Б.Батболд: Нэг биш автомашин авсан. Зам шалгадаг юм тэдгээрээр

2014-08-09

“Гудамж төсөл”-ийн хэрэгжилтийн талаар өчигдөр мэдээлэл хийлээ. Уг төсөл нийслэл хотод хоёр дахь жилдээ хэрэгжиж байна.

Энэ хугацаанд төслийг хэрхэн хэрэгжүүлсэн болон цаашид үргэлжлүүлэх эсэх, АТГ-аас шалгаж буй асуудлын талаар тус төслийн захирал Б.Батболдтой ярилцлаа.

-“Гудамж” төслийг “Чингис” бондоор санхүүжүүлэх ёстой гэж Засгийн газраас тогтоол гаргасан. Гэтэл “Самурай” бондоос 55 сая ам.долларыг “Гудамж” төсөлд зарцуулсан гэх юм. Тухайн төслийг албан ёсоор аль бондоос санхүүжүүлдэг юм бэ?

- “Гудамж” төсөл нь зөвхөн “Чингис” бондын эх үүсвэрээс санхүүүждэг. Зохих дүрэм журмын дагуу хэрэгжүүлсэн бүтээн байгуулалтын ажлуудыг Хөгжлийн банк өөрийн давхар шалгуураар хяналт тавьсны үндсэн дээр санхүүжүүлдэг. Засгийн газраас “Гудамж” төслийн санхүүжилтийг Хөгжлийн банкнаас гаргана гэж тогтоол гаргасан. Өөрөөр хэлбэл, Их хурлаас “Чингис” бондыг баталсан. Харин Засгийн газраас 1.5 тэрбум долларын үнэтэй бондыг зарцуулах эрхийг Эдийн засгийн хөгжлийн яаманд өгсөн. Харин тус яам тухайн мөнгийг төсөл хөтөлбөр бүрт зарцуулах ёстой. Товчхондоо нэг иймэрхүү бүтэцтэй. Үүний нэг нь манай “Гудамж” төсөл юм. Гэтэл олон нийтэд “Гудамж” төсөлд “Самурай” бондоос 50 сая ам.доллар зарцуулсан гэсэн ташаа мэдээлэл тарсан. “Самурай” бонд “Гудамж” төсөлд ямар ч хамааралгүй. Өнгөрсөн хугацаанд төслийн үйл ажиллагаанд ямар эх үүсвэрээс хэдий хэмжээний мөнгө зарцуулсан талаарх бүх тайлан мэдээлэл ил тод бий.

-“Гудамж” төсөлд нийтдээ хэдэн сая ам.доллар зарцуулах ёстой вэ. Эрх мэдлийнхээ хүрээнд тухайн мөнгийг захиран зарцуулах эрх танд байдаг уу?

- Засгийн газраас 200 сая ам.долларыг “Гудамж” төсөлд зарцуулахыг зөвшөөрсөн байдаг. Гэхдээ энэ мөнгө төслийн дансанд ордоггүй. Энэ мөнгө хөгжлийн банкны дансанд байдаг. Тиймээс бид ийм ийм төслийг хэрэгжүүлэх гэж байна санхүүжүүлж өгнө үү гэж тайлан тавьж хамтарч ажилладаг. Тиймээс надад өөрийн дураар мөнгө захиран зарцуулах эрх байхгүй. Би “Гудамж” төслийн захиралын хувьд ажилчдын цалин, тоног төхөөрөмжид л мөнгө зарцуулдаг.

- Засгийн газраас 200 сая ам.долларыг “Гудамж” төсөлд зарцуулахыг зөвшөөрсөн байдаг юм байна. Тэгвэл одоогоор үүнээс хэдийг нь зарцуулж байна вэ?

-Өнгөрсөн онд “Гудамж” төслийн хөрөнгөөс 60 тэрбумыг зарцуулсан. Өөрөөр хэлбэл, 200 сая доллараас 37 сая долларыг зарцуулсан гэсэн үг. Үүнд нийслэлийн 18 гудамж, Хүй долоон худгийн бүтээн байгуулалт орно. Мөн хурдны замын техник эдийн засгийн үзүүлэлт, нарийвчилсан зураг хүртэл орж байгаа юм. Харин энэ онд нийслэд 60 тэрбум, хөдөө орон нутагт 50 тэрбум төгрөг зарцуулахаар төлөвлөсөн.

-АТГ-аас таныг дуудаж мэдүүлэг авсан уу?

-Намайг АТГ-аас албан ёсоор дуудаж мэдүүлэг аваагүй. Надаас асууна л гэсэн. Одоо манай үйл ажиллагааг АТГ-аас шалгаж байгаа нь үнэн. Бид үүнд дургүйцэх зүйл алга. Шалгаж л байг. Харин эрүүгийн хэрэг үүсгэлээ, сэжигтнээр татлаа гэх зэргээр буруу мэдээлэл гарч байгаад гомдолтой байна.

