Bolod.mn сайт ӨНГӨРСӨН долоо хоногт болж өрнөсөн ОНЦЛОХ үйл явдлыг ТОЙМЛОН хүргэж байна. Эдгээр өдрүүдэд улс төрд шинэчлэл хийсэн өдрүүд байв. Учир нь Монгол Улсын 32 дахь Ерөнхий сайд томилогдож, ажил албан үүргээ хүлээн авлаа. АН-ын зүгээс Л.Оюун-Эрдэнийг Ерөнхий сайдын албан тушаалд томилохыг дэмжихгүй байгаагаа илэрхийлсэн хэдий ч, чуулганы хуралдааны санал хураалтаар 89.7 хувь нь нэр дэвшигчийг дэмжсэн тул Монгол Улсын дараагийн Ерөнхий сайдаар томилох тухай тогтоолын баталсанд тооцлоо.  Түүнчлэн Засгийн газрын сайд нарын томилгоо хийгдсэн бөгөөд долоон сайд улиран томилогдсон юм.

-          Монгол Улсын 32 дахь Ерөнхий сайдаар Л.Оюун-Эрдэнэ томилогдлоо 

Монгол Улсын Ерөнхий сайдаар ажиллаж байсан У.Хүрэлсүх өнгөрсөн долоо хоногт үүрэгт ажлаа хүлээлгэн өгөх хүсэлтийг УИХ-д хүргүүлж, улмаар чуулганаар баталсан юм. Үүний дагуу МАН-ын УЗ болон Бага хурлаас Ерөнхий сайдад Л.Оюун-Эрдэнийг нэр дэвшүүлж, энэ сарын 22-нд Ерөнхийлөгчид өргөн барьсан. Улмаар Ерөнхийлөгч Х.Баттулга Ерөнхий сайдаар Л.Оюун-Эрдэнийг томилох тухай саналаа УИХ-д хүргүүлсэн юм.

Чуулганы хуралдааны санал хураалтаар гишүүдийн 87.9 хувь нэр дэвшигчийг дэмжсэн тул Л.Оюун-Эрдэнийг Монгол Улсын Ерөнхий сайдаар томилох тухай тогтоолыг баталсанд тооцлоо. Өмнөх Засгийн газрын гал тогоо буюу Хэрэг эрхлэх газрын даргаар 2019 оноос хойш ажилласан Л.Оюун-Эрдэнэ нь Монголын шинэ залуу улс төрчдийг манлайлагчдын нэг бөгөөд 2015 онд АНУ-ын Харвардыг их сургууль төгссөн юм. Тэрбээр Монголын улс төр, эдийн засгийн хүнд хэцүү, “COVID-19”-ийн сорилтод орсон, Оюутолгой төслийн гэрээг сайжруулах хэлэлцээрийн үед Засгийн газрын тэргүүнээр томилогдож байна.

-          МАН-ын удирдах зөвлөл сайд нарын нэрсийг тодрууллаа

МАН-ын Удирдах зөвлөл хуралдаж, Л.Оюун-Эрдэнийн танхимд ажиллах сайд нарын асуудлыг хэлэлцэн шийдвэрлэлээ. Олон нийтийн зүгээс шинэ сайд нарын асуудал гол анхаарлын төвд орсон асуудал байлаа. Ялангуяа өнгөрсөн өдрүүдэд шинэ засгийн хэдэн хувьд нь өмнөх сайд нар эргэн ирэлт хийж, ямар гишүүд давхар дээл өмсөх бол гэсэн таамгууд янз бүрийн хувилбараар хөвөрч байв. Тэгвэл Удирдах зөвлөлөөс дараах хүмүүсийг дэмжжээ. Үндсэндээ долоон сайд улирч, дөрвөн сайд давхар дээлтэй болох нь тодорхой боллоо.

Шадар сайд - УИХ-ын гишүүн С.Амарсайхан

Засгийн газрын Хэрэг эрхлэх газрын дарга - Ц.Нямдорж

1.     Байгаль орчин, аялал жуулчлалын сайд - Уртнасан

2.     Хууль зүй, дотоод хэргийн сайд - Х.Нямбаатар

3.     Сангийн сайдаар - УИХ-ын гишүүн Б.Жавхлан

4.     Гадаад харилцааны сайдаар - Б.Батцэцэг

5.     Хөдөлмөр, нийгмийн хамгааллын сайд - А.Ариунзаяа

6.     Боловсрол, шинжлэх ухааны сайд - Л.Энх-Амгалан

7.     Барилга хот байгуулалтын сайд - Б.Мөнхбаатар

8.     Батлан хамгаалах яам - Г.Сайханбаяр

9.     Зам тээврийн хөгжлийн сайд - Л.Халтар

10.   Уул уурхай хүнд үйлдвэрийн сайд - Г.Ёндон

11.   Хүнс, хөдөө аж ахуй, хөнгөн үйлдвэрийн сайд - З.Мэндсайхан

12.  Эрчим хүчний сайд - Н.Тавинбэх

13.  Соёлын сайд - Ч.Номин

14.  Эрүүл мэндийн сайд - С.Энхболд

Ийнхүү УИХ-ын чуулганы хуралдаанаар сайд нарыг танилцуулж, тангараг өргөх ёслол болж Монгол Улсын 32 дахь Ерөнхий сайд болон Засгийн газар эмхлэн бүрдэж, үүрэгт ажилдаа орсон юм.

