2022-01-29Мэдээ мэдээллийн нэгдсэн Bolod.mn сайт долоо хоног болгоны ням гараг бүрт Улс төр, нийгэм, эдийн засгийн хүрээнд болж өрнөсөн онцлох үйл явдлыг тоймлон хүргэдэг уламжлалтай. Монголын ахмадын холбооноос ахмад настны тэтгэврийн хэмжээг нэмэх шаардлагатай байгааг мэдээлсэн.Түүнчлэн өргөн хэрэглээний бараа бүтээгдэхүүний үнэ өсөхийн хэрээр иргэдийн амьжиргаа туйлдаж байгааг онцолж байсан. Энэ хүрээнд МУ-ын Ерөнхийлөгч У.Хүрэлсүх тэтгэврийн хэмжээг нэмэгдүүлэхэд анхаарч ажиллахыг холбогдох яамд үүрэг болголоо. Мөн Оюу-толгойн гүний уурхайн үйлдвэрлэлийн ажлыг эхлүүлэх анхны тэсэлгээг хийлээ.
- Сар шинийн баяраас өмнө ахмад настны тэтгэврийн доод хэмжээг 500 мянга болгоно
Монгол улсын Ерөнхийлөгч У.Хүрэлсүх Засгийн газрын тэргүүн, зарим сайд нарыг хүлээн авч уулзаж тэтгэвэр, тэтгэмжийг нэмэх асуудлаар үүрэг чиглэл өгсөн. Улмаар Засгийн газар, Сангийн яам дээрх асуудлыг судлан тодорхой шийдвэрт хүрлээ. Тодруулбал, Сангийн яам төсвийн тодотголыг УИХ-д өргөн барьж, ахмад настны бүрэн тэтгэврийн доод хэмжээг 500 мянган төгрөг хүртэл нэмэж, үүнээс дээш тэтгэвэртэй бол 15 хүртэлх хувиар нэмэх болон өргөн хэрэглээний бараа бүтээгдэхүүний үнийг тогтворжуулахтай холбоотой зарим багц, арга хэмжээг тусгалаа.
Мөн халамжийн тэтгэвэрийн хэмжээ болон байнгын асаргаа шаардлагатай 16 хүртэлх насны хүүхдэд олгох тэтгэмжийг хэмжээг 288.000 төгрөг хэвээр үлдээх зэрэг нэн чухал асуудлыг төсөвт тодотгол хийж, шийдэхээр болж байна.
Тэтгэвэр тэтгэмжийг нэмэхэд ойролцоогоор 700 орчим тэрбум төгрөг шаардагдах тооцоо байна. Засгийн газрын зүгээс нэн яаралтай бус зураг, техник эдийн засгийн үндэслэлгүй зарим хөрөнгө оруулалтыг царцаах замаар зарим санхүүжилтийг босгох бодлого барин ажиллах юм байна.
- Гүний уурхайн үйлдвэрлэлийн эхний шат болох анхны тэсэлгээг хийх дохиог өглөө
Оюутолгойн гүний уурхайн үйл ажиллагааг эхлүүлж байгаа түүхэн үйл явдал тохиолоо. Энэ хүрээнд гүний уурхайн үйлдвэрлэлийн эхний шат болох анхны тэсэлгээг хийх дохиог Ерөнхий сайд Л.Оюун-Эрдэнэ болон “Рио Тинто” группийн гүйцэтгэх захирал нар өглөө. Ийнхүү гүний уурхайн үйлдвэрлэл эхэлснээр 2023 оны эхний хагас жилд үйл ажиллагаа жигдэрч, бүрэн хүчин чадлаараа ажиллана гэсэн тооцоотой байна.
Оюутолгойн ордын нийт нөөцийн 80 гаруй хувь нь газрын гүнд буюу гүний уурхайн хэсэгт оршдог. “Оюу толгой” компани гүний блокчлон олборлох аргаар үйл ажиллагаа явуулах юм. Гүний уурхай бүрэн ашиглалтад орсноор Монгол Улс дэлхийд тавд эрэмбэлэгдэх өндөр технологийн гүний уурхайтай болж, олон улсын зах зээлд зэсийн томоохон тоглогчдын нэгд тооцогдохоос гадна манай улсын эдийн засаг болон улсын төсөвт оруулах үр өгөөж нэмэгдэх юм.
Тодруулбал, “Оюу толгой” компани $5 тэрбумын борлуулалт хийж, Монгол Улсад төлөх ашигт малтмалын нөөц ашигласны төлбөр гурав дахин нэмэгдэж, жилийн 700 тэрбум төгрөгт хүрэх урьдчилсан тооцоолол гарчээ. Ийнхүү гүний уурхайн үйл ажиллагааг эхлүүлэх нээлтийн үйл ажиллагаанд УИХ-ын гишүүд, Засгийн газрын гишүүд албаны төлөөлөл болон “Рио Тинто” группийн удирдлагууд оролцсон юм.
