Өнгөрсөн долоо хоногт болж өрнөсөн ОНЦЛОХ үйл явдлыг BOLOD.mn сайт уншигч та бүхэнд тоймлон хүргэж байна. Эдгээр өдрүүдэд цар тахлын онцгой дэглэмийн хугацааг өндөржүүлсэн бэлэн байдлын зэрэг болгон сунгалаа. Ингэснээр иргэд арванхоёрдугаар сарын 23-ны өдрөөс хэлэн ирэх оны нэгдүгээр сарын 6-ныг хүртэл хатуу хөл хорион дунд өнгөрүүлэх юм. Түүнчлэн ирэх онд болох Ерөнхийлөгчийн сонгуулийн талаар Засгийн газраас хэлэлцсэний эцэст Ерөнхийлөгчийн сонгуулийн тухай хуулийг баталлаа.

- Засгийн газар: Арван хоёрдугаар сарын 23-наас эхлэн 14 хоног дахин хатуу хөл хорио тогтоохоор шийдвэрлэлээ

Засгийн газрын ээлжит бус хуралдаанаар Улаанбаатар хотод энэ сарын 23-наас ирэх нэгдүгээр сарын 6-ны 06.00 цаг хүртэл Гамшгаас хамгаалах бүх нийтийн бэлэн байдлын зэргийг хэсэгчлэн тогтоох шийдвэр гаргажээ. Мөн шийдвэр гаргахдаа хөдөө орон нутаг руу явсан иргэдийг нийслэлд эргэж ирэх боломжийг хангах үүднээс энэ сарын 23-ны 06.00 цагаас хэрэгжүүлэх болсныг дурдсан юм. Тэрбээр, “Засгийн газар цар тахал гарснаас хойш иргэдийн амь нас, эрүүл мэндийг хамгаалах асуудлыг нэгдүгээрт тавьж байна. Тиймээс голомтыг хумих, тархалтыг зогсоох, эрүүл мэндийн салбарын ачааллыг хэтрүүлэхгүй байх стратеги барьж байгаа. Баянзүрх дүүрэгт голомтолж гарч байгаа халдвар өдөрт 20-30 хүнд илэрч байна. Хэдийгээр ойрын болон дам хавьтлын хүмүүсээс илэрч байгаа. Гэхдээ энэ сарын 11-15-нд эмнэлгээс гарсан хүмүүст халдвар илэрсэн. Энэ хүмүүс иргэдийн дунд байсан учраас халдвар тархах эрсдэл өсөж магадгүйг мэргэжлийн байгууллагууд мэдэгдэж байгаа. Дэлхийн 192 оронд хөл хорионы дэглэм тогтоогоод байна. Ялангуяа, Англид мутацид орсон коронавирус илэрсэн. Шинэ жилийн баярын үеэр олон хүн цугларч, халдвар тархах эрсдэл нэмэгдэх тул олон орон хөл хорио тогтоож байгаа. Монгол Улсын хувьд нийтээр Шинэ жилийн баяр тэмдэглэхгүй ч иргэдийн хөл хөдөлгөөн тодорхой хэмжээгээр нэмэгдэх тул эрсдэл өсөж магадгүй хэмээн дээрх шийдвэрийг гаргаж байна” гэлээ. Энэ хүрээнд эрчим хүч, хүнсний үйлдвэр, түгээлт, харилцаа холбоо, хэвлэл мэдээлэл зэрэг 13 байгууллагуудын үйл ажиллагааг хэвийн явуулах болсон юм.

- Ерөнхийлөгчийн сонгуулийн тухай хууль баталлаа

Улсын Их Хурлын 2020 оны намрын ээлжит чуулганы арвахоёрдугаар сарын 24-ны үдээс хойших нэгдсэн хуралдаанаар Коронавируст халдвар (КОВИД-19)-ын цар тахлаас урьдчилан сэргийлэх, тэмцэх, нийгэм, эдийн засагт үзүүлэх сөрөг нөлөөллийг бууруулах тухай хуульд нэмэлт, өөрчлөлт оруулах тухай хуулийн төслийн хэлэлцэх эсэхийг үргэлжлүүлэн хэлэлцлээ. Чуулганы үдээс өмнөх хуралдаанаар гишүүд төсөл санаачлагчийн илтгэл, Аюулгүй байдал, гадаад бодлогын байнгын хорооны санал, дүгнэлттэй холбогдуулан асуулт асууж, хариулт, тайлбар мэдээлэл авсан.

