BOLOD.MN сайт долоо хоног бүрийн ням гарагт өнгөрсөн өдрүүдэд болж өрнөсөн онцлох үйл явдлыг тоймлон хүргэдэг уламжлалтай. Эдгээр өдрүүдэд УИХ-ын 18, 28-р тойрогт УИХ-ын нөхөн сонгуулийн ирц хангалтгүйн улмаас дахин зохион байгуулах болсон юм. Санал хураалтыг өнөөдөр буюу 10-р сарын 16-ны 07:00 цагаас 22:00 цаг хүртэл зохион байгуулах юм. Мөн түүнчлэн БНХАУ-ын Эрээн хотод халдварын тохиолдол бүртгэгдсэн бөгөөд үүний улмаас БНХАУ-ын Эрээн боомтын үйл ажиллагааг тодорхойгүй хугацаагаар хаах шийдвэр гаргаад буй. Одоогоор Эрээн хотод халдварт өвчин судлалын шалгалт, холбогдох орчны ариутгал халдваргүйжүүлэлтийн ажил хийгдэж байна.

Нөхөн сонгуулийн нэмэлт санал хураалт өнөөдөр болно

УИХ-ын 18, 28-р тойрогт 10-р сарын 10-ны өдөр УИХ-ын нөхөн сонгуулийн санал хураалт 07:00-22:00 цагт болсон. Сонгогчдын ирц 18 дугаар тойрог буюу Хэнтий аймагт 34,29 хувь нь, 28 дугаар тойрог буюу Сонгинохайрхан дүүрэгт 39,04 хувьтай байсан билээ.

Нийт 148 хэсгийн хорооноос 17 хэсэгт сонгогчийн ирц 50 хувьд хүрчээ. Тодруулбал, Хэнтий аймгийн Баянмөнх 18-30, 18-29, Хэрлэн-18-10, Жаргалтхаан 18-62, 18-65, 18-61, 18-63, 18-64, Баян-Овоо 18-33, 18-31, Цэнхэрмандал 18-82, Баян-Адарга 18-24, Баян-Овоо 18-32, 18-34, Дэлгэрхаан 18-58, 18-57, СХД-ийн 11-р хороо буюу 28-36 хэсгийн хороонд нэмэлт санал хураалт явуулахгүй.

Харин нийт сонгогчдын ирц 50 хувьд хүрээгүй бусад хэсгийн хороодод Монгол Улсын Их Хурлын сонгуулийн тухай хуулийн 78 дугаар зүйлд заасны дагуу нэмэлт санал хураалт явуулах болсныг Сонгуулийн ерөнхий хорооны хуралдаанаар шийдвэрлэсэн.  Нэмэлт санал хураалтыг дээрх хоёр тойргийн 131 хэсэгт өнөөдөр буюу аравдугаар сарын 16-ны 07:00-22:00 цагт зохион байгуулна.

Сонгуулийн хуулийн дагуу маргааш нийслэлийн хэмжээнд согтууруулах ундаа худалдах, түүгээр үйлчлэхийг түр зогсоох, соёл, урлаг, үзвэр, спортын зэрэг олныг хамарсан аливаа арга хэмжээ зохион байгуулахгүй байх, гадаа болон битүү талбайд үйл ажиллагаа явуулдаг худалдаа, үйлчилгээний төвүүдийн тухайн долоо хоногийн амралтын өдрийг сонгуулийн нэмэлт санал авах өдөр буюу аравдугаар сарын 16-нд шилжүүлэхийг аж ахуйн нэгж, байгууллагын удирдлагуудад даалгасан Хотын даргын захирамж гарчээ.

УИХ-ын 28 дугаар тойргийн нөхөн сонгуулийн нэмэлт санал хураалтад Сонгинохайрхан дүүргийн 7-19, 21, 23, 25, 27-31, 38-40, 42, 43 дугаар хорооны сонгогчид саналаа өгнө.

Охидын эрхийг хамгаалах өдөр тохиолоо

Охидын олон улсын өдөр (International Day of Child girl) энэ сарын 11-ны өдөр тохиолоо. Энэ өдрийг охид хүүхдүүдээ хайрлан хамгаалах өдөр хэмээн нэрийдэж болох юм. 

