BOLOD.MN сайт ням гараг бүр өнгөрөгч өдрүүдэд улс төр, нийгэм, эдийн засгийн хүрээнд болж өрнөсөн онцлох үйл явдлуудыг тоймлон хүргэдэг уламжлалтай. Эдгээр өдрүүдэд Монгол улсын зургаа дахь Ерөнхийлөгчөөр сонгогдсон У.Хүрэлсүх тангаргаа өргөж, бүрэн эрхээ баталгаажууллаа. Түүнчлэн Улсын Их баяр наадмыг цахимаар тэмдэглэхээр болж наадамд төсөвлөгдсөн 10 тэрбум төгрөгийг Эрүүл мэндийн салбарт зарцуулахаар боллоо. Эдгээр болон бусад онцлох мэдээ мэдээллийг blood.mn сайт тоймлон хүргэж байна.

У.Хүрэлсүх ерөнхийлөгчийн тангаргаа өргөж, бүрэн эрхээ баталгаажууллаа

Монгол Улсын Ерөнхийлөгчөөр сонгогдсон У.Хүрэлсүх тангараг өргөж, бүрэн эрхээ баталгаажууллаа. Тангаргаа өргөсөн Монгол Улсын Ерөнхийлөгч У.Хүрэлсүх ард түмэндээ хандаж үг хэллээ. Тэрбээр "Миний бие бүрэн эрхт, бүтэн заяат туурга тусгаар Монгол Улсынхаа Төрийн тэргүүний өндөр сэнтийг түшиж, Үндсэн хуулиар олгогдсон эрх үүргийг шударгаар сахин биелүүлэхээ андгайлан Монгол Төрийн тамгыг гардан авч байна. Эгэл жирийн жолоочийн гэр бүлд төрж өссөн надад буурал дээдсээс өвлөгдөн ирсэн агуу түүхт Монгол төрийг толгойлох их хувь заяаг оноож, өндөр их итгэл найдвар хүлээлгэсэн эрх хүндэт ард иргэд, сонгогч түмэндээ гүн талархал илэрхийлэн мэхийн ёсолж байна.

Миний бие энэхүү их итгэл найдварыг, ард түмнийхээ язгуур эрх ашгийг эрхэмлэн дээдэлж, улс орныхоо тусгаар тогтнол, аюулгүй байдлыг бататган бэхжүүлж, хүний эрх, эрх чөлөө шударга ёс, үндэсний эв нэгдлээ сахин хамгаалахын төлөө хичээн зүтгэх болно. Миний бие нийгэмд шударга ёс тогтоохын тулд хүн засагладаггүй, хууль засагладаг ардчилсан шударга төрийг жинхэнэ утгаар нь байгуулахын төлөө хичээн зүтгэнэ. Задарсныг нь засагладаг, ядарсныг нь хайрладаг төртэй байх ёстой. Энэ бол Монгол төр юм. Зөвийг эрхэмлэж, эвийг сахисан Төрийн тэргүүн байна” хэмээлээ.

Я.Содбаатар ЕТГ-ын даргаар томилогдож тамгаа гардан авлаа

Шадар сайд асан Я.Содбаатар, Ерөнхийлөгчийн тамгын газрын дарга асан Ө.Шижирийн халааг авч, тамгаа гардан авлаа. Тэрбээр Ерөнхийлөгчийн тамгын газрын даргаар томилогдсон даруйдаа ажилдаа орж эхэлжээ. 

Я.Содбаатарын хувьд УИХ-ын гишүүн, Засгийн газрын сайд, Шадар сайдаар ажиллаж байсан юм.