Дараа нь Монгол Улсын Ерөнхийлөгчийн сонгуулийн тухай хуулийн төслийг батлах санал хураалт явуулахад хуралдаанд оролцсон 68 гишүүний 52 нь 76.5 хувийн саналаар дэмжиж баталлаа. Түүнчлэн хамт өргөн мэдүүлсэн хуулийн төслийг батлахыг гишүүдийн олонх дэмжсэнээр батлагдав. Монгол Улсын Засаг захиргаа, нутаг дэвсгэрийн нэгж, түүний удирдлагын тухай хуулийн шинэчилсэн найруулгын төслийг батлах санал хураалт явуулахад гишүүдийн 65.2 хувиар дэмжиж, хууль батлагдлаа. Хамт өргөн мэдүүлсэн Монгол Улсын засаг захиргаа, нутаг дэвсгэрийн нэгж, түүний удирдлагын тухай хуулийг хэрэгжүүлэх бэлтгэлийг хангах зарим арга хэмжээний тухай, Монгол Улсын татварын ерөнхий хуульд нэмэлт, өөрчлөлт оруулах тухай, Төсвийн тухай хуульд нэмэлт, өөрчлөлт оруулах тухай, Монгол Улсын засаг захиргаа, нутаг дэвсгэрийн нэгж, түүний удирдлагын тухай хууль хүчингүй болсонд тооцох тухай, Монгол Улсын засаг захиргаа, нутаг дэвсгэрийн нэгж, түүний удирдлагын тухай хуульд өөрчлөлт оруулах тухай хуулийг дагаж мөрдөх журмын тухай хуулийг хүчингүй болсонд тооцох тухай хуулийн төслүүдийг баталсан юм.

- МҮОНРТ-ын Ерөнхий захирлаар Н.Дэмбэрэлийг томиллоо

Монголын Үндэсний олон нийтийн радио, телевизийн Үндэсний зөвлөлийн хурал болж, шинэ Ерөнхий захирлыг томилжээ. Хуралдаанаар Н.Амарбаяр, С.Баярмөнх нар нэрээ татсан. Улмаар Үндэсний зөвлөлийн 14 гишүүн хуралдаж, 11 саналд Н.Дэмбэрэлийг дэмжсэнээр түүнийг Ерөнхий захирлаар томилсон байна.

Н.Дэмбэрэл нь хүүхдийн эмч, эдийн засагч мэргэжилтэй. 2006-2008 онд Засгийн газрын Хэвлэл мэдээллийн албаны дарга, 2012 оноос МАН-ын Хэвлэл мэдээлэл, олон нийттэй харилцах газрын дарга, 2015 онд МАН-ын Ерөнхий нарийн бичгийн даргын зөвлөх, 2018 оноос Ерөнхий сайдын дэргэдэх Үндэсний брэндингийн зөвлөлийн ажлын албаны даргаар ажилласан туршлагатай.

- Баянзүрх дүүргийн Цагаан давааны хогийн цэгт ковид-19-ийн халдвар батлагджээ

Баянзүрх дүүргийн хэмжээнд цар тахлын голомт үүссэн учир халдварын сэжигтэй орон сууц, орцуудад цагдаагийн байгууллага 14 хоногийн хамгаалалт, тусгаарлалтын арга хэмжээ авч байна. Тусгаарлагдсан орон сууцны иргэдээс мэргэжлийн байгууллага гурван удаагийн шинжилгээ авч, хариу сөрөг гарвал тусгаарлалтаас гаргана. Иргэд гэрээс гарах боломжгүй учир долоо хоногт хоёр удаа гарч хүнсээ цуглуулах боломж бүрдүүлнэ.

Цагаан давааны хогийн цэгт коронавирусийн халдварын эерэг тохиолдол батлагдсан. Үүнээс болж хог тээвэрлэлтэд хүндрэл гарч байгаа бөгөөд хог тээвэрлэлтийг Сонгино-хайрхан дүүргийн хогийн цэг рүү шилжүүлж байна хэмээн мэдээллээ.

