Bolod.mn сайт өнгөрсөн долоо хоногт болж өрнөсөн онцлох үйл явдлыг ТОЙМЛОН хүргэж байна. Эдгээр өдрүүдэд Шадар сайд С.Амарсайхан болон УОК-ын гаргасан шийдвэр олон нийтийн анхаарлыг татаж байна. Цар тахлын голомтыг хумих, халдварыг бага эрсдэлтэйгээр даван туулах зорилготойгоор энэ жилийн цагаан сарын баярын өдрийг тэмдэглэхгүй байхаар ЗГ-аас шийдвэрлэсэн. Энэ хүрээнд иргэдийг олноор цуглуулахгүй байх, гарч болох эрсдэлийг тооцоолон хоёрдугаар сарын 11-ээс буюу битүүний өдрөөс эхлэн шинийн 8-ныг хүртэл хатуу хөл хорио тогтоох болсныг УОК-оос мэдээлсэн билээ.

Түүнчлэн Сар шинийн үндэсний бөхийн барилдааныг зохион байгуулахгүй байх шийдвэрийг Шадар Сайд С.Амарсайхан олон нийтэд мэдээлсэн.

- Хатуу хөл хориог хоёрдугаар сарын 11-ээс эхлэн 12 хоног тогтоохоор боллоо

УОК-ын хоёрдугаар сарын 3-ны өдрийн шуурхай хуралдаанаар Цагаан сарын баяраар хөл хорио тогтоож халдварын эрсдэлийг бууруулах талаар хуралдаж олон нийтэд мэдээлсэн. Эрүүл мэндийн яамнаас УОК-т Улаанбаатар хотод хатуу хөл хориог 14 хоног тогтоох санал хүргүүлээд байсан. Тэгвэл УОК-ийн хуралдаанаар уг асуудлыг тал бүрээс нь хэлэлцэн, холбогдох тооцоо судалгааг гаргаснаар нийслэлд хоёрдугаар сарын 11-нээс эхлэн 12 хоног хатуу хөл хорио тогтоохоор шийдвэрлэлээ. Өөрөөр хэлбэл, битүүний өдрөөс эхлэн хоёрдугаар сарын 23-ны 06.00 цаг хүртэл хөл хорио тогтоохоор болжээ.

Мөн нийслэлд хэсэгчилсэн хөл хорио үр дүнгүй тул бүхэлд нь хөл хорио тогтоох нь зөв гэж үзсэн байна. Учир нь, сар шинийн өдрүүдэд хөл хөдөлгөөн нэмэгдэх эрсдэлтэй, ингэснээр ахмад настнууд, суурь өвчинтэй иргэдийг эрсдэлд оруулах магадлал өндөр гэж дүгнэж буй юм.

Дашрамд дурдахад, БНХАУ өнгөрөгч онд Цагаан сарын баяраа өргөн дэлгэр тэмдэглэсний улмаас халдварын тархалтыг алдаж, хяналтаас гарч байсан удаатай. Мөн Европын орнууд, АНУ-д ч баяр ёслолтой холбоотой гарсан тархалт өндөр байгаа учир урьдчилан сэргийлэх арга хэмжээ авах нь зүйтэй гэж УОК үзэж буй аж.

- Л.Энх-Амгалан: Гуравдугаар сарын 1-ээс улс даяар танхимын сургалт эхлүүлнэ

БШУ-ны сайд Л.Энх-Амгалан ирэх гуравдугаар сарын 1-нээс танхимын сургалтыг эхлүүлэх талаар мэдээлэл өглөө. Тэрбээр “Хоёрдугаар сард цаг агаар хүйтэн байх учраас орон нутгийн хүүхдүүд хичээлдээ ирж, очиход хэцүү. Цагаан сарын үеэр хөл хорио тавих учраас бэлтгэлээ сайн хангаж байгаад гуравдугаар сарын 1-нээс зайлшгүй хичээллэх шаардлагатай байна.

