Кикбоксын спорт манай улсад 10-д жилийн өмнөөс анх үүсэн хөгжөөд одоо 2 дах үедээ явж байна. Миний хувьд анх гадагшаа явж суралцан тулааны спортоор мэргэжлийн тамирчин болоод дараа нь эх орондоо ирж энэ спортыг хөгжүүлхэд хувь нэмрээ оруулсан.

Шинобу файт гэж юу гэсэн үг вэ?

Шинобу гэдэг нь манай дэвжээний нэр юм. Би өөрөө 10 гаруй жил энэ дэвжээний нэрээр Японд тулааны урлагаар хичээллэж, тодорхой амжилтанд хүрсэн. Монголд ирээд анх Империал гэдэг тэмцээнийг зохион байгуулж байлаа. Үүний дараа 2 жилийн өмнөөс Шинобу файт гэдэг тэмцээнийг зохион байгуулсан. Өдгөө энэ хүрээнд 70, 65, 60 кг-ийн жингийн тамирчдын тэмцээнийг зохион байгуулж байна. Энэхүү тэмцээний гол зорилго нь Монгол дах кикбокс болон тулааны урлагийн бусад клубуудын дунд энэ төрлийн тэмцээнийг зохион байгуулж үндэсний аваргыг тодруулах явдал юм. Тэгээд саяхан өндөр шагналтай тэмцээнийг бид анх удаа зохион байгууллаа. Гэхдээ энэхүү тэмцээн нь бооцоот тэмцээн биш өндөр шагналын сантай тэмцээн юм. Өдгөө бид энэ тэмцээнийг 3 дах жилдээ эх орондоо зохион байгуулж байна. Өмнө нь 70 кг, 65кг-ийн жингийг тулааны тэмцээнүүдийг зохиож байсан бол өнөөдөр ийнхүү 60 кг-ийн тэмцээнийг зохион байгуулж байна. Уг тэмцээнд ялалт байгуулсан тамирчдыг ирэх 8-р сард Япон улсад зохиогдох кикбоксингийн Азийн Гран при тэмцээнд оролцуулхаар зорин ажиллаж байна.

Уг тэмцээнд оролцсон тамирчид бүгд өөр өөр клубуудээс ирж оролцсон гэсэн үг үү?

Тийм. Өнөөдөр манай улсад маш олон фитнес клубууд байна. Эдгээр клубуудэд тулааны спортоор хичээллэж байгаа олон залуус байгаа. Тэд кикбокс, бокс, карате, таеквондо, холимог тулаан зэрэг тулааны урлагын төрлүүдээр амжилттай хичээллэж байна. Гэхдээ тулааны урлагийн тэмцээнийг Кикбоксын киван гэдэг дүрмээр зохион явуулдаг. Үүгээрээ онцлогтой гэж хэлж болно.

Саяын тэмцээн бусад тэмцээнүүдээс юугаараа онцлогтой вэ?

Энэ удаагийн тэмцээн нь 60 кг-ийн тулааны тэмцээн болж буйгаараа онцлогтой. Аль холбоо клубын тамирчин хамгийн шилдэг тулаанч вэ гэдгийг тодруулах тэмцээн юм. Дараа дараачийн тэмцээнүүдэд бид үүнээс олон тамирчдыг оролцуулах болно. Тулааны урлагийг ингэж хөгжүүлснээрээ бид нийгэмд тодорхой хэмжээний хувь нэмрээ оруулж байгаа юм. Яагаад гэвэл өнөөдөр манай нийгэмд залуучуудад чөлөөт цагаа өнгөрүүлэх газар ховор байна. Тиймээс хүүхэд залуучууд маань энэхүү эр зоригийн спорт, тулааны спортоор хичээллэснээр эрүүл чийрэг бие бялдартай болж, өөрийгөө хянах, сахилга баттай болох, бусдаас хараат биш, тийм зан чанартай болно гэж бодож байна. Тиймээс энэхүү спортыг нийгэмд өргөн сурталчилж, маш олон залуусыг зөв замд нь хөтлөх боломжтой. Үүнийг Японд будогийн замнал гэж нэрлэдэг. Одоо ингээд харж байхад манай зарим хүүхэд залуус буруу зам руу орж байна. Тэд ихэвчлэн баар цэнгээний газар орж, архи дарс зэрэг муу зүйлд татагдаж байна, мөн мансууруулах бодисын нөлөөнд автах явдал их байна. Энэ нь юуг хэлээд байна гэхээр тэдэнд сэтгэлийн тэнхээ огт байхгүй байна, мөн яаж зөв зам руу орох вэ гэдгээ огтхон ч мэдэхгүй байна. Тэгвэл тэд энэ тулааны спортоор хичээллэснээр зөв зам руу орох боломжтой юм. Тэр тусмаа хүүхэд залуучуудад үгүйлэгдээд байгаа нэг зүйл нь тэдэнд үлгэр дууриал болчих тулааны урлагийн од, баатар болохоор хүн хэрэгтэй байгаа юм шиг надад санагддаг.

