Bolod.mn сайт долоо хоногийн ням гараг бүр улс төр, нийгэм, эдийн засгийн хүрээнд болж өрнөсөн онцлох үйл явдлуудыг тоймлон хүргэдэг уламжлалтай. 2022-2023 оны хичээлийн шинэ эхлэх гэж байгаатай холбогдуулан салбарын сайд мэдээлэл хийж чанаргүй, үйл ажиллагаа нь явуулах боломжгүй 13 их дээд сургуулиудын эрхийг цуцалж байгаа талаараа мэдээлсэн. Түүнчлэн дэлхийн од реппер Lil Pump Хуур хөгжмийн наадамд оролцохоор Монголд хүрэлцэн ирсэн. Эдгээр болон бусад онцлох үйл явдлуудыг Bolod.mn сайт тоймлон хүргэж байна.

Нийслэлээс орон нутаг руу шилжиж буй төрийн албан хаагчдийг дэмжих зардлыг төсөвд тусгана

Улаанбаатар хотоос орон нутаг руу шилжиж буй төрийн албан хаагчдийг дэмжих зардлыг ирэх оны төсөвт тусгахаар төлөвлөж байгааг Ерөнхий сайд Л.Оюун-Эрдэнэ хэллээ.

Тэрбээр, нийслэлийн удирдлагууд болоод холбогдох албаны хүмүүсийн хамт энэ сарын 15-ны өдөр нийслэл Улаанбаатар хотод хэрэгжиж буй гэр хорооллыг дахин төлөвлөж, орон сууцжуулах төслийн хэрэгжилттэй танилцасан юм. Энэ үеэр Улаанбаатар хотод тулгамдсан асуудлуудыг шийдэх гарц гаргалгааны талаар Ерөнхий сайд Л.Оюун-Эрдэнэ хэвлэлд өгсөн ярилцлагадаа, "Засгаас газраас баталсан “Шинэ сэргэлтийн бодлого” өдрөөс өдөрт эрчимжиж байна. Энэхүү бодлогын “Хот хөдөөгийн сэргэлтийн бодлого”-ын хүрээнд хийх ажил их байна.

Жил бүр Улаанбаатар хотын хүн ам 60-70 орчим мянган иргэнээр нэмэгдэж байгаагийн тал хувь нь хөдөөнөөс Улаанбаатар хотод шилжин суурьшиж байна. Тиймээс Улаанбаатар хотоос хөдөө орон нутаг руу очиж ажиллаж буй боловсон хүчнийг дэмжинэ. Нийслэлээс шилжиж, хөдөөд ажиллаж буй иргэдээ “Шинэ сэргэлтийн бодлого”-ыг дэмжиж байгаа шинэ үеийн илгээлтийн эзэд гэж үзэж ипотекийн зээлийн багц дэмжлэгийг олгоно. Улаанбаатараас хөдөө рүү шилжиж байгаа төрийн албан хаагчдын цалинг хоёр дахин нэмнэ. Мөн очиход нь нэг удаагийн тэтгэлэг олгох зэрэг нь ирэх оны төсвийн онцлог. Харин нийслэл Улаанбаатар хотод ирж буй хүмүүс татвар төлдөг болно" гэлээ.

БШУЯ-наас үйл ажиллагааг нь цуцалж, хүчингүй болгож байгаа 13 их дээд сургуулын нэрсийг танилцууллаа

Боловсрол, Шинжлэх Ухааны Яам (БШУЯ)-наас дээд боловсролын салбарт хэрэгжүүлж байгаа зарим арга хэмжээний талаар өнөөдөр мэдээлэв. Энэ үеэр Боловсрол, шинжлэх ухааны сайд Л.Энх-Амгалан "Их, дээд сургуулийн шаардлага хангаагүй 13 сургуулийн үйл ажиллагааг зогсоож байгаа тухай мэдээллээ.Үйл ажиллагааг нь хүчингүй болгосон эдгээр сургууль нь 163 багш, 1,567 оюутантай. Өөрөөр хэлбэл, сургууль тус бүр 40 хүрэхгүй оюутантай үйл ажиллагаа явуулж байгаа бөгөөд иймд эдгээр 13 их, дээд сургуулийн үйл ажиллагааг зогсоож байгаа юм байна. Түүнчлэн эдгээр сургуульд суралцаж буй нэг ч оюутны эрх ашгийг хөндөхгүй бөгөөд 1,500 гаруй оюутан нэр хүндтэй, эрэмбэ өндөртэй их, дээд сургуульд шилжин суралцах боломжийг олгох болно " гэдгийг хэлсэн.

