Мэдээ мэдээллийн нэгдсэн Bolod.mn сайт долоо хоног бүрийн бямба гарагт өнгөрсөн өдрүүдэд улс төр, эдийн засаг болон нийгмийн хүрээнд болж өрнөсөн онцлох үйл явдлуудыг тоймлон хүргэдэг уламжлалтай. Эдгээр өдрүүдэд улс төрийн хүрээнд болж өрнөсөн үйл явдлуудаас дурдвал үүрэгт ажилдаа хариуцлагагүй хандсан зарим яамны сайд, дэд сайд, Төрийн нарийн бичгийн дарга болон бусад албан тушаалтнуудыг үүрэгт ажлаас нь чөлөөлсныг онцолж байна. Үүний зэрэгцээ шинэ сайдын томилгоо үргэлжилж тангарагаа өргөлөө. Мөн түүнчлэн Монгол Улсын хөгжлийн банкнаас улсад ихээхэн хэмжээний хохирол учруулсан “чанаргүй” зээлдэгчдийн нэр албан тушаалыг нийтэд ил болгож шүүхэд шилжүүлжээ.

-      Үүрэгт ажилдаа хариуцлагагүй хандсан зарим сайдыг үүрэгт ажлаас нь чөлөөллөө

Засгийн газрын ээлжит бус хуралдаан болж үүрэгт ажилдаа хариуцлагагүй хандсан зарим сайд нарт хариуцлага тооцлоо. Энэ хүрээнд Байгаль орчин, аялал жуулчлалын сайд Н.Уртнасан, дэд сайд Ц.Батбаяр, мөн тус яамны Төрийн нарийн бичгийн дарга Д.Ганболд нарыг ажлаас нь чөлөөллөө. Мөн Нийслэлийн Засаг дарга бөгөөд Улаанбаатар хотын Захирагч Д.Сумъяабазарт агаар, орчны бохирдол хариуцсан дарга, мэргэжилтнүүдэд хариуцлага тооцохыг үүрэг болголоо.

Тэгвэл Нийслэлийн Засаг даргын захирамжаар Нийслэлийн Засаг даргын ногоон хөгжил болон агаар, орчны бохирдлыг бууруулах асуудал хариуцсан орлогч Д.Ихбаяр болон Нийслэлийн Агаар, орчны бохирдолтой тэмцэх газрын дарга Б.Пүрэвсүрэн нарыг үүрэгт ажлаас нь чөлөөллөө.

Харин БОАЖ-ын сайдын дараагын томилгоог хийхээр МАН-ын Удирдах зөвлөл хуралдсан бөгөөд ШӨХТГ-ын дарга Б.Бат-Эрдэнийг БОАЖ-ын сайдаар томилох талаар хэлэлцэж, олонх нь дэмжсэн юм.

Иймд Ерөнхий сайд Л.Оюун-Эрдэнэ дээрх шийдвэрийг УИХ-д танилцуулж, улмаар шинээр томилогдож буй сайд тангараг өргөн үүрэгт ажлаа хүлээн авлаа.

-      “Нас барсан өндөр настны тэтгэврийн зээлийг чөлөөлөх тухай” хуулийн төслийг өргөн барилаа

Улсын Их Хурлын гишүүн Ц.Туваан “Нас барсан өндөр насны тэтгэврийн зээл авагчийн тэтгэврийн зээл чөлөөлөх тухай” хуулийн төслийг санаачлан боловсруулж, Улсын Их Хурлаар хэлэлцүүлэхээр Монгол Улсын Их Хурлын дарга Г.Занданшатарт өргөн мэдүүллээ.

Тэрбээр, 2020 оны байдлаар Нийгмийн даатгалын сангаас нийт 441,201 хүн өндөр насны тэтгэвэр авч байгаагаас 227,527 нь 500,000 /таван зуун мянга/ төгрөгөөс доош тэтгэвэр авч байгааг онцлов. Үүнийг өрхийн дундаж зарлагын хэмжээтэй харьцуулан авч үзвэл нийт ахмадуудын 60 орчим хувь нь 500,000 /таван зуун мянга/ төгрөг хүрэхгүй тэтгэвэр авч, нэг өрхийн хоёр өндөр настан нийлээд дээр дурдсан өрхийн дундаж зарлагын 50 хувьд ч хүрэхээргүй хэмжээний тэтгэврийн орлогоор амьдарч байгааг мэдээлэв.

Тэрээр уг хуулийг санаачлан боловсруулахдаа бүх насаараа хөдөлмөрлөсөн, тэтгэврээс өөр орлогогүй ахмад настнуудын хэрэгцээг 500 мянган төгрөг хангаж чадахгүй. Монгол Улсад үйлчилж байгаа нийгмийн хамгааллын бодлого шинэчлэн өөрчлөгдсөөр байгаа хэдий ч зорилтод бүлгийн иргэдийн амьдралын наад захын хэрэгцээг хангахгүй, дутагдалтай байсаар ирснийг онцлов.

