BOLOD.MN сайт долоо хоног бүрийн ням гарагт улс төр, эдийн засгийн хүрээнд болж өрнөсөн онцлох үйл явдлуудыг тоймлон хүргэдэг уламжлалтай. Эдгээр өдрүүдэд 18 дахь өдрөө үргэлжилж байсан иргэдийн эсэргүүцлийн жагсаалыг хүчээр тарааж, төв талбайд барьсан байсан 2 монгол гэрийг буулгажээ. Мөн түүнчлэн Хаанбанкны ажилтан хуурамч гүйлгээгээр их хэмжээний мөнгө залилан зугцаасан байж болзошгүй хэргийг ЦЕГ-аас шалгаж, хяналт шалгалт үргэлжилж байна. Эдгээр болон бусад онцлох үйл явдлуудыг тоймлон хүргэж байна.

Хөдөлмөрийн баатар Э.Содномпилжээ дэлхийн цомоос мөнгөн медаль хүртлээ

АНЭУ-ын Дубай хотод пара пауэрлифтингийн дэлхийн цомын тэмцээн болж байна. Манай улсаас Үндэсний шигшээ багийн тамирчин, паралимпын алт, хүрэл, ДАШТ-ий хошой аварга, Хөдөлмөрийн баатар, гавьяат тамирчин Э.Содномпилжээ өрсөлдлөө. Тэрээр тэмцээний 107 кг-ын жинд цээжнээс 250 кг-ыг шахсанаар мөнгөн медаль хүртлээ. Түүний оролцсон жинд Иран улсын тамирчин алтан медаль хүртсэн бол Йордан улсын тамирчин хүрэл медаль хүртэв.

Налайх дүүрэгт гурван ихэр хүүхэд мэндэлжээ

Налайх Эрүүл мэндийн төвийн Төрөх, эмэгтэйчүүдийн тасгийн хамт олон 2022 оны арванхоёрдугаар сарын 4-ний өдөр анх удаа гурван ихэр хүүхдийг эсэн мэнд амаржуулжээ.

Төрөх үйл явцын багт Эмчилгээ эрхэлсэн орлогч дарга Д.Оюунмаа, эх барихын эмч А.Энхчимэг, Г.Баасанжаргал, мэдээгүйжүүлгийн эмч Б.Ууганбаатар, Д.Мөнхжаргал, хүүхдийн эмч Б.Арьяа, эх баригч Д.Бахытгүл, мэс заслын сувилагч Б. Гэрэл, мэдээгүйжүүлгийн сувилагч С.Бижанаар, М.Айжан, нярайн сувилагч Д.Бадамцэцэг нар ажиллаж, яаралтай кесаров мэс заслаар эх, хүүхдүүдийг эсэн мэнд төрүүлсэн байна.

Гурван ихэр нь ээжийнхээ зургаа дахь төрөлтийн хүүхдүүд бөгөөд 35-36 долоо хоногтойдоо 1,700 грамм, 1,800 грамм, 1,900 грамм жинтэй тус тус мэндэлсэн байна. Нярайн их эмч Д.Отгонхишиг болон тасгийн хамт олон гурван ихэр охиныг 15 хоногийн хугацаанд хяналтдаа байлган эх, хүүхдийн биеийг тогтворжуулан тэнхрүүлж, өчигдөр гэрт нь гаргалаа хэмээн Эрүүл мэндийн яамнаас мэдээлэв.

104 тэрбумын хохиролтой Капиталын захирлуудын хэргийг шүүхэд шилжүүлэхээр болжээ

Нийслэлийн Прокурорын газраас Капитал банкны удирдах албан тушаалтнуудад холбогдох эрүүгийн хэрэгт яллах дүгнэлт үйлдэн шүүхэд шилжүүлжээ. Тодруулбал, Капитал Банкны гүйцэтгэх захирал А, гүйцэтгэх захирлын орлогч Я, дэд бөгөөд Зээлийн газрын захирал Д нар нь Монголбанкнаас тогтоосон банкны өөрийн хөрөнгийн хүрэлцээ, төлбөр түргэн гүйцэтгэх чадвар, зээлийн төвлөрлийн зохистой харьцааны шалгуур үзүүлэлтийг хангаж ажиллаагүйн улмаас тус банкны хэвийн үйл ажиллагаа алдагдан банкийг төлбөрийн чадваргүй болгож, тус банкандмөнгөн хөрөнгө байршуулсан иргэн, аж ахуйн нэгж, байгууллагад их хэмжээний хохирол учруулсан гэх хэрэгт Эрүүгийн хуулийн 18.13 дугаар зүйлийн 2-т зааснаар буюу 1-5 жил хорих ялаар шийтгэх дүгнэлт үйл дэн Чингэлтэй дүүргийн эрүүгийн хэргийн анхан шатны шүүхэд шилжүүлсэн байна. Дээрх хэргийн улмаас иргэн болон аж ахуйн нэгж, байгууллагад нийт 104тэрбум 651 сая(104,651,000,000) төгрөгийн хохирол учирснаас мөрдөн шалгах ажиллагааны явцад 94 тэрбум 889 сая(94,889,000,000) төгрөг нөхөн төлөгджээ.