Үйл ажиллагааг нь хүчингүй болгож байгаа их, дээд сургуулиудад:

Газарчин дээд сургууль
Зүүн хүрээ коллеж
Маргад дээд сургууль
Монголын менежмент, технологийн дээд сургууль
Монголын хүний нөөцийн удирдлагын дээд сургууль
Номэра дээд сургууль
Рафлес олон улсын институтын УБ дахь салбар сургууль
Түшээ дээд сургууль
Идэр их сургуулийн харьяа Далай ван дээд сургууль

10. Чингис хаан дээд сургууль

11. Улаанбаатар эрдэм их сургуулийн харъяа Эко Ази дээд сургууль

12. Утга зохиол, нийгмийн ажилтны дээд сургууль

13. Эрхүүгийн зам харилцааны улсын их сургуулийн Улаанбаатар дахь салбар сургуулиуд зэрэг багтжээ.

“Эрэл”-ийн Б.Эрдэнэбат, түүний өмгөөлөгч Н.Цэцэгмаа болон Нийслэлийн прокуроруудыг АТГ-аас шалгаж эхэллээ

"Эрэл"-ийн Б.Эрдэнэбат, түүний өмгөөлөгч Н.Цэцэгмаа болон Нийслэлийн прокуроруудыг АТГ-аас шалгаж эхэлжээ.

Тодруулбал, "Эрэл" ХХК-ийн үүсгэн байгуулагч Б.Эрдэнэбат нь өөрийн өмгөөлөгч Н.Цэцэгмаагаар дамжуулан Нийслэлийн Прокурорын удирдлагууд болон хяналтын прокурор М.Энхбаатар нарт хээл хахууль өгч, өөрийн үйлдсэн Хөгжлийн банктай холбоотой эрүүгийн хэрэг болон ЦЕГ-ын Эрүүгийн Цагдаагийн Албаны Эдийн Засгийн Гэмт Хэрэгтэй Тэмцэх Газарт шалгагдаж байсан 20 тэрбум төгрөг бусдаас залилсан гэмт хэргээ хаалгахаар авлига, хээл хахууль өгсөн байж болзошгүй үйлдлийг АТГ-аас шалгаж эхэлсэн байна.

Дарханы замын тендерийг хариуцаж байсан сайд Б.Энх-Амгалан, ЗТЯ-ны дарга Х.Оргил-Эрдэнэ нарыг АТГ-аас шалгаж байна

Засгийн газрын долдугаар сарын 27-ны өдрийн хуралдаанаар Ерөнхий сайд Л.Оюун-Эрдэнэ Дарханы замын бүтээн байгуулалт болон Зүүнбаян-Гашуунсухайт чиглэлийн төмөр замын бүтээн байгуулалтын ажлууд удааширсантай холбоотой алдагдсан боломжийн өртгийг тооцуулж, албан тушаалтнуудыг шалгах ажлыг Авлигатай тэмцэх газарт даалгасан. Улмаар Дарханы замын бүтээн байгуулалтын тендерийг анх шалгаруулахад оролцсон албан хаагчдыг АТГ-аас шалгаж эхэллээ. Тодруулбал, замын тендерийг хариуцаж байсан тухайн үеийн сайд Б.Энх-амгалан, Зам тээврийн хөгжлийн яамны Зам ашиглалтын газрын дарга Х.Оргил-Эрдэнэ тэргүүтэй хүмүүсийг АТГ шалгаж эхэлсэн байна.

