BOLOD ДОЛОО ХОНОГИЙН ТОЙМ: Бөхчүүдийн А сорьцоос ДОПИНГ илэрч, хүчингийн хэрэгт холбогдоод буй Ц.Анандбазарыг УЕПГ-аас яллагдагчаар татсан ДОЛОО ХОНОГ

2021-10-30

BOLOD.MN сайт долоо хоног болгоны ням гараг бүр өнгөрсөн өдрүүдэд болж өрнөсөн онцлох үйл явдлуудыг тоймлон хүргэдэг уламжлалтай. Эдгээр өдрүүдэд Монголын Үндэсний бөхийн холбооноос дөрвөн бөхийн А сорьцоос допинг илэрснийг мэдээллээ. Түүнчлэн 2020 оны УИХ-ын сонгуулиар Хэнтий аймгаас сонгогдсон У.Анандбазарыг охид эмэгтэйчүүдэд бэлгийн дарамт учруулсан байж болзошгүй гэх хэргээр УЕП-ын газарт мэдээлж байсан. Тэгвэл УЕПГ-аас УИХ-ын гишүүн Ц.Анандбазарыг яллагдагчаар татан мэдүүлэг авч байгаа аж. Эдгээр болон бусад онцлох мэдээ мэдээлийн тоймыг хүргэж байна.

Допингийн шинжилгээнд дөрвөн бөх бүдэрлээ

Монгол Улсад Залуучуудын байгууллага үүсч хөгжсөний 100 жил, МҮБХ-ны 30 жил, Монгол бөхийг дэлхийн дээд амжилт Гиннест бүртгүүлсний 10 жилийн ойд зориулсан "ҮНДЭСНИЙ БӨХ-ҮНЭТ ӨВ" хүчит бөхийн барилдаан өнгөрсөн наймдугаар сарын 17-нд зохион байгуулагдаж, 512 бөх оролцсон билээ.

Тус барилдаанд оролцсон 18 бөхөөс допингийн шинжилгээ авахад дөрвөн дээжээс допинг илэрчээ. Тодруулбал, 512 бөхийн барилдаанд шөвгөрсөн 16, өөрийн саналаар хоёр, нийт 18 бөх допингын шинжилгээ өгсөн аж.

Монголын Үндэсний бөхийн холбооноос А сорьцоос допинг илэрсэн бөхчүүдийг 10 хоногт багтан Б сорьцоо шинжлүүлэх эсэх хариугаа өгөх ёстойг дуулгаж байв. Хэрэв шинжилгээний хариуг эсэргүүцэж байгаа бол Б сорьцоо шинжлүүлэх боломжтой бөгөөд хүсэлт гаргаагүй тохиолдол шинжилгээний хариуг хүлээн зөвшөөрсөнд тооцох аж. Бөхчүүдийн хүсэлтийг харгалзан Б сорьцод шинжилгээ хийж, дахин допинг илэрвэл нэрсүүдийг зарлах болно хэмээх МҮБХ-оос мэдээлж байв.

Ч.Сайханбилэгийг Интерполоо эрэн сурвалжлуулна

Ерөнхий сайд асан Ч.Сайханбилэгийг Дубайн гэрээ, "Эрдэнэт үйлдвэр"-ийн 49 хувийг хууль бусаар бусдад шилжүүлсэн гэх хэргүүдэд байцаалт авахаар АТГ, прокурорын байгууллага хүлээж буй.

Учир нь тэрбээр хоёр жилийн өмнө "...Солонгост эмчлүүлнэ" гээд хил давснаасаа хойш буцаж ирээгүй, үе үе цахим сүлжээгээр мэдэгдэл хийдэг болсон юм. Харин энэ хооронд нэг хэрэгт хамт шалгагдсан хүмүүс нь ял авч, нөгөө хэрэг нь нэмэлт мөрдөн байцаалтад буцсан. Мөн эдгээр хэргийн холбогдогчид "...Бүгдийг Ерөнхий сайд асан Ч.Сайханбилэг мэднэ" гэдэг байна.

Тиймээс өнгөрсөн долоо хоногт Засгийн газар, хууль хяналтын байгууллагын удирдлагуудын түвшинд Ч.Сайханбилэгийг Монголд авчрах талаар ярилцаж, эхний ээлжинд Интерполоор эрэн сурвалжлуулахаар болжээ. Хэрвээ Ч.Сайханбилэгийг авчирвал дээрх хэргүүдийн хамгийн том зохион байгуулагч ил болох юм байна.

