Өнгөрсөн ДОЛОО хоногт болж өрнөсөн ОНЦЛОХ үйл явдлыг BOLOD.MN сайт ТОЙМЛОН хүргэж байна. Эдгээр өдрүүдэд дэлхий дахинаа 2021 оныг хөл хорионд тэмдэглэн угтсан нь хамгийн онцлох үйл явдал байсан юм. Түүнчлэн Монгол Улсын хувьд коронавирусийн цар тахлын хөл хориог хөдөө орон нутгуудад 2021 оны гуравдугаар сарыг дуустал сунгасан билээ. Харин Нийслэл Улаанбаатар хотын хөл хорионы дэглэмийг нэгдүгээр сарын 6-наас дахин сунгах эсэх дээр ЗГ-аас мэдээллэх болно

- Аймгуудад тогтоосон өндөржүүлсэн бэлэн байдлын зэргийг гуравдугаар сарыг дуустал сунгалаа

Засгийн газрын арванхоёрдугаар сарын 30-ны өдрийн хуралдаанаар хэлэлцсэн асуудлын талаар Шадар сайд Я.Содбаатар мэдээлэл хийлээ. Мэдээллээр "Засгийн газрын хуралдаанаас гурван шийдвэр гаргасан бөгөөд УОК-оос санал болгосон Улаанбаатараас бусад аймгуудад тогтоосон

өндөржүүлсэн бэлэн байдлын зэргийг 2020 оны 12 дугаар сарын 31-ний өдрөөс 2021 оны 03 дугаар сарын 31-ний өдрийг дуустал сунгахаар шийдвэрлэжээ. Ингэснээр аймгууд буцаад хэвийн амьдралдаа орох боломжтой болсон. Харин хилийн бүх боомтоор нэвтрэх зорчигч тээврийн хөдөлгөөнийг түр зогсоосон шийдвэрийг 2021 оны 03 дугаар сарын 31-ний өдрийг дуустал сунгалаа.

- Үндэсний эрх чөлөө, тусгаар тогтнолоо сэргээн мандуулсны 109 жилийн ой тохиолоо

Арванхоёрдугаар сарын 29-ны өдөр Үндэсний эрх чөлөө, тусгаар тогтнолоо сэргээн мандуулсны 109 жилийн ойн баярын өдөр тохиолоо.

Социализмын он жилүүдэд энэхүү түүхэн чухал өдрийн үнэ цэнийг ойшоолгүй ирсэн ч УИХ-ын 2007 оны наймдугаар сарын 16-ны хуулиар энэ өдрийг нийтээр тэмдэглэх тэмдэглэлт өдөр болгон улмаар 2011 оны арванхоёрдугаар сарын 23-ны өдрийн хуулиар Үндэсний эрх чөлөө, тусгаар тогтнолоо сэргээсний баярын өдөр хэмээн нийтээр тэмдэглэх баярын өдөр болгохоор хуульчилсан юм. Энэ өдөр улс нийтээрээ амардаг билээ.

- Азын дугаарыг дуудлага худалдаанд оруулахаар боллоо

Автотээврийн хэрэгслийн бүртгэл хөтлөх, улсын дугаар олгох журмын 12.5-д Сонирхол татахуйц улсын бүртгэлийн дугаарыг үнэ хаялцуулах замаар худалдан борлуулна хэмээн заасан байдаг. Энэ дагуу "азын" гэх тодотголтой улсын дугаарыг дуудлага худалдаагаар борлуулахаар болжээ. Уг ажлыг Автотээврийн үндэсний төв ТӨҮГ-аас Е-Mоngolia цахим хөтөлбөрөөр дамжуулан зохион байгуулж Зам, тээврийн хөгжлийн яам, Цахим хөгжлийн үндэсний хороотой хамтран ажиллаж байна.

Өмнө нь Шударга өрсөлдөөн, хэрэглэгчийн төлөө газраас авто машины "азын" дугааруудыг Төрийн үйлчилгээ, тэр дундаа хог тээвэрлэх автомашинд тавьж байхаар дуудлага худалдаанд оруулж, олсон мөнгөөрөө хүмүүнлэг, нийгмийн сайн сайхны үйлсэд зарцуулах хүсэлт гарган, холбогдох байгууллагад хандаж байсан аж.

auction.transdep.mn сайтад хандан, дуудлага худалдаанд оролцох боломжтой бөгөөд Автотээврийн хэрэгслийн бүртгэл хөтлөх, улсын дугаар олгох журмын дагуу үнэ хаялцуулах ажиллагааны ялагчтай байгуулсан гэрээ, улсын бүртгэлийн дугаарын захиалгыг үндэслэн зөвхөн түүний өмчлөлийн тээврийн хэрэгсэлд тухайн дугаарыг олгоно.