Учир нь охин хүүхдүүдэд эрүүл өсөн төрж бойжихоос эхлээд эрхээ хамгаалах, хамгаалуулах, энд томчуул, олон нийтийн анхаарлыг хандуулж охидын эрхийг хамгаалах үүднээс НҮБ-аас тогтоол гарган 2012 оноос дэлхий нийтээр тэмдэглэх болжээ. НҮБ-ын Хүүхдийн сангаас гаргасан статистик мэдээллээр дэлхийн 20-24 насны бүсгүйчүүлийн 3-ны нэг нь хүчээр гэр бүл болон айлын эхнэр болж тэднийг 15 нас хүрээгүй байхад эрд гаргасан байдаг аж. Мөн 20-49 насны эмэгтэйчүүдийн 41 хувь нь буюу 400 сая нь 28 нас хүрээгүй байхдаа айлын эхнэр болсон статситик тоо байна.

Монгол Улсын нийт хүн амын 51 хувийг эмэгтэйчүүд, түүний 35 хувийг 0-19 насны охид эзэлдэг. Нийт хүн амын хувьд 18 хувийг охид эзэлдэг гэсэн статистик тоо баримт бий. Охид тэр тусмаа өсвөр насныханд нөхөн үржихүйн эрүүл мэндийн боловсролын мэдлэг, мэдээлэл дутмаг байдгаас эрт жирэмслэх, улмаар үр хөндүүлэх, жендерт суурилсан хүчирхийлэлд өртөх зэрэг олон зүйлтэй тулгардаг. Энэ мэтчилэн охид эмэгтэйчүүдийг хүчирхийлэх гэмт хэргийн тоо жилээс жилд өсөн нэмэгдэж насанд хүрээгүй охид гэмт хэргийн золиос болсоор байна.

Хятадад шатахууны үнэ нэмэгджээ

“Синьхуа” агентлагийн мэдээлснээр Хятадын үндэсний хөгжил, шинэчлэлийн хорооноос шатахуун, дизелийн жижиглэнгийн үнийг мэдэгдэхүйц хэмжээгээр нэмэхээр болжээ. 

Тухайлбал, шатахууны үнийг нэг тонн тутамд 345 юаниар буюу ойролцоогоор 53.4 ам.доллараар өсгөх юм. Харин дизель түлшийг 330 юаниар нэмэгдүүлэхээр болсныг Үндэсний хөгжил, шинэчлэлийн хорооноос мэдээлсэн байна. Дэлхийн эдийн засгийн сэргэлтийг дагаж олон улсын түүхий нефтийн үнэ богино хугацаанд өсөх хандлагатай байгаа гэж мэдээлэлдээ дурджээ.  Мөн олон улсын түүхий нефтийн үнэ тонн тутамд 50 гаруй юаниар өөрчлөгдөж, ажлын 10 хоногийн турш энэ түвшинд байвал Хятадын талаас бензин, дизель зэрэг боловсруулсан нефтийн бүтээгдэхүүний үнийг зохих ёсоор тохируулна гэдгээ илэрхийлсэн байна. Үүнтэй холбоотойгоор Хятадын үндэсний газрын тосны гурван том компани болох Хятадын үндэсний газрын тосны корпораци, “China Petroleum & Chemical” корпораци, Хятадын үндэсний офшор газрын тосны корпорациас тогтвортой нийлүүлэлтийг хангахын тулд газрын тосны үйлдвэрлэлээ хадгалах, тээвэрлэлтийг хөнгөвчлөхийг хүсчээ. 

Бясалгалын төвөөс сураггүй болсон эмэгтэйн цогцос жорлонгийн нүхнээс олджээ

Одоогоос жил гаруйн өмнө буюу өнгөрөгч 2020 оны долоодугаар сарын 31-ний өдөр Налайх дүүрэгт байрлах “Тэнгэрийн энерги” бясалгалын төвөөс 25 настай эмэгтэй сураггүй алга болсон тухай мэдээллийг өмнө нь хүргэж байсан.

Дээрх эмэгтэйг онцгой байдлын газар болон цагдаагийн байгууллагаас хоёр сар гаруйн хугацаанд эрэн сурвалжилсан ч үр дүнд хүрээгүй тул ар гэрийнхнийх нь хүсэлтээр ажиллагааг зогсоосон байдаг. Тэгвэл 10-р сарын 12-ны шөнө дээрх эмэгтэйн цогцос Налайх дүүргээс олдсон байна. Талийгаачийн цогцсыг хоёр метрийн гүн ухсан жорлонгийн нүхнээс гарган авчээ.

