Дэлхийн хамгийн өндөр үнэтэй 10 дарвуулт завь, тэдний эзэд

2014-10-21

Үнэтэй дарвуулт завь эзэмшдэг тэрбумтнуудын дунд ч гэсэн хэнийх нь гоё, том вэ гэсэн уралдаан маягийн юм өрнөдөг аж. Энэ долоо хоногийн лхагва гаригт Монакод болсон дарвуулт завины шоуд энэ дэлхийн хамгийн үнэтэй 10 дарвуулт завь оролцжээ. Бид энэ удаа тэдгээрийн ойролцоо үнэ ханшийн талаархи мэдээллийг тавихаар шийдэв. Эдгээр завинууд усан дээрхи бичил хоттой адилхан бөгөөд дэлхийн хамгийн баян хүмүүсийн эзэмшилд байдаг юм.

1. Оросын олигарх Роман Абрамович тухайн үедээ дэлхийн хамгийн том дарвуулт завинд тооцогдож байсан Eclipse гэдэг 163 метр урт завийг 2010 онд нэг тэрбум доллараар худалдан авчээ. Энэ дарвуулт завин дээр нисдэг тэрэг буух хоёр ч талбай, кинотеатр, үсчний салон, зоогийн газар байдаг. Түүнээс гадна энэ завь түүн дээр морилсон алдартай зочдын гэрэл зургийг авахыг оролдох папарацци нараас хамгаалах лазер хамгаалалтын системээр тоноглогджээ.

2. Azzam дарвуулт завины урт бараг 180 метр бөгөөд түүний эзэн бол Арабын Нэгдсэн Эмират Улсын Ерөнхийлөгч шэйх Халифа Бин Зайяд Аль Нахян юм. Германы хөлөг онгоц үйлдвэрлэдэг Luerssen Yachts компани энэ завийг дөрвөн жилийн хугацаанд бүтээжээ. Сураг сонсохнээ, энэ завин дээр люкс ангиллын 50 орчим өрөө бий. 627 сая долларын үнэтэй энэ завь эд хөрөнгө нь 18 тэрбум доллараар үнэлэгддэг шэйх Халифагийн нийт хөрөнгөний ердөө 3.5 хувьтай тэнцдэг билээ.

3. 147 метр урт Topaz дарвуулт завийг Luerssen Yachts компани 2012 онд бүтээжээ. Түүний үнэ ойролцоогоор 527 сая доллар бөгөөд завин дээр жакузи, нисдэг тэрэг буух талбай, гарааж, фитнес төв, кинотеатр бий. Topaz-ын эзэн бол Арабын Нэгдсэн Эмират Улсын Ерөнхий сайдын орлогч Мансур Бин Зайяд Аль Нахян юм. Түүний хөрөнгийн хэмжээ 8.7 тэрбум орчим доллар гэнэ.

4. А нэртэй энэ дэгжин дарвуулт завийг Филипп Старк гэдэг загвар зохион бүтээгч урлажээ. Энэ завь Оросын олигарх Андрей Мельниченкогийн эзэмшилд байдаг. Завины онцлог зүйлүүдийн талаар ярих юм бол ус дамжуулах хоолой нь 40 мянган доллар, шатны бариул нь 60 мянган долларын үнэтэй. Товчлуур дээр дарвал ор нь эргэдэг аж. Ингэснээр нар мандах юм уу нар жаргах үйл явцыг тухтай үзэх боломжтой юм. А дарвуулт завины үнэ 390 сая доллар билээ.

5. Serene дарвуулт завь нь 134 метр урт бөгөөд түүний эзэн Оросын магнат Юрий Шеффлер гэнэ. Завины дээвэр бүхий талбайн нийт хэмжээ бараг 4500 хавтгай дөрвөлжин метр бөгөөд энэ завь долоон давхар билээ. Түүн дээр ил болон битүү усан сангууд, ил кино үзвэрийн танхим байдаг аж. Шеффлер 2011 онд уг завийг 330 сая доллараар худалдан авчээ.

6. Radiant нэртэй 320 сая долларын үнэ бүхий энэ завийг анхлан Оросын олигарх Борис Березовский захиалж хийлгэсэн ч хожим нь Арабын Нэгдсэн Эмират Улсын тэрбумтан Абдулла Аль Футтаймын эзэмшилд очсон юм. Энэ завь дуу авиа гаргагч буугаар тоноглогдсон бөгөөд энэ буу завинд дөхсөн балмад этгээдүүдийн чихний хэнгэргийг зад цохих чадвартай гэнэ. Түүнчлэн ойртон ирж буй моторт завийг 90 метрийн цаанаас усаар шүршиж живүүлэх чадвартай ус шүршигч төхөөрөмжтэй байна. Энэ завин дээр шаардлагатай тохиолдолд орхин зугтах боломжтой асар хурдан моторт завь байдаг аж. Radiant завин дээр жакузи, биеийн тамирын заал, гарааж бий. Завь 20 орчим зочдыг хүлээж авах боломжтой.

7. 300 сая долларын үнэтэй, 162 метр урттай Dubai бол дэлхийн хамгийн том дарвуулт завины нэг билээ. Түүнийг анхлан Брунейн ханхүү Жефри хөлөглөсөн бол дараа нь Дубай хотын захирагч шэйх Мухаммед Рашид Аль-Мактум өөрийн болгожээ. Завин дээр 115 зочдыг хүлээн авах боломжтой. Долоон давхар энэ завин дээр усан сан, нисдэг тэрэг буух талбай, жижигхэн шумбагч онгоц агуулах гарааж бий.

8. Al Said дарвуулт завийг Оманы султан Кубас би Саидын захиалгаар бүтээжээ. 300 сая долларын үнэтэй, 155 метр урт энэ дарвуулт завь 70 зочин, багийн гишүүн 154 хүнийг багтаах чадвартай. Түүн дээр нисдэг тэрэг буух хоёр ч талбай, цахилгаан шат, концертын танхим байдаг. Тэр танхим дотор 50 хүний бүрэлдэхүүнтэй найрал хөгжим тоглох боломжтой.

9. Анхлан энэ дарвуулт завийг Саудын Арабын нэгэн бизнесмэний захиалгаар бүтээжээ. 2004 онд Pelorus-ыг Оросын тэрбумтан Роман Абрамович өөрийн болгосон аж. Гэр бүлээ цуцлуулснаар түүний салсан эхнэр энэ завины эзэн болоод Америкийн магнат Дэвид Геффенд 300 сая доллараар худалдсан гэдэг. 115 метр урт энэ дарвуулт завин дээр нисдэг тэрэг буух хоёр талбай, усны мотоцикл зэрэг хөдөлгүүрт төхөөрөмжөөр хахсан гарааж бий.

10. Al Mirqab дарвуулт завины эзэн бол Катар Улсын Ерөнхий сайд асан Хамад бин Жассим бин Жабер бин Мухаммад аль Тани юм. 250 сая долларын үнэтэй, 133 метр урт энэ дарвуулт завийг 2008 онд бүтээжээ. Түүн дотор өрөө болгондоо унтлагын өрөө, угаалгын өрөө бүхий 12 өрөө бий. Өрөө болгонд хоёр хүн орох боломжтой. Түүнээс гадна завин дээр кинотеатр, усан сан, нисдэг тэрэг буух хоёр ч талбай, багийн гишүүн 55 хүнийг багтаах өрөөнүүд байдаг гэнэ.