Bolod.mn сайт долоо хоног бүр улс төр, нийгэм, эдийн засгийн хүрээнд болж өрнөсөн онцлох үйл явдлуудыг тоймлон хүргэдэг уламжлалтай. Эдгээр өдрүүдэд УИХ-ын гишүүдийн бүлэг “Гэр бүлийн тухай хууль”-д нэмэлт өөрчлөлт оруулах тухай хуулийн төсөл өргөн барилаа. Түүнчлэн Худалдаа хөгжлийн банкны захирал асан УИХ-ын Г.Амартүвшинг Монгол Улсаас гарах эрхийг хязгаарлалаа. Эдгээр болон бусад онцлох мэдээ мэдээллийг тоймлон хүргэлээ.

“Хүүхдийн тэтгэмж эцэг, эхийн орлогын 50-иас доошгүй хувь байх, данснаас нь шууд суутгахаар зохицуулна”

УИХ дахь эмэгтэй гишүүдийн бүлэг "Гэр бүлийн тухай хууль"-д нэмэлт өөрчлөлт оруулах тухай хуулийн төслийг УИХ-ын даргад өргөн барвсан ба үүнтэй холбогдуулан хуулийн төслийн талаар мэдээлэл хийсэн. Гэр бүлийн тухай хууль анх 1973 онд батлагдаж байсан бөгөөд 1999 онд шинэчлэн найруулсан бөгөөд үүнээс хойш энэ төрлийн хуульд нэмэлт өөрчлөлт ороогүй. Тэгвэл энэ удаагийн хуулийн төслийн гол өөрчлөлт нь хүүхэд хамгааллын асуудал гэдгийг УИХ-ын эмэгтэй гишүүдийн бүлэг үзэж байлаа.

Манай улсын хэмжээнд жилд 3391 хос гэр бүлээ цуцлуулдаг гэсэн судалгаа байдаг аж. Иймээс гэр бүл салалтын хамгийн том хохирогч нь хүүхэд бөгөөд сүүлийн жилүүдэд гэр бүл салалт нэг хувиар нэмэгдэж байгаа гэдгийг онцлон цохож байлаа.

Иймд дээрх асуудлууд дээр тулгуурлан тус хуулийн төсөлд гэр бүл салалтын дараах хүүхдийн тэтгэмжийн асуудлыг тусгаж өгсөн аж. Тодруулбал тэтгэмжийн хэмжээ болон төлөлтийн асуудалд онцгойлон анхаарал хандуулсан ба Тэтгэмжийн хувьд 11 хүртэлх насны хүүхдийг амьдралын баталгаажих түвшний 51 хувиар тооцож олгодог. Ингэхээр 11 нас хүрээгүй хүүхдийн тэтгэмж сард 115,000 төгрөг байсан юм. Тиймээс тэтгэмжийн хэмжээг тогтоохдоо орлоготой нь уялдуулах, ХАОАТ-ын хуульд заасны дагуу орлогын 50-аас доошгүй хувь гэдэг байдлаар тогтооё гэсэн заалтыг оруулж өгчээ.

Түүнчлэн хүүхэд хүндээр өвдсөн, хөгжлийн бэрхшээлтэй болсон тохиолдолд дахиж шинжээчдийн баг томилж, тэтгэмж төлөгчтэй хамтран төлөх зохицуулалтыг оруулжээ. Монгол улсад нийт тэтгэмж төлөх ёстой хүмүүсийн зөвхөн 20 хувь төлж байгаа бол үлдсэн 80 хувь нь шүүхээр тогтоосон хүүхдийн тэтгэмжээ төлөхгүй байгаа юм байна. Өнөөдрийн байдлаар хүүхдийн тэтгэмж төлөхгүй байгаа иргэдийн хуримтлагдсан мөнгөн дүн 34 тэрбум төгрөгт хүрчээ.

УИХ-ын гишүүн Г.Амартүвшинг Монгол Улмаас гарахыг хязгаарлажээ

Нийслэлийн Прокурорын газрын хяналтын прокуророос яллагдагч Г.Амартүвшинд Эрүүгийн хуулийн ерөнхий ангийн 1.8 дугаар зүйлийн 3, 1.9 дүгээр зүйлийн 1, 3.7 дугаар зүйлийн 1 дэх хэсгийг тус тус журамлан,

мөн хуулийн тусгай ангийн 22.1 дүгээр зүйлийн 2 дахь хэсэгт заасан гэмт хэрэгт яллагдагчаар татаж, Эрүүгийн хэрэг хянан шийдвэрлэх тухай хуулийн 14.9 дүгээр зүйлийн 1 дэх хэсгийн 1.3 дахь хэсэгт заасан үндэслэлээр Монгол Улсын хилээр гарахыг хязгаарлах хязгаарлалт тогтоох таслан сэргийлэх арга хэмжээ авах тухай санал ирүүлснийг хүлээн авч, өнгөрсөн 5 дугаар сарын 30-ны өдөр хянан хэлэлцэв.