-          УИХ-ын гишүүн С.Ганбаатар Оюутолгойн асуудлаар төв талбайд өлсгөлөн зарлалаа

УИХ-ын гишүүн С.Ганбаатар Сүхбаатарын талбайд энэ сарын 25№ны өдрөөс эхлэн өлсгөлөн зарлалаа.  Тэрбээр Оюутолгой төслийн хөрөнгө оруулалтын гэрээг шинэчлэх асуудлаар олон улсын шүүхэд нэхэмжлэл гаргахыг Монгол Улсын Ерөнхий сайдаас шаардаж буй юм.

УИХ-ын гишүүн С.Ганбаатар, “Оюутолгой төсөлтэй холбоотой Монгол Улсын шүүхээс эхлээд Английн шүүхийн шийдвэр зэрэг 1400 хуудас баримт бичиг надад бий. Энэ төслөөс Монгол Улс 2051 он хүртэл ногдол ашиг авахгүй байх хэмжээнд хүрсэн байна. Энэхүү гэрээг өөрчлөх, Монгол Улсын өмнөөс нэхэмжлэл гаргах эрхтэй ганц хүн бол Ерөнхий сайд байдаг. Тиймээс Монгол Улсын шинэ Ерөнхий сайдыг томилогдсон дариудаа нэхэмжлэл гаргахыг шаардаж байгаа юм” гэлээ. Мөн тэрбээр Ерөнхий сайдыг олон улсын шүүхэд нэхэмжлэл гаргах хүртэл дээрх тэмцлээ үргэлжлүүлэхийг мэдэгдсэн юм.

-          Монгол Улс авилгын индексээр таван байраар ухарчээ

Берлинд төвтэй олон улсын “Транспаренси интернэшнл” байгууллагаас 2020 оны “Авилгын төсөөллийн индекс”-ийг танилцууллаа. Монгол Улс 2020 онд авилгын индексээр 35 оноо авч, 111 дүгээр байрт жагсжээ. Энэ нь 2019 оноос таван байраар ухарсан үзүүлэлт бөгөөд тус онд 105 байрт жагсаж байв. Мөн Ази Номхон далайн бүс авилгын индексээр 2020 онд 100 онооноос 40 оноо авсан байна. Тэгвэл Монгол Улсын авилгын индекс оноо Ази Номхон далайн бүсийн дундаж онооноос 10 оноогоор бага байгаа. Дани, Шинэ Зеланд жагсаалтыг тэргүүлжээ

Түүнчлэн авилгын индекс өндөр  оноо авсан орнууд эрүүл мэндийн салбартаа их хэмжээний хөрөнгө оруулалт хийдэг, бүх нийтийн эрүүл мэндийн хамралт сайн бөгөөд ардчиллын институцүүд нь хараат бус, хууль дээдлэх ёс өндөр байна гэв. 2020 оны Авилгын төсөөллийн индексийн дүнгээс харахад авилга нь COVID-19-ийн эсрэг арга хэмжээг үр дүнгүй болгож, дэлхий даяарх цар тахлын эсрэг тэмцэл удааширч байгааг мэдээллийн эхэнд онцолсон. Авилгын төсөөллийн индекст 180 орон, бүс нутгийг эрэмбэлэхдээ төрийн салбарын авилгын төсөөллийн хэмжээг 13 шинжээчийн байгууллагуудын үнэлгээ болон бизнесүүдийн удирдлагуудаас авсан асуумж дээр үндэслэн гаргажээ.

-          ХӨСҮТ-ийн захирлаар Д.Наранзул томилогдлоо

ХӨСҮТ-ийн ерөнхий захирал Д.Нямхүү энэ сарын 21-нд албан тушаалаа өгсөн билээ. Тэрээр ХӨСҮТ-ийн эмч, ажилтнууд нялх биетэй эх, нярайг зөөвөрлөхдөө журам зөрчсөн, хүнлэг бус харьцсан асуудлаар ийнхүү хариуцлага хүлээсэн юм.

