BOLOD.MN  сайт долоо хоногийн ням гараг бүр улс төр, нийгэм, эдийн засгийн хүрээнд болж өрнөсөн онцлох үйл явдлуудыг тоймлон хүргэдэг уламжлалтай. Эдгээр өдрүүдэд Ардын хувьсгалын 100 жилийн ойн хүрээнд авч хэрэгжүүлж буй үйл явдлуудыг нэг болох өршөөлийн тухай хууль хэрэгжиж эхэллээ. Түүнчлэн сүүлийн өдрүүдэд өрнөж буй халуухан сэдвүүдийн нэг болох Замын-Үүдийн авилагын хэргийг АТГ-аас шалгалт хийж буй. Шалгалтаар хэд хэдэн ноцтой хэргүүдийг шалган саатуулсан. Эдгээр болон бусад онцлох мэдээ мэдээллийг BOLOD.MN сайт тоймлон хүргэж байна.

Ардын хувьсгалын 100 жилийн ойн баяр наадмын хүндэтгэлийн хуралдаан боллоо

Энэ сарын 9-ны өдөр УИХ-ын  хүндэтгэлийн хуралдаан боллоо. Хаврын чуулган хаалтаа хийсэн хэдий  ч Ардын хувьсгалын 100 жилийн ойд хүндэтгэл үзүүлэх утгаар хүндэтгэлийн хуралдаан зохион байгуулсан аж. Хүндэтгэлийн хурлын үеэр УИХ-ын дарга Г.Занданшатар болох Монгол Улсын Ерөнхийлөгч Ухнаагийн Хүрэлсүх цахимаар оролцож үг хэллээ. Тэрээр “Монголын ард түмний Үндэсний их баяр наадам гэдэг бол Монгол Улс, монгол үндэстэн, монгол хүний хувьд төрт ёс, тусгаар тогтнол, түүх соёл, эв нэгдэл, мандан бадрахын бэлгэдэл, монгол үндэстний оюун санааны дархлаа, нүүдэлчин соёл иргэншил, зан заншлын түүхэн уламжлал бөгөөд үеийн үед мөнхлөн тэмдэглэж байх ёстой үнэт зүйл юм. Гэвч энэ удаа дэлхий нийтэд түгээд байгаа “Ковид-19” цар тахлын хор хохирлыг тооцон манай улсын эрдэмтэн судлаачид, мэргэжлийн байгууллагуудын өгч буй зөвлөгөө, шийдвэрийг үндэслэн Монгол Улсын Засгийн газраас Үндэсний их баяр наадмыг энх тунх сайн цаг ирэхэд тэмдэглэхээр хойшлуулаад байна.

Энэ шийдвэр нь манай улсад тохиолдож болзошгүй аюулт эрсдэлээс үр хүүхэд, ард иргэдийнхээ амь нас, эрүүл мэндийг хамгаалсан, аж амьдрал, сэтгэл санааны хувьд нөхөж баршгүй хохирол амсаад байгаа иргэддээ хүн ёсны хувьд ч, ёс суртахууны хувьд ч хүндэтгэлтэй хандсан хүнлэг шийдвэр гэдгийг манай ард түмэн уужим саруул ухаандаа тунгаан ойлгож байгаа гэдэгт итгэлтэй байна” гэсэн юм.

Л.Оюун-Эрдэнийг МАН-ын даргаар бүртгэлээ

Улсын Дээд шүүхийн нийт шүүгчийн хуралдаан 2021 оны 7 дугаар сарын 9-ний өдөр хуралдав. 

Хуралдаанаар Монгол Ардын намын даргын өөрчлөлтийг бүртгүүлэх тухай хүсэлтийг хэлэлцээд тус намын Бага хурлын 2021 оны 6 дугаар сарын 25-ны өдрийн XI хуралдаанаас Л.Оюун-Эрдэнийг намын даргаар сонгосон үйл ажиллагаа Улс төрийн намын тухай хууль болон тухайн намын дүрэмд нийцсэн байх тул намын даргын өөрчлөлтийг бүртгэж шийдвэрлэжээ.

