2022-10-15Bolod.mn сайт долоо хоног бүрийн ням гарагт улс төр, эдийн засаг, нийгмийн хүрээнд болж өрнөсөн онцлох үйл явдлуудыг тоймлон хүргэдэг уламжлалтай. Эдгээр өдрүүдэд Монголын үүх түүхийг толилуулах Их хаадын Чингис хаан музей нээлтээ хийлээ. Түүнчлэн шүүгч Б.Баасанцогт, УИХ-ын гишүүн Ж.Батзандан, түүний төрсөн ах болох ХХААХҮ-ын дэд сайд Ж.Бат-Эрдэнийг нэг сарын хугацаатай цагдан хорих таслан сэргийлэх арга хэмжээ авсан. Эдгээр болон бусад холбогдох мэдээ мэдээллийг BOLOD.MN сайт тоймлон хүргэж байна.
"Чингис хаан музей" нээлтээ хийлээ
"Чингис хаан" музей 10-р сарын 11-ны өдөр нээлтээ хийлээ. Энэ үеэр Ерөнхийлөгчийн зарлигаар Төрийн есөн хөлт цагаан тугийг Төрийн ордноос гарган, музейд залсан юм. Нээлтэд төрийн тэргүүн болон төр нийгмийн зүтгэлтнүүд, урлаг соёлын алдартнууд оролцсон юм. "Чингис хаан" хаад, язгууртны музей аравдугаар сарын 12-ноос иргэдэд нээлттэй ба музейг үзэхэд нэг хүн 8-9 цагийг зарцуулах аж. Тасалбарын хувьд нэг хүн 30,000 төгрөг бол оюутан залуус 25,000, гэр бүл 20,000 төгрөгөөр үзэх боломжтой аж. Мөн түүнчлэн хуулийн дагуу 0-16 насны хүүхэд, хөгжлийн бэрхшээлтэй иргэн, ахмад настнууд үнэ төлбөргүй үзэх боломжтой юм.
Чингис хаан нээлтийн үеэр "Ази тивдээ эхний 10-т багтах хэмжээтэй, нүүдлийн соёл иргэншлийн цогц түүхийг харуулж чадах музей хэмээх шинжлэх ухааны ордонтой болж байна" хэмээн тус музейн захиран С.Чулуун онцолж байлаа.
ХХААХҮ-ийн дэд сайд Ж.Бат-Эрдэнийг 30 хоног цагдан хорих шийдвэр гарчээ
Зам тээврийн хөгжлийн дэд сайд асан, ХХААХҮ-ийн дэд сайд Ж.Бат-Эрдэнийг өнгөрсөн долоо хоногийн лхагва гарагт Авлигатай Тэмцэх Газар/АТГ/-аас 48 цагийн хугацаатай саатуулсан талаар өмнө нь мэдээлсэн.
Түүнийг Зам, тээвэр хөгжлийн яаманд ажиллаж байхдаа албан тушаалаа урвуулан ашиглаж, Улаанбаатар-Дархан чиглэлийн авто замын ажилд бусдад давуу байдал олгосон, үндэслэлгүйгээр хөрөнгөжсөн байж болзошгүй хэмээн шалган 48 цаг саатуулаад сулласан бөгөөд тухайн хэрэгтэй холбогдуулан шүүхээс 30 хоног цагдан хорих шийдвэр гаргажээ.
Тодруулбал, аравдугаар сарын 11-ний өдөр Чингэлтэй дүүргийн Эрүүгийн хэргийн анхан шатны шүүхээс Ж.Бат-Эрдэнийг нэг сарын хугацаатай үргэлжлүүлэн цагдан хорих шийдвэр гаргасан байна.
Прокурорын байгууллагаас өнгөрсөн долоо хоногт Ж.Бат-Эрдэнийг үргэлжлүүлэн нэг сарын хугацаатай цагдан хорих саналыг шүүхэд хүргүүлсэн байсан ч тэрбээр шүүгчээс татгалзсанаар шүүх хурал хойшилсон бол ийнхүү 10-р сарын 10-нд болсон байна.