Тэгвэл түүний ажлыг үргэлжлүүлэх ерөнхий захирал томилогдсон байна. Тус албан тушаалд ХӨСҮТ-ийн дэд захирал байсан тархвал судлаач Д.Наранзул томилогджээ. Тэрээр энэ сарын 28-ны өдөр ажлаа хүлээн авсан байна.

-          “Цэс хайрхан” компанийг 20 сая төгрөгөөр торгожээ

"Цэс хайрхан" ХХК-ийн оргилуун дарстай холбоотой гомдлын дагуу ШӨХТГ хяналт, шалгалтын ажлыг энэ сарын 4-нөөс эхлүүлсэн. Мөн уг асуудлаар Мэргэжлийн хяналтын ерөнхий газар зөрчлийн хэрэг нээж LUXURIOUS болон СОВЕТСКОЕ бүтээгдэхүүнийг нэг эсвэл хоёр өөр төрлийн оргилуун дарс мөн, биш эсэхийг шинжлүүлжээ.

Гэхдээ шинжилгээний хариуг ШӨХТГ-т  ирүүлээгүй байгаа гэнэ. Харин ШӨХТГ-ын зүгээс бараа, ажил, үйлчилгээг хууран мэхлэх, төөрөгдүүлэх, хүч хэрэглэх замаар худалдах, гүйцэтгэх, хэрэглэгчийн эрхийг хохироосон, гэрээ байгуулахыг хориглодог атал хэрэглэгчийг төөрөгдүүлэх замаар худалдаж, хууран мэхэлсэн тул 20.000.000 (Хорин сая) төгрөгөөр торгож, зөрчлийг арилгуулах албан даалгаврыг гаргалаа. Учир нь Советское оргилуун дарс нь Монгол улсад үйлдвэрлэгддэг, орос нэрээр худалдаанд гардаг бүтээгдэхүүн юм байна. Харин хэрэглэгчид ОХУ-аас орж ирдэг импортын бүтээгдэхүүн гэж боддог. Иймд хэрэглэгчийг хууран мэхлэх, төөрөгдүүлсэн гэж үзэн Зөрчлийн тухай хуулийн 10.2.3-т заасныг үндэслэн дээрх торгуулийн арга хэмжээг авлаа.

-          Нууцаар ажиллаж байсан “Green House” амралтын газрыг илрүүлжээ

Баянзүрх дүүргийн цагдаагийн албан хаагчид нууцаар ажиллаж байсан амралтын газрыг илрүүлжээ. Тодруулбал, Баянзүрх дүүргийн 20-р хорооны нутаг дэвсгэрт үйл ажиллагаа явуулдаг “Грийн хаус” нэртэй амралтын газар нь 3 байшин, 1 монгол гэрт нэр бүхий 24 иргэнийг хүлээн авч нууцаар зөвшөөрөлгүй амралтын үйл ажиллагаа зохион байгуулж байжээ. 

Тиймээс иргэд, Аж ахуй нэгж байгууллагууд Улсын Онцгой комисс, Нийслэлийн Онцгой комисс, дүүргийн Онцгой комиссоос өгсөн үүрэг, чиглэлийг дагаж мөрдөхийг БЗД-ийн онцгой комиссоос анхаарууллаа. 

-          Асрамжийн газрын багш болон хөгжлийн бэрхшээлтэй хоёр хүүхэд халдвар авчээ

Эрүүл мэндийн яамнаас өдөр бүрийн тогтмол 11 цагт ковид-19-ийн талаарх мэдээллийг олон нийтэд хүргэдэг билээ. Нэгдүгээр сарын 30-ны өдрийн байдлаар Улаанбаатар хотод гарсан халдварын тоо 908 боллоо. Харин Улсын хэмжээнд нийт гарсан халдвар 1742 боллоо. Эдгээрийн 1321 нь эдгэрсэн бол 408 халдвартай иргэн ХӨСҮТ-д эмчлэгдэж байна. Эдгээр өдрүүдэд бусад аймаг орон нутгуудад халдвар нэмж бүртгэгдээгүй бөгөөд Улаанбаатар хотын халдварын голомтууд эрчимтэй үргэлжилсээр байна. Өнгөрсөн долоо хоногт Баянгол дүүргийн 12-р хорооны нийтийн байр болон, Наркологийн төв эмнэлэг, Микс пицца компанийн ажилтнууд, ББСБ-ын ажилтантай холбоотой Асрамжийн газрын багш болон хөгжлийн бэрхшээлтэй хүүхдүүд халдвар авсан нь батлагдсан.

ХӨСҮТ-д эмчлэгдэн тусгаарлагдаж байгаа иргэдийн 353 нь хөнгөн, хүндэвтэр 53, хүнд 1, маш хүнд 1 хүн байгаа хэмээн Эрүүл мэндийн яамнаас мэдээллээ.