- Баян-Өлгий аймгийн сумдад казакаар оноосон нэр өгсөн зөрчил илэрчээ

Баян-Өлгий аймгийн бүх сумдад Монгол хэлээр нэрлэгдээгүй Засаг захиргааны нэгж, гудамж байгаа эсэхэд хяналт хийлгэж үзэхэд Улаанхус, Дэлүүн, Сагсай сумдад шинээр байгуулагдсан багуудад Казах хэлээр оноосон нэр өгсөн зөрчил илэрсэн байна.

Зөрчлийг аймгийн Иргэдийн төлөөлөгчдийн хуралд хандаж, тухайн багуудад оноосон нэрийг хүчингүй болгож залруулжээ.

Мөн "Геодези, зураг зүйн тухай хууль"-ийн 11-р зүйлийн 11.1-д заасны дагуу байгууллага, аж ахуйн нэгж, иргэдийг газар зүйн албан ёсны нэрийн тухай мэдээллээр хангах, газар зүйн нэрийг зөв бичих, хэрэглэх, хууль тогтоомжийн хэрэгжилтийг хангуулж зөрчил дутагдлыг арилгах, иргэний бүртгэлийн мэдээллийн санд зөрчилтэй бүртгэгдсэн иргэдийн мэдээллийг зөв болгох, цаашид ийм зөрчил гаргуулахгүй байх талаас нь ажил зохион байгуулж ажиллах, нутаг дэвсгэртээ хамаарах газар зүйн нэрийн хэрэглээнд хяналтаа тавьж ажиллахыг холбогдох төрийн байгууллага, тодорхой сумдын Засаг дарга нарт даалгалсныг ШӨХТГ-аас мэдээллээ.

- “Сайн ломбард”-ыг дээрэмдсэн этгээд баригджээ

Энэ сарын 17-ны өдөр Баянгол дүүргийн 11 дүгээр хороонд байрлах “Сайн ломбард”-ыг дээрэмдсэн хэрэг гарч байв. Тодруулбал, Зурагтын эцсийн Сайн ломбардад 25-35 насны залуу дайран орж хутга тулган, тоо хэмжээ, ширхэг тодорхойгүй үнэт эдлэлүүд, нэг сая орчим орчим төгрөгийг дээрэмдээд зугтсан байдаг. Уг этгээдийг эрэн сурвалжилж байсан бөгөөд өнөөдөр 11.00 цагийн орчимд Эрүүгийн цагдаа, нийслэлийн цагдаагийн албан хаагчид Баянзүрх дүүргийн нутаг дэвсгэрээс баривчилсан байна. Түүнээс одоо мэдүүлэг авч байгаа бөгөөд үргэлжлүүлээд цагдан хорих юм байна. Тус этгээд нь урьд нь 2, 3 удаа ломбард дээрэмдсэн хэргээр шалгагдаж, эрүүгийн хариуцлага хүлээж байсан аж.

- Архангай аймгийн Батцэнгэл сумын халдварын голомтыг хаажээ

Архангай аймгийн Батцэнгэл суманд covid-19 халдвар бүртгэгдэж, голомтот бүс нутгаар бүртгэгдээд байсан. Үүнээс хойш тус суманд 28 хоног шинэ тохиолдол бүртгэгдээгүй тул халдварын голомт хаагдсан гэж үзжээ. Тус аймгийн Эрүүл мэндийн газрын дарга Р.Гандиймаагийн мэдээлснээр зөөвөрлөгдсөн халдварын тохиолдууд нэг гэр бүлийн хүрээнд бүртгэгдэж, хязгаарлагдсан байна. Аймгийн хэмжээнд бүх нийтийн бэлэн байдлын зэрэгт шилжиж, эрсдэлийн үнэлгээг тухай бүр хийн, салбар хооронд уялдаа холбоотой ажилласны үр дүнд халдварын голомтыг цомхотгожээ. Мөн аймгийн Засаг даргын нөөц хөрөнгөөс 178 сая төгрөгийг шийдвэрлэж, амьсгалын аппарат 2, хүчилтөрөгч өтгөрүүлэгч 85, зайнаас халуун хэмжигч 102, пульсиоксиметр 80, дуслын памп 3 болон тарианы памп 8 зэрэг тоног төхөөрөмж, 104 сая төгрөгийг шийдвэрлэж, хувийн хамгаалах хувцас хэрэгслийг аймгийн Онцгой комиссоос эрүүл мэндийн байгууллагуудад хуваарилан ажилласан байна.