Ерөнхий сайд Л.Оюун-Эрдэнэ МАН-ын даргаар томилогдлоо

Ардын намын Бага хурал яг одоо хуралдаж байна. Бага хуралд оролцсон гишүүдийн олонх нь Ерөнхий сайд Л.Оюун-Эрдэнийг намын даргаар томилжээ. Тодруулбал, МАН-ын УЗ-өөс энэ сарын 25-ны өдөр Ерөнхий сайд Л.Оюун-Эрдэнийг намын даргад томилуулахаар шийдвэрлэж Бага хуралд оруулсан юм. Сануулахад, Их Хурлын чөлөөт цагт намын даргын орон гарсан тохиолдолд Бага хурлаас намын даргыг шинээр сонгож эрх нь Бага хуралд хадгалагдаж байгаа юм.

Цахим наадам гурван тэрбум төгрөг зарцуулна

Улсын баяр наадмыг зохион байгуулахтай холбогдуулан Наадмын комиссоос мэдээлэл хийлээ. Үндэсний их баяр наадмын зохион байгуулах хорооны ажлын хэсгийн дарга Баатархүү "Үндэсний их баяр наадам нь тогтмол хугацаанд зохион байгуулдаг хуульчлагдсан баяр. Энэ жил наадмыг хүй долоон худагт цахим байдлаар зохион байгуулахад бэлтгэл ажил эхэлж байна. Энэ жил наадмыг 2.8-3 тэрбум төгрөгийн хооронд хийнэ. Ардын хувьсгалын 100 жилийн ойн тэмдэглэлт нь үүнээс тусдаа бүтэн жил үргэлжлэх зүйл юм. 10 тэрбум төгрөг нь Ардын хувьсгалын 100 жилийн ойн бүтэн жилийн үйл ажиллагааны санхүүжилт." гэлээ.

Цагаан хад боомтод 14 хоногийн тэг зогсолт зарлалаа

Өмнөговь аймгийн ЗДТГ-аас “Цагаан хад” суурьшлын бүсэд зургадугаар сарын 24-ний 06.00 цагаас эхлэн хөл хорио тогтоох шийдвэр гаргасан.Тус  аймгийн хувьд улсын хэмжээнд халдвар бүртгэгдээгүй, “Ногоон бүс” хэмээн зарлагдаж байсан  хэдий ч коронавирусийн 14 тохиолдол Өмнөговь аймагт бүртгэгдээд байгаа юм. Тиймээс халдварын нөхцөл байдлыг өргөн хүрээнд алдахгүйн тулд “Цагаан хад” суурьшлын бүсэд тэг зогсолт хийж, бүх ААН-үүдийн үйл ажиллагааг хязгаарлахаар болж буй аж. Хатуу хөл хорио зургадугаар сарын 24-өөс эхлэн долдугаар сарын 6-ныг хүртэл үргэлжлэх юм байна.

Хүүхдүүдэд вакцины урамшууллын 50 мянган төгрөг олгоно

Засгийн газар вакцинд хамрагдсан иргэдээ урамшуулж, 50 мянган төгрөг олгож буй. Вакцинжуулалт үргэлжилж байгаа ч иргэдийн идэвх оролцоо буурсан тул ийнхүү урамшуулахаар болсныг Сангийн яам өнгөрсөн сард мэдэгдэж байлаа. Салбарын сайд Б.Жавхлан  "Вакцинжуулалтад бүрэн хамрагдсан иргэдийн дархлааг хадгалах, сэргээх зорилгоор 50 мянган төгрөгийн витаминжуулалтын багц бэлдэж байсан. Гэхдээ үүнийг вакцинд хамрагдсан иргэдийг урамшуулах хэлбэрээр бэлэн мөнгөөр тооцож олгох шийдвэр гаргалаа" гэж Засгийн газрын тавдугаар сарын 5-ны өдрийн хуралдааны үеэр мэдэгдэж байв. Энэ дагуу вакцины хоёрдугаар тунд хамрагдсан иргэд тавдугаар сарын 6-наас урамшууллын мөнгөө авч эхэлсэн билээ. Мөн удалгүй вакцины эхний тунгаа тариулсан иргэдэд ч 50 мянган төгрөг олгохоор болсон юм.