Түүнчлэн Худалдаа хөгжлийн банкны төв салбарын ажилтнаас халдвар илэрсэн юм. Тухайн иргэн нь батлагдсан тохиолдлын ойрын хавьтал байсан гэх мэдээлэл байгаа юм. Үүнээс улбаалж тус банкны төв салбарыг хамгаалалтад авч ажилтнуудаас шинжилгээ авч эхэлсэн. Түүнчлэн 14 хоногийн хугацаанд ажиллахгүй болсныг ажилтнууддаа мэдэгдэж эхэлжээ.

ХӨСҮТ-өөс мэдээлснээр БЗД-ийн Нэгдсэн эмнэлгээс гарсан голомт өчигдөр гэхэд 55 хүн шинээр халдвар авсныг мэдээлсэн билээ.

- Путин “бүх насаараа халдашгүй эрхтэй” боллоо

Оросын Ерөнхийлөгч Владимир Путин ерөнхийлөгчийн албан тушаалд ажиллаж байсан хүмүүсийн халдашгүй эрхийг хасах журмыг "төвөгтэй болгосон" хуульд гарын үсэг зуржээ. Ерөнхийлөгчийн албан тушаалд ажиллаж байсан хүмүүст насан туршид нь халдашгүй эрх олгох тухай хууль Оросын эрхзүйн мэдээллийн албан ёсны цахим хуудсанд нийтлэгдсэн байна.

Энэ хууль батлагдсанаар, ерөнхийлөгч бүрэн эрхээ хэрэгжүүлэх хугацаанд гаргасан үйлдлийнхээ төлөө хариуцлагад татагдахгүй байх боломж үүсжээ. Шинэ хуулийн дагуу Ерөнхийлөгч улс орныг удирдахаа больсон үед ч халдашгүй эрх нь хэвээр байх гэнэ. Ерөнхийлөгч агсныг захиргааны болон эрүүгийн хариуцлагад татах боломжгүй, түүнчлэн саатуулах, баривчлах, нэгжлэг хийх, байцаах эсвэл хувийн үзлэг хийх боломжгүй болж байгаа аж.

Түүнчлэн төрийн тэргүүний албан тушаал хашиж байсан хүний орон сууц, албаны сууц, түүний тээврийн хэрэгслүүд, холбоо харилцааны хэрэгсэл, баримт бичиг, захидал зурвас ч халдашгүй байх гэнэ.

-Нууцаар ажиллаж байсан цахим тоглоомын газарт насанд хүрээгүй хүүхдүүд тоглож байжээ

УОК, Засгийн газрын шийдвэрээр энэ сарын 23-наас бүх нийтийн бэлэн байдлын зэрэгт шилжээд байгаа. Ингэснээр 15 салбарын үйл ажиллагааг л явуулах зөвшөөрлийг УОК-оос гаргасан юм. Гэтэл хатуу хөл хорионы үеэр нууцаар PC тоглоом ажиллуулж байсныг цагдаагийн албан хаагчид илрүүлжээ. Тодруулбал, Чингэлтэй дүүргийн тавдугаар сургуулийн хажууханд Хэнтий аймгийн харьяат иргэн цахим тоглоомын газрыг ажиллуулж байсан үйлдлийг Эрүүгийн цагдаагийн албан хаагчид таслан зогсоосон байна. Тус газарт 21-ээс доош насны буюу насанд хүрээгүй 15-20 орчим хүүхдүүд байсан аж.

Цахим тоглоомын газар байсан хүүхдүүд амны хаалт зүүгээгүй, хүн хоорондын зай баримтлаагүй мөн тоглож байгаа орчинд ариутгал халдваргүйжүүлэлт хийгдээгүй гэх мэт олон зөрчил илэрчээ.

Харин тоглоомын газрыг ажлуулж байсан иргэнээс яагаад ийм үйлдэл хийх болсон талаар тодруулахад "Цар тахал гарч санхүүгийн асуудалтай байгаа учраас ингэж хэрэглээний мөнгө олох өөр арга байсангүй" гэх тайлбарыг өгсөн байна.

Иймд хөл хорио тогтоосон эдгээр өдрүүдэд эцэг эхчүүд насанд хүрээгүй хүүхдэдээ тавих анхаарлаа сулруулахгүй байхыг холбогдох албанаас анхааруулж байна.

