой. Нүүрсний тээвэрлэлтийн бизнес эрхэлж, хамтран ашиг олдог байсан гэх. Монгол Улсын Засгийн газрын 2018 оны дөрөвдүгээр сарын 25-ны өдрийн 18 дугаар тэмдэглэлийн “Сайжруулсан шахмал түлшний үйлдвэр байгуулах тухай” хуралдааны шийдвэрийг үндэслэн сайжруулсан шахмал түлш үйлдвэрлэх чиг үүрэг бүхий “Таван толгой түлш” ХХК үүсэн байгуулагдаж байлаа. Тус компани нь түүхий эд болох угаасан нүүрсээ “Энержи Ресурс”-ээс үнэ төлбөргүйгээр татан авдаг. Өөрөөр хэлбэл, “Тавантолгой түлш” компани үнэ төлбөргүй авсан нүүрсээ барьцалдуулагчтай хольж сайжруулсан түлш болгон үйлдвэрлэж, нийслэлчүүдэд зардаг гэсэн үг. Хоржоонтой нь, түүхий эдээ үнэгүй авдаг, үнэгүй авсан угаасан нүүрсээ боловсруулаад, өрсөлдөөнгүйгээр зах зээлд нийлүүлж, нийслэлчүүдэд зардаг “Тавантолгой түлш” ХХК таван жил алдагдалтай ажиллаж байна. Нэг ч төгрөгийн ашиггүй, байнгын алдагдалд орсон гэх нэрийдлээр төрийг “сааж” байгаа уг компанийн алдагдалтай ажиллаад байсан шалтгаан “Эрдэнэс тавантолгой” ХК-ийн гүйцэтгэх захирал асан Б.Ганхуяг, Х.Нурлат нартай холбоотой байж болзошгүй гэх. Төрийн өмчит хязгаарлагдмал хувьцаатай компанийн хөрөнгийг тэд гадаад руу гаргачихсан байж болзошгүй ноцтой баримт хуулийнханд байгаа гэх.

“ТАВАНТОЛГОЙ ТҮЛШ” ХХК-ИЙН НЭР БҮХИЙ УДИРДЛАГУУДЫГ ХУУЛИЙН БАЙГУУЛЛАГААС ШАЛГАЖ, САНХҮҮГИЙН ШАЛГАЛТ ОРУУЛНА

“Тавантолгой түлш” ХХК-ийн мөнгийг Б.Ганхуяг, Х.Нурлат нар дур мэдэж гадаад руу гаргаагүй нь тодорхой. Тэдний гар, хөл “Тавантолгой түлш” компанид үүрлэж байсан гэсэн үг. Хууль хяналтын байгууллагынхан Б.Ганхуягтай хамтарч, төрийн өмчит хязгаарлагдмал хувьцаатай компанийг “цөлмөсөн” байж болзошгүй тухайн үеийн удирдлагын баг болон нэр бүхий албан тушаалтнуудыг шалгаж эхэлсэн гэнэ.

Нүүрсний хулгайн жимээр орж, “Тавантолгой түлш” ХХК-ийн 2018-2022 он хүртэлх санхүүгийн тайланд аудитын шалгалт оруулж эхэлсэн талаар эх сурвалж мэдээллээ. Эх сурвалжийн бидэнд өгсөн мэдээллээр “Тавантолгой түлш” ХХК-ийн удирдлагын багийнхан сандралдаж эхэлсэн гэнэ. Тус компанид эрх бүхий алба хашиж байсан хүмүүсийг толгой дараалан дуудаж, мэдүүлэг авах ажиллагаа эхэлсэн юм шиг байна лээ. Нэг нэг рүүгээ чихээд хөгөө чирч байгаа сурагтай. Хэний тушаалаар, хэн гарын үсэг зурсан, хахуулийн мөнгөнөөс хэн ашиг хүртсэн гээд нэгдсэн шалгалт болох нь. Хөгжлийн банкны зээлдэгчийн хэргээс ч хөгтэй “юм” болох нь. “Чиний шахалтаар гарын үсэг зурсан. Хуурамчаар санхүүгийн бичиг үйлдсэн. Ашигтай ажилласныг зохион байгуулалттайгаар алдагдалтай болгосон” гээд л том асуудлууд эхэлж байгаа” гэлээ.

Тодруулбал, 2018-2022 оны хугацаанд ажиллаж байсан “Тавантолгой түлш” ХХК-ийн Захиргаа, удирдлагын хэлтсийн дарга Р.Гансүх, ТУЗ-ийн дарга Ж.Батбаясгалан, Ерөнхий нягтлан бодогч С.Билэгдэмбэрэл нарын хүмүүсийг шалгаж болзошгүй байна.

“Тавантолгой түлш” ХХК нь Б.Ганхуягийн толгойлж байсан “Эрдэнэс тавантолгой” компанид энэ мэтээр их хэмжээний дүнтэй гүйлгээ хийж байсан нь санхүүгийн аудитын тайлангаар ил болж байжээ.

