Эх сурвалжийн хэлж буйгаар Засгийн газрыг дэмжигч буюу Ерөнхий сайд У.Хүрэлсүхийн фракцынхан “ажил хаяжээ”. Хуваарийн дагуу өчигдөр УИХ-ын хууль зүйн байнгын хороо, өргөдлийн байнгын хороо хуралдах байсан ч гишүүдийн олонх нь ирсэнгүй. Харин төрийн хэрэг хувийн өрөөнд шилжиж, талцагч талууд тус тусдаа хэсэг бүлгээрээ уулзацгаав. Тооны харьцаагаар тэнцүү шахуу хуваагдчихаад буй МАН дахь албан бус хоёр бүлгийн хайнааг хагалах ардчилсан намынхан ч бүлгийн дарга Д.Эрдэнэбатын өрөөнд санал солилцсон талаар эх сурвалж хэлж байна. Улмаар тус намын улс төрийн зөвлөл хуралдаж, Ерөнхий сайд У.Хүрэлсүхийн тэргүүлсэн Засгийн газрыг огцруулах саналыг дэмжихээр болжээ. Аймаг, нийслэл, дүүргийн намын дарга нараас бүрддэг уг зөвлөлөөс тогтоол гаргасан бөгөөд үүнд “У.Хүрэлсүхийн тэргүүлсэн Засгийн газрыг огцруулахыг дэмжиж, энэ асуудлаар бүлгийн гишүүд нэгдмэл байр суурьтай байхыг чиглэл болгов” гэжээ. Хэрэв тус бүлгийн есөн гишүүн намаас өгсөн чиглэлийн дагуу нэгдмэл байр сууриар санал өгвөл одоогийн байдлаар Засгийн газрыг огцруулах 36 кноп бэлэн байна гэсэн үг.

Д.Хаянхярваагаар ахлуулсан УИХ-ын 27 гишүүний өргөн барьсан Засгийн газрыг огцруулах бичигтэй холбогдуулан зарим гишүүн, сайдын байр суурийг сонирхлоо.

З.Нарантуяа: Хариуцлагатай холбоотой бүх саналыг дэмжинэ

Манай бүлэг “Төрийн үйл ажиллагаа хариуцлагатай, хяналттай, тууштай байх ёстой. хууль зөрчсөн аливаа үйлдэл гаргасан бүх л хүнтэй хариуцлага тооцох нь зөв” гэх байр суурьтай байгаа. ЖДҮХС-гаас хууль зөрчиж мөнгө авсан Засгийн газрын сайд ч байна, УИХ-ын гишүүн ч байна. Өөрөөр хэлбэл бид ёс зүйгүй гишүүдэд хариуцлага тооцох санал дээр ч дэмжиж кнопоо дарна, Засгийн газрыг огцруулах санал дээр ч кноп дарна. Харин хэндээ хариуцлага хүлээлгэхээ эрх барьж байгаа нам өөрөө шийдэх ёстой. Тиймээс хариуцлагатай холбоотой бүх саналыг дэмжинэ.

Н.Энхболд: Санал хураалтад эрүүл саруул ухаан давамгайлах болов уу гэж найдаж байгаа

Өнөөдөр улс орны гадаад дотоод нөхцөл байдал, нийгмийн уур амьсгалыг харахад алдаатай, оноотой ч Засгийн газар бололцооныхоо хэмжээнд тодорхой хориг саад даваад ажиллаж байна. Ийм үед Засгийн газар огцрох нь улс орны хувьд ашиггүй. Засгийн газар алдаж, онож байгаа зүйл бий байх. Засаж залруулах бололцоо, цаг хугацаа ч байна. Тиймээс огцруулах нь буруу гэж үзэж байгаа. Энэ бол зөвхөн МаН-ын дотоод асуудал биш. Улс орны эрх ашигтай холбоотой юм. Гэхдээ санал хураалтад эрүүл саруул ухаан давамгайлах болов уу гэж найдаж байгаа.

Ц.Мөнх-Оргил: У.Хүрэлсүх үндсэн хуулиар олгогдсон үүргээ ухамсарлахгүй байна

Хамгийн гол асуудал нь, Ерөнхий сайд У.Хүрэлсүх үндсэн хуулиар олгогдсон үүргээ ухамсарлахгүй байна. Саяхан чуулганы индэр дээрээс “Би ажлаа хиймээр, шударга ёсыг тогтоомоор байна. Даанч үндсэн хууль болохгүй байна” гэж мэдэгдсэн. Иргэн хүн ямар ч мэдэгдэл хийж болно. Гэхдээ Монгол Улсын Ерөнхий сайдын хувьд хууль, тогтоомждоо нийцэж ажиллах учиртай. Тиймээс “Үндсэн хууль болохгүй байгаа учраас би ажлаа хийж чадахгүй байна” гэж мэдэгдэх эрхгүй. Ерөнхий сайд бүү хэл төрийн албан хаагч улсынхааа хууль тогтоомжид нийцэж ажиллах ёстой. Ерөнхий сайд Засгийн газрыг удирдаж, төрийн хуулийг хэрэгжүүлэх үүргийг уих-ын өмнө биечлэн хариуцах үндсэн хуулийн хүрээний хоёрхон эрхтэй. Ерөнхий сайд нам, төр хоёр тусдаа гэдгийг ойлгохгүй яваа нь харамсалтай.

Х.Баделхан: Засгийн газар шударга ажиллах гэж хичээж байна

Би Засгийн газрыг огцруулах үндэслэлийг одоохондоо олж харахгүй байна. Нийгэм шударга ёс шаардаж байна. Ялангуяа, ЖДҮХС-тай холбогдуулаад. Гэхдээ ард түмэн шударга ёс шаардаж байгаа болохоос биш Засгийн газраа огцруул гэж захиалаагүй. Засгийн газар анх бүрдэхдээ л шударга байсан гэж үздэг. Намд хандив өгсөн, санхүүжүүлсэн хүмүүс сайд болдог гэсэн шүүмжлэл өмнө нь гардаг байсан. Харин энэ Засгийн газар тэгээгүй. Тухайлбал миний тухайд үндэсний цөөнхийн төлөөлөл. Манай аймгаас 25 жилийн дараа, харин БХБЯ-ны хувьд 35 жилийн дараа үндэсний цөөнхийг төлөөлсөн сайдтай боллоо. Шударгаар бүрдсэн Засгийн газар шударга ажиллах гэж хичээж байна.

Ё.Баатарбилэг: Ерөнхий сайдын ам, ажил хоёр зөрөөд байна

Засгийн газар хуулийн хэрэгжилтийг хангуулж ажиллах үндсэн үүрэгтэй. УИХ-аас гаргасан хууль тогтоомжуудын хэрэгжилтийг хангуулан ажиллах ёстой Засгийн газар сүүлийн үед байнга доголдож, алдаа дутагдал гаргах боллоо. Ерөнхий сайд сахилга, хариуцлагаа чангатгана гэж байнга ярьдаг. Гэтэл бодит байдалд Ерөнхий сайдын ам, ажил хоёр зөрөөд байна. Ж.Эрдэнэбатын Засгийн газрыг огцруулах үндэслэлээр гурван асуудал нэрлэж байсан. Гэтэл У.Хүрэлсүхийн Засгийн газрыг огцруулах асуудлаар зургаан үндэслэл нэрлэлээ. ЖДҮХС-гаас Засгийн газрын хоёр гишүүн зээл авчихаад байхад ямар ч шийдвэр гаргахгүй байна. Энэ мэт үндэслэлүүд бодитой байгаа гэж хэлье.

Б.Энхжаргал

Засгийн газрын мэдээ