Мөн Монгол Улсын шүүхийн тухай хуулийн 27 дугаар зүйлийн 27.1.5 дахь хэсэгт заасны дагуу Шүүхийн сургалт, судалгаа, мэдээллийн хүрээлэнгийн захирлаар Н.Отгончимэгийг томилох асуудлыг Улсын дээд шүүхийн Шүүгчдийн зөвлөгөөнд танилцуулав.

Торгуулийн 50 хувийг тэглэж, жолоодох эрхийг сэргээнэ

Үндсэн хуулийн 25 дугаар зүйлд өршөөл үзүүлэх шийдвэр гаргах онцгой бүрэн эрх зөвхөн Улсын Их Хуралд хадгалагдана хэмээн заасан байдаг.   Энэ эрхийнхээ хүрээнд парламент 1991, 1996, 2000, 2006, 2009, 2015 онд нийт зургаан удаа Өршөөл үзүүлэх тухай хуулийг баталсан байна.  Тэгвэл Ардын хувьсгалын 100 жилийн ойгоор долоо дахь удаагийн Өршөөл үзүүлэх тухай хуулийг баталж, өнөөдрөөс хүчин төгөлдөр мөрдөгдөж эхэллээ. Энэ удаагийн хуулиар 3.6 хувь нь суллагдаж, 8.9 хувийнх нь хорих ялыг зорчих эрхийг хязгаарлах ялаар сольж, 4.5 хувийнх нь хорих ялаас хоёр жилээр хасна. 

Хуулийн хэрэгжилттэй холбоотой асуудлаар ХЗДХ-ийн сайд Х.Нямбаатар мэдээлэл хийж байна. Тэрбээр:  -Тулгар төр байгуулагдсаны 830, Ардын хувьсгалын 100 жилийн ойг тохиолдуулан цар тахлын үеийн нийгэм эдийн засагтай холбоотой Өршөөлийн хуулийг УИХ баталлаа. Энэ хууль долдугаар сарын 6-наас хэрэгжиж эхэлнэ. Хэрэг үйлдсэн болон шүүхээр хянан шийдвэрлэх шатан байгаа хэрэг хамаарна. Нөхөн төлбөрөө төлсөн болон төлөхөө амласан байх хэрэгтэй. Мөрийтэй тоглоом, цахим гэмт хэрэг, мөнгө угаах, хүн алах, галт зэвсэг  зэрэг гэмт хэрэг энэ хуульд хамаараагүй. Өмнө нь Өршөөл үзүүлэх хуульд хамрагдаад дахин гэмт хэрэг үйлдсэн бол өршөөлд хамааруулаагүй. Шүүхээс таван жил, түүнээс бага хугацаа үлдсэн бол хамаарна. Зорчих эрх нь хязгаарлагдсан бол байнга оршин суух хаягтай байхыг шаардаж байна. Зорчих эрхийг нь хязгаарласан тохиолдолд цахим бугуйвч зүүлгэнэ.

Жолоочийн торгуулийн шийтгэлийг 10 дугаар сарын нэгний дотор 50 хувиа төлсөн тохиолдолд үлдсэнийг нь өршөөнө. Торгуулиа хугацаанд нь төлсөн тохиолдолд 50 хувиар хөнгөлөх хуулийн зохицуулалт хийнэ. Маргаашаас 160 хоригдол шууд суллагдана. Нийт 4000 гаруй этгээд өршөөлд хамрагдаж байгаа гэв. 

АН-ын бүлэг Засгийн газрыг огцруулна хэмээн мэдэгдлээ

УИХ дахь АН-ын бүлэг Засгийн газрыг огцруулах талаар мэдээлэл хийлээ. УИХ дахь АН-ын бүлгийн дарга Д.Ганбат, "АН-ын бүлэг ээлжит хурлаар хоёр асуудал хэлэлцлээ. Нэгдүгээрт, нийслэл хотын эрх зүйн байдлын тухай, хоёрдугаарт цар тахлын нөхцөл байдлын талаар ярилцлаа. Нийслэлийн эрх зүйн асуудалд өөрчлөлт оруулах нь зүйтэй. Улаанбаатар хотыг зоригтой өөрчлөхгүй бол түгжрэл хэцүүдэж байгаа ярилцаад, дээрх хуулийг дэмжих нь зүйтэй гэж үзэв.