-      Хөгжлийн банкны чанаргүй зээлдэгч нарыг нийтэд зарлалаа

Монгол Улсын Хөгжлийн банкнаас хэвийн үйл ажиллагаанд сөргөөр нөлөөлж, олгосон зээлийг эргэн төлөөгүй чанаргүй гэх ангилалд орсон 26 компанийг нэрийн нийтэд ил болголоо. Хөгжлийн банкний олгосон нийт зээлийн 55.3 хувь нь чанаргүй зээлийн ангилалд орсон. Өөрөөр хэлбэл зээл аваад төлөөгүй 26 компанийн 841 тэрбум төгрөгийн нэхэмжлэл гаргасан байна.

Тодруулбал, 2014-2019 оны хооронд Хөгжлийн банкнаас санхүүжилт авч зээлийг зориулалтын бусаар ашигласан, санаатайгаар зээл төлөхөөс татгалзсан, зах зээлийн нөхцөл байдлаас хамааран эргэн төлөлт хийгээгүй, мөн гэрээн дээрх үүргээ биелүүлээгүйн улмаас төр, нийтийн ашиг сонирхолд хохирол учруулсан дээрх байгууллагуудыг нийтэд ил болголоо.

Хөгжлийн банкнаас олгож буй зээл нь улсад хэрэгтэй төсөл хэрэгжүүлэх үндсэн үүрэгтэй юм. Тус банкны хамгийн өндөр дүнтэй зээлдэгчдийн нэг болох “Кью Эс Си” ХХК-ийн асуудлыг Дээд шүүх эцэслэн шийдэж, үндсэн зээлийн үлдэгдэл, үндсэн хүүгийн үлдэгдэл, нэмэгдүүлсэн хүүгийн үлдэгдлийн нэхэмжлэлийн шаардлагыг бүхэлд нь хангаж, нэхэмжлэл гаргасан үеийн ханшаар буюу нийт 192.57 тэрбум төгрөгийг Хөгжлийн банканд олгуулахаар болжээ.

 Монгол Улсын хөгжлийн банкны чанаргүй зээлдэгч жагсаалтад багтсан 26 аж ахуйн нэгж, байгууллагын нэрсийг 

•  “Монгол драй милк” ХХК
• “Монгема” ХХК
• “Эрэл” ХХК
• "Инжир" ХХК
•  "Чингис хаан"‘
• Чингис хаан банк
• “Төрийн орон сууцны корпораци” ТӨХХК, 
• “Нью яармаг хаусинг прожект” ХХК
• ТОСК-“Хөдөлгөөнт цогцолбор” төсөл
• “Монгол эм импекс концерн” ХХК, “Бишрэлт групп” ХХК 
• “Монгол мах экспо” ХХК, “Бишрэлт пропертиз” ХХК, “Веллмарт” ХХК
• “Сонгоулд” ХХК “Өрмөн Уул групп” ХХК
• “Зэст-Өндөр” ХХК
• “Кью Эс Си” ХХК
• “Енсада истерн” ХХК
• “Болор шүр” ХХК
• “Эрд хул” ХХК
• “Монлаа” ХХК
• “Ган Хүдэр Орд” ХХК
• “Дэд бүтэц инженеринг” ХХК
• Бэрэн групп ХХК
• Мондулаан трейд ХХК
• Пирамид Орд ХХК
• МБҮ трейд ХХК
• Сэлэнгийн герефорд ХХК
• Бармон ХХК

-      Лифтний гэх тодотголтой өмгөөлөгч Б.Баасанцогтын өмгөөлөх эрхийг 2 жилээр хассан шийдвэрийг хэвээр үлдээлээ

Улсын дээд шүүхийн захиргааны хэргийн шүүх хуралдаанаар Б.Баасанцогтын гомдолтой, Монголын Өмгөөлөгчдийн холбооны Мэргэжлийн хариуцлагын хороонд холбогдох маргааныг гомдол гаргагчийн итгэмжлэгдсэн төлөөлөгчийн гомдлоор 2022 оны 1 дүгээр сарын 17-ны өдөр хянан хэлэлцлээ.

Б.Баасанцогт нь Монголын Өмгөөлөгчдийн холбооны Мэргэжлийн хариуцлагын хорооны 2021 оны 5 дугаар сарын 21-ний өдрийн 6 дугаар тогтоолоор өмгөөллийн үйл ажиллагаа эрхлэх эрхийг хоёр жилийн хугацаагаар түдгэлзүүлэх хариуцлага хүлээлгэсэн шийдвэрийг хүчингүй болгуулах тухай гомдлыг шүүхэд гаргажээ.  