УИХ-ын гишүүн Б.Энх-Амгалан 2019 онд ЗТХ-ийн сайдаар сонгогдон ажиллаж байв. ЗТХ-ийн сайд асан Я.Содбаатарын эхнэрийн үүсгэн байгуулсан компани ЖДҮХС-гаас зээл авсантай холбогдуулан, тэрбээр ёс зүйн хариуцлага хүлээж, үүрэгт ажлаа хүлээлгэн өгөх хүсэлтээ 2018 оны 11 дүгээр сарын 30-нд Ерөнхий сайдад хүргүүлсэн. Уг саналыг Ерөнхий сайд хүлээн авч 2018 оны 12 дугаар сарын 04-нд өргөн мэдүүлснийг УИХ баталсан юм. Тиймээс тухайн үеийн Ерөнхий сайд У.Хүрэлсүх ЗТХ-ийн сайдад Б.Энх-Амгалан гишүүнийг нэр дэвшүүлсэн. Хэрэв АТГ-аас шалган хууль зөрчсөн гэж үзэн хэрэг үүсгэвэл УИХ-ын гишүүний бүрэн эрхийг түдгэлзүүлэх асуудал яригдах юм.

Дэлхийн алдарт реппер Lil Pump Монгол ирлээ

Covid-19 цар тахалтай холбоотойгоор хоёр жил завсарласан “Хуур” хөгжмийн наадам болоход нэг хоног үлдлээ. Уг хөгжмийн наадамд “Reborn stage” буюу хип хоп, трап урсгалын уран бүтээлчид, “Live stage” буюу шинэ залуу, дотоодын хамтлагууд, “Electronic stage” буюу дотоодын алдартай DJ нараас бүрдсэн 40 орчим уран бүтээлчид оролцоно. Үүнээс гадна дэлхийн алдарт реппер Lil Pump XMF хөгжмийн наадамд өөрийн биеэр оролцож ая дуугаа өргөхөөр энэ сарын 18-ны өдөр Монголд газардлаа.

Түүний дуулсан “Gucci Gang” уран бүтээл нь youtube сувагт 1.1 тэрбум хандалт авч байсан юм. Энэ дуу нь АНУ-ын Billboard-ын топ гурван уран бүтээлд шалгарсан байдаг.

Баянхонгор аймагт зам тээврийн осол гарч, 5 хүн нас барлаа

Зам тээврийн ослын улмаас таван хүний амь хохирсон ноцтой осол гарчээ.Тодруулбал, Баянхонгор аймгийн Баян-Овоо сумын Мандалхайрхан багийн “Цагаан цахир” гэдэг газар суудлын болон ачааны автомашин мөргөлдсөн байна.

Баянхонгор аймгийн Онцгой байдлын газрын Эрэн хайх, аврах салбарын алба хаагчид дуудлагын дагуу ослын газарт очин ажиллаж Баян-Өлгий аймгаас Улаанбаатар хотын чиглэлд иргэн Н-ын жолоодож явсан суудлын автомашин Улаанбаатар хотоос Ховд аймгийн чиглэлд иргэн Э-ын жолоодож явсан хүнд даацын автомашины зүтгүүртэй мөргөлдөж, дарагдсан байсан.

Аврагчид 5 цаг 20 минут ажиллаж, суудлын автомашиныг татан гаргаж, автомашины бүхээгээс жолооч болон зорчигч нарын 25-65 насны таван иргэний цогцсыг гаргаж, Баянхонгор аймгийн цагдаагийн газрын мөрдөгчид шилжүүлэн өгчээ. Иймд жолооч, зорчигчид орон нутгийн замд зорчихдоо хөдөлгөөний аюулгүй байдлыг хангаж, анхаарал болгоомжтой явахыг сэрэмжлүүлж байна.

Алга болсон хүүгийн цогцос хорих 461-р анги орчмын тогтоод уснаас олджээ

Наймдугаар сарын 07-ны өдөр 14 цагийн орчимд БГД-ийн Наранд байрлах гэрээсээ гараад ор сураггүй алга болж эрэн сурвалжлагдаж байсан 13 настай Т-н тухай мэдээлэл цахим орчинд түгээд байсан. Харамсалтай нь талийгаач хүүгийн цогцос Хорих 461 дүгээр ангийн орчимд байрлах тогтоол уснаас олдсон тухай эх сурвалж бидэнд мэдээллээ. ЦЕГ-аас эцэг эхчүүдийг бага насны хүүхдэд тавих хараа хяналтаа сайжруулахыг анхааруулж байна.

BOLOD ДОЛОО ХОНОГИЙН ТОЙМ: Зарим их дээд сургуулиудын үйл ажиллагааг цуцалж, дэлхийн од Монголд ирсэн ДОЛОО ХОНОГ
Tweet
Bolod.mn