УОК, Тагнуулын хэлтсээс өнгөрсөн арваннэгдүгээр сарын 27-нд Архангай аймагт covid-19 халдварын батлагдсан тохиолдлын ойрын хавьтал ирсэн тухай мэдээллийг өгчээ. Энэ дагуу тус аймгийн Батцэнгэл суманд 2 цагийн дотор тэг зогсолт хийж, сэжигтэй тохиолдол болон түүний нэн ойрын хавьтал болох 9 хүнээс сорьц авсан байна. Шинжилгээгээр 3 тохиолдлын онош батлагдаж, Цэргийн төв эмнэлэгт шилжүүлсэн аж. Одоогоор батлагдсан 3 тохиолдлын 2 нь эдгэж энэ сарын 25-нд аймагтаа иржээ. Эдгэрсэн 2 иргэнийг Батцэнгэл сумын Улаанчулуу багт шууд гэрт нь хүргэсэн байна. Харин гурав дахь иргэний биеийн байдал хөнгөн, эмчлэн тусгаарлаж байгаа аж.

- Зарим хүнсний бүтээгдэхүүн хомсдож, үнийн хөөрөгдөл үүсэж байна

Манай улсад дотоодод халдвар бүртгэгдэж, хөл хорио тогтоох болсноор импортын бүтээгдэхүүнүүд ховордоод байгаа. Ялангуяа, нарийн ногоо, өндөгний импорт удааширснаар эрэлт нэмэгдэж, үнэ нь өсөөд байгаа юм. Шинэ жилийн баяр өдрүүдэд бэлдэж иргэдийн нарийн ногоо, жимс, өндөгний хэрэгцээ дотоодод эрс нэмэгдэж, эрэлттэй байв. Хүнсний дэлгүүрүүдэд өндөг, жимс, нарийн ногоо ховордсон тул өндөг авах иргэд худалдааны төвүүдэд урт дараалал үүсгэх болжээ. Тухайлбал, “Барс” худалдааны төвд иргэд өглөөний 05.00 цагаас эхлэн дугаарлаж, зарим нь өндөг, нарийн ногоогоо авч чадалгүй буцах тохиолдол цөөнгүй байгаа хэмээн иргэд мэдээлж байлаа.

- Covid-19-ийн шинэ мутаци АНУ-д анх удаа бүртгэгдлээ

Их Британид анх илэрсэн халдварлах чадвар өндөртэй, Covid-19-ийн шинэ хувилбар “B.1.1.7” АНУ-д анх удаа бүртгэгджээ. Тодруулбал, Колорадо мужийн оршин суугч 20 гаруй насны эрэгтэйгээс уг вирус илэрсэн байна. Гэхдээ тухайн өвчтөн нь ойрын хугацаанд гадаадад зорчоогүй тул хаанаас халдвар авсан нь тодорхойгүй байгаа аж.

АНУ-ын халдварт өвчин судлалын мэргэжилтнүүдийн үзэж буйгаар Covid-19-ийн шинэ хувилбар мэдэгдэлгүйгээр хүн амын дунд тархсан байх өндөр магадлалтай байгаа юм байна. “B.1.1.7” гэж нэрлэгдэж байгаа шинэ хувилбар нь энгийн Covid-19-өөс 70 хувиар хурдан халдварладаг ба дэлхийн 17 оронд илрээд байгаа юм.

Өнгөрсөн долоо хоногоос эхлэн АНУ-ын засаг захиргаа Их Британиас ирэх зорчигчдоос Covid-19-гүйгээ нотлохыг шаардах болсон байна. Өөр хэд хэдэн улс орон Их Британийн иргэдийг хүлээн авахаа зогсоогоод буй юм.