УИХ-ын гишүүн асан Ж.Батзанданг нэг сарын хугацаатай цагдан хорихоор болжээ
УИХ-ын гишүүн асан Ж.Батзанданг өнгөрсөн Пүрэв гарагт буюу аравдугаар сарын 6-ны өдөр Авлигатай Тэмцэх газраас баривчилсан талаар өмнө нь мэдээлсэн. Түүнийг Хөгжлийн Банктай холбоотой зээл тойрсон асуудлаар шалгаж, баривчилсан бөгөөд уг хэрэгтэй холбогдуулан шүүхээс 30 хоног цагдан хорих шийдвэр гаргажээ. Тодруулбал, аравдугаар сарын 7-ны өдөр Чингэлтэй дүүргийн Эрүүгийн хэргийн анхан шатны шүүхээс Ж.Батзанданг нэг сарын хугацаатай үргэлжлүүлэн цагдан хорих шийдвэр гаргасан байна.
Б.Баасанцогтод 4.4 жил хорих ял оноож, бусад шүүгчдийг торголоо
Нийслэлийн прокурорын газраас яллах дүгнэлт үйлдсэн Б.Баасанцогт нарын нэр бүхий гурван шүүгдэгч, нэг хуулийн этгээдэд холбогдох эрүүгийн хэргийг Хан-Уул дүүргийн Эрүүгийн хэргийн анхан шатны шүүх өнгөрсөн наймдугаар сард хянан хэлэлцэхээр товлосон. Гэвч шүүгдэгч Б.Мөнхбаяр Covid-19 өвчний учир эмчлүүлж байгаа талаар, түүний өмгөөлөгч Ц.Баярмаа нэгдүгээр хавьтал болж хяналтад байгаа зэрэг эмнэлгийн баримт ирүүлснийг шүүх хүлээн авч мөн бусад өмгөөлөгч нараас гаргасан хүсэлт зэргийг харгалзан шүүх хуралдааныг жич товлохоор хойшлуулсан юм.
Тус хурал энэ сард болж шүүхээс өмгөөлөгч Б.Баасанцогтод 4.4 жилийн хорих ял оноож, авлигал авсан шүүгч нарыг 7.5 сая төгрөгөөр торголоо. Тодруулбал, Хан-Уул дүүргийн Эрүүгийн хэргийн анхан шатны шүүх энэ сарын 11-нээс эхлэн өмгөөлөгч Б.Баасанцогт болон шүүгч асан Б.Мөнхбаяр, Д.Энхцэцэг, Барилга, үл хөдлөх хөрөнгийн бизнес хариуцсан захирал И.Галбуян, “Улаанбаатар импэкс” ХХК-д холбогдох хэргийг хаалттай хэлэлцэж энэ сарын 13-ны өдөр дараах шийдвэр гаргасан байна. Шүүхээс шүүгдэгч Б.Баасанцогтыг хахууль өгсөн үндэслэлээр 4.4 жил, шүүгч Б.Мөнхбаяр, Д.Энхцэцэг нарыг хахууль авсан, албан тушаалаа урвуулсан гэмт хэрэг үйлдсэн гэм буруутайд тооцож 7.5 сая төгрөгөөр торгох ял оногдуулж “Улаанбаатар импэкс” компани түүний төлөөлөгч И.Галбуянг цагаатгажээ.
Эргэн сануулахад, Б.Баасанцогтыг 2022 оны дөрөвдүгээр сарын 4-ний өдрөөс нэг сарын хугацаанд цагдан хорих шийдвэр гаргасан. Улмаар анхан шатны шүүхээс түүнийг дахин нэг сар буюу зургадугаар сарын 7-ныг хүртэл саатуулах хугацааг сунгаж шийдвэрлэсэн. Түүний өмгөөлөгчид Б.Баасанцогтыг батлан даалтад гаргахын тулд дээд шатанд буюу Баянгол, Хан-Уул, Сонгинохайрхан дүүргийн эрүүгийн хэргийн анхан шатны шүүхийн ерөнхий шүүгчид гомдол гаргасныг хянан хэлэлцээд, өнгөрсөн тавдугаар сарын 13-ны өдөр батлан даалтад гаргасан юм.
Мөн Тагнуулын ерөнхий газраас Б.Баасанцогттой холбоотой мэдээлэл хийж, нэр бүхий улстөрчийн биед халдахаар завдаж байсан хэмээн мэдэгдэж байв.
“Өргөө амаржих” газрын захирлыг үүрэгт ажлаас нь чөлөөлжээ
"Өргөө" амаржих газрын захирал Ж.Энхцэцэгийг үүрэгт ажлаас нь чөлөөлөх шийдвэр гарчээ. МҮЭХ болон Эрүүл мэндийн салбарын ажилчдын үйлдвэрчний эвлэлийн холбооноос өнгөрсөн пүрэв гарат хамтарсан мэдээлэл хийсэн. Энэ үеэрээ "Өргөө" амаржих газар буюу Нэгдүгээр төрөх эмнэлгийн захирал Ж.Энхцэцэгийн ажлын байрны дарамт шахалтын талаар маш олон өргөдөл гомдол иржээ.