Жилд 165-180 хоногт нь хичээллэх ёстой байтал 80 гаруй хоногт нь цахим буюу теле байдлаар хичээллэсэн байна. 174 мянган хүүхэд гар утасгүй, интернетгүй байна. Сурагчдын 70-80 хувь нь хоцрогдолд орсон байна.

Гуравдугаар сарын 1-нээс эхлэн улс даяар танхимын хичээлийг эхлүүлэх байр суурьтай байна” гэв.

- УОК: Сар шинийн барилдааныг зохион байгуулахгүй

Монголын үндэсний бөхийн холбоо Сар шинийн уламжлалт барилдааныг 2021 оны хоёрдугаар сарын 11-ний өдөр "Монгол бөхийн өргөө"-нд зохион байгуулахаар шийдвэрлэсэн.

Цар тахлын улмаас Улс аймгийн цолтой 128 бөхийн барилдаан үзэгчгүйгээр зохион байгуулж, Улсын Онцгой Комисс, Нийслэлийн Онцгой Комиссоос гаргасан зөвлөмж, шийдвэр, журмыг чанд даган мөрдөж ажиллана хэмээж байсан юм.

Гэвч Улсын онцгой комиссын хуралдаанаар Сар шинийн баяраар бөхийн барилдааныг зохион байгуулах шаардлагагүй бөгөөд боломжгүй гэж үзжээ. Нэгэнт хөл хорио тогтоож, сар шинийн баярыг тэмдэглэхгүй, бөхчүүдэд цол олгохгүй учир зохион байгуулах шаардлагагүй хэмээн Шадар сайд С.Амарсайхан мэдэгдлээ.

- НД-ийн шимтгэлийг 2 хувиар нэмж нийт 26 ХУВЬ боллоо

Нийгмийн даатгалын шимтгэлийг 2 хувиар нэмж нийт 26 хувийн шимтгэл авахаар болсон талаар НДЕГ-аас мэдээллээ.

"Нийгмийн даатгалын тухай хуульд 2017 оны 4-р сарын 14-нд нэмэлт өөрчлөлт оруулсан ба ингэхдээ ажил олгогч болон ажилтан тэтгэврийн даатгуулагчийн шимтгэл 7 хувь байсныг 9,5 хувь болгож нэмэгдүүлсэн. Энэ хуулийн дагуу:

· 2018 онд 1 пункт

· 2019 онд 0.5 пункт

· 2020 онд 1 пункт

Нийт 2.5 пунктээр нэмэгдүүлэхээр болсон. 2020 онд нэмэгдэх ёстой байсан шимтгэлийг УИХ-аар 2021 онд хойшлуулж баталсан ба үүний дагуу 2021 оны нэгдүгээр сарын 1-нээс эхлэн тэтгэврийн даатгуулагчийн шимтгэлийн хувь хэмжээ 2 пунктээр буюу ажилтан, ажил олгогчид тус бүр 1 пунктээр нэмэгдсэн. Үүнийг ХНХЯ, НДЕГ хэрэгжүүлэн ажиллаж байна.

Монгол улсад 49 орчим мянган байгууллага нийгмийн даатгалын тайланг өгдөг. Цар тахлаас шалтгаалж орлого нь буураад байгаа байгууллагын эдийн засгийг дэмжих зорилгоор 2020 оны 10-12-р сард нийгмийн даатгалаас чөлөөлсөн. Үүнд 38,4 мянган ажил олгогчийн 410 мянган даатгуулагч, 161 мянган сайн дурын даатгуулагчийн 672 орчим тэрбум төгрөгийг чөлөөлсөн.

Тус чөлөөлөлтөд хамрагдсан 38,4 мянган ажил олгогчийн нийгмийн даатгалын шимтгэл, тэтгэврийн даатгалыг нь ажил олгогч, даатгуулагч тус бүр 8.5 пунктээр, эрүүл мэндийн даатгалыг нь 2 пунктээр 2021 оны долдугаар сарын 1-ны өдөр хүртэл төлүүлэхээр хуульчилсан. Тэгэхээр нийт 21 хувиар шимтгэл төлөхөөр 5-7 пунктээр хөнгөлөлтөд хамрагдана гэсэн үг юм.