- Монгол улсад covid-19-ийн батлагдсан нийт тохиолдол 1220 боллоо

2021 оны нэгдүгээр сарын 1-ны өдрийн байдлаар 7764 хүнд шинжилгээ хийхэд таван хүнээс вирус илэрсэн. ХӨСҮТ-ийн нэг сувилагч, БЗД-ийн эмнэлгийн голомттой холбоотой тусгаарлалтад байсан хоёр хүн, мөн Мөнххада ХХК-ийн хоёр хүнээс өчигдөр шөнө коронавирусийн халдвар илэрсэн. Халдвар авсан эх уурхайг судалж, тандаж байна. Мөнххада ХХК нийт 116 ажилтантай. Ойрын хавьтал 24 хүнийг тусгаарласан. Хоёрдогч хавьтал 92 хүн, нийт хүмүүст тандалт судалгаа хийж байна.

Халвар голомтлон гарч байсан аймгуудад сүүлийн 24 цагийн байдлаар халдвар нэмж бүртгэгдээгүй. Улсын хэмжээнд голомтлон гараад байгаа хэсэгт нийтдээ 740 тохиолдол бүртгэгдсэн. Харин сүүлийн 24 цагт долоон хүн эдгэрч эмнэлгээс гарсан.

Улаанбаатарт: 414

Сэлэнгэ аймагт: 217

Орхон аймагт: 25

Дархан-Уул аймагт: 45

Дорноговь аймагт: 32

Говьсүмбэр аймагт: дөрөв

Архангай аймагт: гурав

Монгол Улсад Covid-19 халдварын батлагдсан нийт тохиолдол 1220, үүнээс эдгэрсэн 837 буюу 68.3 хувь нь эдгэрсэн.

Цэргийн төв эмнэлэг, Хан-Уул дүүргийн 300 ортой эмнэлэг, Сэлэнгэ аймгийн нэгдсэн эмнэлэг, ХӨСҮТ-д нийтдээ онош нь батлагдсан 373 хүн эмчлүүлж байна. Үүнээс биеийн байдал нь маш хүнд хоёр хүн, хүнд зургаа, хүндэвтэр 104 хүн, хөнгөн 261 хүн эмчлэгдэж байна.

ХӨСҮТ-д хөнгөн 76, хүндэвтэр 19, хүнд нэг хүн байна.
Цэргийн төв эмнэлэгт 216 хүн эмчлэгдэж байгаагаас хөнгөн 124, хүндэвтэр 85, хүнд тав, маш хүнд хоёр хүн байна.
Сэлэнгэ аймагт эмчлэгдэж буй 21 хүний биеийн байдал хөнгөн байна.
Хан-Уул дүүргийн 300 ортой эмнэлэгт хөнгөн 40 хүн хяналт тандалтад байна.

БЗД-ийн нэгдсэн эмнэлгийн голомттой холбоотой хавьтлуудыг тусгаарласан. 2020 оны арванхоёрдугаар сарын 16, 17-наас тусгаарласан хавьтлууд 14 хоног хяналт тандалтад байж, дөрвөн удаагийн шинжилгээ сөрөг гарсан тул 332 хүнийг гэрийн ажиглалтад шилжүүлж байна. Энэ голомттой холбоотой 918 хүн ажиглалтад байна.

24 цагийн хугацаанд тусгай дугаарын долоон утсанд 2556 хүн хандаж, зөвлөгөө мэдээлэл авсан.

Дэлхий дахинд халдварын тархалт өндөр хэвээр байна. 218 улс орны 81.4 сая хүн халдвараар өвчилж, 1.7 сая хүн нас барсан бол 59.3 сая хүн эдгэрсэн байна.

Англи улсаас гаралтай коронавирусийн шинэ хувилбар нь дэлхийн 30 гаруй улсад тархсан. Энэ хувилбар нь 20-оос доош насны хүүхэд залуучуудыг их халдварлуулж байна.

BOLOD ДОЛОО ХОНОГИЙН ТОЙМ: Хатуу хөл хорионд 2021 оныг угтсан ДОЛОО ХОНОГ
Tweet
Bolod.mn

Мэдээ
Гадаад мэдээ
Видео