Түүнчлэн нийт 487 ажилтантай тус эмнэлгийн 138 ажилтныг Ж.Энхцэцэг захирал ажлаас нь халсан тухай мэдээлсэн. Улмаар ажилчдыг хохироож буй эмнэлгийн удирдлагад хариуцлага тооцож чадахгүй бол өөрөө огцрохыг Эрүүл мэндийн сайд С.Энхболдоос шаардаж байгаагаа мэдэгдсэн юм.
“Өргөө амаржих газар” төрөлжсөн мэргэшлийн эмнэлгийн удирдлага Ж.Энхцэцэг, эмч, эмнэлгийн ажилтнуудад ажлын байрны дарамт үзүүлж, олноор нь ажлаас чөлөөлж байгаа асуудлыг МҮЭ-ийн холбоо, Монголын эрүүл мэндийн ажилтны ҮЭ-ийн холбооноос хөндөж, “Өргөө” амаржих газраас 2021, 2022 оны байдлаар нийт 138 ажилтан халагдсан, ЭМЯ-ны Эмнэлгийн мэргэжилтний ёс зүйн хяналтын хорооноос Ж.Энхцэцэг захирлыг ёс зүйн дүрмийн зургаан заалт зөрчсөн гэх дүгнэлт гаргасан тухай хөндөж байсан юм.
Цэцэрлэгийн гуравдугаар ээлжийн бүртгэл эхэллээ
Нийслэлийн цэцэрлэгт хамрагдах хүүхдүүдийн гуравдугаар ээлжийн цахим бүртгэл 10-р сарын 10-нд эхэлсэн. Цэцэрлэгийн бүртгэл E-Mongolia системээр явагдаж байгаа бөгөөд түр оршин суугч иргэн хүсэлт илгээх боломжтой юм. 2022-2023 оны хичээлийн жилд цэцэрлэгийн бүртгэлийг анх удаа гурван үе шаттайгаар зохион байгуулж байгаа юм. Нэгдүгээр шатанд 12,217 хүүхэд бүртгүүлсэн бол хоёрдугаар шатанд нийт 11,038 хүүхэд бүртгүүлжээ.
Мөрийтэй тоглоом тоглох зөрчил гурав дахин өсжээ
Улсын хэмжээнд энэ оны есдүгээр сарын байдлаар 233 053 зөрчлийн хэрэг бүртгэгдсэн нь наймдугаар сартай харьцуулахад 0.01 хувиар өссөн байна. Нийт зөрчлийн хэргийн 74.2 хувь нь Нийслэлд, 25.7 хувь нь орон нутагт бүртгэгдсэн бол 99 хувийг Цагдаагийн байгууллага, 0.18 хувийг Мэргэжлийн хяналт, 0.01 хувийг Онцгой байдал, 0.79 хувийг бусад байгууллагын эрх бүхий албан тушаалтнууд шалгаж шийдвэрлэжээ. Дээрх хугацаанд 230 895 хүн, 293 хуулийн этгээд Зөрчлийн тухай хуульд зааснаар шийтгүүлсэн ба өмнөх сараас шийтгэл оногдуулсан хүн 0.7 хувиар буурч, хуулийн этгээд 13.6 хувиар өсжээ.
Зөрчил үйлдсэн хүмүүсийн 76 хувь нь эрэгтэй, 24 хувь нь эмэгтэй байгаа бол 64.4 хувь нь 26-45 насныхан байна. Өнгөрсөн есдүгээр сард үйлдэгдсэн зөрчлийг наймдугаар сартай харьцуулбал, Мөрийтэй тоглоом тоглох зөрчлийн хэргийн гаралт хамгийн их өссөн дүнтэй байна.
Тодруулбал, Мөрийтэй тоглоом тоглох зөрчил гурав дахин, Олон нийтийн газарт зүй бусаар биеэ авч явах зөрчил 29.4 хувиар, Гамшгаас хамгаалах тухай хууль зөрчих зөрчил 25 хувиар, Хүүхдийн эрхийг зөрчих зөрчил 17.5 хувиар, Нийтийн зориулалттай орон сууцны оршин суугчдын амгалан тайван байдлыг алдагдуулах зөрчил 7.6 хувиар, Танхайрах зөрчил 0.4 хувиар тус тус өсжээ.