- ШӨХТГ: НӨАТ-ын сугалааны ажилтны гэр бүлийн хүн 40 сая төгрөг хожсон

Шударга өрсөлдөөн хэрэглэгчийн төлөө газраас НӨАТ-ын сугалаанд хяналт шалгалт хийсэн талаар мэдээлсэн юм. Шалгалтаар сугалааны бөмбөгийг гаргаж ирж буй төхөөрөмжид шалгалт хийхэд ямар нэгэн зөрчил илрээгүй байна. Харин гааль, татвар, хяналт, санхүү, мэдээллийн технологийн газрын өмнө байсан болон одоо ажиллаж байгаа 47 албан хаагч, давхардсан тоогоор 89 удаа нийт 3,838,000 төгрөг хожжээ. Мөн нэг ажилтан хамгийн дээд хэмжээний нийлбэр дүнгээр 310 сая төгрөг хожсон байжээ. Мөн тухайн ажилтны гэр бүлийн хамаарлын хүмүүс дунд зөвхөн нэг тохиолдолд 40 сая төгрөг хожсон байна.

Ийнхүү НӨАТ-ын сугалааны машиныг дурын хүн ашиглахгүйгээр болгох, сугалааны тоног төхөөрөмжийг хадгалах тусгай байр гаргах, машиныг тест хийж буй бичлэгийг хадгалах, мэдээллийн технологийн аудит жил бүр оруулах, сугалаа явуулж дуусаад хонжворт хожсон хүмүүст тэр дор нь мэдээлэл хүргүүлэх зэрэг албан шаардлагуудыг ШӨХТГ-аас хүргүүлсэн байна.Түүнчлэн НӨАТ-ын сугалааг болиулах саналыг ШӨХТГ-аас Сангийн яаманд хүргүүлсэн талаар ШӨХТГ-ын дарга Б.Бат-Эрдэнэ мэдээлсэн юм.

- Москвад хоёр мянга орчим хүн эсэргүүцлийн жагсаалд оролцжээ

Москва хотын төвд ням гарагт зөвшөөрөлгүйгээр явуулсан эсэргүүцлийн ажиллагаанд оролцсон хүний тоо 2000 орчимд хүрсэн тухай ОХУ-ын Дотоод хэргийн яамны нийслэлийн ерөнхий газрын хэвлэлийн алба мэдээлэв. “Орон нутгийн цагаар 14:30 цагт Москва хотод зөвшөөрөлгүйгээр явуулсан олон нийтийн арга хэмжээнд 2 мянга орчим хүн оролцсоны дотор олон нийтийн хэвлэл мэдээллийн хэрэгслийн төлөөлөгчид багтаж байна” хэмээн мэдэгдэлд дурдсан байна.

Ажиллагаанд оролцогч 600 орчим хүн хотын хэд хэдэн гудамжны явган хүний замаар дайран өнгөрч, зохион байгуулалттайгаар жагсаал цуглаан өрнүүлэхийг завджээ. Цагдаа нар хууль сахиулах байгууллагын бусад төлөөлөгчидтэй хамтран нийслэл хотод нийтийн хэв журмыг сахиулахаар ажиллаж байгааг Нийслэлийн ерөнхий газар онцлон тэмдэглэжээ.

“Коммерсант” цахим хуудасны мэдээлснээр, эсэргүүцлийн ажиллагааны үеэр цагдаа нар Оросын сөрөг хүчний улс төрч Алексей Навальныйгийн гэргий Юлия Навальнаяг баривчилжээ. Эсэргүүцлийн ажиллагааг харуулсан зургийг нийтэлснээс хойш хэдхэн минутын дараа түүнийг баривчилсан байна. Тэрбээр нэгдүгээр сарын 23-нд болсон эсэргүүцлийн ажиллагааны үеэр мөн баривчлагдсан хэдий ч хэдхэн цагийн дараа суллагджээ. ОХУ даяар болж буй Алексей Навальныйг дэмжсэн жагсаал цуглаанд оролцогчид сөрөг хүчний удирдагчийг суллахыг шаардаж байгаа юм.

