“...Өчигдөр архи зардаггүй өдөр хаанаасаа хар ус олж, гудардаг юм бэ. Чиний баяр биш хоёр хүүхдийн чинь, миний баяр шүү дээ. Биднийг баярлуулаагүй байж, айлд архидаад албатай юм шиг ирж ав гэж загнах юм. Би ч яах вэ, хоёр хүү чинь аавдаа гомдоно доо. Ганц баярынх нь өдөр хамт байж, баярлуулчихдаггүй...” энэ бол ногоон гэрэл асахыг хүлээж, явган хүний гарцан дээр зогсох эхнэр, нөхөр хоёрын яриа.

Ногоон гэрэл ч аслаа. Хөгжлийн бэрхшээлтэй, тэргэнцэртэй эр “Гэрэл асчихлаа яваач” гэж нүдэндээ нулимстай, бүлтэгнэн зогсох эхнэрийгээ загнах аж. Үүнийг сонссон миний гол зураад л явчихлаа. Арай ч дээ, монгол эр хүн та ийм арчаагүй, харалган, хувиа хичээсэн нэгэн болж хувирсан гэж үү гэх бодол толгойд минь эргэлдэнэ.

Ингээд зам хөндлөн гарч, ажил дээрээ ирлээ. Редакци маань хүүхдийн баярын уур амьсгалтай. Дор бүрнээ зургадугаар сарын 1-нд хүүхдүүдээ хэрхэн баярлуулсан тухайгаа ярилцах аж.

Ингээд компьютерээ асааж, цахим ертөнцөөр аялвал хүүхдийн баяраар согтуурч, хашаандаа тоглож байсан гурван настай хүүг дайрсан тухай мэдээлэл олж уншлаа.

Баярынх нь өдөр согтуурсан томчууд ингэж эрхийг нь ноцтой зөрчжээ. Тодруулбал, өнгөрөгч амралтын өдрүүдэд цагдаагийн байгууллагад гэмт хэргийн шинжтэй 100 гаруй үйлдэл бүртгэгдсэнийг холбогдох нэгжүүд шалгаж байгаа гэв.

Зургадугаар сарын 1-нд архигүй өдөр таарсан ч 75 согтуу жолооч журамлагдсан байна. Хүүхдийн баярын өдрөөр 16 хүүхэд зам тээврийн осолд өртсөний 11 нь бага насных байжээ.

Үүнээс хулгайлах төрлийн гэмт хэрэг 34, танхайрах 38, тээврийн хэрэгслийн хөдөлгөөний аюулгүй байдлын журам зөрчих гэмт хэрэг 51 бүртгэгджээ. Танхайрах төрлийн гэмт хэргийн 90 гаруй хувийг архи согтууруулах төрлийн зүйл хэрэглэсэн үедээ үйлдсэн байна.

Мөн хүүхдийн баярын өдөр тээврийн хэрэгслийн осол, авто аваар нэлээд бүртгэгджээ. Тодруулбал, 25 осол бүртгэгдсэнээс архи согтууруулах ундаа хэрэглэсэн үедээ тээврийн хэрэгсэл жолоодох, мөн согтууруулах ундаа хэрэглэсэн үедээ зам тээврийн осолд өртсөн тохиолдол их байсан тухай албаны эх сурвалж мэдээлэв.

Тиймээс ямарваа нэгэн баяр ёслолын үеэр архи согтууруулах ундаа хэрэглэхгүй байхыг цагдаагийн байгууллагаас анхааруулсан юм. Уг нь сар бүрийн 1-нд дэлгүүр, үйлчилгээний газрууд согтууруулах ундаа худалдаалах, үйлчлэхийг хориглосон байдаг. Хэдийгээр зургадугаар сарын 1-нд архигүй өдөр таарсан ч 75 согтуу жолооч журамлагдсан байна. Хүүхдийн баярын өдрөөр 16 хүүхэд зам тээврийн осолд өртсөний 11 нь бага насных байжээ. Тэр ч бүү хэл хүүхдийн баярын өдөр согтуу эмэгтэй жолооч айлын хашаа мөргөж, хашаандаа тоглож байсан гурван настай хүүхдийг гэмтээсэн хэрэг ч гарсан байна. Мөн дугуй унаж явсан хүүхдийг мөргөж гэмтээсэн хэрэг гарсан аж.