Улсын хэмжээнд 18-аас дээш насны хүн амын зорилтот бүлгийн 60 хувь нь буюу 2.1 сая хүн вакцинд хамрагдах тооцоо бий. Тэдний 1.8 сая буюу 88.6 хувь нь вакцины нэг, хоёрдугаар тунд хамрагдаж, 50 мянган төгрөг авчээ. Өнгөрсөн долоо хоногоос жирэмсэн эмэгтэй, 16-17 насны хүүхдүүдийг дархлаажуулж эхлээд байна. Вакцинд хамрагдсан хүүхдүүдэд урамшууллын 50 мянган төгрөг олгоно гэж Сангийн яамнаас мэдээлэв. 

Энэ талаар тус яамнаас тодруулахад “Монгол Улсын иргэн бүрд вакцины урамшуулал 50 мянган төгрөгийг дансаар олгоход ямар ч асуудалгүй. Өмнө нь 300 мянган төгрөг олгосон данс буюу хүүхдийн мөнгөний дансаар олгоно”  гэсэн юм. Монгол Улс 1.1 сая хүүхэдтэй. Тэдний 219 мянга орчим нь 15-18 насныхан. Статистик мэдээллээр, 10-14 насны 299512, 5-9 насны 388928, 0-4 насны 381639 хүүхэд бий. Цар тахлын үед эрсдэлд байгаа хүүхдүүдээс эхний ээлжид ийнхүү 16, 17 настнуудыг вакцинд хамруулж эхэлсэн бол удалгүй 12 насны хүүхдүүдийг дархлаажуулахаар Эрүүл мэндийн яам, Засгийн газар төлөвлөөд буй.

Хотын захиргааны шинэ байрыг халдвар авсан жирэмсэн эхчүүдийг хүлээн авах  түр эмнэлэг болгоно

Халдварын тоо ихэсч байгаатай холбогдуулан эмнэлгийн ор хүрэлцэхгүй байгааг албаны хүмүүс мэдээлсэн. Үүнтэй холбогдуулан өнгөрсөн даваа гарагт Нийслэлийн удирдах ажилтны шуурхай зөвлөгөөнөөр эмнэлгийн орны хүрэлцээний асуудлыг авч хэлэлцсэн. Хуралдаанд Улаанбаатар хотын төвийн бүсийн 6 дүүргийн удирдлагууд биеэр болон бусад хэлтэс албадын удирдлагууд цахимаар оролцсон байна.

Зөвлөгөөнөөр хотын захиргааны шинэ байрыг коронавирусийн халдвар авсан жирэмсэн эхчүүдийг хүлээн авах түр эмнэлэг болгож, ор дэлгэлт яаралтай хийхийг Нийслэлийн Засаг дарга бөгөөд Улаанбаатар хотын захирагч Д.Сумъяабазар Нийслэлийн Эрүүл мэндийн газарт үүрэг болгожээ.

“Оюутны Өргөө” дотуур байранд 240 ор дэлгэж, хөнгөн өвчтөнүүдийг авч эхэллээ

Коронавирусийн халдвартай иргэдийн тоо нэмэгдсээр байгаа тул нэмэлтээр ор дэлгэж, өвчтөнүүдийг авахаар төлөвлөсөн талаар НОК мэдээлж байсан. Тэгвэл "Оюутны өргөө" дотуур байранд нэмэлтээр 240 ор дэлгэжээ. Тус дотуур байранд зургадугаар сарын 23-наас эхлэн онош батлагдсан хөнгөн өвчтөнүүдийг хүлээн авч эхэлсэн байна. Баянзүрх дүүргийн эрүүл мэндийн төвийн гурван их эмч, гурван резидент эмч, таван сувилагч, таван үйлчлэгч, нэг ерөнхий зохицуулагч энд ажиллаж, хөнгөн өвчтөнүүдэд эмнэлгийн тусламж үйлчилгээ үзүүлэх бөгөөд 4-10 давхар хүртэл тусгай өрөөнүүдийг бэлджээ.

