Эх сурвалжуудын мэдээллэж байгаагаар Ерөнхий сайд Ч.Сайханбилэг одоо байгаа бүтэц дээрээ нэг яам шинээр нэмж байгуулахаар бэлтгэж байгаа гэв. Энэ нь эдийн засгийн хөгжлийн яамны чиг үүргийг хадгалсан томоохон төсөл, аж үйлдвэржилтийн бодлого хариуцсан яам байх талаар мэдээлэл тараад байна. АН-ын ҮЗХ хуралдаж Засгийн газрын бүтэц бүрэлдэхүүнийг батлахыг гүйцэтгэх зөвлөлдөө даалгасан. Мөн МАН-ын бүлэг, удирдах зөвлөл сайдад нэр дэвшигчдээ тодруулна. Тэгвэл шинэ засагт ямар сайд нар очих тохироо хэдийн хийгдээд эхэлжээ. Шинэ засгийн газар 14 яамтай Ерөнхий сайдын хамт 17-гишүүний бүрэлдэхүүнтэй бөгөөд МАН-7, ИЗН-1, МҮАН-1, АН-8 сайд томилохоор яригдаж байна. Сайд нарын 9 нь гаднаас 8 нь УИХ-аас томилогдохоор байна. Ингээд Ерөнхий сайд Ч.Сайханбилэгийн тэргүүлсэн Засагт сайдаар очих эрхмүүдийг танилцуулья.

Монгол Улсын шадар сайд У.Хүрэлсүх

Улстөрөөс хөндийрсөн мэт харагдавч МАН-д өнөөдрийг хүртэл нөлөөгөө хадгалж хүчээ сэлбэсээр байгаа хүн бол гарцаа байхгүй У.Хүрэлсүх. Түүний тэргүүлдэг Зүүний хүчний холбоонд Н.Багабанди, С.Баяр, С.Батболд, Ө.Энхтүвшин нарын хуучин намын дарга нар өөрсдийн шадар цэргүүдээ илгээж дэмжиж байгаагаа илээр мэдэгдсэн билээ. Түүнийг энэ удаад МАН-аас томилогдох сайд нарын марафоныг тэргүүлнэ гэдгийг эх сурвалж мэдээллэж байна. УИХ-ын гишүүний суудлаа сайн дураараа өгч намдаа нэг хүнд ч болтугай зай гаргаж өгсөн эрэлхэг үйлдлийг нөхөд нь мартаагүй бололтой. "Энэ удаагийн Засгийн газраас намын дарга нар хол байх хэрэгтэй" гэж УИХ-ын дарга, АН-ын дарга З.Энхболд мэдэгдсэн болохоор МАН-ын дарга М.Энхболд заавал Засгийн газарт өөрөө томилогдох шаардлаггүй гэж олонх нь үзэж байгаа гэнэ.

Засгийн газрын хэрэг эрхлэх газрын дарга Я.Санжмятав

Ерөнхий сайдын гал тогоог “Алтангадас”-ын тэргүүнээр сонгогдоод удаагүй байгаа Я.Санжмятав хариуцах бололтой.

Сангийн сайд С.Бямбацогт

Маргаангүй хүн. Парламентад нэгэн бүрэн эрхийн үедээ сөрөг хүчний байрнаас эрх баригчдын байранд шилжиж байсан түүх үгүй. Бүлэггүй, байнгын хорооддоо бараг нөлөөгүй, үгийг нь тоодоггүй байсан МАН-ын бүлгийг нэг жил гаран удирдахдаа бүлэгтэй, байнгын хороонд тэгш хуваарилалттай, Засгийн газарт хамтрагч болтол нь хүчирхэгжүүлсэн нь гарцаа байхгүй МАН-ын бүлгийн 26 гишүүн атгасан гар шиг ажиллаж чадсаны гавьяа. Товчхондоо энэ бол МАН-ын хувьд ялалт. Энэ ялалтыг байгуулахад парламент дахь сөрөг хүчний удирдагчийн үүрэг, оролцоо хамгийн их байсан нь дамжиггүй. УИХ-д хоёр дахь удаагаа сонгогдсон Санхүү эдийн засгийг дээд сургууль, голландын мастритхийн их сургуулийн тус тус дүүргэсэн эдийн засагч мэргэжилтэй энэ эрхэм Монгол Улсын төсөв санхүүг хариуцаж ажиллах нь. Мөн түүнийг зарим эх сурвалжуудын шадар сайдаар томилогдохыг ч үгүйсгэхгүй байгаа.