Харин Хулгайлах зөрчил 21.4 хувиар, Архидан согтуурахтай тэмцэх тухай хууль зөрчих зөрчил 17.8 хувиар, Төрийн албан тушаалтны шийдвэрийг үл биелүүлэх, үйл ажиллагаанд нь саад учруулах зөрчил 16 хувиар, Замын хөдөлгөөний аюулгүй байдлын тухай хууль зөрчих зөрчил 2.1 хувиар, Гэр бүлийн хүчирхийлэлтэй тэмцэх тухай хууль зөрчих зөрчил 1.4, Хүний биед халдах зөрчил 0.3 хувиар тус тус буурсан байна гэж Улсын ерөнхий прокурорын газраас мэдээллээ.
Өсвөр насны хүүхэд төрсөн эцгээ хөнөөсөн хэрэг гарчээ
Баянзүрх дүүргийн Баруун Алтан-Өлгий гэх газарт энэ сарын 10-ны өдөр өсвөр настны эрэгтэй онц ноцтой хүн амины хэрэг үйлдсэн хэрэг гарчээ. Энэхүү хэргийн тухай мэдээлэл оройн 23.00 цагийн орчимд цагдаагийн байгууллагад ирсэн байна. Дуудлага мэдээллийн дагуу албаныхан хэргийн газарт очих үед , тус дүүргийн 22 дугаар хороонд оршин суух хаягтай 16 настай М гэгч нь төрсөн эцэгтэйгээ маргалдаж, хоолойн тус газарт нь найман удаа, хэвлийд нь нэг удаа хутгалж амь насыг нь хохироосон болох нь тогтоогдоод байгаа аж.
Хэрэг үйлдэх үедээ хэргийн холбогдогч нь архи согтууруулах ундааны зүйл хэрэглэсэн байсан гэх бөгөөд түүнийг саатуулан шалгаж эхэлжээ. Одоогоос хоёр жилийн өмнө Монгол Улсын нийт хүн амын дунд хийсэн судалгаагаар монголчуудын 34 хувь нь архи хэтрүүлэн хэрэглэдэг гэх үзүүлэлт гарч байсан бол өнөөдөр энэ тоо улам нэмэгдэж, Монгол Улс архидалтаараа дэлхийд 15-д жагсах болжээ. Баримтаас харахад манай улсын архинд донтох, архидах залуусын тоо жил ирэх тусам нэмэгдэж, архи хэтрүүлэн хэрэглэснээс үүдэлтэй гэмт хэргийн гаралт жил ирэх бүр өсөх хандлагатай байгаа талаар цагдаагийн байгууллагаас анхааруулж байна.
Байгаль нуурт газар хөдөлж, Улаанбаатарт чичирхийлэл мэдрэгдлээ
Газар хөдлөлтийн чичирхийлэл өчигдөр буюу 10-р сарын 14-ны өдөр хүчтэй мэдрэгдсэн талаар иргэд цахим хуудаснаа нийтэлсэн. Энэ талаар Одоон орон геофизикийн хүрээлэнгээс тодруулахад өглөөний 08:52 цаг Байгаль нуур орчимд 6.0 магнитудын хүчтэй газар хөдлөлт болсон. Үүний чичирхийлэл 10 минут гаруй хугацаанд 3.0 магнитудын чичирхийлэл Монголын нутаг дэвсгэрт мэдрэгдсэн. Тухайлбал, Улаанбаатар хот, Дархан, Сэлэнгэ зэрэгт мэдрэгдсэн байна гэсэн юм.
Чичирхийлэл хүчтэй мэдрэгдсэн хэсэг нь Улаанбаатар хот, тодруулбал 100 айл, Баянбүрд, Сүхбаатарын талбай хэсэг аж. Одоогоор ямар нэгэн хохирол учирсан талаар Онцгой байдлын газарт мэдээлэл ирээгүй байна. Энэ жил Монголын нутаг дэвсгэр дээр 6.5 магнитудын газар хөдлөлт сүүлийн үед хэд хэд ажиглагдсан аж. Энэ нь 7 магнитудын газар хөдлөх, томоохон эрсдэл үүсэх дохио болж магадгүйг мөн Одон орон, геофизикийн хүрээлэнгээс анхаарууллаа.
.jpg "Томруулж харах")