- Оюутолгойн ажилтан гэрээслэл үлдээгээд, амиа хорложээ

Монголын томоохон уул уурхайн компани болох Оюутолгойд сар хүрэхгүй хугацаанд хоёр хүн амиа алдлаа. Өнгөрсөн 1 дүгээр сарын 19-ний өдөр тус уурхайн жолооч амиа алдсан харамсалтай хэрэг гарсан бол өчигдөр /01.31/ Өмнөговь аймгийн Ханбогд суманд байрлах уурхайд ажилладаг 41 настай эрэгтэй гэрээслэл үлдээн амиа хорлосон хэрэг гэрчээ. Тэрээр ил уурхайн хажууд байрлах контейнерын дэгээ төмрөөс боомилж нас барсан байсан бөгөөд "Энэ бол миний шийдвэр. Ар гэр, ах дүүсийг минь бүү буруутгаарай" гэсэн утга бүхий гэрээслэл бичжээ. Тус хэргийг цагдаагийн ерөнхий газраас шалгаж байгаа гэв.

- Богд-Арын байранд гарсан гал түймрээс 66 иргэнийг авран хамгааллаа

Баянгол дүүргийн 1 дүгээр хороо Богд-Ар хорооллын 11А байрны 8-н давхарт гал түймэр гарчээ. Галын дуудлага 2021 оны өнөөдөр /2021.02.04/ 16:18 цагт Нийслэлийн Онцгой байдлын газарт ирсэн байна. Дуудлагын дагуу Чингэлтэй дүүргийн Онцгой байдлын хэлтсийн Гал түймэр унтраах 10 дугаар ангийн 1, 2, 3 дугаар тасгийн бүрэлдэхүүн шуурхай ажиллаж гал түймрийн голомтоос 12 хүүхэд, утаажилтын бүсээс 11 хүүхэд 43 иргэнийг гаргаж, амь насыг авран хамгааллаа.

- Улаанбаатар хотод халдварын идэвхтэй зургаан голомт байна

Хоёрдугаар сарын 6-ны өдрийн байдлаар Улсын хэмжээнд ковид-19 ийн батлагдсан тохиолдол 1928 болсон байна. Эдгээрийн 1430 буюу 78 орчим хувь нь эдгэрч, эмнэлгээс гарчээ.

Харин Улаанбаатар хотод гарсан халдварын тоо 1092-т хүрсэн бол өнгөрсөн өдрүүдэд халдвар гарсан хөдөө орон нутгуудад өвчлөл нэмж бүртгэгдээгүй байна. Сүүлийн өдрүүдэд халдварын маш олон тохиолдол илэрч байгаа бөгөөд, энэ нь Нийслэл хотын халдварын голомт идэвхтэй байгааг харуулж байгаа юм.

Улаанбаатар хотод идэвхтэй голомт болоод буй газруудыг танилцуулбал,

- Монгол шир үйлдвэрийн 18 ажилтан халдвар авсан бол нэмж 7 тохиолдол бүртгэгдэн нийт 25 болсон.

- Баянзүрх дүүргийн “Икс Апартмент” хотхоноос 13 тохиолдол илэрсэн.

- ББСБ-ын буюу Жи Би плазагийн голомтоос 40 тохиолдол

- Сүхбаатар дүүргийн Бэлхийн гутлын цехийн голомтоос 26 тохиолдол бүртгэгдсэн

- СХД-ийн Амгалан худалдааны төвийн голомтоос 17 иргэн халдвартай нь нотлогдсон

- Сүхбаатар болон Чингэлтэй дүүргийн нийтийн байрнуудад гарсан халдварын голомт маш эрчимтэй байсаар байгаа юм.

BOLOD ДОЛОО ХОНОГИЙН ТОЙМ: Цагаан сарын баяраар хатуу хөл хорио тогтоон, үндэсний бөх барилдахгүй
Tweet
Bolod.mn