- “Халдварын оргил үе таарч байгаа учир хичээл эхлэх хугацааг долоо хоногоор хойшлуулахаас өөр аргагүй байна”
Цар тахлын халдварын шинээр илрэх тохиолдлын тоо нэмэгдсээр байгаа тул сургууль, цэцэрлэгийн танхимын сургалтыг эхлүүлэх хугацааг 7-14 хоногоор хойшлуулах саналыг Эрдэмтдийн зөвлөлөөс танилцуулсан. Засгийн газрын хуралдаанаар сургууль, цэцэрлэгийн танхимын сургалтыг хоёрдугаар сарын 14-нөөс 5/9 зарчмаар хичээллүүлж, хоёрдугаар сарын 28-наас 100 хувь танхимаар хичээллүүлэхээр болжээ. Улсын хэмжээнд ЕБС-иудад хийсэн судалгаагаар сурагчдын хичээлийн хоцрогдол 60 хувьтай байгаа бөгөөд тэр дундаа 1-3 ангийн сурагчид хоцрогдол ихтэй байна гэдгийг салбарын сайд Л.Энх-Амгалан онцлов.
Хичээл эхлэх хугацаанд омикрон халдварын оргил үе таарч байгаа учир дахин нэг долоо хоног сунгах шаардлагатай болж байгаа аж.
Харин Их дээд сургууль, МСҮТ-ийн хичээл хоёрдугаар сарын 7-нд цахимаар эхлэх бол хоёрдугаар сарын 28-наас танхимаар хичээллэнэ.
Цэцэрлэгүүдийн үйл ажиллагаа одоогоор хэвийн үргэлжилж байгаа бөгөөд цаашдаа хоёрдугаар сарын 14-нөөс эхлэн 3-5 настай хүүхдийг цэцэрлэгт хамруулахаар боллоо.
- Ё.Отгонбаярыг МАН-ын даргын зөвлөхийн үүрэгт ажлаас чөлөөлжээ
Сэтгүүлчийн амь насанд заналхийлж, сүрдүүлсэн гэх Ё.Отгонбаярыг МАН-ын даргын зөвлөхийн ажлаас нь чөлөөлжээ. Тэрбээр өнгөрсөн оны аравдугаар сард МАН-ын дарга Л.Оюун-Эрдэнийн зөвлөхөөр томилогдсон юм.
Хөгжлийн банкны найдваргүй зээлдэгчдийн тоонд БСШУ-ны сайд асан Ё.Отгонбаярын эхнэрийн хамаарал бүхий компани тус банкинд 17.7 тэрбум төгрөгийн өртэй, найдваргүй зээлдэгчийн жагсаалд багтсан талаар хэвлэл мэдээллийн хэрэгслээр мэдээлсэн. Тус мэдээлэлтэй холбогдуулан Ё.Отгонбаяр нь сэтгүүлчдийн амь насанд заналхийлсэн зурвас бичсэн нь олон нийтэд ил болсон юм.
Түүний энэ үйлдэлд хариуцлага тооцохыг МСНЭ болон Монголын сайтын холбооноос мөн сэтгүүлчдийн төлөөллүүд нэгдэн хэвлэлийн хурал хийсэн. Сэтгүүлчдийн зүгээс түүнийг уучлалт гуйхын оронд эхнэрийнхээ хамаарал бүхий компанийн 17.7 тэрбум төгрөгийн зээлийг төлж барагдуулахыг шаардсан юм.
- Хөгжлийн банкны зээлдэгчдийг хуулийн байгууллагаар шалгуулахыг үүрэгдлээ
Монгол Улсын хөгжлийн банкнаас “чанаргүй” буюу найдваргүй 26 зээлдэгчдийн нэрсийг нийтэд ил болгосон. Тус банкны 55.3 хувь нь чанаргүй зээлдэгчдийн ангилалд багтсан төдийгүй гэрээн дээрх үүргээ биелүүлээгүй 26 компанийг шүүхэд шилжүүлж нэхэмжлэл гаргасан тухай Хөгжлийн банкны гүйцэтгэх захирал мэдээлсэн. Харин Засгийн газрын ээлжит хуралдааны үеэр Ерөнхий сайд Л.Оюун-Эрдэнэ Хөгжлийн банктай холбоотой асуудлыг хуулийн байгууллагаар шалгуулах үүрэг өглөө.
- Монгол Улсын Ерөнхийлөгч Төрийн дээд одон медаль гардууллаа
Тулгар төрийн 2231 жил, Их Монгол Улс байгуулагдсаны 816 жил, Үндэсний эрх чөлөө, тусгаар тогтнолоо сэргээн мандуулсны 111 жил, Ардын хувьсгалын 101 жилийн ой, XVII-р жарны усан бар жилийг угтан Монгол Улсын Ерөнхийлөгч У.Хүрэлсүх зарлиг гаргаж төрийн дээд одон медаль гардууллаа.
Эрхэлсэн ажилдаа олон жил үр бүтээлтэй ажиллаж, амжилт гарган, эх орныхоо хөгжил цэцэглэлтэд үнэтэй хувь нэмэр оруулсан салбар салбарын тэргүүлэх зүтгэлтнүүдийн шагнал урамшууллаа.
Тодруулбал, Шинжлэх ухааны гавьяат зүтгэлтэн, академич, зурхайч Л.Тэрбишийг Ардын багш цолоор, дуучин, ая зохиогч, продюсер Б.Ангирмааг Урлагийн гавьяат зүтгэлтэн цол тэмдгээр шагналаа.
Түүнчлэн Хөгжлийн найруулагч Б.Чинбатыг Урлагийн гавьяат зүтгэлтэн, Уртын дууч Д.Үүрийн-туяаг Алтан гадас одонгоор, Жүдо бөхийн Монголын анхны эмэгтэй шүүгч Т.Энхцэцэгийг Сүхбаатарын одонгоор тус тус шагналаа.
.jpg "Томруулж харах")
.jpg "Томруулж харах")
.jpeg "Томруулж харах")
.jpg "Томруулж харах")