УИХ-ын гишүүн Ц.Анандбазарыг прокурорын газраас яллагдагчаар татжээ

УИХ-ын гишүүн Ц.Анандбазарыг яллагдагчаар татах шийдвэрийг Нийслэлийн прокурорын газраас өнгөрсөн долоо хоногт гаргажээ. Түүнийг Эрүүгийн хуулийн 12.1.1-р заалтад үндэслэн /"Хүчиндэх"/ тогтоол гарган яллагдагчаар татахаар болсон байна.

ХҮНИЙ БЭЛГИЙН ЭРХ ЧӨЛӨӨ, ХАЛДАШГҮЙ БАЙДЛЫН ЭСРЭГ ГЭМТ ХЭРЭГ
12.1 дүгээр зүйл.Хүчиндэх

1.Хохирогчийн хүсэл зоригийн эсрэг хүч хэрэглэж, хүч хэрэглэхээр заналхийлж, эсхүл сэтгэцийн өвчтэй, согтуурсан, мансуурсан, сэтгэцийн үйл ажиллагаа нь түр сарнисан, бусад өвчний улмаас биеэ хамгаалах, эсэргүүцэл үзүүлэх чадваргүй, эсхүл эд хөрөнгө, албан тушаал, бусад нөхцөл байдлын улмаас эрхшээлдээ байгааг далимдуулан хүчээр бэлгийн харьцаанд орсон, эсхүл бэлгийн харьцааны шинжтэй хүч хэрэглэсэн үйлдэл хийсэн бол нэг жилээс таван жил хүртэл хугацаагаар хорих ял шийтгэнэ.

Цагдаагийн байгууллагаас өмнө нь хоёр ч удаа хэргийг хаах санал гаргасан боловч прокурорын газраас гэмт хэргийн шинжтэй гэж үзэж хаах саналыг хүлээн аваагүй байна. Дараагийн удаад яллагдагчаар татах санал ирэхэд нь хүлээн авч, тогтоолыг нь нийслэлийн прокрорын газраас хүлээн авч өнгөрсөн долоо хоногт пүрэв гарагт гаргаж, баасан гарагт мөрдөх байгууллагад нь өгсөн гэж УПЕГ-аас мэдээллээ.

Прокурорын байгууллага УИХ-ын гишүүний бүрэн эрхийг түдгэлзүүлэх хүсэлтээ тавих боломжтой байдаг эсэх талаар асуухад "Прокурорын газар гишүүний бүрэн эрхийг түдгэлзүүлэх хүсэлт гаргадаг боловч мөрдөх байгууллагаас прокурорын газар санал гаргадаг байна. Тэр санал нь ирээгүй байгаа учраас бид шууд их хуралд хүсэлтээ тавих боломжгүй байна. Мөрдөн шалгах ажиллагаанд саад учруулаагүй, дуудсан цагт нь мэдүүлэг өгсөн тохиолдолд заавал эргүүлэн татах хүсэлт явуулах шаардлагагүй байдаг" гэж хэллээ.

Э.Одбаярыг хилээр гарахыг хориглосон шийдвэртэйгээр сулаллаа

Эрх баригчдын алдаатай бодлого шийдвэрийг эсэргүүцэж, “Nodoublestandart” эсэргүүцлийн арга хэмжээг Сүхбаатарын талбай дээр зохион байгуулсан

“Зон олны нам”-ын дарга Э.Одбаярыг энэ сарын 6-ны өдөр хойшлуулашгүй үндэслэлээр баривчлан 461 дүгээр ангид баривчлан саатуулсан. Тодруулбал, Нийслэлийн прокурорын газраас Э.Одбаярт эрүүгийн хэрэг үүсгэж яллагдагчаар татан, хорих хүсэлтийг шүүх хүлээн авч “Батлан даалтанд байх хугацаандаа дахин хэрэгт холбогдсон” гэх үндэслэлээр нэг сар цагдан хорихоор шийдвэрлэсэн байдаг.