Тодруулбал, “Налайх дүүргийн зургаадугаар хорооны нутаг дэвсгэр, Ээлтэй гэх газарт цогцос байж болзошгүй байна” гэх дуудлага дүүргийн цагдаагийн газарт ирсэн байна. Дуудлагын дагуу албаныхан хэргийн газарт очиход жилийн өмнө сураггүй алга болж, эрэн сурвалжлагдаж байсан 25 настай О-ийн цогцос болох нь тогтоогдсон байна. Одоогоор  цогцсыг шүүхийн шинжилгээний хүрээлэнд хүргүүлж, үхлийн шалтгааныг тодруулахаар ажиллаж байгаа ба талийгаач нас бараад удсан гэж урьдчилсан байдлаар дүгнэжээ.

Өршөөлд үзүүлэх тухай хуулиар 1212 яллагдагчид холбогдох хэргийг хэрэгсэхгүй болгожээ

Прокурорын байгууллага 2021 оны 3 дугаар улирлын байдлаар гэмт хэргийн талаарх 50651 гомдол, мэдээлэлд хяналт тавьж ажилласнаас 48.4 хувьд нь хэрэг бүртгэлтийн хэрэг нээхээс татгалзаж, 31.1 хувьд нь хэрэг бүртгэлтийн хэрэг нээн, 11.2 хувьд нь эрүүгийн хэрэг үүсгэн яллагдагчаар татаж шалгасан байна. Гэмт хэргийн талаарх гомдол, мэдээлэл өнгөрсөн оны мөн үетэй харьцуулахад 4671-р буюу 8.4 хувиар буурчээ. Хэрэг бүртгэлтийн ажиллагаа явуулсан 42249 хэрэгт хяналт тавьснаас 7814 буюу 18.5 хувийг нь эрүүгийн хэрэг үүсгэн яллагдагчаар татаж, 10934 буюу 25.9 хувийг нь хааж шийдвэрлэсэн байна. Хэрэг бүртгэлт явуулсан хэрэг өмнөх оны мөн үеэс 34.3 хувиар буурсан боловч эрүүгийн хэрэг үүсгэж яллагдагчаар татсан хэрэг 0.6 хувиар өссөн байна.

Мөрдөн байцаалтын ажиллагаа явуулсан 15662 хэрэгт хяналт тавьснаас 56.3 хувьд нь яллах дүгнэлт үйлдэн шүүхэд шилжүүлж, 8.4 хувийг нь хэрэгсэхгүй болгон шийдвэрлэжээ. Хэрэгсэхгүй болгосон 1309 хэргийн 1051 буюу 80.2 хувийг Тулгар төр байгуулагдсаны 2230 жил, Их Монгол Улсын 815 жил, Ардын хувьсгалын 100 жилийн ойг тохиолдуулан, коронавируст халдвар /КОВИД-19/-ын цар тахлын нийгэм, эдийн засагт үзүүлэх сөрөг нөлөөллийг бууруулах зорилгоор баталсан Өршөөл үзүүлэх тухай хуульд заасан үндэслэлээр хэрэгсэхгүй болгож шийдвэрлэсэн байна. Өршөөл үзүүлэх тухай хуулиар 1051 хэргийн 1212 яллагдагчид холбогдох хэргийг хэрэгсэхгүй болгосон бөгөөд өсвөр насны буюу 14-17 насны 87, 18-30 насны 454, 31-44 насны 524, 45–аас дээш насны 198 яллагдагч тус тус хамрагджээ. Хүйсийн хувьд эрэгтэй 1010, эмэгтэй 202 хүн байна.

Эрүүлжүүлэх байранд хүн нас баржээ

Өнгөрөгч амралтын өдөр Чингэлтэй дүүргийн эрүүлжүүлэх байранд нэр хаяг тодорхойгүй 50 орчим насны эрэгтэй нас баржээ. Аравдугаар сарын 8-ны өглөөний 07.00 цагийн орчимд Чингэлтэй дүүргийн таван буудлын орчмоос “Архи согтууруулах ундааны зүйл хэрэглэсэн хүн байна” гэх дуудлагын дагуу цагдаагийн алба хаагч очиж, эрүүлжүүлэх байранд хүргэсэн байна.