Сүүлийн 24 цагт 1500 хүн халдвар авч, 12 хүн нас барж, нийтдээ 620 гаруй хүн нас барж, 130 мянга гаруй хүн халдвар авчээ. Монгол улсад хүний амь нас үнэхээр үнэ цэнэгүй болчихжээ. Юмны үнэ тэнгэрт хадсанаар иргэн "Тэнгэр хол, Газар хатуу" нөхцөлд амьдарч байна. МАН цар тахлын хуулийг хүч түрэн баталлаа. Энэ зүйлтэй АН-ын бүлэг санал нийлэхгүй. Засгийн газар цаг үетэйгээ нийцсэн шийдвэрийг гаргаж чадахгүй байна. Тиймээс АН-ын бүлгийн гишүүн ярилцаад, энэ засгийн газарт хариуцлага тооцохоор гарын үсэг цуглуулж эхэллээ. 

Саун, бассейн, фитнесс, амралтын газрууд ажиллаж эхэллээ

Нийслэлд үйл ажиллагаа явуулдаг амралтын газар, саун, бассейн, фитнес, бялдаржуулах төв зэрэг байгууллагын 400 орчим төлөөлөлтэй Нийслэлийн Засаг дарга бөгөөд Улаанбаатар хотын Захирагч Д.Сумъяабазар болон Улаанбаатар хотын Ерөнхий менежер бөгөөд Захирагчийн ажлын албаны дарга Т.Гантөмөр нар уулзлаа. Дээрх аж ахуйн нэгжүүдтэй халдвар хамгааллын дэглэмээ мөрдөн үйл ажиллагаа явуулах Хариуцлагын гэрээ байгуулж, үйл ажиллагааг нь нээхээр болов. Саун, бассейн, фитнес, амралтын газруудыг зогсоосон хугацаа ийнхүү дуусгавар болж байгаа юм. Түүнчлэн зарим шаардлагатай өөрчлөлтийг гэрээний хавсралтаар тусгажээ.

Цагаан хад суурьшлын бүсэд тогтоосон тэг зогсолт 7-р сарын 20 хүртэл үргэлжилнэ

Өмнөговь аймгийн Ханбогд сумын Цагаан хад суурьшлын бүсэд үүссэн цар тахлын нөхцөл байдлын улмаас энэ сарын 6-ныг хүртэл ТЭГ зогсолт хийх тухай А/205 тоот захирамжийг тус сумын Засаг дарга гаргасан. 

Тов ёсоор долдугаар сарын 6-ны өглөө ТЭГ зогсолтын хугацаа дуусгавар болох байсан ч уг захирамжийн хэрэгжилтийг сунгаж, долдугаар сарын 20-н хүртэл үргэлжлүүлэхээр болжээ. Энэ хугацаанд Цагаан хад суурьшлын бүс дэх үйлчилгээний байгууллагын үйл ажиллагааг эхлүүлж 08:00-16:00 цаг байхаар тогтоосон байна.

Ахлах ахлагч Э.Даваажамц 33 дахь өдрөө гүйж, Улаанбаатарт ирлээ

Ховд аймгийн Буянт сумын харьяат, Зэвсэгт хүчний 123 дугаар ангийн хөгжимчин, ахлах ахлагч Э.Даваажамц Ховдоос Улаанбаатар хот хүртэл 1500 км зайд гүйхээр 2021 оны зургадугаар сарын 2-ны өдөр гараанаас гарсан.

Тэрбээр 33 дахь өдрөө гүйж, Улаанбаатар хотод өнөө өглөө ирсэн байна. Э.Даваажамц долдугаар сарын 10-ны өдөр буюу Монгол Улсын Төрийн далбааны өдөрт зориулсан цэргийн ёслолын жагсаалын үеэр Улаанбаатар хот, Сүхбаатарын талбайд барианд орохоор тооцоолсон боловч, Үндэсний баяр наадам хойшилсон тул үргэлжлүүлэн гүйж, Дорнод аймагт хүрэхээр төлөвлөжээ.