Тэрбээр саатуулагдсан өдрөөсөө буюу энэ сарын 6-наас шүүхийн шийдвэрийг эсэргүүцэж 23 хоног шоронд өлсгөлөн зарласан. Түүний биеийн байдал тун муу байгааг өмгөөлөгч нь мэдэгдэж, АН-аас суллах шаардлагыг тавьж байсан юм. Тэгвэл түүнийг Ерөнхий шүүгчийн шийдвэрээр суллах шийдвэрийг аравдугаар сарын 29-ны өдөр гаргажээ. Ингэхдээ Э.Одбаярыг хилээр гарахыг нь хориглосон байна. Мөн гэрээс гарахыг хориглож, эмнэлэг цагдаагаас өөр газраар зорчихгүй байхаар шийдвэрлэжээ.

11-р сарын 1-ээс 189 мянган өрхийн шөнийн цахилгааны төлбөрийг 100 хувь хөнгөлнө

Монгол Улсын Засгийн газрын 2017 оны долдугаар сарын 4-ний өдрийн 199 дүгээр тогтоолоор Гэр хорооллын айл өрхөд цахилгаан эрчим хүчний тарифын хөнгөлөлт үзүүлэх журам шинэчлэгдэн батлагдсан.

Тус тогтоолын дагуу агаарын бохирдлыг бууруулах зорилгоор гэр хорооллын өрхийн шөнө, оройн цагаар хэрэглэсэн цахилгааны тарифыг тэглэдэг билээ. Энэ хөнгөлөлт ирэх сарын 1-нээс эхэлж байгаа бөгөөд Улаанбаатар хот болон аймгийн төв, арван мянгаас дээш хүн амтай сум, суурин газрын айл өрхүүд хамрагдана.

Ингэхдээ стандартын шаардлага хангасан баталгаажсан тарифт тоолууртай, цахилгаан эрчим хүчний өр төлбөргүй гэр хорооллын хэрэглэгчид хөнгөлөлтөд хамрагдах шаардлага тавьж байгаа аж.

Цахилгаан, дулааны төлбөрийг тодорхой метр квадрат заан хөнгөлж байгаа ч ирэх сарын 1-нээс шөнийн хөнгөлөлтийг мөн тооцож эхлэх юм байна. Тухайлбал, арваннэгдүгээр сарын 1-нээс нийслэлийн гэр хорооллын 117 мянга, аймаг, орон нутгийн 72 мянган айл өрхийн шөнийн цахилгааны төлбөрийг 100 хувиар хөнгөлнө.

Энэ нь агаарын бохирдлыг бууруулахын тулд гэр хорооллын айл өрхүүдийг цахилгаанаар халаалт, дулаанаа шийдэхийг дэмжих зорилгоор хэрэгжүүлж буй нэг алхам юм. Энэ жилийн хөнгөлөлтөд гэр хорооллын 189 мянган айл өрх хамрагдаж, үүнд 4.7 тэрбум төгрөгийн хөнгөлөлт үзүүлэхээр төлөвлөсөн. Хөнгөлөлт ирэх сарын 1-нээс 2022 оны дөрөвдүгээр сарын 1-н хүртэлх хугацаанд оройн 21.00 цагаас өглөөний 06.00 цагийн хооронд үйлчлэх юм.

Төрсөн хүү дагавар охиноо хүчирхийлсэн этгээдийг саатуулжээ

Гэр бүлийн орчинд бэлгийн хүчирхийлэлд өртсөн бага насны хүүхдүүдийг хүүхэд хамгаалах төвд хүргэж, гэмт этгээдийг саатууллаа. Хан-Уул дүүргйин иргэн 42 настай эрэгтэй аравдугаар сарын 28-ны өдөр өөрийн төрсөн хүү болон дагавар охиноо хүчирхийлсэн жигшүүрт хэрэг гарчээ.

Түүнийг цагдаагийн байгууллагаас саатуулан шалгаж байгаа бөгөөд тэрээр өмнө нь хүчингийн хэргээр 8 жилийн хорих ял авч байсан ба улмаар өршөөлийн хуульд хамрагдан түүнчлэн хорих ангидаа сахилга баттай байсан хэмээн ялаа хөнгөлүүлэн хоёр жил болгон хөнгөлүүлж байсан байна. Ийнхүү өршөөлийн хуулиар суллагдан удаагүй байхдаа дээрх жигшүүрт хэргийг үйлдсэн нь тогтоогджээ.