Нийгмийн хамгааллын сайд Д.Оюунхорол

УИХ-ын гишүүн Д.Оюунхорол МАН-ын эмэгтэйчүүдийг төлөөлж, нийгмийн хамгааллын сайдаар ажиллана.

Боловсрол шинжлэх ухааны сайд Д.Цогтбаатар

Дипломатич мэргэжилтэй Д.Цогтбаатар бол МАН-ын нэр цэвэр залуучуудын нэг. Өмнөх Засгийн газар байгаль орчны сайдаар ажиллаж байсан тэрээр улстөрийн хувьд идэвхтэй байр суурь илэрхийлж "амбицлаад" яваад байдаггүй. Даруу төлөв, бичиг номын хойноос төдийлөн хөндийрдөггүй түүнийг С.Баяр, С.Батболд нар маш ихээр дэмждэг. МАН-ын Ерөнхий нарийн бичгийн даргад нэр нь дуулдаж байсан тэрээр энэ удаад гарцаагүй сайдаар томилогдох бололтой.

Зам тээвэр, барилга хот байгуулалтын сайд Ц.Сандуй

МАН дахь хотын фракцын гол төлөөлөл, нийслэлийн МАН-ын дарга Ц.Сандуй зам тээвэр барилга, хот байгуулалтын салбарыг тэргүүлнэ. Тэрээр Улаанбаатар хотын газрын албанд олон жил ажиллаж, меритийн зарчмаар газрын албаны даргаар дэвшин ажиллаж байсан мэргэшсэн төрийн алба хаагч н. МАН дахь нэр нөлөө, үүрэг хүрээнийхээ даацаар ч Ц.Сандуй сайдаар томилогдох нь цаг нь ирсэн гэнэ.

Батлан хамгаалахын сайд Я.Содбаатар

"Ирээдүйн МАН-ын дарга, Генсек нар бүгд МАСЗХ-ноос төрнө" гэсэн илтгэл үнэмшилтэй залуус МАН-д олон. МАСЗХ-ний залуус гэж У.Хүрэлсүхийн тэргүүлсэн бүтэн үе МАН-д хүчээ авч байна. Тэгвэл тэднийг төлөөлж сайдын тамга атгах хүн нь Я.Содбаатар болж байна.

Гадаад харилцааны сайд Л.Пүрэвсүрэн

Гадаад харилцаа, эдийн засгийн хамтын ажиллагааны яам гэсэн сүүлчийн нэршил өөрчлөгдөж эдийн засгийн харилцааг тусгаарлах нь тодорхой болж байгаа гэнэ. Харин гадаад харилцааны сайдаар Ерөнхийлөгчийн гадаад бодлогын зөвлөх Л.Пүрэвсүрэн очих нь тодорхой байгаа гэнэ.

Хууль зүйн сайд Д.Дорлигжав

Монгол Улсын Ерөнхий прокурор хууль цаазын тэргүүн зөвлөх Д.Дорлигжавын нэр Монгол Улсын Ерөнхий сайдад ч хэд хэдэн удаа дуулдаж байв. Ардчилсан хувьсгалын анхдагчдийн нэг тэрээр энэ удаад хууль зүйн салбараа бүхэлд нь тэргүүлэх ажээ.

Соёл, спорт, аялал жуулчлалын сайд Ц.Оюундарь

АН-ын Генсек Ц.Оюундарь Ч.Сайханбилэгийн багт орж ажиллахаар болсон байна.

