Bolod.mn сайт долоо хоног бүрийн ням гарагт улс төр, нийгэм, эдийн засгийн хүрээнд болж өрнөсөн онцлох үйл явдлуудыг тоймлон хүргэдэг уламжлалтай. Эдгээр өдрүүдэд УИХ-ын намрын чуулган Их эзэн Чингис хааны эш хөрөгийн хамт нээлтээ хийлээ. Түүнчлэн Хөгжлийн банкны зээлдэгчдийн нөхөн төлбөр 766 тэрбум төгрөгт хүрсэн байна. Харин олны анхаарлын төвд УИХ-ын гишүүн асан Ж.Батзандангын төрсөн ах болон түүний талаарх мэдээлэл цахим хуудаснаа хөвөрч байна. Эдгээр болон бусад онцлох үйл явдлуудыг тоймлон хүргэе.

УИХ-ын намрын чуулган нээлтээ хийлээ

УИХ-ын намрын чуулган өнгөрсөн даваа нээлтээ хийлээ.Чуулганы хуралдааны эхэнд нэгэн арга хэмжээ болсон нь Их эзэн Чингис хааны эш хөргийг Их хуралдай танхимд залж, Монгол Улсын Ерөнхийлөгчийн зарлигийг уншиж танилцуулсан явдал байв. Монгол Улсын Ерөнхийлөгч У.Хүрэлсүх өнгөрсөн баяр наадмаар Эзэн богд Чингис хааны эш хөргийг хүндэтгэн залах тухай зарлиг гаргсан. Чуулганы нээлтэнд Монгол Улсын Ерөнхийлөгч У.Хүрэлсүх, Ерөнхий сайд Л.Оюун-Эрдэнэ нар оролцсон юм. Ийнхүү чуулганы нээлтийг үргэлжлүүлэн УИХ-ын намын бүлгүүд хуралдсан юм. 

Хөгжлийн банканд 766.5 тэрбум төгрөгийн эргэн төлөлт төлөгджээ 

Засгийн газрын аравдугаар сарын 5-ны өдрийн хуралдаанаар хэд хэдэн онцлох үйл явдлын асуудлуудыг хэлэлцлээ. Энэ үеэр Монгол Улсын Хөгжлийн банкнаас олгосон зээлийн өр төлбөрийг барагдуулах зарим арга хэмжээний тухай Засгийн газрын тогтоолын хэрэгжилтийн талаар Сангийн сайд Б.Жавхлан танилцууллаа. Хөгжлийн банканд энэ оны нэгдүгээр сарын 20-ны өдрөөс есдүгээр сарын 30-ны хооронд нийт 766.5 тэрбум төгрөгийн зээлийн эргэн төлөлт хийгджээ. Үүнээс бэлэн мөнгөөр 668.8 тэрбум төгрөгийн зээл, өмчлөх бусад үл хөдлөх хөрөнгөөр 97.7 тэрбум төгрөгийн зээл төлөгдсөн бол 14 зээл бүрэн төлөгдөж хаагдсан байна.

Дэд сайд Ж.Бат-Эрдэнэг АТГ-аас саатуулжээ 

Хүнс, хөдөө аж ахуй, хөнгөн үйлдвэрийн дэд сайд Ж.Бат-Эрдэнийг энэ сарын 6-ны өдөр АТГ-аас баривчлан ШШГЕГ-ын харьяа Цагдан хорих 461 дүгээр ангид саатуулжээ. Түүнийг Зам тээврийн хөгжлийн яаманд ажиллаж байхдаа Улаанбаатар-Дархан чиглэлийн авто замын шинэчлэлийн ажлын хоёрдугаар багц ажлыг зохион байгуулахдаа бусдад давуу байдал олгосон, мөн үндэслэлгүй хөрөнгөжсөн байж болзошгүй гэх асуудалд холбогдуулан шалгаж байгаа юм.