Улмаар талийгаач эрүүлжүүлэх байрт хүргэгдэж ирмэгцээ амьсгал хураажээ. Задлан шинжилгээний дүгнэлтээр талийгаач нь гаднын нөлөөтэйгөөр тархиндаа гэмтэл авсны улмаас нас барсан болох нь тогтоогдсон байна.
Энэ хэрэгт 52 настай эрэгтэй З гэгчийг холбогдуулан шалгаж байгаа ба тэрбээр талийгаачтай маргалдсаны улмаас цохиж унагасан нь ийнхүү үхэлд хүргэсэн байна.

Эрээний боомт хаагдаж ачаа тээвэр зогсонги байдалд орлоо

Энэ сарын 14-ний өдрөөс эхлэн Эрээний боомтыг тодорхой хугацаагүйгээр хаах шийдвэр гаргаад байгаа. Өөрөөр хэлбэл  БНХАУ-ын Эрээн хотод халдвар гарсан юм. Үүний улмаас нийт оршин суугчдаа бүгдийг нь шинжилгээнд хамруулах шаардлага үүссэн. Иймд боомтын үйл ажиллагааг түр зогсоох шаардлагатай байгаа гэдгээ БНХАУ-ын талаас манай улсын хилийн байгууллагад мэдэгджээ.

Манай улсаас тээвэр хийж байгаа жолооч нар Хятадын ямар ч иргэнтэй контакт хийхгүй байхаар зохицуулагдсан байдаг бөгөөд тээвэрчдийн зүгээс халдвар хамгааллын дэглэм зөрчсөн зүйл байхгүй гэдгийг Хууль Зүйн сайд Х.Нямбаатар мэдээлэв.

Харин дээрх асуудлыг хэлэлцэн наашлуулах талаар Гадаад харилцааны яам холбогдох шугамаар ажиллаж байгаа бөгөөд хэзээ Эрээний боомт нээгдэхийг мэдэхгүй, үүнээс үүдэх хохиролыг урьдчилан тооцоолох боломжгүй гэдгийг сануулж байсан юм.

10 настай хүү буудуулж амиа алджээ

Архангай аймгийн нутаг дэвсгэрт “10 настай эрэгтэй хүүхэд буудуулж нас барсан” гэх дуудлага мэдээллийг 2021 оны 10 дугаар  сарын 13-ны өдөр иржээ. Дуудлага мэдээллийн цагдаагийн байгууллага хэргийн газар очиж шалгахад амиа алдсан хохирогч 10 настай эрэгтэй "Х" гэгчийг түүний төрөл садангийн 38 настай эрэгтэй "Д" гэгч нь сум алдаж амь насыг нь хохироосон байж болзошгүй нөхцөл байдал урьдчилсан байдлаар тогтоогдсон.

Холбогдох шалгалтын ажиллагааг Архангай аймаг дахь цагдаагийн газар үргэлжлүүлэн явуулж байна.

УИХ-ын гишүүн С.Жавхлан УИХ-ыг огцохыг шаардаж суулт зарлаж эхэллээ

УИХ-ын гишүүн асан, МУГЖ С.Жавхлан УИХ, Засгийн газрыг тарахыг шаардан төв талбайд суулт хийж эхэллээ. Тэрээр “УИХ, Засгийн газрыг огцортол би эндээс хөдлөхгүй. Хэдэн сар, жил болох нь хамаагүй. Би хэлсэн үгэндээ хүрдэг залуу. Гэхдээ хуулийн дагуу гурвууланг нь буулгах боломж байдаггүй юм байна. Аль нэг нь ажлаасаа буугаад, бусад нь тарах боломж байдаг юм билээ. Тиймээс Ерөнхийлөгчөөс онцгой байдал зарлаж, Засгийн Газрыг тараана уу гэж хүсмээр байна. Мод тарьж, шоу хийгээд яваад байх юм. Олон зуун хүн үхэж байхад ажлаа хийхгүй байна. Тиймээс төрийн удирдлагууд надтай ирж уулзаж, миний асуултад хариултал би энд сууна. Би Л.Оюун-Эрдэнэ, Г.Занданшатар нарыг дуудаж гаргаж ирж нээлттэй мэтгэлзэнэ. Тэднээс амьтны үр хүүхэд цуглуулж, өвчин хууч тараасан, монгол түмний эсрэг шийдвэр гаргаж байгааг асууна. Тэдний гаргасан нэг оновчтой шийдвэр алга" гэлээ.