-“Чингис” бондын хөрөнгийг үр ашиггүй зарцуулсан гэдэг үндэслэлээр шалгаж байгаа гэсэн мэдээллийг АТГ өгсөн. Шалгах болсон үндэслэл нь юу вэ?

-Би ийм нарийн зүйлийг мэдэхгүй. Бид зөвхөн Засгийн газраас гаргасан тогтоол шийдвэрийг л хэрэгжүүлдэг. Манайх бол зүгээр л төслийн нэгж. Тиймээс “Чингис” бондын хөрөнгийг үр ашиггүй зарцуулах эрх мэдэл бидэнд байхгүй.

-470 гаруй сая төгрөгөөр худалдаж авсан автомашины тухайд та ямар тайлбар хийх вэ. “Гудамж” төслийн хөрөнгийг үр ашиггүй зарцуулж байна гэх зэргээр нэлээд шүүжлэл дагуулж байх шиг байна. Тухайн автомашиныг юунд хэрэглэдэг вэ?

-Засгийн газрын 2013 оны 46 дугаар тогтоолоор батлагдсан төсвийн хүрээнд хуулийн дагуу “Гудамж” төслийн өдөр тутмын үйл ажиллагаанд зайлшгүй шаардлагатай автомашин, техник тоног төхөөрөмж, албан өрөөний хэрэгцээнд зориулсан тавилга зэргийг худалдаж авсан. Манайх “Гудамж” төслийн хүрээнд гурван дэд төсөлтэй. Тус бүрдээ захиралтай. Үнэтэй автомашин нэгийг ч аваагүй дөрвөн ширхэгийн авсан. Эдгээр машиныг хурдны замын ажил шалгахад ашигладаг. Бидний хийж буй ажилд хэрэгтэй автомашин байгаа. Энэ том төсөл хөтөлбөрт дөрвөн машин байх ёстой гэж бодож байна.

-“Гудамж” төсөл хоёр дахь жилдээ хэрэгжиж байна. Энэ хугацаанд ямар бүтээн байгуулалтыг хийв?

-“Гудамж” төслийн хүрээнд “Хотын төв”, “Хурдны зам”, “Гэр хороолол” гэсэн гурван дэд төсөл хэрэгжиж байна. Төслийн хүрээнд нийт 33 уулзварыг шинэчлэхээс өнгөрсөн жил 18-ыг хийлээ. Тухайлбал, Чингисийн өргөн чөлөөний 2.2 км замыг өргөтгөн шинэчлэх, “Хүй долоон худаг”-ийн 8.5 км зам барьж, нийт 10.7 км авто замын ажил, 5496 автомашин, 102 автобусны зогсоол байгуулж, 12.6 га үйлчилгээний талбайг тохижууллаа.

-Тэгвэл энэ жилийн хувьд?

-Энэ жилийн хувьд гурван уулзвар, 21 км авто зам, 479 у/м гүүр, Гандангийн гэр хорооллын дахин төлөвлөлт, дэд бүтэц, Туул голын хурдны 33 км зам, Сэлбэ голын 26 км хурдны замын ажлыг хийж байна. Замын уулзварыг шинэчлэх ажлын тухайд, эхний ээлжинд тодорхой болсон гурван уулзвар нь 100 айл, Ахуйн үйлчилгээний төв, “Цэцэг” төвийн уулзварууд юм. Мөн “Гудамж” төслийг орон нутагт хэрэгжүүлж байна.

-“Гудамж” төслийн хүрээнд нийт 33 уулзвар шинэчлэхээс 15 нь үлджээ. Үлдэж буй уулзварт нийт хичнээн төгрөг зарцуулахаар төсөвлөсөн бэ?

-Нэг уулзварт 1-1.5 тэрбум төгрөг зарцуулж байна. Үлдсэн 15 уулзварт 20-25 тэрбум төгрөг зарцуулах тооцоо гарсан. Бид ганцхан зам засаад байгаа юм биш. Дулааны шугам буюу дэд бүтцийн шинэчлэлийг давхар хийж байгаа. Мөн газар чөлөөлөхөд хөрөнгө, мөнгө зарцуулж байна.

-Зам засвар, уулзварын шинэчлэлээс шалтгаалан түгжрэл нэмэгдэж байх шиг байна. Тухайлбал, ахуйн үйлчилгээний уулзварын ажил эхлээд багагүй хугацаа өнгөрлөө. Хэзээ ашиглалтад орох вэ?

-Энэ жил хур бороо ихтэй байна. Тиймээс цаг уурын нөхцөл байдлаас шалтгаалж зам засварын ажил тодорхой хугацаанд удааширч байгаа. Ахуйн үйлчилгээний уулзвар ойролцоогоор дөрвөн тэрбум гаруй төгрөгийн төсөвтэй. Одоогоор тэрбумыг нь зарцуулсан. Барагцаагаар 14 хоногийн дараа ашиглалтад орох байх.