Хүүхдийн хүчирхийлэл гэр бүлийн орчинд үйлдэгдэх тохиолдол хамгийн их буюу 80 орчим хувийг эзлэх болсныг мэргэжлийн байгууллагын судалгаа мэдээллүүд харуулдаг. Энэ нь ихэвчлэн гэр бүл салалт, архины хамааралтай эцэг эх, хоёр дахь амьдрал, хүүхдэд тавих гэр бүлийн хараа хяналт сул байдлаас үүдэлтэй байдаг аж.

Хэнтий аймагт хээрийн түймэр гарч, 300 га талбай шатжээ

Хэнтий аймаг, Галшар сумын Баянбадрал багийн “Зүүн адаг” гэдэг газар хээрийн түймэр гарчээ. Энэ тухай дуудлагыг 10 дугаар сарын 26-ны өдрийн 19:15 цагт онцгой байдлын газар хүлээн авсан байна.

Дуудлагын дагуу тус аймгийн Онцгой байдлын газрын Эрэн хайх аврах салбарын алба хаагчид, сумын Засаг даргын Тамгын газрын ажилтнууд 22:15 цагт очиход орон нутгийн иргэд 300 га талбай шатаж байсныг 21:25 цагт бүрэн унтраасан байжээ.

Facebook нэрээ “METO” болгон өөрчиллөө

“Facebook”-ийн үүсгэн байгуулагч, гүйцэтгэх захирал Марк Зукерберг Пүрэв гаригт компанийнхаа нэрийг “Meta” болгон өөрчилснөө зарлав. Энэ нэр тус компанийн тооцооллын платформд өрсөлдөх цаашдын эрмэлзлэлийг илтгэж байна гэж шинжээчид үзжээ.

Зукерберг “Манай компани одоо “Meta” болсныг мэдэгдэхэд таатай байна” гэжээ.

Ийнхүү “Facebook” компанийн нэр “Meta” болон өөрчлөгдсөн тухай мэдээ гарсаны дараа Нью-Йоркийн хөрөнгийн бирж дээр тус компанийн хувьцааны үнэ 2.75 хувиар өсч, нэгж хувьцаа нь 8.6 ам.долларт хүрчээ.

Шинэ нэршлээс үүдэн компанийн мэдээллийг ашиглах болон хуваалцах байдалд өөрчлөлт орохгүй бөгөөд компанийн бүтэц хэвээр үлдэх гэнэ. Мөн тус компани хувьцаагаа арванхоёрдугаар сарын 1-нээс эхлэн “MVRS” хэмээх шинэ тэмдэгтээр арилжаалахаар болжээ.

Эрээнд Ковид19-ийн 17 тохиолдол бүртгэгджээ

Хятадын Өвөр Монголын өөртөө засах орны Эрээн хотын тээвэр логистикийн паркийн нэгэн ажилтан Сovid-19-ийн халдвар авсан нь энэ сарын 13-нд тогтоогдсон. Улмаар Монгол Улс болон Хятад хоорондын хилийн гол боомт Эрээн ба Замын-Үүдийн боомт хаагдаад байгаа билээ. Аравдугаар сарын 30-ны өдрийн байдлаар тус хотод нийт 17 тохиолдол батлагдсан байгаа билээ.

Харин Эзнээ хошуунд одоогоор Covid-19-ийн халдварын нийт 114 тохиолдол бүртгэгдсэн. Эзнээ хошуу нь Монгол Улстай хиллэдэг бөгөөд Монгол-Хятадын нүүрс тээврийн гол гарцуудын нэг Сэхээ боомт тус хошууны нутаг дэвсгэрт байдаг. Covid-19-ийн тархалтын улмаас хөл хорио тогтоосонтой холбоотойгоор Эзнээ хошуунд 9400 гаруй жуулчин гацаад байсан бөгөөд тэдний эхний ээлж болох 2400 орчим хүнийг нутаг руу нь буцаасан байна.

Эзнээ хошуу нь оршин суугчдаа нийт таван удаа бүх нийтийн PCR-ын шинжилгээнд хамруулаад байна. Цар тахлын голомтод ажиллаж буй хүмүүс, тухайлбал эмч, цагдаа нараас өдөр бүр шинжилгээ авч байгаа аж.

BOLOD ДОЛОО ХОНОГИЙН ТОЙМ: Бөхчүүдийн А сорьцоос ДОПИНГ илэрч, хүчингийн хэрэгт холбогдоод буй Ц.Анандбазарыг УЕПГ-аас яллагдагчаар татсан ДОЛОО ХОНОГ
Tweet
Bolod.mn