Захиргааны хэргийн давж заалдах шатны шүүх дээрх маргааныг 2021 оны 11 дүгээр сарын 3-ны өдөр анхан шатны журмаар хянан хэлэлцээд “... олон нийтийн газар биеэ зохисгүй авч явсан үйлдэл гаргасан нь Өмгөөлөгчийн мэргэжлийн ёс зүйн дүрмийн 3 дугаар зүйлийн 3.1.8, 43 дугаар зүйлийн 43.1.2-т заасныг тус тус зөрчсөн” гэсэн үндэслэлээр Монголын Өмгөөлөгчдийн холбооны Мэргэжлийн хариуцлагын хорооны 2021 оны 6 дугаар тогтоолыг хэвээр үлдээж, Б.Баасанцогтын гомдлыг хангахгүй орхисон байна.

Улсын дээд шүүхийн захиргааны хэргийн шүүх хуралдаанаар Мэргэжлийн хариуцлагын хорооны маргааныг анхан шатны журмаар хянан хэлэлцсэн Захиргааны хэргийн давж заалдах шатны шүүхийн 2021 оны 08 дугаар магадлалыг хэвээр үлдээж шийдвэрлэв.

-      Говь-Алтай аймагт 6 магнитуудын хүчтэй газар хөдлөлт боллоо

Говь-Алтай аймгийн Алтай сумын төвөөс зүүн хойд зүгт 46 километрийн зайд 6 магнитуудын хүчтэй газар хөдөллөө. Үндэсний статистикийн хорооны мэдээллээр, манай оронд 3.5 магнитуудаас хүчтэй газар хөдлөлт 2020 онд 56 удаа бүртгэгдсэн бол 2021 онд 255 болжээ. Харин 2010 онд 31 удаа газар хөдөлсөнтэй харьцуулбал сүүлийн 10 жилд энэ тоо 8 дахин нэмэгдсэн аж. Ташрамд тэмдэглэхэд, магнитууд гэдэг нь газар хөдлөлтийн төвд багажаар хэмжсэн үзүүлэлт бол, газрын хөрсөн дээр хүн болон барилга байгууламжид нөлөөлөх хүчийг баллаар хэмждэг. Газар хөдлөлтийн баллын хэмжээ 3-4 байвал хүнд мэдрэгдэх боломжтой, 6 баллаас хэтэрвэл барилга байгууламжид эвдрэл үүсэх магадлалтай, арваас хэтэрвэл барилга байгууламж нурах аюултай юм.

-      Э.Содномпилжээ 247,5 кг шахаж насанд хүрэгчдийн улсын дээд амжилтыг шинэчлэн тогтоолоо

“Токио-2020” паралимпын пауэрлифтингийн аварга, Хөдөлмөрийн баатар Э.Содномпилжээ пауэрлифтингийн хэвтээ шахалтын дээд амжилтыг шинэчлэн тогтоолоо. Энэ нь мөн дэлхийн дээд амжилтад тооцогдож байна. Тухайлбал, 2022 оны хэвтээ шахалтын 4 дахь удаагийн улсын аварга шалгаруулах тэмцээний -120 кг-ын жинд оролцож 247.5 кг шахан улсын дээд амжилтыг шинэчлэн тогтоолоо.

-      Согтуурлын зэргийг үлээхгүйгээр тодорхойлдог багаж ашиглаж эхэллээ

Согтуугаар тээврийн хэрэгсэл жолоодох зөрчлийг илрүүлэх явцыг сайжруулах, энэ төрлийн гэмт хэрэг, зөрчлийг таслан зогсоох зорилгоор БЗД дэх Замын цагдаагийн хэлтэс БНСУ-д үйлдвэрлэсэн IBLOW-10C тандагч багажийг ашиглаж эхэллээ.  Зарим тохиолдолд жолооч нар халдвар тараах эрсдэлтэй гэж үзэн үлээх багаж ашиглахаас татгалздаг. Тэгвэл согтуурлын зэрэг хэмжигч багаж нь үлээх шаардлагагүйгээр хүний бие болон гарт хүрэлцэхгүйгээр ашиглах боломжтой аж.

Замын хөдөлгөөнд оролцож буй жолооч нар тээврийн хэрэгслийг согтуугаар жолоодож байгаа эсэхийг тогтоохдоо халдвар хамгааллын дэглэмийг зөрчихгүйгээр согтуурлын хувь хэмжээг тогтоох давуу талтай гэж Баянзүрх дүүргээс мэдээллээ.

BOLOD.MN