Манай тулааны урлагийн багш тамирчдын чадвар ер нь хэр вэ?

Нэг үеэ бодвол мэдээж сайжирсан. Гэхдээ тодорхой хэмжээгээр тэдэнд суралцах зүйлүүд их бий. Удахгүй бид гадны багш мэрэгжилтнүүдийг авчирч сургалт семинар зохион байгуулах бодолтой байна. Одоо бид өөрсдийнхөө хэмжээнд энэ спортыг хөгжүүлээд явж байна. Миний хувьд энэ спортод өөрийн бие сэтгэлийг анхнаасаа зориулж ирсэн. Тэмцээн олон байж байж тамирчдын маань чадвар сайжирч, энэ спорт цаашаа хөгжих боломжтой. Мөн тэмцээн уралдаан олон байх тусам шагналын сан өндөр байх ёстой. Гадаадын улс орнуудад энэ төрлийн уралдаан тэмцээнүүд маш өндөр шагналын сантай байдаг. Бид цааш цаашдаа тэмцээний шагналынхаа сангаа өсгөх болно.

Та бүхэн төр засгаас дэмжлэг авч чадаж байгаа юу?

Харамсалтай нь манай тулааны спортын клубууд улсаас огт дэмжлэг авдаггүй. Энэ нь төр засгын бодлого нь өөрөө их буруу байдагтай холбоотой. Тэр нь ямар учиртай вэ гэвэл тэд спортыг олимпийн ба олимпын бус спорт гээд ялгачихдаг. Энэ утгаараа тэд олимпын төрлийг нь дэмжээд олимпийн бус төрлийг нь ерөөсөө дэмждэггүй. Гэтэл олимпийн бус төрлийн спортод маш олон төрлийн мэргэжлийн спортууд байдаг. Эдгээр төрлүүдээс манай тамирчид олон улсын тэмцээнд маш идэвхитэй сайн оролцож, нэр хүндтэй шагналуудыг хүртэж байсан. Гэхдээ бид заавал төр засгыг хараад зүгээр гараа хумхиад суухыг хүсээгүй. Өөрсдийнхөө нөөц боломжийг ашиглан эдгээр тэмцээн уралдаануудыг зохион байгуулж байна. Гэхдээ хамгийн гол нь төр засгаас спортын төрлүүдийг алагчилалгүйгээр дэмжиж өгвөл их сайн байна. Би өөрөө Япон улсад 10-д жил их сургуульд сурч, тулааны урлагын спортоор амжилт гарган энэ хугацаандаа шоу бизнесийн чиглэлээр мастерийн зэрэг хамгаалсан.

Манай тамирчдаас олон улсын чанартай тэмцээнүүдэд оролцож чадаж байна уу ?

Оролцож байгаа. Бид удахгүй энэхүү тэмцээнд түрүүлсэн тамирчдаа аваад ирэх 6-р сард Япон улсад зохиогдох тэмцээнд оролцуулна. Тэд Японд очоод тус улсын аварга тамирчидтай халз тулалдах юм. Мөн удахгүй манай улсад олон улсын тулааны спортын томоохон тэмцээн зохион байгуулагдана. Үүнд бид одооноос бэлтгэж эхлэх учиртай.

Цаг зав гарган ярилцсанд танд баярлалаа.

Ж.Батдорж

BOLOD.mn

Ц.Амарбаясгалан: Манай тулааны урлагийн тамирчид удахгүй Азийн Гран при тэмцээнд оролцоно
Tweet
Bolod.mn