Ингэхдээ халдвар авсан жирэмсэн эмэгтэйчүүдийг гуравдугаар давхарт, ахмад настнуудыг дөрөвдүгээр давхарт тусгаарлах юм. Мөн зургадугаар давхарт яаралтай тусламжийн тасгийг байгуулж хамгаалалтын хувцас, шаардлагатай эм тариа зэргийг бэлдсэн байна.

Хүсэлт өгсөн болон гэртээ тусгаарлагдах боломжгүй хөнгөн хэлбэрээр өвчилсөн өвчтөнүүдийг тусгаарлаж, эмнэлгийн тусламж үзүүлнэ гэж Баянзүрх дүүргийн ИООНХХ-ээс мэдээллээ.

ЭЕШ-ыг наймдугаар сар хүртэл хойшлуулна

Элсэлтийн ерөнхий шалгалтын зохион байгуулалттай холбоотой асуудлаар БШУ-ы сайд Л.Энх-Амгалан мэдээлэл өгч байна. Тэрбээр "Энэ жилийн долдугаар сарын 1-4-ний хооронд зохион байгуулах байсан ЭЕШ-ыг наймдугаар сарын хоёрдугаар хагаст зохион байгуулах шийдвэрийг яамнаас гаргаж байна. Нэгдүгээр хавьталтай ойрхон гэсэн 1,500 хүүхэд тогтоогдсон. Эдгээр хүүхдүүд ЭЕШ-д орж чадахгүй байх эрсдэл үүссэн учраас ийм шийдвэр гаргалаа.

ЭЕШ-ыг улсын хэмжээнд 9,620 багш зохион байгуулдаг. Эдгээр багшийн тодорхой хувь нь халдвар авсан. Улаанбаатар хотоос 21 аймагт 66 багш ЭЕШ зохион байгуулдаг. Эдгээр багшийн 10 орчим нь халдвар авсан учир ЭЕШ зохион байгуулах боломжгүй гэсэн үг. Тиймээс өнөөдрийн байдлаар есөн аймаг өндөржүүлсэн бэлэн байдлын зэргийг зарлаж, сумаас аймаг, аймгаас сум руу зорчих хөдөлгөөнийг зургадугаар сарын 30 хүртэл хаагаад байгаа. Ийм олон нөхцөл үүссэн учраас ЭЕШ-ийг хойшлуулж байна. Шалгалтыг хэрхэн зохион байгуулах талаар долдугаар сарын 10-ны өдөр гэхэд шийдвэрийг гаргаж мэдээлэх юм байна." гэлээ.

5000 жилийн өмнө амьдарч байсан эрэгтэйн гавлын яс Баянхонгор аймгаас олджээ

5000 жилийн өмнө Монголын нутагт амьдарч байсан Афанасьева эрэгтэйн гавал Баянхонгор аймгаас олджээ. 

Энэ гавлын шүдний өнгөрт МУИС-ийн профессор М.Эрдэнэ судалгаа хийж, 5000 жилийн өмнө Монголчууд мал аж ахуйтай байсан ба цагаан идээг боловсруулж хэрэглэж байсныг нотолсон байна.

Түүнээс өмнө энэ хугацааг 2500 жил гэж тооцож байсан бол М.Эрдэнэ профессорын судалгаагаар даруй 2500 орчим жилээр урагшлуулжээ. Энэ нь одоогоор мэдэгдэж буй хамгийн эртний баримт болоод байна. Энэхүү судалгааны ажил нь шинжлэх ухааны топ сэтгүүл Nature-т хэвлэгджээ. Харин тун удахгүй түүний судалгааны талаарх видео нэвтрүүлгийг МУИС-иас олон нийтийн хүртээл болгох аж.