Хуурамч гүйлгээгээр 360 сая төгрөг завшсан байж болзошгүй хэргийг шалгаж байна

Цагдаагийн байгууллагад энэ сарын сарын 19-ний өдрийн 18:00 цагт Сүхбаатар дүүргийн 8 дугаар хорооны нутаг дэвсгэрт байрлах банкнаас мөнгө алдагдсан тухай гомдол бүртгэгджээ. Тодруулбал, нэр бүхий банкны ажилтан хуурамч гүйлгээгээр их хэмжээний мөнгө завшсан байж болзошгүй хэрэг гарсан байна.

Дуудлагын дагуу тус дүүргийн цагдаагийн газрын нэгдүгээр хэлтсээс шалгахад тус банканд ажилтай 27 эрэгтэй З энэ оны аравдугаар сарын 28-наас арванхоёрдугаар сарын 6-ны хооронд хуурамч гүйлгээгээр нийт 360 сая төгрөгийг завшсан байж болзошгүй хэрэгт мөрдөн шалгах ажиллагаа явуулж байна.

Жагсагсдын эрүүл мэндийн байдлыг харгалзан хоёр гэрийг буулгажээ

Нийслэлийн Засаг даргын орлогч З.Төмөртөмөө өчигдөр /2022.12.20/ жагсаж буй иргэдтэй уулзсан. Тэрбээр “Жагсагчдын удаа дараа тавьсан шаардлагын дагуу төр засгийн зүгээс гэр барьж, телевиз, интернетийн орчин зэрэг шаардсан зүйлийг бүрдүүлэн ажилласан. Цаашид суулт зарласан иргэдийн эрүүл мэнд амь насанд эрсдэл үүсэж болзошгүй байна. Иймд өмнө нь тавьсан шаардлага, хүсэлтийн дагуу Соёлын төв өргөөнд байрлах боломж нөхцөлийг бүрдүүлсэн тул та бүхэн харилцан ойлголцож тухайн байранд орж байрлах хэрэгтэй” гэжээ.

Жагсаал 18 дахь өдрөө үргэлжилж байна. Өнгөрсөн хугацаанд нийт 600 гаруй хүнд эмч нар үзлэг хийж 29 хүн эмнэлэгт хүргэгдсэн. Цаашид жагсагчдын эрүүл мэндийн байдалд эрсдэл учирч болзошгүй тул эрүүл мэндийн тусламж үйлчилгээг авах шаардлагатайг илэрхийлж, НЗДТГ-аас барьсан хоёр гэрийг цагдаагийн байгууллагаас буулгажээ.

Харин Жагсагчдын зүгээс Соёлын төв өргөөнд байрлах асуудал дээр нэгдсэн ойлголт, байр сууринд хүрээгүй талцсан байдалтай байна" гэж ЦЕГ-аас мэдээллээ.

Автобус шатаж байсныг унтрааж аюулгүй болголоо

Баянгол дүүргийн 20 дугаар хорооны нутаг дэвсгэрт Саппорогийн автобусны буудлын урд автобус шатаж байна гэсэн дуудлага иржээ. Улмаар Сонгинохайрхан дүүргийн Онцгой байдлын хэлтсийн ГТУА-26 дугаар ангийн салааны захирагч ахлах дэслэгч М.Болор-Эрдэнээр ахлуулсан найман алба хаагч, хоёр автомашинтай очиход 86-16 УБТ улсын дугаартай Хуандэй 99 орон нутагт явдаг 45 хүний суудалтай автобус шатаж байсныг унтраасан байна.

Галын аюулгүй байдлыг хангаж ажиллахыг иргэд, аж ахуйн нэгж байгууллагад анхааруулж байна гэж нийслэлийн Онцгой байдлын газраас мэдээллээ.

BOLOD ДОЛОО ХОНОГИЙН ТОЙМ: Иргэдийн жагсаалыг тарааж, капиталын захирлуудын хэргийг шүүхэд шилжүүлнэ
Tweet
Bolod.mn