Монголын бодибилдингчид Азийн аваргын тэмцээнээс есөн медальтай ирлээ

2014-09-04

Багийн ахлагч, дасгалжуулагч, Монголын бодибилдинг фитнесийн холбооны ерөнхий нарийн

бичгийн дарга, олон улсын шүүгч С.Одбаатартай ярилцлаа.

-Юуны өмнө танай баг тамирчдад баяр хүргэе. Азийн аваргын тэмцээнээс медаль бөөндөж, өмнө байгаагүй амжилт үзүүлсэн гэж сонслоо. Тамирчдын амжилтын талаар дэлгэрэнгүй мэдээлэл өгнө үү?

-Монголын бодибилдинг фитнесийн баг тамирчид Макаод болсон 48 дахь удаагийн Ази тивийн аварга шалгаруулах тэмцээнд амжилттай оролцоод эх орондоо ирлээ. Тэмцээн наймдугаар сарын 26-наас есдүгээр сарын 1-ний хооронд болсон. Манай 15 тамирчин тэмцээнд оролцсоноос есөн медальтай ирлээ. Нэг алт, хоёр мөнгө, зургаан хүрэл медаль хүртэж, эмэгтэй багийн дүнгээр хүрэл цом авч, нийт дүнгээр тавдугаар байрт орсон. Алтан медалийг модель ангилалд оролцсон С.Насанбуян хүртэж, Азийн аварга боллоо. Мөн модель ангилалд оролцсон Д.Саруул, эрэгтэй фитнес ангилалд оролцсон Н.Хүсэлтүвшин нар мөнгөн медаль тус тус хүртлээ. Эмэгтэй модель ангилалд Б.Энхцацрал хүрэл, эрэгтэйчүүдийн атлетик физик ангилалд Г.Жамц хүрэл, эрэгтэй бодибилдингийн төрлийн 55 кг-ийн жинд Мянганбилэг хүрэл, 65 кг-д Д.Саруулбат хүрэл, 75-80 кг-д Э.Ганзориг хүрэл, 85 кг-д Ж.Нурлан хүрэл медаль хүртсэн амжилттай ирлээ.

-Та тэмцээнд тамирчдаа дасгалжуулж, бас шүүгчээр оролцсон юм байна. Энэ удаагийн тэмцээний онцлог юу байв?

-Ази тивд 48 дахь удаа зохиогдоход хамгийн олон орон оролцсоноороо онцлог юм. Нийт 29 орны хамгийн олон буюу 300 гаруй тамирчин оролцсоноороо тэмцээн маш их онцлогтой, бас чанартай болсон. Макао тэмцээнийг маш сайн зохион байгуулдаг. Сүүлийн 20 жилд олон улсын тэмцээн хүлээж аваагүй байж байгаад энэ удаа тэмцээн хүлээж авч зохион байгууллаа.

-Энэ спорт хамгийн хөгжсөн улс орон хаанах вэ?

-Азийн төвшинд хамгийн сайн хөгжсөн нь Иран улс юм. Ираны бараг хөл бөмбөгийнх нь дараа ордог спортын төрөл юм байна лээ. Жижиг жингүүдэд Вьетнам, Тайландад маш өндөр хөгжсөн.

-Монгол Улс тэдний хаана явна, хөгжлөөрөө бас тамирчдынхаа ур чадвараар?

-Монголын бодибилдинг фитнесийн холбоо 1989 оноос эхлэн үйл ажиллагаа явуулж эхэлсэн. Түүнээс хойш 25 жил болж байна. Энэ хугацаанд тамирчдын амжилт ахисан төвшинд явж ирсэн.

-Амжилтын буухиаг сонирхуулна уу?

-Энэ жил хамгийн үнэмлэхүй амжилт үзүүлсэн. Өмнө нь эмэгтэй бодибилдингийн ангилалд манай тамирчин Н.Сарангуяа Азийн аварга болж байсан. Сүүлийн жилүүдэд манай тамирчдын амжилтын буухиа тасарчихсан байж байгаад мистер Д. Баянхүү хүрэл медаль хүртэж байсан бол Ж.Нурлан өнгөрсөн жил хүрэл медаль хүртэж байсан. Эмэгтэй шилдэг тамирчдын нэг Б.Оюунгэрэл Азийн аварга, Дэлхийн аваргын хүрэл медаль хүртсэн гээд жилээс жилд манай тамирчдын амжилт ахиж байгаа. Сая Макаод болсон тэмцээнд бахдам сайхан амжилт үзүүллээ. Эмэгтэй тамирчид багаараа хүрэл цомын эзэн болно гэдэг, мөн 29 орноос Монголын баг тамирчид эхний тавд багтсан нь энэ спортын түүхэнд тэмдэглэгдэх амжилт юм. Энэ талаар та бүхэн манай тамирчдын сэтгэгдлийг сонсох нь зүйтэй байх.

Б.Энхцацрал/хүрэл медальт/:

Бодибилдинг фитнесээр нэг жил хичээллээд амжилтад хүрлээ

-Баяр хүргэе. Манай уншигчидтай сэтгэгдлээ хуваалцана уу?

- Азийн аварга шалгаруулах олон улсын тэмцээнд анх удаа оролцлоо. Эмэгтэйчүүдийн модель ангилал дотроо хэд хэдэн төрөлтэй. Түүний +165 см-ийн өндөртэй модель ангилалд хүрэл медаль хүртлээ. Олон улсын тавцанд эх орныхоо нэрийг гаргаж, төрийн далбаагаа мандуулсандаа баяртай байна. Амжилтаар буухиалсан мундаг хамт олонтой нэг баг болж том тэмцээнд оролцсондоо их баярлаж байгаа.

-Энэ спортоор хичээллээд удаж байна уу?

-Миний хувьд харьцангуй богино хугацаанд хичээллээд амжилтад хүрлээ. Г.Жамц багшийн удирдлагад нэг жил хичээллэж байна. Багштайгаа хамт тэмцээнд Азийн аваргын тэмцээнд оролцсон. Манай багш өөрийнхөө ангилалд бас хүрэл медаль хүрсэн. Энэ дашрамд хэлэхэд, намайг ивээн тэтгэсэн “MCS Пропертиз” компанийн хамт олонд баярласнаа илэрхийлье.

Д.Саруул /мөнгөн медальт/:

Энэ спортыг сонгосон бол тууштай хичээллэх хэрэгтэй

-Азийн аваргын тэмцээнээс мөнгөн медаль хүртэх хүртэл ямар хугацаанд энэ спортоор хичээллэв?

-Модель ангиллын 165 хүртэлх өндөртэй тамирчдын төрөлд мөнгөн медаль хүртлээ. Бодифитнесийн спортоор тууштай хичээллэсэн нь гэвэл сүүлийн долоон сарын хугацаанд хичээлээ. Өмнө нь жилийн хугацаанд аэробек, иогийн хичээл заадаг байсан юм.

-Бодибилдинг фитнесээр хичээллэхэд юу анхаарах вэ?

-Тэвчээр чухал. Нэгэнт хичээллэж эхэлсэн бол тууштай явах хэрэгтэй.

-Гэхдээ хэрэглээ өндөр спорт гэж дуулсан юм байна?

-Тэр үнэн. Уураг, витамин хэрэглэнэ. Өдөр бүр бэлтгэл хийнэ, дараа нь уургаа ууна. Хоолны нарийн дэглэм баримталж, унтах, амрах цаг гээд бүх юмаа зохицуулах хэрэгтэй.

Ч.Зотол /ЗУУНЫ МЭДЭЭ/