Түлшний есөн вагон замаас гарч онхолджээ

Нийслэл хотод болон орон нутгуудад үер буусны улмаас төмөр зам угаагдаж галт тэрэг замаас гарсан ноцтой үйл явдал болжээ.  Тодруулбал, Улаанбаатар хотоос Орхон аймгийн чиглэлд шатахуун тээвэрлэж явж байсан ачааны галт тэрэг Сэлэнгэ аймгийн Орхонтуул сумын Шар-Ус багийн “Цагаан тохой” гэдэг газар замын хажуу руу унасан байна.

Уг галт тэрэг зургадугаар сарын 24-ний өдрийн 20:40 цагт унасан бөгөөд энэ тухай дуудлагыг тус өдрийн 21:45 цагт ОБГ хүлээн авчээ. Улмаар аймгийн Онцгой байдлын газрын Сайхан сум дахь Гал түймэр унтраах, аврах 61 дүгээр ангийн алба хаагчид 54 км замыг туулан 02:38 цагт очжээ.

Бороо орж төмөр замын ул шороо угаагдаж зам эвдэрсний улмаас Салхит өртөөнөөс Эрдэнэт өртөөний чиглэлд ачааны галт тэрэгний есөн вагон унаж, гурван вагоноос түлш асгарсан байна. Одоогоор Улаанбаатар Төмөр замын зам, эрчим хүчний засварын ангийн 50 ажилтан, найман техник хэрэгсэлтэй ажиллаж байна.

Дөрвөн жилийн турш охиноо хүчирхийлж байсан гэх хойд эцэгт ял оноолоо

ЕБС-ийн 8-р ангийн 13 настай охиныг 4 жилийн турш хүчирхийлж байсан гэх хойд эцгийн хэргийг зургадугаар сарын 25-ны өдөр шүүхээр хянан хэлэлцжээ.  Хуульч, өмгөөлөгч Р.Булгамаагийн мэдээлснээр, хамгийн хүндрэлтэй асуудал нь шүүгдэгч мөрдөн шалгах ажиллагаанаас эхлэн гэм буруу дээрээ маргаж, би охиноо ямар нэг бэлгийн харьцаанд уруу татаж орсон зүйл байхгүй гэж мэдүүлгээрээ мэлзэж байсан аж. Харин өнөөдөр тэрбээр бодит үнэнд гүйцэгдэж гэм буруугаа хүлээжээ.

Энэхүү гэмт хэрэг нь насанд хүрээгүй бага насны хүүхдийг биеэ хамгаалж чадахгүй буюу үйлдлийн учир холбогдлыг ойлгохгүйг далимдуулсан, хүч хэрэглэхээр үргэлжилсэн үйлдэлтэй, заналхийлж гэмт үйлдлээ гүйцэтгэсэн, хүүхдийн сэтгэл санаанд нь айдас төрүүлэн, эсэргүүцэл үзүүлэх чадваргүй болгож ээж, эгч, дүүг нь заналхийлэн хэл амаар доромжлон, эдийн засгийн байдлаар дарамтлан эрхшээлдээ бүрэн оруулснаас болж олон жил нууц, далд аргаар үйлдэгдсэн насанд хүрээгүй хүүхдийн сэтгэл санаа, бие махбод, ирээдүйд ноцтой хохирол учруулсан гэмт үйлдэл юм.

Энэ гэмт хэргийг үйлдсэн БЗД-ийн 21-р хорооны иргэн 43 настай Х-д шүүхээс гэм буруутай гэж үзэж хаалттай хорих ангид эдлэх ялыг хуульд заасан дээд хэмжээгээр оногдууллаа. Мөн шүүхийн шийдвэрт хохирогч хүүхдийн сэтгэл санаа, гэм хорын зардал, цаашид сэтгэл заслын эмчилгээнд зарцуулагдах зардал мөнгийг шүүгдэгчээс гаргуулж, хохирол төлбөрийг барагдуулахаар шийдвэрлэсэн байна.