Эрүүгийн хэрэг хянан шийдвэрлэх тухай хуулийн 14.5 дугаар зүйлийн 1 дэх хэсэгт заасны дагуу яллагдагч Г.Амартүвшинд 2022 оны 5 дугаар сарын 30-ны өдрөөс Монгол Улсын хилээр гарахыг хязгаарлах хязгаарлалт тогтоох таслан сэргийлэх арга хэмжээг авч шийдвэрлэв.

Нийтийн тээврийн 70, сургуулийн 20 автобусыг шинээр үйлчилгээнд гаргалаа

Шинэ сэргэлтийн бодлогын Хот хөдөөгийн сэргэлтийн хүрээнд нийслэл хотын тулгамдсан асуудлуудыг үе шаттайгаар шийдвэрлэх зорилгоор жил бүр 420 тэрбум төгрөгийг Улаанбаатар хотод төсөвлөсөн.

Энэ хөрөнгө оруулалтын эхлэл болгож, нийслэлийн түгжрэлийг бууруулах ажлын хүрээнд 60 автобус, цахилгаан хөдөлгүүр бүхий хоёр давхар 10, сургуулийн 20 автобусыг үйлчилгээнд нэвтрүүллээ. Энэ нь нийтийн тээврийн парк шинэчлэлийн эхний хэсэг гэдгийг Ерөнхий сайд Л_Оюун-Эрдэнэ, Хотын дарга Д.Сумъяабазар нар хэллээ.

Хөдөлмөрийн баатар Э.Содномпилжээ дэлхийн дээд амжилтыг шинэчиллээ

Казахстаны Алмата хотод пауэрлифтингийн IPF холбооны хэвтээ шахалтын ДАШТ-ий насанд хүрэгчдийн -120 кг жинд "Токио-2020" паралимпын наадмын аварга, "Рио-2016" паралимпын наадмын хүрэл медальт, Үндэсний шигшээ баг, "Сүлд" спорт хорооны тамирчин, Хөдөлмөрийн баатар, гавьяат тамирчин Энхбаярын Содномпилжээ алтан медаль хүртлээ.

Тэрбээр цээжнээс 260 кг-ыг шахсанаар дэлхийн аваргаар шалгарсан төдийгүй тус жингийн дэлхийн дээд амжилтыг шинэчлэн тогтоож чадлаа.

Өмнө нь Э.Содномпилжээ 105 кг жинд дэлхийн дээд амжилт эзэмшиж байсан юм. Энэ удаагийн хосгүй амжилт нь түүний ДАШТ-ээс авсан зургаа дахь медаль бөгөөд гурван алт, гурван мөнгөн медаль хүртэж байсан хүчтэн билээ.

Алмата хотноо пауэрлифтингийн IPF холбооны хэвтээ шахалтын ДАШТ энэ сарын 21-29-нд амжилттай болж 48 орны баг тамирчид оролцсон байна. Монгол Улсаас гавьяат дасгалжуулагч Д.Баттулгын удирдлага дор 19 тамирчин хүч чадлаа сорин өрсөлджээ.

Прокурор асан Д.Баярмагнайд Сингапурын шүүх 14 хоногийн ял оноожээ

Монгол Улсын хэсэг иргэд Сингапурын нэр бүхий казинод архидан согтуурч, улмаар хулгайн гэмт хэрэгт холбогдож, шүүх хурал товлогдсон талаар мэдээлэл гарсан. Монгол Улсын иргэн, Нийслэлийн ерөнхий прокурор асан Дэлгэрийн Баярмагнайг Сингапур Улсын Казиногийн үйл ажиллагааг хянах тухай хууль зөрчсөн эрүүгийн гэмт хэрэг үйлдсэн гэж үзэж тавдугаар сарын 26-ны өдөр тус улсын шүүхээр хэлэлцсэн. Улмаар дээрх хурлаар Д.Баярмагнайг гэм буруутай гэж үзэн, 14 хоногийн хорих ял шийтгэсэн байна.

BOLOD ДОЛОО ХОНОГИЙН ТОЙМ: Гэр бүлийн тухай хуульд нэмэлт өөрчлөлт оруулж, хүүхдийн тэтгэмжийг эцэг, эхийн орлогын 50-иар тогтоодог болно
Tweet
Bolod.mn