Энэ тухай албаны эх сурвалжаас тодруулахад “Хүүхдийн баяраар буюу энэ сарын 1-нд нийт зам тээврийн осол, зөрчлийн 286 дуудлага ирсэн. Үүнээс зам тээврийн 25 осол гарч, 36 хүн бэртсэн. Зургадугаар сарын 1 хэдийгээр архигүй өдөр байсан ч 75 согтуу жолооч журамлагдсан. Согтуугаар тээврийн хэрэгсэл жолоодсон долоон жолооч осол гаргасан байгаа. Ослын улмаас хоёр хүн нас барсан. Нэг нь Баянзүрх дүүргийн Чулуун овооны орчимд “Hyundai Verna” маркийн автомашины жолооч хурд хэтрүүлэн явснаас осол гаргаж, 19 настай эмэгтэй нас барж, таван хүн гэмтсэн. Мөн Хан-Уул дүүрэгт 45 настай эрэгтэйг зам гарч явахад нь дайрч, амь насыг нь хохироогоод хэргийн газраас зугтсан хэрэг гарсан байгаа. Хүүхдийн баярын өдрөөр 16 хүүхэд зам тээврийн осолд өртсөний 11 нь эцэг эхийнхээ хараа, хяналтад байх ёстой сургуулийн өмнөх насны хүүхдүүд байсан. Согтуу эмэгтэй жолооч айлын хашаа мөргөж, хашаандаа тоглож байсан гурван настай хүүхдийг гэмтээсэн, мөн дугуй унаж явсан хүүхдийг мөргөж гэмтээсэн хэргүүд гарсан.

Өнгөрсөн жилийн хүүхдийн баяраар 68 согтуу жолооч журамлагдаж, 21 осол гарч, 31 хүн бэртсэн байгаа. Мөн 10 хүүхэд зам тээврийн осолд өртсөн. Өнгөрсөн жилийн мөн үетэй харьцуулахад согтуугаар тээврийн хэрэгсэл жолоодсон, осол гаргасан, хүүхэд осолд өртсөн гэх зэрэг бүхий л үзүүлэлтүүд нэмэгдсэн байна” гэв.

Дэлгүүр, баар цэнгээний газрын эздийг мод тарьж, суварга бүтээ гэсэнгүй. Зөвхөн энэ өдөр архи зарахгүй байхад л болно. Таны зарсан шил архи ямар хар мөр дагуулахыг санаж явахад илүүдэхгүй биз. Уг нь зургадугаар сарын 1 хүүхдийн баяр юмсан. Архигүй нэг өдрийг өнгөрүүлэхэд томчуудад тийм хэцүү байна гэж үү.

Хүүхдийн баяраар томчууд бид ингэж л хүүхдүүдээ баярлуулжээ. Уг нь жил бүрийн зургадугаар сарын 1-нд Олон улсын хүүхдийн эрхийг хамгаалах өдөр тохиодог. Гэтэл энэ өдөр томчууд нь архидаж, хүүхдүүдээ дайрч, гэмтээж эрхийг нь хамгаалсан гэхээр өрөвдмөөр санагдсаныг нуух юун.

Хүүхдийн баяраар томчууд нь архиддаг улс орон магадгүй Монголоос өөр байхгүй биз. Үнэхээр дээр дурьдсанаар томчууд хүүхдийн баярын өдөр хаанаас архи, согтууруулах ундаа олж уугаад, гэр бүлээ, үр хүүхдээ зовоож, тэднийхээ нулимсыг барж, сэтгэл санаа, эрүүл мэндээр нь хохироогоод байна вэ. Ганц өдөр архи уухгүй өнгөрүүлж болохгүй гэж үү.

Хүүхдийн төрсөн өдрөөр, эрхийг нь хамгаалах өдрөөр архи уухгүй, эрүүл саруул, эцэг, эх шиг нь байж болдоггүй юм уу. Томчууд бидэнд архи уух, согтуурах шалтаг, шалтгаан мундахгүй. Жилийн 365 хоногийн хэдэн өдөр нь тэмдэглэлт баяр нэрийдлээр архиддаг билээ. Гэтэл жилдээ ганцхан удаа тохиох баярынх нь өдрөөр, эрхийг нь хамгаалсан шиг хамгаалаад, чин сэтгэлээсээ баярлуулчихаад та бидэнд тийм хэцүү байна гэж үү.

Дэлгүүр, үйлчилгээний газрын эзэд ч гэсэн өөрсдөө үр хүүхэдтэй, бяцхан дүүтэй байлтай. Ганц өдөр хууль, журмаа баримтлаад архи зарахгүй байлаа гэхэд ядуурч, хоосорчихгүй нь лавтай. Тэд ч гэсэн иргэнийхээ үүргийг биелүүлж, ухамсартай хандаж, зургадугаар сарын 1-нд архи, согтууруулах ундаагаар үйлчлэхгүй, зарж борлуулахгүй байхад л нийгмийнхээ төлөө хийж байгаа нэгээхэн сайн үйлс юм шүү дээ.

Түүнээс дэлгүүр, баар цэнгээний газрын эздийг мод тарьж, суварга бүтээ гэсэнгүй. Зөвхөн энэ өдөр архи зарахгүй байхад л болно. Таны зарсан шил архи ямар хар мөр дагуулахыг санаж явахад илүүдэхгүй биз. Уг нь зургадугаар сарын 1 хүүхдийн баяр юмсан. Архигүй нэг өдрийг өнгөрүүлэхэд томчуудад тийм хэцүү байна гэж үү.