Э.Даваажамц 3 сарын хугацаанд бэлтгэл хийсэн бөгөөд тэрбээр энэ удаагийн гүйлтээ Монгол Улсад Зэвсэгт хүчин үүсэн байгуулагдсаны 100 жил, Ховд аймаг байгуулагдсаны 90 жилийн ой, ирэх жил буюу 2022 онд тохиох Ардын Хатанбаатар Магсаржавын нэрэмжит ЗХ-ний 123 дугаар анги байгуулагдсаны 100 жилийн ойд зориулж байгаа хэмээж байв.

МУГТ Ц.Шаравжамцын хүү Леброны хүүг хожлоо

МУГТ Ц.Шаравжамцын хүү Ш.Энхийн-Од NBA-д тоглосон Монголын анхны тамирчин болох зорилготой өдгөө АНУ-д сурч, бэлтгэл сургуулилтаа хийж байгаа билээ. Тэгвэл өнөөдөр/2021.07.03/ Ш.Энхийн-Одын “Midwest” баг Леброн Жэймсийн хүү Бронни Жэймсийн “Strive For Greatness” багтай тоглож, 99-97 гэсэн харьцаатай ялалт байгуулжээ.

Энэхүү тоглолт Леброн Жэймсийн сурч байсан Акрон хотын Сент-Винсет-Сент-Мэри ахлах сургуулийн заланд зохион байгуулагдаж, домогт Леброн Жэймс өөрийн биеэр ирж, хүүгээ дэмжжээ. NBA-ийн гурван удаагийн аварга Дэнни Гриний зохион байгуулж буй “The Battle: Summer Showcase” хэмээх тэмцээний хүрээнд дээрх хоёр баг тоглож, Ш.Энхийн-Од баг ялалт байгууллаа “247Sports” сайтын гаргасан чансаагаар Бронни Жэймс 2023 оны NBA-ийн драфтын ангийг 28-д жагсчээ.

Минжийг байгальд дасгах хиймэл цөөрөм байгууллаа

Амьтан нутагшуулах ажлыг хийхэд хатуу, зөөлөн хоёр аргыг хэрэглэдэг. Хатуу арга гэдэг нь амьтнаа шинэ нутагт шууд тавихыг хэлнэ.  Харин зөөлөн арга нь амьтныг амьдрах орчинд нь бага багаар дасган, аажмаар сулладаг.Нийслэлийн Байгаль орчны газрын зүгээс олон жилийн судалгаанд үндэслэн, зөөлөн аргыг сонгон ажиллаж байгаа бөгөөд үр дүнг нэмэгдүүлэх зорилгоор минжийг байгальд дасгах хиймэл цөөрөм байгууллаа. Ингэснээр минжний шинэ орчинд дасах, байгальд амьдрах чадвар нэмэгдэх боломж бүрдэнэ. Цаашид Минж үржүүлэх, нутагшуулах төв орчмын газрыг орон нутгийн хамгаалалтад авснаар цөөрмийн тоог нэмэгдүүлэх төлөвлөгөөтэй байна.

Генерал С.Ганбатыг Замын-Үүдийн хэрэгтэй холбогдуулан саатууллаа

Хууль зүй, дотоод хэргийн сайд Х.Нямбаатараар ахлуулсан, Авилгатай тэмцэх газрын ахлах мөрдөгч, Эрүүгийн цагдаагийн газрын алба хаагчдаас бүрдсэн ажлын хэсэг Замын-Үүд суманд ажиллаж, нэр бүхий зургаан албан тушаалтныг саатуулсан талаар өмнө нь бид мэдээлсэн. 

Учир нь, Замын-Үүд боомтод иргэдийн болон аж ахуйн нэгжүүдийн ачаа бараа бөөгнөрч, хүндрэл үүсгэж буй асуудал нь  албан тушаалтнуудын ашиг сонирхлын зөрчилтэй холбоотой байж магадгүй нөхцөл байдал үүсээд байгаа юм. 

Тэгвэл долдугаар сарын 7-ны шөнө Дотоодын цэргийн штабын дарга, Бригадын генерал С.Ганбатыг дээрх хэрэгт холбогдуулан Тагнуулын ерөнхий газраас түр саатуулсан байна.Түүнийг хууль бус их хэмжээний орлоготой холбогдуулан саатуулсан бол генерал С.Ганбатыг гэрээс 500 мянган ам.доллар бэлнээр хурааж авсан байна.