- Естийн халуун рашааныг зорьсон таван залуу майхандаа угаартжээ

Төв аймгийн Эрдэнэ сумын нутаг дахь Естийн халуун рашааныг зорьсон таван залуу нас барсан харамсалтай хэрэг гарчээ. Цагдаагийн байгууллага хэргийг шалгахаар нисдэг тэргээр явсан байна. Урьдчилсан мэдээллээр залуучууд майхандаа гал түлснээс угаартаж нас барсан. Биеийн гадна ямар нэг гэмтэл шархгүй гэх дүгнэлтийг гаргаад байгаа аж. Улмаар цогцсуудыг энэ сарын 23-нд нисдэг тэргээр зөөвөрлөж авчирсан юм.

- ЭХЯ: Эрчим хүчний хэрэглээ буурч байна

Эрчим хүчний яамнаас энэ сарын 23-ны өдөр мэдээлэл хийлээ. Эрчим хүчний зохицуулах хорооны Төвийн эрчим хүчний системийн оргил ачаалал өнгөрсөн өдрүүдэд 1202 МВт хүрсэн нь өмнөх оны мөн үеэс 8 хувийн өсөлттэй байна. Оргил ачааллын үед ОХУ-аас 155 МВт эрчим хүч авч оргил ачааллыг хаажээ. Импортын хэрэглээг өмнөх оны мөн үетэй харьцуулахад 3 хувийн бууралттай байгаа аж.

Эндээс үзэхэд манай улсын эрчим хүчний хэрэглээ буурч байгаа бөгөөд энергийн хувьд 21.2 сая КВт цаг эрчим хүч хэрэглэсэн нь өмнөх оны мөн үеэс 11 хувийн өсөлтийг үзүүлжээ. 12-р сарын 15-ны өдөр эрчим хүчний системийн хэрэглээ 1303 МВт болж оргил ачаалалдаа хүрсэн. Харин 24 цагийн дараагаас оргил ачаалал мөн өдрийнхөөс 107 МВт-аар багассан багассан байна.

- Баянзүрх дүүргийн Нэгдсэн эмнэлэгийн батлагдсан тохиолдол 142 боллоо

Эрүүл мэндийн яамнаас өдөр бүрийн 11 цагт коронавирусийн мэдээллийг тогтмол хүргэдэг билээ. Арван-хоёрдугаар сарын 25-ны өдрийн байдлаар Улаанбаатар хотод 6 тохиолдол шинээр илэрсэн бөгөөд эдгээр тохиолдлууд Баянзүрх дүүргийн нэгдсэн эмнэлгийн голомтоос илэрсэн аж. Ийнхүү тус эмнэлэгт 142 тохиолдол бүртгэгдээд байгаа бөгөөд Улаанбаатар хотын хэмжээнд дотоодын тохиолдол 285-д хүрээд байгаа юм.

Харин өнгөрсөн долоо хоногийн хувьд Архангай, Сэлэнгэ, Орхон, Дархан зэрэг халдварын голомт тархсан аймгуудад халдварын тохиолдол нэмж бүртгэгдээгүй юм. Ингээд улсын хэмжээнд нийт 1075 тохиолдол илэрч, 584 хүн эдгэрч, 482 хүн эмчлэгдэж байгаа аж. Үүнээс 416 хүн нь хөнгөн, 57 хүндэвтэр, 6 хүнд, 3 хүний биеийн байдал маш хүнд байгаа хэмээн эрүүл мэндийн яамнаас мэдээлсэн юм. Нийт халдвар авсан иргэдийн эдгэрэлтийн байдал 51 хувьтай байгааг ХӨСҮТ-ийн Тандалт судалгааны албаны дарга А.Амбасэлмаа хэллээ.

Мөн Цэргийн төв эмнэлэгт хэвтэн эмчлүүлж байсан биеийн байдал нь маш хүнд оноштой 82 настай иргэн эдгэрч дараагийн хяналт буюу Яармагийн эмнэлэг рүү шилжжээ.

BOLOD ДОЛОО ХОНОГИЙН ТОЙМ: Хатуу хөл хориог дахин сунгаж, Ерөнхийлөгчийн сонгуулийн тухай хууль баталсан ДОЛОО ХОНОГ
Tweet
Bolod.mn