Энэ талаар АТГ, "Тендерийн бичиг баримт боловсруулсан, сонгон шалгаруулсан, олгосон санхүүжилттэй холбоотойгоор шалгалт явуулж арав гаруй албан тушаалтныг шалгаж байгаа. Үүнээс найман хүнийг нь яллагдагчаар татсан. Гурвыг нь цагдан хорих, таслан сэргийлэх арга хэмжээ авсан ба Нэг холбогдогчийг баривчилсан" гэв.

УИХ-ын гишүүн асан Ж.Батзандангийн гэрт нэгжлэг хийж, АТГ-аас шалгаж байна

УИХ-ын гишүүн асан Ж.Батзанданг АТГ-аас өчигдөр орой 10-р сарын 7-нд албадан ирүүлж мэдүүлэг авчээ. Мөн түүний орон гэрт нэгжлэг хийсэн байна. Тодруулбал Ж.Батзандан нь УИХ-ын гишүүн байх үедээ өөрийн туслах Г.Аюулгүйгээр дамжуулан Капитал банкнаас “Азийн бамбар” ХХК, “Элит Цамхаг” ХХК-иудад 12.6 тэрбум зээл авсан байдаг. Ингэхдээ тус банкинд өөрийн биеэр хэд хэдэн удаа очиж уулзсан төдийгүй 2020 оны аравдугаар сард “Азийн бамбар” ХХК татан буугджээ. Ийнхүү түүнийг хөгжлийн банкны асуудалтай холбон АТГ-аас мэдүүлэг авч, түүний гэрт нэгжлэг хийжээ.  

Дэлхийн багш нарын баярын өдөр тохиолоо 

ЮНЕСКО-гоос жил бүрийн аравдугаар сарын 5-ны өдрийг Дэлхийн багш нарын өдөр болгон 1994 онд зарласан билээ. 1966 оны энэ өдөр ЮНЕСКО ба Олон улсын хөдөлмөрийн байгууллага хамтран, багш нарын статусын тухай​ Засгийн газар хоорондын тусгай бага хурал зохион байгуулж “Багш нарын статусын тухай зөвлөмж”-ийг батлан гаргажээ. Уг зөвлөмж багшийн мэргэжлийн олон улсын стандартыг тодорхойлж өгсөн. Энэ нь хууль зүйн заавал дагаж мөрдөх баримт биш боловч боловсролын чанарыг сайжруулах зорилгоор багш нарын статусыг дээшлүүлэх эрх зүйн чухал баримт бичигт тооцогддог.

Дэлхийн багш нарын 28 дахь, Монголын багш нарын 56 дахь удаагийн баярын өдөр өнөөдөр (2022.10.05) тохиож байна. Монгол Улс Багш нарын баярыг 1966 оноос тэмдэглэж ирсэн. Засгийн газрын 2013 оны 412 дугаар тогтоолоор “Түүхэн үйл явдлын ой, тэмдэглэлт өдрийг тэмдэглэх, гавьяат үйлстэнийг алдаршуулах, дурсгалыг нь мөнхжүүлэх” журамд Монголын багш нарын өдрийг жил бүрийн аравдугаар сарын 5-нд тэмдэглэж байхаар өөрчлөлт оруулжээ. Багш нарын баярын өдрийг өнөөдөр дэлхийн 100 гаруй оронд тэмдэглэдэг уламжлалтай.