Уул уурхай, эрчим хүчний сайд М.Энхсайхан

Эвслийг бүрдүүлж байгаа МАХН энэ удаад сөрөг хүчний дүрд үлдэхээр болж харин анхнаасаа Ардчиллаас гаралтай МҮАН-ын дарга М.Энхсайхан Уул уурхай, эрчим хүчний салбарыг тэргүүлнэ гэсэн мессеж их тарах боллоо. Гэвч зарим эх сурвалжууд Уул уурхай, эрчим хүч гэсэн аварга том хоёр салбарыг салгана. М.Энхсайханд энэ хоёр том салбараа бүхлээр нь өгөхгүй гэж мэдээллэх боллоо. Аль ч салбарыг нь тэргүүлсэн М.Энхсайхан шиг рефоромист хүн энэ Засагт хайран зайран нь билээ.

Эрүүл мэндийн сайд Л.Цогзолмаа

МАХН Засагт орохгүй гэж мэдэгдсэнээр МАН-д 7-дахь яам хуваарилагдах бололтой. МАН-ын НАМЭХ-ийг тэргүүлж байгаа Л.Цогзолмаа энэ удаад эрүүл мэндийг салбарыг тэргүүлэхээр болсон гэж эх сурвалж мэдээллэж байна.

Эдийн засгийн сайд Д.Эрдэнэбат

Өнгөрсөн хоёр жилийн турш эрх баригчдад ирсэн галыг цээжээрээ хамгаалж, ширүүн тэмцэлдэж Засгийн газраа бүрэн бүтэн, намын нөхдөө эв түнжинтэй байлгах гэж сайн муугаараа бишгүй хэлүүлж, зэмлүүлж ирсэн АН-ын бүлгийн дарга Д.Эрдэнэбат энэ удаад эдийн засгийн яамыг тэргүүлэх гэнэ. Гэхдээ энэ Засгийн яам нь Н.Батбаяр сайдын үеийнх шиг захиран зарцуулагч биш харин бодлогын яамны статустайгаар томоохон төслүүдийг урагшуулах, хөгжил шинэтгэлийн бодлого боловсруулах салбар байх гэнэ. Нэршлийн хувьд ч хүний хөгжил эдийн засгийн яам, үйлдвэржилтийн яам гэх мэтээр олон хувилбар яригдаж байгаа гэнэ.

Байгаль орчны сайд С.Оюун

УИХ-д хоёр суудалтай ИЗН тогтвортой байдлаа хадгалаад хохиролгүй, хожилгүй цааш үргэлжлүүлэхээр болжээ.

Хөдөлмөрийн яам С.Эрдэнэ

Хуучин танхимаасаа улирагч цөөн сайд нарын нэг нь С.Эрдэнэ. Тэрээр одоо Ардчилсан хүчний холбооны дарга болж хүч бяр нь улам нэмэгдсэн нэгэн. Энэ удаад хөдөлмөрийн яамыг тэргүүлэх нь тодорхой болж байгаа ажээ.

Үйлдвэр хөдөө аж ахуйн сайд Х.Баттулга

Хэдийгээр давхар дээлтэй сайд хийхгүй гэж мэдэгдэж байгаа ч Х.Баттулга Үйлдвэр хөдөө аж ахуйн яамаа тэргүүлэх сураг дуулдаж байна. Гэвч Х.Баттулга Ч.Сайханбилэгийг Ерөнхий сайд болоход эсрэг кноп дарж байсан хүн. Тийм болохоор өөрөө энэ салбарыг тэргүүлэхгүй ч байж болох юм гэсэн гаргалгааг ч зарим эх сурвалж мэдээллэж байна. Гэхдээ энэ яамыг МоАХ-ны мэдэлд орхисон бөгөөд өөрөө биш бол өөр хэн гэж аавын хүү очихыг Х.Баттулга л шийдэх гэнэ.

Эх сурвалж: 24tsag.mn