НҮҮРСНИЙ ХУЛГАЙН МӨНГӨӨ КАЗАХСТАНД ОРОН СУУЦНЫ ХОРООЛОЛ БОЛГОСОН Х.НУРЛАТЫН ӨӨР НУУСАН ХӨРӨНГИЙГ ГАДААДААС ОЛЖЭЭ

Үүнээс гадна Б.Ганхуягийн хамтрагч Х.Нурлатын нуусан хөрөнгийг хууль хяналтын байгууллагынхан тогтоож байгаа. Тодруулбал, хулгайн нүүрсний мөнгөөрөө Казахстанд орон сууцны хороолол барьсан гэх “Эрдэнэс таван толгой” ХК-ийн Дотоод хяналт, эрсдэлийн удирдлагын газрын дарга асан Х.Нурлатын нуусан өөр хөрөнгийг олсон талаар албаны хүмүүс тайлбарлажээ. Өөрөөр хэлбэл, Х.Нурлат Казахстанд орон сууцны хорооллоос гадна өөр хөрөнгөө нуусан байсан гэсэн үг.

Харин Х.Нурлатын гол хамтрагч нь Улаанбаатар хот дахь Гаалийн газрын улсын байцаагч З.Сырымбек гэх мэдээлэл бий. Тэрбээр эрх мэдэл, албан тушаалын байдлаа урвуулан ашиглаж, Х.Нурлаттай хамтарч нүүрсний мөнгөөр Казахстанд хаус хороолол барьсан байж болзошгүй нөхцөл байдал илрээд он дамжих нь. Компанийн газрын дарга, гаалийн улсын байцаагч яаж нүүрсний хулгайч болж, гаднын улсад өндөр зэрэглэлийн хаус, орон сууцны хороолол барьсан бэ гэх асуулт эндээс урган гарч ирнэ. Х.Нурлат нь 2016 оноос “Эрдэнэс таван толгой” ХК-ийн Дотоод хяналт, эрсдэлийн удирдлагын газрын даргаар ажиллаж эхэлсэн байдаг. Харин гаалийн улсын байцаагч З.Сырымбек нь Буянт-Ухаа гаалийн газрын даргаар ажиллаж байгаад 2018 оноос одоогийн албан тушаалдаа томилогдсон байдаг юм билээ. Тэднийг холбож байгаа хамаарал нь “Онлайнложистикс" компани. Мөн нэг нутаг буюу Баян-Өлгий аймгийн Өлгий хот.

“Онлайнложистикс" компанийг Х.Нурлат 2008 онд үүсгэн байгуулж, З.Сырымбек хувьцаа эзэмшиж ирсэн. 2021 оны аравдугаар сарын 11-нийг хүртэл тус компанийн захирлаар Х.Нурлат ажиллаж байгаад гүйцэтгэх захирлаар Б.Эрдэнээ гэх хүнийг томилж, өөрийнхөө компаниас нэрээ хасуулжээ. Одоо тус компанийг Зухай Сырымбек, Батбаяр Эрдэнээ, Батбаяр Чөдөр-Эрдэнэ нар хариуцаж, хувьцаа эзэмшдэг. Өөрөөр хэлбэл, гадаад худалдааны чиглэлээр үйл ажиллагаа явуулдаг “Онлайнложистикс" компанийн бүртгэл, бичиг баримтаас харахад Х.Нурлат тус компанид хамааралгүй юм шиг хэрнээ “нууц ноён” нь гэсэн үг. Үүнийг батлах ганцхан жишээ нь, “Онлайнложистикс" компани нь Х.Нурлатын гэрийн хаяг болон бусад НҮТББ-ын хаяг дээр бүртгэлтэй байдаг аж. Х.Нурлат, З.Сырымбек нар тус компаниараа мөнгө угааж, хулгайн нүүрсний мөнгийг Казахстан руу гаргасан байж болзошгүй байгаа юм. Үүгээр ч зогсохгүй эрх мэдэл, албан тушаалын байдлаа урвуулан ашигласан хулгайн нүүрсний мөнгөөрөө өндөр зэрэглэлийн орон сууцны хороолол барьсан. Ингээд зогсохгүй барилгын ажил дуусаж, орон сууцны хороолол ашиглалтад орсон гэх мэдээлэл бий.

Монголын баялаг улстөрчдийн гараар дамжиж, Б.Ганхуяг гэх хүний халаасаар шургаад хил давчихжээ. Б.Ганхуяг болон түүний багийнхан ороогдох, ойчих хэрэг мөн ч олон байна. Өшөө ч түүний зүйл анги нэмэгдээд, С.Зоригийн хэргийг хавтаст хэргийг давах нь ээ.

https://ergelt.mn/news/22/single/33160

Монголоос Солонгос руу "угаасан" зургаан сая ам.долларыг Б.Ганхуяг, Х.Нурлат нар "Тавантолгой түлш" ХХК-аас гаргуулсан гэв үү
Tweet
Bolod.mn