МҮИС-ийг хууль бус сурталчилгаа байршуулсан хэмээн үзэж 5 сая төгрөгөөр торгожээ

Шударга өрсөлдөөн хэрэглэгчийн төлөөх газраас Монголын Үндэсний Их сургууль “Монголын хамгийн том их сургууль” гэсэн зар сурталчилгааг өөрийн фейсбүүк хуудас болон хот доторх зарим чиглэлийн нийтийн тээврийн автобуст байршуулсан зөрчлийг илрүүлж, зөрчил шалган шийдвэрлэх ажиллагааг явуулж Зар сурталчилгааны тухай хуулийн 7-р зүйлийн 7.2.3-т “хангалттай тодорхой мэдээллийг орхигдуулан, эсхүл мэдлэг, туршлага дутмаг итгэмтгий байдлыг ашиглан хэрэгчийг төөрөгдөлд оруулсан” гэж заасныг зөрчсөн тул “Монголын Үндэсний Их сургууль” Нийгэмд үйлчилдэг төрийн бус байгууллагад Зөрчлийн тухайн хуулийн 10.1 дүгээр зүйлийн 4 дэх хэсэгт заасан 5000 нэгж буюу 5.000.000 төгрөгөөр торгох шийтгэл оногдуулсан. 

Монголын үндэсний их сургууль уг шийтгэлийг эс зөвшөөрч нийслэл дэх Захиргааны хэргийн анхан шатны шүүхэд нэхэмжлэл гаргасан боловч Монголын үндэсний их сургуулийг эрх бүхий байгууллагаас “Монголын хамгийн том их сургууль” гэж тодорхойлоогүй байх тул Шударга өрсөлдөөн, хэрэглэгчийн төлөө газрын оногдуулсан шийтгэл үндэслэлтэй, тус сургуулийг Зар сурталчилгааны тухай хуулийг зөрчсөн зар сурталчилгаа явуулсан гэж захиргааны хэргийн шүүхээс үзсэн. Монголын үндэсний их сургууль шүүхийн шийдвэрийг хүлээн зөвшөөрч, шийтгэл оногдуулсан торгууль 5.000.000 төгрөгийг Шударга өрсөлдөөн, хэрэглэгчийн төлөө газрын Төрийн сан банкин дахь дансанд 2022 оны 9 дүгээр сарын 26-ны өдөр шүүхийн шийдвэр албадан гүйцэтгэх журмаар төлж барагдуулсан байна. 

Шударга өрсөлдөөн, хэрэглэгчийн төлөө газраас дээрх хууль зөрчсөн зар сурталчилгааг өөрийн фэйсбүүк хуудас болон бусад хэлбэрээр түгээхгүй байх, зар сурталчилгааг зогсоох, нийтийн тээврийн үйлчилгээнд явж буй зурагт хуудсыг авах зөрчлийн үр дагаврыг арилгах албан даалгавар хүргүүлсэн боловч өнөөдрийг хүртэл арга хэмжээ авч хэрэгжүүлээгүй байна.

       Иймээс Монголын үндэсний их сургуульд хүргүүлсэн албан даалгаврыг шүүхийн шийдвэрийг гүйцэтгэх журмаар албадан гүйцэтгэх хүсэлтийг нийслэл дэх Захиргааны хэргийн анхан шатны шүүхэд хүргүүлээд байна гэж Шударга өрсөлдөөн, хэрэглэгчийн төлөө газраас мэдээллээ.  

“Blue Bus” компанийн автобусны жолоочыг 100 мянган төгрөгөөр торгожээ

4-071 дугаартай “Blue bus” компанийн автобусны жолооч зөрчил гаргаж, хүүхэд гэмтээсэн бичлэг цахим сүлжээнд цацагдсан. Энэ талаар тус компанийн жолоочоос тодруулахад тухайн үйл явдал өнгөрсөн тавдугаар сард болсон байна. Түүнчлэн тухайн жолооч автобусны араас гүйсэн хүүхдийг мэдээгүй. Толиндоо хараагүйгээс болоод ийм хэрэг гарсан гэлээ. Ослын улмаас охины гэр хугарч, зөөлөн эдийн гэмтэл авсан бөгөөд хүүхдийн гэр бүл цагдаагийн байгууллагад өргөдөл гаргасан аж. Харин автобусны жолооч хоёр сарын хугацаанд ажлаа хийгээгүй бөгөөд охиныг эмчилгээний зардлыг бүрэн барагдуулсан хэмээж байлаа.